ʼE Tonu Koa Ke Tou Faikole Ki Te Kau ʼAselo Ke Nātou Tokoni Mai?
ʼE LELEI koa hatatou pāui te kau ʼaselo ke nātou tokoni mai ʼi te ʼu temi faigataʼa? Ko te tokolahi ʼe nātou manatu feiā. ʼE ʼui fēnei ʼi te tohi New Catholic Encyclopedia: “ ʼE faikole he tahi ki . . . te kau ʼaselo . . . ʼuhi pe ke feala hanatou fakahoko tana ʼu faikole ki te ʼAtua.” Kae ʼe tonu koa ke tou faikole ki te kau ʼaselo ke nātou hūfaki tatou ia muʼa ʼo te ʼAtua?
ʼE tou maʼu ʼi te Folafola ʼa te ʼAtua, te ʼu higoa pe e lua ʼo te ʼu ʼaselo agatonu ʼa te ʼAtua, ko Mikaele pea mo Kapeliele. (Taniela 8:16; 12:1; Luka 1:26; Suta 9) Kapau ʼe tuʼu te ʼu higoa ʼaia ʼi te Tohi-Tapu, pea ʼe mahino mai ko te kau ʼaselo takitokotahi ʼe nātou kehekehe, pea ʼe ʼi ai tonatou ʼu higoa, kae ʼe mole ko he ʼu mālohi pe ʼe mole honatou ʼu higoa. Kae neʼe ʼi ai te ʼu ʼaselo neʼe mole nātou fia fakahā tonatou ʼu higoa. Ohage la, ko Sakopo neʼe ina fehuʼi ki te ʼaselo ʼaē neʼe haʼu ʼo ʼaʼahi ia ia, ke ina fakahā age tona higoa, kae neʼe fakafisi kiai. (Senesi 32:29; Kau Fakamāu 13:17, 18) ʼE mole lahi he ʼu higoa ʼo te kau ʼaselo ʼe tou maʼu ʼi te Tohi-Tapu. Koia ʼe mole tonu ai ke tou faka maʼuhigaʼi fau ia nātou.
ʼI te ʼu gāue ʼaē ʼe tonu ke fai e te kau ʼaselo, ʼe kau kiai te tala ʼo te ʼu logo ʼa te ʼAtua ki te tagata. Koteʼuhi ko te kupu Faka Hepeleo pea mo Faka Keleka ʼaē neʼe fakaliliu ʼaki te kupu “ ʼaselo” ko tona faka ʼuhiga totonu “ko he tahi ʼe ʼave logo.” Kae ko te kau ʼaselo ʼe mole nātou fakahoko tatatou ʼu faikole ki te ʼafioʼaga ʼo te Māʼoluga. Neʼe fakatuʼutuʼu e te ʼAtua, ke tou faikole kia te ia ʼaki te huafa ʼo tona ʼAlo, ia Sesu Kilisito, ʼaē neʼe ina ʼui fēnei: “[ʼE] foaki atu e taku Tamai kia koutou he meape e koutou kole kia te ia i toku huafa.”—Soane 15:16; 1 Timoteo 2:5.
ʼE feala kia Sehova ʼAtua ʼi te temi fuli pe ke fakalogo ki tatatou pāui kia te ia, mo kapau ʼe tou fai ʼo mulimuli ki tana fakatuʼutuʼu. ʼE fakamoʼoni mai fēnei e te Tohi-Tapu: “ ʼE ōvi ia Sehova kia nātou fuli ʼaē ʼe nātou pāui kia te ia, ia nātou fuli ʼaē ʼe nātou pāui kia te ia ʼi te agatonu.”—Pesalemo 145:18.