ʼE Tonu Koa Ke Fakatafito Te Tui Ki Te ʼAtamai?
Neʼe tohi fēnei e te takitaki lotu ʼi te seminalio faka teolosia ʼi Amelika: “Kua tokolahi te hahaʼi kua ‘tui’ koteʼuhi mole kei nātou fia fakakaukau. ʼE nātou fia muliʼi pe he lotu kae mole nātou fia kumi peʼe moʼoni.”
KO TONA tupuʼaga tāfito heʼe ko te tokolahi ʼaē ʼe nātou ʼui ʼe nātou tui ki te ʼAtua, ʼe mole nātou fakakaukauʼi pe koʼe ʼe nātou tui ki te ʼu meʼa ʼaē ʼe nātou fai, peʼe nātou vakavakaʼi peʼe fakatafito kiteā tanatou tui. Koia ʼe mole tou punamaʼuli ai ki te mole fia palalau ʼa te tokolahi ki te lotu.
Kae ko te ʼu aga faka lotu ohage ko te tauhi ki te ʼu fakatātā pea mo te lau liuliuga pea mo fakaʼatamai ʼo te ʼu faikole, ʼe mole nātou faka fealagia ki te hahaʼi ke nātou fakaʼaogaʼi tonatou ʼatamai. Maʼa te lauʼi miliona hahaʼi, ko te lotu ʼe ko te ʼu aga faka lotu, mo te ʼu ʼēkelesia matalelei, mo te ʼu sioʼata matalelei ʼaē ʼe pena ai te ʼu paki faka lotu, pea mo te ʼu musika mālie. Logola ko ʼihi lotu ʼe nātou ʼui ʼe fakatafito tanatou tui ki te Tohi-Tapu, kae ʼe mole fia ako fakalelei te Tohi-Tapu e tanatou ʼu hahaʼi, ʼuhi ko tanatou logo ʼaē ʼe tala ai ‘koutou tui kia Sesu pea ʼe ina hāofaki anai koutou.’ Ko ʼihi ʼe nātou faka mafola te evaselio faka sosiale peʼe faka politike. Koteā te fua ʼo te ʼu meʼa fuli ʼaia?
ʼO ʼuhiga mo te ʼaluʼaga ʼaia ʼi Amelika, neʼe ʼui fēnei e te tagata fai lotu: “Ko te lotu faka Kilisitiano . . . ʼe mole loloto, [pea] ko nātou ʼaē ʼe nātou lagolago kiai ʼe mole loloto tanatou tui.” ʼO ʼuhiga mo Amelika, neʼe ʼui fēnei e te tagata ʼe ina fai te ʼu kumi: “ ʼE ko he puleʼaga ʼe mole ina ʼiloʼi te Tohi-Tapu.” Kae ʼi tona fakahagatonu, ʼe toe feiā pe ʼi te tahi ʼu fenua ʼaē ʼe ʼui e nātou Kilisitiano. ʼE lahi te ʼu lotu ʼe mole ko he ʼu lotu faka Kilisitiano, tatau aipe peʼe mole nātou fia fakakaukauʼi te ʼu meʼa ʼaē ʼe nātou ako, kae ʼe nātou faka maʼuhigaʼi tāfito te ʼu hiva, mo te ʼu faikole māhani, pea mo te ʼu faʼahiga metitasio kehekehe ʼe pipiki kiai te ʼu meʼa fakamanamana.
Kae ko te hahaʼi ʼaia ʼi tonatou maʼuli ʼi te ʼaho fuli, ʼaē ʼe mole nātou fakakaukauʼi peʼe moʼoni pea mo totonu te ʼu meʼa ʼaē ʼe nātou tui kiai, ʼi te agamāhani ko te tahi age ʼu meʼa ʼaē ʼe nātou tokakaga fakalelei kiai. ʼE mole mata faikehe koa kia koutou te fai e he tahi he ʼu tuʼuga kumi ʼuhi pe he fia toʼo hana motokā ʼaē ka maumau anai ʼi he ʼaho, kae ina ʼui leva ʼo ʼuhiga mo tana lotu: ‘Kapau neʼe lelei maʼa taku ʼu mātuʼa, pea ʼe lelei anai kia ʼau’?
Kapau ʼe tou loto ke leleiʼia tatou e te ʼAtua, ʼe mole tonu koa la ke tou vakaʼi fakalelei peʼe moʼoni te ʼu meʼa ʼaē ʼe tou tui kiai ʼo ʼuhiga mo ia? Neʼe ʼui e te ʼapositolo ko Paulo ʼo ʼuhiga mo ʼihi kau takitaki lotu ʼo tona temi, neʼe “natou mau te faafai o uhiga mo te Atua, kae ko te faafai e mole mulimuli ki te atamai.” (Loma 10:2) ʼE lava fakatatau te faʼahiga hahaʼi ʼaia ki he tagata fai pena ʼe gāue kinakina moʼo pena ʼo he ʼapi, kae ʼe kovi te ʼu lanu ʼo te pena ʼaē ʼe ina fakaʼaogaʼi, he neʼe mole mulimuli ki te ʼu meʼa ʼaē neʼe fakatotonu e ia ʼaē ʼoʼona te ʼapi. ʼE lagi fiafia anai te tagata fai pena ki tana gāue, kae ʼe leleiʼia anai koa e te tagata ʼo te ʼapi?
Koteā ʼaē ʼe tali e te ʼAtua ʼo ʼuhiga mo te tauhi moʼoni? ʼE tali e te Tohi-Tapu: “Ko te meʼa ʼaia ʼe matalelei mo lelei kia mata ʼo totatou Hāofakiʼaga, ia te ʼAtua, ʼaē ʼe ina loto ke hāofaki te faʼahiga tagata fuli pe, pea ke nātou maʼu te ʼatamai mālama totonu ʼo te moʼoni.” (1 Timoteo 2:3, 4, MN ) Ko ʼihi ʼe lagi nātou manatu ʼe mole feala ke maʼu te taʼi ʼatamai mālama ʼaia ʼi te ʼu tuʼuga lotu ʼaē ia ʼaho nei. Kae koutou fakakaukauʼi age muʼa—kapau ko te finegalo ʼo te ʼAtua ke maʼu e te hahaʼi te ʼatamai mālama ʼo te moʼoni, ʼe tonu koa ke ina fufū te faʼahi ʼaia ki te hahaʼi? Kailoa heʼe ʼui fēnei mai e te Tohi-Tapu: “Kapau ʼe ke kumi te [ʼAtua], ʼe ina tuku anai ke ke maʼu ia ia.”—1 Fakamatala 28:9.
ʼE fakahā feafeaʼi e te ʼAtua ia ia totonu kia nātou ʼaē ʼe nātou kumi fakamalotoloto ia ia? ʼE tali anai te alatike ka hoa mai ki te fehuʼi ʼaia.