Tou Kumi Te Hahaʼi ʼAē ʼe Tāu Mo Nātou
1 Ko te ʼu fakatotonu ʼa Sesu ke fakahoko te gāue fai faka mafola ʼe lagi faigataʼa kia tatou. Neʼe ina ʼui fēnei: “ ʼI he kolo lahi, pe ko he kolo veliveli ʼe koutou hū kiai, koutou kumi pe ko ai ʼaē ʼe tāu mo ia.” (Mat. 10:11, MN ) Kua tahitahiga te maʼu atu ʼa te hahaʼi ʼi tonatou ʼapi. Koia, koteā ʼaē ʼe tou lava fai ke fua lelei tatatou kumi ʼo nātou?
2 Koutou Vakavakaʼi Takotou Telituale: ʼUluaki, koutou vakavakaʼi takotou telituale. Ko te temi fea ʼaē ʼe nonofo ai te hahaʼi ʼi tonatou ʼapi? Kofea ʼaē ʼe tou lava maʼu ai nātou lolotoga te ʼaho? ʼE ʼi ai koa he ʼaho ʼi te vāhaʼa peʼe ko he hola ʼi te ʼaho ʼaē ʼe feala ke nātou tali lelei ai tatou? Koutou fetogi takotou minisitelio ʼo mulimuli ki te ʼu agamāhani pea mo te ʼu ʼaluʼaga ʼo te hahaʼi ʼo tokotou telituale, pea ʼe koutou sio anai ʼe ʼi ai tona ʼu fua.—1 Ko. 9:23, 26.
3 Tokolahi te kau fai faka mafola neʼe fua lelei tanatou maʼu te hahaʼi ʼi te afiafi. Ko ʼihi hahaʼi ʼi tonatou loto fale ʼe nātou tokalelei pea mo nātou fia logo ʼi te temi ʼaia. Ka hoko mai te temi ʼaē ʼe tō vave ai te afiafi, pea ʼe lagi lelei anai te fai faka mafola ʼi te telefoni (ʼi te ʼu potu ʼaē ʼe fakagafua ai). Ko te gāue ʼi te telituale ʼo te ʼu matani gāue pea mo fai faka mafola ʼi te ʼu koga meʼa ʼaē ʼe kaugamālie ai te hahaʼi, ʼe ko te tahi faʼahiga fai ʼaia ke logo te hahaʼi ki te logo lelei.
4 Lolotoga te māhina ʼaē neʼe fai ai te faka mafola makehe, neʼe fakatuʼutuʼu e te kokelekasio ke nātou fai faka mafola ʼi te ʼu afiafi ʼo te ʼu Moeaki pea mo te ʼu ʼAhotapu, pea mo te ʼu pōʼuli ʼo te ʼu Feliafā pea mo te ʼu Felianima. Neʼe nātou fai te tahi fakatuʼutuʼu ko te fai faka mafola ʼi te telefoni pea mo nātou gāue ʼi te telituale ʼo te ʼu matani gāue. Neʼe fiafia ʼaupito tanatou minisitelio ʼaki te ʼu fakatuʼutuʼu ʼaia, koia neʼe fakatotonu ai e te kokelekasio ke nātou haga fai te ʼu fakatuʼutuʼu ʼaia.
5 Tou Faiga Mālohi ʼo ʼAʼahi Te Hahaʼi: Kapau ʼe faigataʼa ʼi takotou telituale te maʼu ʼo te hahaʼi mokā koutou toe ʼaʼahi nātou, koutou faiga ʼi te ʼu temi fuli ʼaē ʼe koutou palalau ai mo he tahi, ke koutou fakatuʼutuʼu lelei te ʼaho ʼaē ka koutou toe liliu age, māʼia pe la ʼi takotou ʼuluaki fai palalau mo ia. Pea koutou ʼolo ki ai ʼi te ʼaho ʼaē neʼe koutou fakatuʼutuʼu kiai. (Mat. 5:37) Kapau ko he meʼa ʼe feala, koutou kole ki ai tona numelo telefoni. ʼE toe tokoni atu anai ke koutou toe maʼu ia ia.
6 ʼE koutou maʼu moʼoni anai te ʼu tapuakina mai ia Sehova, ʼi takotou ʼu faiga mālohi ʼaia moʼo kumi te hahaʼi ʼaē ʼe tāu mo nātou, pea mo taupau tanatou fia logo ki te logo lelei.—Taag. 21:5.