Te ʼu Fehuʼi ʼa Te Kau Lautohi
ʼE tonu koa ki he Kilisitiano ke ina foaki he meʼa ʼofa ki he ʼu gāue neʼe fai e he tahi ʼe gāue maʼa te puleʼaga, peʼe faka ʼuhiga anai ia ko he totogi fakakākā?
ʼI he koga meʼa pe ʼe nonofo ai te kau Kilisitiano, ʼe nātou faigaʼi ke nātou maʼuliʼi te poto ʼaoga mokā nātou tau mo he ʼu ʼaluʼaga ʼi te fenua, ʼo nātou manatuʼi ko te aga ʼaē ʼe feala ke nātou fai pea ʼe ʼalutahi mo te lao ʼi he fenua, ʼe lagi mole tali ia ʼi he tahi fenua pea mo fakafeagai ia ki te lao. (Tāʼaga Lea 2:6-9) ʼE moʼoni, ʼe tonu ke manatuʼi tuʼumaʼu e he Kilisitiano ko ʼaē ʼe fia ‘nofo ʼi te falelā ʼa Sehova’ ke ʼaua naʼa ina fai he totogi fakakākā.—Pesalemo 15:1, 5; Tāʼaga Lea 17:23.
Koteā koa te totogi fakakākā? ʼI te fakamahino ʼa te tohi The World Book Encyclopedia, “ko te totogi fakakākā ʼe ko te foaki ʼo he koloā maʼuhiga ki he tahi ʼe maʼu tuʼulaga, ke gāue fakakākā peʼe ina fulihi te lao ke tō lelei kiā ia ʼaē neʼe ina fakatoʼo age te koloā ʼaia.” Koia ʼi he fenua pe ʼe tou māʼuʼuli ai, ʼe ʼui ʼe ko he totogi fakakākā, mo kapau ʼe kita foaki he paʼaga ki he tuʼi fakamāu peʼe ko he polisi moʼona fakalotoʼi ke ina fulihi tana faifakamāu, peʼe ki he tagata sivi ke mole ina tauteaʼi he aga ʼe kovi, peʼe ko he maumauʼi ʼo he lao. ʼE ko he totogi fakakākā mo kapau ʼe kita foaki he meʼa ʼofa ki he tahi ke agalelei kehe mai kiā kita, ohage la ke ʼuluaki tohi tota higoa ʼi he lisi peʼe kita ʼuluaki fakalaka ʼi he ʼatu ʼe fakatalitali. Ko te taʼi aga ʼaia ʼe mole ko he agaʼofa.—Mateo 7:12; 22:39.
Kae ʼe ko he totogi fakafūfū koa mokā kita foaki he meʼa ʼofa ki he tahi ʼe gāue maʼa te puleʼaga, ke ina fakahoko maʼa kita he gāue ʼe mole fakafeagai ki te lao peʼe ke ʼaua naʼa gaohi koviʼi kita? Ohage la, ʼi ʼihi fenua, ko te kau maʼu tuʼulaga ʼe mole nātou fakahū ako anai te tamaliki, peʼe nātou ʼave he tahi ki te lōpitali, peʼe nātou foaki te ʼu pepa ke hū ki te fenua mo kapau ʼe mole foaki age he meʼa ʼofa. Peʼe nātou fakatuai te fakafoʼou ʼo te ʼu fakaʼui pepa moʼo fakagafua he faʼahiga gāue.
Ko te aga ʼaē ko te foaki ʼo he meʼa ʼofa pea mo te manatu ke maʼu ʼo ʼuhiga mo te aga ʼaia ʼe kehekehe pe mai te tahi fenua ki te tahi fenua. ʼI te ʼu fenua ʼaē ʼe ko he agamāhani ia te fai ʼo te ʼu taʼi totogi ʼaia peʼe ko he meʼa ʼe fakamaʼua, maʼa ʼihi Kilisitiano ʼi tanatou fakafuafua ki te lao, ʼe mole nātou maumauʼi te ʼu pelesepeto faka Tohi-Tapu mokā nātou foaki he meʼa ʼofa ki he tahi ʼe maʼu tuʼulaga ke tupu ai hana fakahoko tona maʼua. ʼI ʼihi fenua ʼe feala ke faka ʼuhiga e ʼihi hahaʼi te taʼi totogi ʼaia ohage ko he meʼa ʼofa ʼe hilifaki ki te kiʼi totogi veliveli ʼo he tahi ʼe gāue maʼa te puleʼaga. ʼE tonu ke tou manatuʼi tuʼumaʼu ʼe kehekehe te foaki ʼo he meʼa ʼofa moʼo fakahoko ʼo he gāue ʼe ʼalutahi mo te lao pea mo te foaki ʼo he totogi ke fai he gāue ʼe mole ʼalutahi mo te lao.
Kae ʼi te tahi faʼahi, mokā fakaʼui he ʼu meʼa ʼe mole fakafeagai ki te lao, ko ʼihi Fakamoʼoni ʼa Sehova ʼe mole nātou fia foaki he ʼu meʼa ʼofa ki te ʼu pule polisi, peʼe ko te kau gāue ʼo te lātuani, peʼe ko he tahi ʼu hahaʼi, tatau aipe peʼe ko te taʼi foaki meʼa ʼofa ʼaia ʼe ko he meʼa ʼe fai māhani. ʼI te kua ʼiloa te kau Fakamoʼoni ʼi tanatou pipiki maʼu ki te aga ʼaē ʼe tonu ke nātou fai pea mo tanatou agatonu, koia ʼi ʼihi temi ʼe gaohi fakalelei ia nātou, ohage ko te hahaʼi tokolahi ʼaē ʼe hoki gaohi fakaleleiʼi mokā ʼe nātou foaki he totogi.—Tāʼaga Lea 10:9; Mateo 5:16.
Moʼo fakanounou, ʼe tahi filifili pe e te kaugana ʼa Sehova peʼe ina foaki anai he meʼa ʼofa ke fai hana gāue ʼe mole fakafeagai ki te lao, peʼe ke ʼaua naʼa gaohi koviʼi ia ia. Ko te potu ʼaē ʼe maʼuhiga tāfito, ʼe tonu ke tahi fai tana aga ʼaki he leʼo ʼo loto ʼe maʼa, ke mole ʼulihi ai te huafa ʼo Sehova pea ke mole fakatupu tūkia ki niʼihi.—Mateo 6:9; 1 Kolonito 10:31-33; 2 Kolonito 6:3; 1 Timoteo 1:5.