ʼE Kotou Lava Mahino Feafeaʼi Ki Te Tohi-Tapu?

2. Kotou Toʼo ʼi Tokotou ʼAtamai Ia Te ʼu Manatu Hala ʼi Te Temi ʼAē ʼe Kotou Lau Ai Te Tohi-Tapu

Neʼe kua fai atu koa e hokotou kaumeʼa he ʼu palalau kovi ʼo ʼuhiga mo he tahi neʼe mole heʼeki kotou felāveʼi mo ia? ʼI takotou felāveʼi leva ʼaē mo ia, neʼe mole faigataʼa koa ʼi te temi ʼaia hakotou tokagaʼi ia tona ʼu fealagia pea mo tona ʼu kalitātē ʼuhi ko te ʼu palalau ʼaē neʼe fai atu e tokotou kaumeʼa? ʼE feala ke hoko he meʼa fēia ʼo ʼuhiga mo te Tohi-Tapu.

NEʼE fakatokaga e te ʼapositolo ko Paulo ia te meʼa ʼaē ʼe feala ke hoko mo kapau ʼe tou lau ia te Tohi-Tapu kae neʼe mole tou toʼo ʼi totatou ʼatamai ia te ʼu manatu hala ʼaē ʼe tou maʼu ʼo ʼuhiga mo te Tohi-Tapu. ʼO ʼuhiga mo ʼihi Sutea ʼi tona temi, neʼe tohi fēnei e Paulo: “ ʼE au fakamoʼoni kiā nātou ʼe natou tauhi fakamālotoloto ki te ʼAtua, kae mole natou fai ʼaki te ʼatamai mālama totonu.”—Loma 10:2.

Ko ʼihi ʼi te kau Sutea ʼaia ʼo te ʼuluaki sēkulō, neʼe mole natou fia tali ia te moʼoni ʼaē neʼe tuʼu lelei ʼi te Koga Tohi-Tapu Fakahepeleo, ʼaē neʼe fakahā lelei ai pe feafeaʼi anai te Mēsia. Neʼe fakahoko e Sesu ʼo Nasaleti ia te ʼu fakamaʼua Fakatohi-tapu fuli, mo te ʼu lea fakapolofetā fuli. Kae ʼuhi ko te ʼu manatu hala ʼaē neʼe kua nonofo mo nātou, neʼe mole feala ai leva ki te kau Sutea ʼo te temi ʼaia ke natou mahino ki te Folafola ʼa te ʼAtua.

Koteā ʼaē ʼe feala ke tou ako mai te fakamatala Fakatohi-tapu ʼaia? ʼE maʼuhiga ke tou toʼo ia te ʼu manatu hala ʼaē ʼe tou maʼu ʼi totatou ʼatamai mokā ʼe tou lau ia te Tohi-Tapu. Kapau ko ia ʼaē ʼe lautohi ʼe ina maʼu he ʼu manatu hala, pea ʼe mole feala anai hana mahino ki te ʼu moʼoni ʼaē ʼi te Tohi-Tapu.

Ohagē lā, ko te polofesea ʼo te ʼu sivi fakalotu ʼi Caroline du Nord, ʼi Amelika, ʼe ina ʼui ko te Tohi-Tapu ʼe “ko he tohi ʼe maʼu ai te ʼu manatu ʼa te tagata, ʼe mole natou felōgoi tahi pea ʼe mole natou foaki ia he takitaki ʼe tuha mo te falala ʼo ʼuhiga mo totatou maʼuli.” Kapau neʼe tonu ke lau e he tahi ia te Tohi-Tapu ʼaki te manatu ʼaē ʼe “ko he tohi ʼe maʼu ai te ʼu manatu ʼa te tagata,” ʼe mole fakafisi anai koa ia ki te takitaki peʼe ko te ʼu pelesepeto ʼaē ʼe mole ina leleiʼia?

Kae ʼe fakalotomālohiʼi tātou ʼi te Tohi-Tapu ke tou ako tuʼumaʼu ia te tohi ʼaia. ʼO ʼuhiga mo te kau Pelea ʼi te temi ʼo Paulo, ʼe ʼui fēnei ʼi te Tohi-Tapu: “Neʼe natou fia ʼiloʼi ʼaupitō te folafola, ʼo natou vakavakaʼi lelei te ʼu Tohi ʼi te ʼaho fuli pē, peʼe moʼoni te ʼu meʼa ʼaia.” (Gāue 17:11) Ohagē ko te kau lautohi ʼaia, ʼe lagi tonu ke kotou toʼo ʼi tokotou ʼatamai ia te ʼu manatu kovi peʼe ko he ʼu fakafifihi ʼe feala ke tāʼofi ai takotou mahino ki te Tohi-Tapu. Kotou toʼo te ʼu manatu hala ʼaē ʼe kotou maʼu ʼi tokotou ʼatamai ʼi te temi ʼaē ʼe kotou lau ai te Folafola ʼa te ʼAtua, ʼo kotou loto moʼoni ke kotou ʼiloʼi ia te logo fakafiafia ʼo Ia ʼaē neʼe ina foaki mai te tohi ʼaia.