Ko Te Kau Fai Faka Mafola ʼo Te Puleʼaga
Ko Te Fai Faka Mafola ʼi Te Loto Fenua ʼo Ositalalia
KO ʼIHI koga meʼa mamaʼo ʼo te toe loto fenua ʼo Ositalalia neʼe mole heʼeki toe ʼaʼahi e te kau Fakamoʼoni ʼa Sehova lolotoga te ʼu taʼu e 12. Koia neʼe fakatuʼutuʼu ai e te kau Fakamoʼoni ʼa Sehova ʼo Darwin, te kolo taulaga ʼo te Telituale ʼo Te Potu Noleto, ia he gāue fai faka mafola lahi ia ʼaho e hiva, moʼo kumi ʼo te hahaʼi ʼaē ʼe fia logo ki te logo lelei.—Mateo 10:11.
Neʼe kua teuteuʼi lelei fakatomuʼa ia māhina e 12 ia te gāue fai faka mafola ʼaia, ʼo fai te ʼu mape ʼo te toe koga meʼa ʼaē ko ʼona kilometa kale e 800 000 tupu—ʼe tuʼa tolu te lahi ʼo Niusila. Ke feala hakotou mahino ki te lahi ʼo te telituale ʼaia, koutou fakakaukauʼi age ʼe koutou fakalaka ʼi te matapā hū ki te lotoʼā manu ʼo koutou ʼolo ia kilometa e 30 pea hoki koutou aʼu ki te ʼapi! Kae ʼe ʼi ai ʼihi lotoʼā manu ʼe ko kilometa e 300 mai te hūʼaga ki te ʼapi.
Ko te toko 145 kau Fakamoʼoni neʼe nātou lotolelei ke nātou kau ki te fakatuʼutuʼu gāue ʼaia. Ko ʼihi neʼe ʼōmai mai mamaʼo, mai Tasmanie. Ko ʼihi neʼe ʼōmai ʼi te ʼu motokā kate kate mo tanatou ʼu falelā, mo te ʼu meʼa fetogi ʼa te ʼu motokā, pea mo te penisini. Ko ʼihi neʼe nātou ʼai tanatou ʼuta ki te ʼu meʼa toho ʼe fakapipiki ki te ʼu taumuli ʼo te ʼu motokā. Pea tahi ʼaē meʼa, neʼe lue te ʼu papikā e lua, ʼe taki hekaʼaga e 22, moʼo fetuku ia nātou ʼaē neʼe mole ʼi ai hanatou motokā kate kate. Ko nātou ʼaē neʼe ʼolo ʼi te ʼu kā neʼe nātou gāue tāfito ki te hahaʼi ʼo te ʼu kolo liliki ʼi te telituale kua hinoʼi age kiā nātou.
ʼI muʼa ʼo te kamata ʼo te fagona, neʼe fakatuʼutuʼu e te ʼu tēhina te ʼu akonaki mo te ʼu faʼifaʼitaki neʼe tokoni kiā nātou ʼo ʼuhiga mo te faʼahiga tala ʼo te logo lelei ʼi te telituale makehe ʼaia. Ohage la, ke lelei te fai faka mafola ki te hahaʼi Aborigènes, ʼe ʼi ai te ʼu aga ʼe tonu ke nātou mulimuli kiai, pea ke nātou mahino ki te ʼu agaʼi fenua ʼo te hahaʼi ʼaia. Neʼe fai mo te ʼu fakatokaga ʼo ʼuhiga mo te puipui ʼo te maʼuli ʼo te ʼu vao matua.
Neʼe lahi te ʼu meʼa fakafiafia neʼe hoko ʼi te gāue. Ohage la, ʼi te tahi nofoʼaga ʼa te kau Aborigènes, neʼe fakatuʼutuʼu e te ʼu tēhina ke nātou fai he akonaki faka Tohi-Tapu maʼa te kaugamālie. Ko te fafine pule ʼo te nofoʼaga neʼe ʼalu tonu ʼo fakaʼilo ki te hahaʼi ʼo te nofoʼaga. Hili ʼaia, pea neʼe ko tohi e 5, mo kaupepa lalahi e 41 neʼe tuku kiā nātou ʼaē neʼe ʼōmai ʼo fakalogo ki te akonaki. ʼI te tahi nofoʼaga, neʼe hoko te fai palalau mo te tagata Aborigène. Neʼe kua ʼi ai tana Tohi-Tapu, ko te King James Version, kae kua ʼāfea pea mo makahaehae. ʼI te fehuʼi age peʼe ina ʼiloʼi te huafa ʼo te ʼAtua, neʼe ʼio kiai pea mo toʼo mai tona tagaʼi kofu ia Te Tule Leʼo ʼāfea. Neʼe ina lau te nusipepa, ʼo ina toʼo mai iā Maleko 12:30: “E ke ofa anai ki te Aliki tou Atua mo tou loto katoa.” Neʼe ina ʼui fēnei: “ ʼE au leleiʼia te vaega ʼaenī.” ʼI te ʼosi ʼo te fai palalau loaloaga mo ia, neʼe ina tali te Tohi-Tapu foʼou pea mo te tahi ʼu tohi faka Tohi-Tapu.
’Ōvi atu ki te Golfe de Carpentarie, neʼe leleiʼia te logo ʼo te Puleʼaga e te tagata pule ʼo te lotoʼā pipi ʼe eketa 400 000. ʼI te fakahā age Te Tohi ʼo Te ʼu Hisitolia Faka Tohi-Tapu mo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata,a neʼe ina fakaʼui mai peʼe mole ʼi ai la he tohi ʼi te lea faka Kriol. Neʼe mole ko he fakaʼui tohi māhani, koteʼuhi logope ʼe kaugamālie te kau Aborigènes ʼe nātou lea faka Kriol, kae ko te tokosiʼi ʼe nātou popoto ʼi te lautohi ʼi te lea ʼaia. Kae ko te toko 50 kau gāue ʼo te lotoʼā pipi ʼaia neʼe nātou popoto ʼi te lautohi faka Kriol. Neʼe fiafia ʼaupito te tagata pule ʼi tana maʼu te ʼu tuʼuga tohi faka Tohi-Tapu ʼi te lea faka Kriol, pea neʼe ina fakatoʼo fakafiafia mai mo tona numelo telefoni ke feala he pāui age ki ai.
Lolotoga te ʼu ʼaho fai faka mafola lahi ʼaia e hiva, neʼe tufa te ʼu Tohi-Tapu e 120, mo te ʼu tohi e 770, mo te ʼu nusipepa e 705, pea mo te ʼu kaupepa lalahi e 1 965. Pea tahi ʼaē meʼa, ko ʼaʼahi e 720 neʼe fai, mo te ʼu ako faka Tohi-Tapu e 215 neʼe kamata.
ʼE moʼoni ia, neʼe fakafimālieʼi te hālofia fakalaumālie ʼo te hahaʼi ʼaē neʼe fia logo ki te logo lelei ʼe nonofo mavetevete ʼi te toe potu fenua ʼaia.—Mateo 5:6.
[Kiʼi nota]
a Neʼe tā e te kau Fakamoʼoni ʼa Sehova.
[Mape ʼo te pasina 30]
(Vakaʼi te nusipepa)
AUSTRALIE
TERRITOIRE DU NORD
Darwin
Golf de Carpentarie
Sydney
TASMANIE