Ko He Tagata Afelika Agavaivai Neʼe Manako Ki Te Folafola ʼa Te ʼAtua
KO TE hahaʼi ʼaē ʼe ʼōmai ki Afelika ʼe nātou punamaʼuli ʼi tanatou tokagaʼi ʼe faigafua te kamata ʼo he fai palalau ki te Tohi-Tapu mo te hahaʼi ʼo te fenua. ʼE tau fia logo te hahaʼi mokā tali ki te ʼu fehuʼi ohage “Pe koteā la te Puleʼaga ʼo te ʼAtua?,” “Peʼe ʼi ai koa la he puleʼaki tologa ki te ʼu fihifihia ohage ko te hoge, mo te mahaki, mo te tau peʼe ko te fai fakapō?” Tokolahi ʼe nātou tali fakafiafia anai ke fakahā age e he matāpule ia te ʼu tali ʼo te ʼu fehuʼi ʼaia ʼi te Tohi-Tapu. ʼE tau iku ai ki he ʼu ako faka Tohi-Tapu. Pea ʼi te lelei ʼo te tuputupu fakalaumālie ʼo te kau ako, ʼe nātou liliu ai ko te kau Kilisitiano kua papitema.
ʼI te ʼu ʼuluaki tagata Afelika ʼaē neʼe nātou tali feiā te Tohi-Tapu, ʼe ʼi ai te tagata ʼaē ʼe talanoa ki ai iā Gaue 8:26-40. Neʼe ko te tagata Etiopea neʼe fagona ki Selusalemi ke ʼalu ʼo atolasio ai ki te ʼAtua moʼoni, ʼaē ko Sehova.
Ohage ko tona fakahā ʼi te pāki ʼe tuʼu ʼi lalo, neʼe toe liliu te tagata Etiopea ki tona ʼapi ʼi tana saliote, mo lau te takaiga tohi. Neʼe fakaōvi age te tagata matāpule ʼo fehuʼi age: “Pe e ke mahino kia mea e ke lau?” Neʼe fakahā fakalelei age e te tagata Etiopea ki te matāpule ʼe tonu ke tokoni age he tahi, pea neʼe faiga age ki te tagata fai faka mafola evaselio ko Filipo ke kake ake ʼo heka ki tana saliote. Pea neʼe ina kole kiā Filipo ke fakamahino age te faka ʼuhiga ʼo te koga tohi faka Tohi-Tapu ʼaē neʼe ina lau. Neʼe fakamahino age e Filipo neʼe ko te lea faka polofeta neʼe fakahoko ʼaki te mate ʼo te Mesia, ia Sesu Kilisito. Neʼe fakamatala age foki e Filipo te tahi ʼu meʼa ʼo ʼuhiga mo “te Logolelei o Sesu,” ʼo lagi kau ai mo te fakatuʼuake ʼo Sesu.
ʼI tana logo ki te ʼu moʼoni fakaofoofo ʼaia, neʼe fia liliu te tagata Etiopea ko he tisipulo ʼa Sesu, pea mo ina fehuʼi age: “Pe kotea ae e ina taofi toku papitemaʼi?” ʼI te hili ʼo tona papitema, neʼe toe liliu te tagata Afelika agavaivai ʼaia ki tona ʼapi, pea ʼe mole maʼu atu he tahi fakamatala ʼi te Tohi-Tapu ʼo ʼuhiga mo ia.
Ia ʼaho nei, ʼe tokoni te kau Fakamoʼoni ʼa Sehova ki te toko lauʼi miliona hahaʼi ʼi te malamanei kātoa ke nātou ako ʼo ʼuhiga mo te “Logolelei” ʼaia. Ko ako Tohi-Tapu ʼe teitei ono miliona ʼe lolotoga fai nei.