“Kua Tou Mālo”
ʼI TE taʼu 2002, neʼe fakahoko e te kau Fakamoʼoni ʼa Sehova te fakatahi faka tisitilike ʼi te kolo ko Mbandaka, ʼi te potu noleto uesite ʼo te Lepupilika Faka Temokalatike ʼo Congo. ʼI te fakahā ʼi te fakatahi te kua tā ʼo te ʼu Tohi Faka Keleka Faka Kilisitiano ʼo te Traduction du monde nouveau ʼi te lea faka Lingala, ko nātou ʼo te fakatahi neʼe nātou hopo fakafiafia pea ko ʼihi neʼe fetāgihi ʼi te fiafia. ʼI te hili ʼo te fakatahi, ko te hahaʼi neʼe nātou fakapupu ʼi te ʼu tufaʼaga tohi ke nātou maʼu hanatou Tohi-Tapu foʼou, mo nātou ʼui: “Basuki, Basambwe,” ko tona fakaliliu: “Kua tou mālo, heʼe mole kei ʼi ai he poto ʼa te ʼu lotu!”
He koʼe neʼe fiafia feiā ia nātou ʼaē neʼe kau ki te fakatahi, pea he koʼe neʼe nātou fai ia te ʼu palalau ʼaia? ʼI ʼihi koga meʼa ʼo te kolo ko Mbandaka, neʼe mole lava maʼu e te kau Fakamoʼoni ʼa Sehova ia he ʼu Tohi-Tapu ʼi te lea faka Lingala. Koteā tona tupuʼaga? Koteʼuhi neʼe mole tali e te ʼu lotu ke fakatau te ʼu Tohi-Tapu ki te kau Fakamoʼoni ʼa Sehova. Neʼe tonu ai ki te kau Fakamoʼoni ke nātou fekauʼi he tahi ʼe mole ko he Fakamoʼoni ke ʼalu ʼo toʼo he ʼu Tohi-Tapu maʼa nātou. Ko te tupuʼaga la ʼaia ʼo tanatou fiafia ʼaupito ʼi te mole kei lava tāʼofi e te ʼu lotu ke ʼi ai he ʼu Tohi-Tapu ʼa te kau Fakamoʼoni.
Ko te fakaliliu foʼou ʼaia ʼa te Tohi-Tapu, ʼe mole ʼaoga pe ki te kau Fakamoʼoni, kae ʼe toe ʼaoga foki ki te hahaʼi fuli. Neʼe logoʼi e te tagata mai tona ʼapi ia te ʼu faiakonaki ʼo te fakatahi he neʼe logo mālohi ʼi te ʼu mikolo, pea neʼe faitohi fēnei ki te pilo ʼa te kau Fakamoʼoni ʼa Sehova: “ ʼE au fiafia ʼaupito heʼe kua maʼu leva ia te Tohi-Tapu ʼaia. ʼE lahi anai te ʼu meʼa ʼaē ka mātou mālama kiai. ʼE mole ko au ko he Fakamoʼoni ʼa Sehova, kae kua au fakaʼamu ke au maʼu te Tohi-Tapu foʼou ʼaia.”
ʼI te temi nei, kua maʼu kātoa te Les Saintes Écritures — Traduction du monde nouveau ʼi te ʼu lea e 33, pea ko te ʼu Tohi Faka Keleka Faka Kilisitiano ʼi te tahi ʼu lea e 19, ʼo kau ai te lea faka Lingala. Kapau ʼe koutou fia fai ki hakotou Tohi-Tapu feiā, koutou fakaʼui ki te kau Fakamoʼoni ʼa Sehova ke nātou ʼavatu hakotou tohi feiā.