Te Tui Moʼoni ʼe Kei Lava Maʼu Koa?

“Ko te tui ʼe ko te falala moʼoni pea mo mālohi ki te ʼofa ʼo te ʼAtua, pea ko te tagata lotu ʼaē ʼe tui papau kiai, ʼe ina foaki anai tona maʼuli kiai ʼo talu ai.”—MARTIN LUTHER, 1522.

“Kua tou ʼamanaki liliu ko he sosiete ʼe mole kei tokaga ki te ʼu meʼa faka lotu, pea ʼe mole kei maʼu ai te tui pea mo te ʼu gāue faka Kilisitiano.”—LUDOVIC KENNEDY, 1999.

ʼE KEHEKEHE ʼaupito te ʼu manatu ʼo ʼuhiga mo te tui. ʼI te temi muʼa, neʼe lahi te hahaʼi ʼaē neʼe tui ki te ʼAtua. Ia ʼaho nei, ʼi he mālama lotolotolua pea mo maʼuli mamahi, ʼe mole kei maʼu ai te tui moʼoni ki te ʼAtua pea mo te Tohi-Tapu.

Te Tui Moʼoni

Ki te tokolahi, ko te “tui” ʼe faka ʼuhiga ki te tui ki he ʼu akonaki faka lotu peʼe mulimuli ki he faʼahiga lotu. Kae ohage ko tona fakaʼaogaʼi ʼi te Tohi-Tapu, ko te “tui” ʼe faka ʼuhiga tāfito ki he tui ʼe katoa—ʼe mole fakaapelua ki te ʼuhiga moʼoni ʼo te ʼAtua pea mo tana ʼu fakapapau. ʼE ko he kalitate ʼe ina fakaʼiloga ai he tahi ʼe ko he tisipulo ʼa Sesu Kilisito.

ʼI te tahi lakaga, neʼe talanoa ia Sesu Kilisito ki te ʼaoga ʼaē ke kita faikole pea ke “ ʼaua naʼa [kita] fiu.” ʼI tana palalau ʼaia, neʼe ina lagaʼi te fehuʼi, peʼe maʼu anai koa te tui moʼoni ʼi totatou temi. Neʼe ina fehuʼi fēnei: “Ka haʼu anai te Foha ʼo te tagata, ʼe ina maʼu moʼoni anai koa te tui ʼi te kele?” He koʼe koa neʼe ina fai te fehuʼi ʼaia?—Luka 18:1, 8, MN, kiʼi nota ʼi te lalo pasina.

Kua Puli Te Tui

ʼE lahi te ʼu meʼa ʼe feala ke puli ai te tui ʼa te hahaʼi. ʼI te ʼu meʼa ʼaia, ʼe kau kiai te ʼu mamahi peʼe ko te ʼu faigataʼaʼia ʼo te maʼuli. Ohage la ʼi te taʼu 1958, ko te Polofesea ko Michael Goulder, neʼe ko te patele ʼo te palokia ʼi Manchester, ʼi Pilitania, pea ʼi te taʼu ʼaia neʼe tō ai te vakalele ʼi Munich, pea neʼe mamate fuli ai te foʼi ʼaka fitipolo ʼo Manchester United. ʼI te televisio BBC, neʼe fakamahino ai e Joan Bakewell, ko Goulder “neʼe mole ina lava fai he meʼa ʼi tana sio ki te toe mamahi lahi ʼa te hahaʼi.” Pea neʼe “mole kei tui ai ko te ʼAtua ʼe ina takitaki te maʼuli ʼo te tagata.” Neʼe ʼui e Goulder “ko te Tohi-Tapu ʼe mole . . . ko te folafola ia ʼa te ʼAtua, heʼe mole feala ke faihala [te ʼAtua],” kae ʼe ko “te folafola ʼa te tagata, ʼaē ʼe feala ia ke faihala, pea ʼe lagi maʼu ai ʼihi folafola mai te ʼAtua.”

ʼI ʼihi temi ʼe puli ai takita tui. Neʼe hoko te faʼahi ʼaia kia Ludovic Kennedy, te tagata faitohi pea mo ʼiloa ʼi te televisio. ʼE ina ʼui, talu tana kei veliveli, neʼe “tau logo ki he ʼu manatu fakaapelua [ʼo ʼuhiga mo te ʼAtua] pea neʼe tuputupu ai [tana] mole tui.” ʼE hage neʼe mole feala ki he tahi ke ina tuku age he ʼu tali ʼe feʼauga ki tana ʼu fehuʼi. Ko te mate fakapunamaʼuli ʼo tana tāmai ʼi te tai, neʼe malave ki tana tui, ʼaē neʼe kua vaivai. Ko te ʼu faikole ki te ʼAtua ke ina “hāofaki tatou mai te ʼu tuʼutāmaki ʼo te tai pea mo te agamālohi ʼa te ʼu fili,” neʼe mole tali kiai ʼi te temi ʼaē neʼe ʼohofiʼi ai pea mo maumauʼi ai e te kau Siamani te vaka ʼo tana tāmai ʼi te Lua Tau Faka Malamanei.—All in the Mind—A Farewell to God.

ʼE tau hoko te ʼu meʼa ʼaia. ʼE ʼui fēnei e te ʼapositolo ko Paulo: “E mole mau te tui e te tagata fuli.” (2 Tesalonika 3:2) Koteā takotou manatu? ʼE kei feala koa ke tou maʼu te tui moʼoni ki te ʼAtua pea mo tana Folafola, ʼi he mālama ʼe tuputupu ai te lotolotolua? Koutou vakaʼi te alatike ʼaē ʼe hoa mai heʼe talanoa ki te faʼahi ʼaia.