ʼE Maʼu Anai Te Kele e Te Kau Agamalū
“ ʼE au fakakaukauʼi pe mokā toe fakatokatoka anai pea mo toe fetogi ia te ʼu meʼa ʼaē neʼe faʼu. . . . ʼE mole hoko mai anai ʼi te pogipogi uhu kae ʼi he temi ʼe kei mamaʼo atu ia, mokā hoki tou sio ai anai ki he lagi foʼou mo he kele foʼou.”—Jean-Marie Pelt, ko te tagata Falani ʼe poto ʼi te sivisivi ʼo te agaaga ʼo te kele.
ʼI TE lahi ʼo te maʼuli fītaʼa ʼa te hahaʼi ʼuhi ko te ʼu ʼaluʼaga ʼo te ʼu meʼa ʼaē neʼe faʼu pea mo te ʼu meʼa faka sosiale ʼaē kua hoko ki te kele, tokolahi te hahaʼi kua nātou fakaʼamu la ke nātou sisio ki he kele kua fakatokatoka ohage ko he palatiso. Kae ko te fakaʼamuʼamu ʼaia neʼe mole hoki maʼu pe ʼi te 21 sēkulō. Talu mai fualoa mo te fakapapau ʼi te Tohi-Tapu ʼo ʼuhiga mo te toe fakatuʼu ʼo he Palatiso ʼi te kele. Ko te ʼu palalau ʼaenī ʼa Sesu: “ ʼE maʼu anai te kele e te kau agamalū” pea “ ʼE ke fakahoko anai tou finegalo ʼi te kele ohage pe ko selo,” ʼe kau ʼi te ʼu vaega ʼiloa ʼi te Tohi-Tapu. (Mateo 5:5; 6:10, Revised Standard Version) Kae ʼi te temi nei, ʼe mole hahaʼi ia nātou ʼe nātou tui ki he palatiso fakakelekele ʼe nofoʼi ʼe te kau agamalū. Maʼa te tokolahi ʼe nātou lau ko nātou ko te kau kilisitiano, ʼe mole kei ʼi ai he Palatiso.
ʼI te nusipepa Fakafalani ʼo te vāhaʼa fuli ʼaē ko tona kupu tāfito: La Vie, ʼe fakamahinohino ai te tupuʼaga ʼaē ʼo te mole kei tui papau ʼa te Lotu Katolika ki he palatiso ʼi te kele peʼe ʼi te lagi: “Hili kiai sēkulō e 19 ʼo te faka maʼuhigaʼi ia [te manatu ʼo ʼuhiga mo he] palatiso ʼi te ʼu akonaki ʼo te Lotu Katolika, kua fakaʼaluʼalu ʼo puli ʼi te fakamamahi faka lotu, mo te ʼu faiakonaki ʼo te ʼAhotapu, mo te ʼu akonaki faka teolosia, pea mo te ʼu ako kapite ʼi te faleako.” ʼE lau ʼo ʼuhiga mo te kupu ‘palatiso’ kua ʼaofi ʼaki te “toe ʼepu lahi” ʼo “he misitelio pea mo he femahino halaʼaki.” Ko ʼihi kua nātou fakatuʼutuʼu ke nātou līaki tanatou fai faka mafola ʼo ʼuhiga mo he palatiso, koteʼuhi ʼe “lahi fau te ʼu manatu hala ʼo ʼuhiga mo te fiafia ʼi te kele ʼe fakapipiki kiai.”
Maʼa Frédéric Lenoir ʼaē ko he tagata poto ʼe ina sivi te nātulā ʼo te tagata ʼi te faʼahi faka lotu, ʼe ina ʼui ko te ʼu manatu ʼo ʼuhiga mo he palatiso neʼe “ko he ʼu faʼahi neʼe faʼufaʼu ʼaki he ʼu manatu hala.” ʼO toe feiā aipe kiā Jean Delumeau te tagata tohi hisitolia pea mo faitohi ʼo te ʼu tuʼuga tohi ʼe hā ai he ʼu tala manatu, maʼa ia ʼe mole hoko moʼoni anai te ʼu fakapapau faka Tohi-Tapu. ʼE ina tohi fēnei: “Ka lagaʼi te fehuʼi ʼaenī, ‘Koteā ʼaē ʼe tonu ke tou puke mai te akonaki ʼo ʼuhiga mo he Palatiso?’ ʼE hoko atu pe te tui faka Kilisitiano ʼaki te ʼu manatu ʼaenī: ʼAki te fakatuʼuake ʼo te Fakamaʼuli, ʼe hoko anai ki he ʼaho ʼe tou sio mata anai ki te fiafia.”
ʼE kei ʼaoga koa te logo ʼo ʼuhiga mo he palatiso fakakelekele? Koteā te ʼu lelei ʼe tou tāʼofi ʼo ʼuhiga mo te ka haʼu ʼo te kele? Ko te fakaʼata ʼo te ka haʼu ʼe nenefu koa kiā tatou, peʼe feala anai ke tou sio kiai? ʼI te alatike ʼaē ka hoa mai ʼe tou vakaʼi anai te tali ki te ʼu fehuʼi ʼaenī.