Te ʼu Fehuʼi ʼa Te Kau Lautohi

Neʼe tuʼu feafeaʼi te ʼu ʼakau ʼamo ʼo te aleka ʼo te fuakava, koteʼuhi ʼe fakahā e 1 Hau 8:8, neʼe ʼasi mai ki te Potu Taputapu?

ʼI te fakatoʼo e Sehova te paki ʼo te tapenakulo ʼi te toafa, ko te koga tāfito neʼe ko te aleka ʼo te fuakava. Ko te puha tapa fā ʼaia neʼe ʼaofi ʼaki te aulo, pea neʼe tuku ai te ʼu maka ʼo te Lao, pea mo te tahi ʼu meʼa. Neʼe tuku ia ʼi te potu taupotu ʼo te loto tapenakulo, ʼi te Potu Taputapu ʼAupito. ʼI te tāpunu ʼo te aleka, neʼe tuʼu ai te ʼu kelupimi ʼe nā folahi tonā ʼu kapakau. ʼI te ʼu tafaʼaki ʼo te Aleka, neʼe ʼi ai te ʼu mama neʼe feala ke tuiʼi ai te ʼu ʼakau ʼamo e lua, neʼe ko te ʼu kauʼi akasia neʼe ʼaofi ʼaki te aulo. ʼE mahino ia, ko te ʼu ʼakau ʼaia neʼe ʼai fakaloaloa ʼi te Aleka. Koia, ʼi te tuku ʼo te Aleka ʼi tona tuʼuʼaga ʼi te Potu Taputapu ʼAupito ʼo te tapenakulo, ʼo haga tona faʼahi ki te potu esite, neʼe haga te ʼu ʼakau ki te potu noleto-saute. Ki muli age, neʼe tuku te Aleka ʼi te tukuʼaga māhani, ʼi te fale lotu ʼaē neʼe laga e Salomone.—Ekesote 25:10-22; 37:4-9; 40:17-21.a

Neʼe vaheʼi te Potu Taputapu ʼAupito mai te Potu Taputapu (te kogafale ʼaē ʼe tuʼu ʼi tuʼa) e te lito. Neʼe mole feala ki te kau pelepitelo ʼi te Potu Taputapu ke nātou sisio ki loto ʼo te Potu Taputapu ʼAupito, pea mo sio ai ki te Aleka, ʼaē neʼe ina fakafofoga te ʼAtua. (Hepeleo 9:1-7) Koia, ʼe mata faikehe te vaega ʼo 1 Hau 8:8 ʼaē ʼe ʼui ai: “Neʼe loloa te ʼu ʼakau ʼamo, koia neʼe ʼasi te ʼu tumutumu ʼo te ʼu ʼakau ki te Potu Taputapu ʼi te muʼa kogafale ʼaē ʼe tuʼu ʼi loto, kae neʼe mole ʼasi ia ki tuʼa.” Ko te ʼu palalau ʼaia ʼe toe tuʼu ia 2 Fakamatala 5:9. Neʼe ʼasi feafeaʼi te ʼu ʼakau ki te Potu Taputapu ʼo te fale lotu?

Ko ʼihi ʼe nātou manatu ko te ʼu ʼakau neʼe lave ki te lito, ʼo fakatupu ai he mapula ʼo te lito. Kae ʼe mole feala ke feiā, mo kapau la neʼe haga te ʼu ʼakau ki te potu noleto-saute, pea neʼe tau faka faʼahi te lito ki te ʼu ʼakau ʼaia. (Faka au 3:38) ʼE ʼi ai te tahi fakamahino. Neʼe lagi ʼasi he kiʼi koga ʼo te ʼu ʼakau mo kapau la neʼe ʼi ai he kiʼi vaha ʼo te lito pea mo te kaupā ʼo te fale lotu, pe neʼe ʼasi ʼi te temi ʼaē neʼe hū ai te pelepitelo lahi ki te Potu Taputapu ʼAupito. Neʼe ū te Aleka ʼi te lito, kae neʼe lagi ʼasi te ʼu ʼakau ʼi tona ʼu faʼahi ʼi te kiʼi vaha ʼaia. Logope ʼe mata tonu age te fakamahino ʼaia, kae ʼe mole tou ʼiloʼi papau.

ʼE mahino ia, ʼe lahi te ʼu agaaga ʼe kei tonu ke tou ʼiloʼi. Neʼe fakamatalatala e te ʼapositolo ko Paulo tona ʼu kiʼi agaaga ʼi tana tohi ki te kau Hepeleo. Koia neʼe ina ʼui feiā ai: “ ʼE mole ko he temi ia ke fakamatalatala te ʼu meʼa ʼaia.” (Hepeleo 9:5, MN ) ʼE lagi tou maʼu anai he ʼu faigamālie fakaloto mālohi ʼaki te fakatuʼuake ʼo te kau agatonu, ke fakamatala mai te faʼahi ʼaia e te ʼu tagata ohage ko Moisese, mo Alone, mo Pesalele, pea mo ʼihi atu neʼe nātou ʼiloʼi lelei te paki pea mo te gāue ʼo te tapenakulo.—Ekesote 36:1.

[Kiʼi nota]