Kei Koutou Manatuʼi Koa?
Neʼe koutou leleiʼia koa te ʼu Tule Leʼo fakamuli? Pea koutou vakaʼi peʼe koutou lava tali ki te ʼu fehuʼi ʼaenī:
• He koʼe neʼe filifili te ʼaho 25 ʼo Tesepeli moʼo fakamanatuʼi te ʼaho tupu ʼo Sesu?
ʼE mole tou maʼu ʼi te Folafola ʼa te ʼAtua te ʼaho tupu ʼo Sesu. ʼE ʼui fēnei ʼi te tohi Enciclopedia Hispánica: “Ko te ʼaho 25 ʼo Tesepeli ʼe mole ko te ʼaho tupu ʼaia ʼo Sesu, kae neʼe ko te ʼaho ʼaia ʼaē neʼe fakahū ai ki te lotu faka Kilisitiano ia te ʼu toʼotoʼoga ʼo te lafeti ʼo te laʼā.” Neʼe fai lafeti te kau Loma ʼo te temi muʼa ki te hopo ake ʼo te laʼā ʼi te temi momoko, ʼo nātou kakai pea mo ʼiʼinu, mo fakafiafia pea mo fefoakiʼaki ia tonatou ʼu meʼa ʼofa.—15/12, pasina 4 mo te 5.
• Ko te ʼu palalau ʼaē iā Gaue 7:59, ʼe faka ʼuhiga koa neʼe faikole ia Setefano kiā Sesu?
Kailoa. ʼE fakahā ʼi te Tohi-Tapu ko te faikole ʼe tonu ke fai fakahagatonu kiā Sehova ʼAtua. ʼI te sio ʼa Setefano kiā Sesu kua fakatuʼuake, neʼe lagi faigafua age kiā ia hana pāui fakahagatonu age ki ai, ʼo ina ʼui fēnei: “Aliki Sesu, ke ke tali toku laumalie.” Neʼe ʼiloʼi e Setefano neʼe tuku age kiā Sesu ia te mālohi ke ina fakatuʼuake ia te kau mate. (Soane 5:27-29) Koia neʼe kole e Setefano peʼe neʼe kalaga kiā Sesu ke ina taupau tona maʼuli ʼo aʼu ki te fakatuʼuake.—1/1, pasina 31.
• ʼE tou ʼiloʼi feafeaʼi ko totatou ka haʼu neʼe mole heʼeki fakatuʼutuʼu fakatomuʼa?
Neʼe tuku e te ʼAtua ki te tagata ia te fealagia ʼaē ke ina filifili te ʼu meʼa ʼaē ʼe ina fai, ʼo ʼasi mai ai neʼe mole heʼeki fai he fakatuʼutuʼu fakatomuʼa ʼo ʼuhiga mo te ʼu meʼa ʼaē ke fai. ʼE heʼe ʼofa pea mo heʼe faitotonu anai ia Sehova mo kanapaula neʼe kua ina fakatuʼutuʼu fakatomuʼa totatou maʼuli pea mo ina tuku mai leva kiā tatou te hala ʼo te ʼu aga ʼaē ʼe tou fai. (Teutalonome 32:4; 1 Soane 4:8)—15/1, pasina 4 mo te 5.
• He koʼe ʼe mole lelei te ʼui ʼaē ʼe mole hoko ni ʼu milakulo?
ʼI tanatou ʼiloʼi ʼaē ʼe veliveli tanatou mālama ki te ʼu meʼa fakapoto lalahi pea mo fakaofoofo ʼi te fakatupu ʼa te ʼAtua, ko ʼihi hahaʼi popoto ʼe nātou fakamoʼoni ʼe mole kei nātou lava ʼui, ʼe faigataʼa ia te fakahoko ʼo he meʼa. Tokolahi, ʼe nātou ʼui fakahagatonu ʼe lava hoko moʼoni ia te ʼu meʼa ʼaia.—15/2, pasina 5 mo te 6.
• He koʼe neʼe ʼui e te tuʼi fakamāu ko Samisoni ki tana ʼu mātuʼa neʼe fia ʼohoana mo he taʼahine Filisitini? (Kau Tuʼi Fakamāu 14:2)
Neʼe ko he fakafeagai ki te lao ʼa te ʼAtua ia te ʼohoana mo he tahi ʼe tauhi ki te ʼatua hala. (Ekesote 34:11-16) Kae kiā mata ʼo Samisoni neʼe ina “loto” ki te fafine Filisitini. Ko Samisoni “neʼe ina kumi he faigamālie ke ina tauʼi te kau Filisitini,” pea ko te fafine ʼaia neʼe ko he faigamālie moʼo fakahoko ia te fakatuʼutuʼu ʼaia. Neʼe tokoni te ʼAtua kiā Samisoni ʼaki Tona laumālie maʼoniʼoni. (Kau Tuʼi Fakamāu 13:25; 14:3, 4, 6)—15/3, pasina 26.
• ʼE tonu koa ki he Kilisitiano ke ina totogi peʼe ke ina foaki he meʼa ʼofa ki he tahi ʼe gāue maʼa te puleʼaga moʼo fakamālo ki hana ʼu gāue neʼe ina fai maʼa ia?
ʼE mole lelei hata totogi fakakākā he tahi ʼe gāue ʼi te puleʼaga, pea mo foaki meʼa ʼofa age ke ina fai maʼa kita he meʼa ʼe fakafeagai ki te lao, peʼe kākā, peʼe ke kita maʼu ai he tokaga makehe. Kae ʼe mole feala ke tou faka ʼuhiga ko he totogi fakakākā mokā kita foaki he meʼa ʼofa ki he tahi ʼe gāue maʼa te puleʼaga ke ina fakahoko fakalelei tana gāue peʼe ke mole gaohi koviʼi kita.—1/4, pasina 29.