ʼE Tou Māʼuʼuli Koa ʼi “Te ʼu ʼAho Fakamuli”?

1. Kofea ʼaē ʼe tou lava ʼiloʼi ai te ʼu meʼa ʼaē ka hoko anai ʼi te ka haʼu?

ʼI TAKOTOU sio pea mo logo ʼi te televisio ki te ʼu tala logo, ʼe mole koutou feʼekeʼaki koa, ‘Peʼe koteā ʼapē te meʼa ʼaē ka hoko anai ki te malamanei?’ ʼE mole feala ki he tagata ke ina tala fakatomuʼa te ʼu tuʼutāmaki ʼaē ka hoko anai ʼi te ka haʼu, heʼe hoko fakafokifā ia. (Sakopo 4:14) Kae ko Sehova ʼe ina ʼiloʼi te ʼu meʼa ʼaē ka hoko anai ʼi te ka haʼu. (Isaia 46:10) Talu mai fualoa, neʼe fakakikite ʼi te Tohi-Tapu te ʼu meʼa kovi ʼaē ʼe lolotoga hoko nei ʼi totatou temi pea mo te ʼu meʼa taulekaleka ʼaē ka hoko anai ʼi te ka haʼu.

2, 3. Koteā te fehuʼi ʼaē neʼe fai e te ʼu tisipulo kiā Sesu, pea neʼe koteā tana tali age?

² Neʼe talanoa ia Sesu Kilisito ʼo ʼuhiga mo te Puleʼaga ʼo te ʼAtua, ʼaē ka ina fakagata anai ia te agakovi pea mo fakatuʼu anai ia te palatiso ʼi te kele. (Luka 4:43) Neʼe fia ʼiloʼi e te hahaʼi peʼe ko ʼafea ʼaē ka fakatuʼu ai anai te Puleʼaga ʼaia. Koia neʼe fehuʼi ai e te ʼu tisipulo ʼa Sesu kiā te ia: “Koteā anai te fakaʼiloga ʼo tau ʼi henī pea mo te fakaʼosi ʼo te tuʼu ʼo te ʼu faʼahiga meʼa ʼaenī?” (Mateo 24:​3, MN ) Pea neʼe tali age e Sesu, ʼe ko Sehova ʼAtua tokotahi pe ʼaē ʼe ina ʼiloʼi lelei te ʼaho tonu ʼaē ka fakaʼauha ai anai te tuʼu ʼo te ʼu faʼahiga meʼa ʼaenī. (Mateo 24:36) Kae logola tana mole fakahā fakahagatonu age te temi fakaʼosi totonu, neʼe ʼui age e Sesu kiā nātou, ʼe hoko anai te ʼu meʼa ʼi te kele ʼi muʼa ʼo te fakatuʼu e te Puleʼaga ia te tokalelei moʼoni pea mo te fīmālie ʼi te malamanei. Pea ko te ʼu meʼa ʼaia ʼe lolotoga hoko nei!

³ ʼI muʼa ʼo hatatou vakaʼi ia te ʼu fakamoʼoni ʼe tou lolotoga māʼuʼuli nei ʼi “te fakaʼosi ʼo te tuʼu ʼo te ʼu faʼahiga meʼa ʼaenī,” tou vakaʼi fakanounou muʼa te tau neʼe mole lava sio kiai te tagata. Ko te tau ʼaia neʼe hoko ʼi te potu fakapulipuli ʼo te lagi, pea ko tona ikuʼaga ʼe malave ki totatou maʼuli.

KO TE TAU ʼI TE LAGI

4, 5. (a) Mole faʼa fualoa ʼi te ʼosi fakanofo Hau ʼo Sesu, koteā ʼaē neʼe hoko ʼi te lagi? (b) Iā Apokalipesi 12:​12, koteā anai te ʼikuʼaga ʼo te tau ʼaē neʼe hoko ʼi te lagi?

⁴ ʼI te kapite kua hili ʼo te tohi ʼaenī, neʼe talanoa ai ʼo ʼuhiga mo Sesu Kilisito kua fakanofo Hau ʼi te lagi talu mai te taʼu 1914. (Taniela 7:​13, 14) Mole faʼa fualoa kiai, pea fakahoko e Sesu ia tona tuʼulaga faka hau. ʼE ʼui ʼi te Tohi-Tapu: “Neʼe hoko te tau ʼi te lagi. Ko Mikaele [te tahi higoa neʼe foaki age kiā Sesu] mo tana kau ʼāselo neʼe nātou tauʼi te talakone [ia Satana te Tevolo], pea neʼe tau te talakone mo tana kau ʼāselo.”a Neʼe mole mālo ia Satana mo tana kau ʼāselo agakovi ʼi te tau ʼaia, koia neʼe lī ifo ai leva nātou mai te lagi ki te kele. Pea neʼe fakafiafia te ʼu foha fakalaumālie agatonu ʼa te ʼAtua ʼi te temi ʼaē neʼe lī ifo ai ia Satana pea mo tana kau temonio ki te kele. Kae ʼe mole fakafiafia anai te malamanei ohage ko te kau ʼāselo agatonu ʼi te lagi, koteʼuhi neʼe fakakikite fēnei ʼi te Tohi-Tapu: “Malaʼia ki te kele . . . he kua hifo ifo atu te Tevolo kiā koutou, mo tona ʼita lahi, he kua ina ʼiloʼi kua nounou tona temi.”​—Apokalipesi 12:​7, 9, 12, MN.

⁵ Koutou fakatokagaʼi te ikuʼaga ʼo te tau ʼaia neʼe hoko ʼi te lagi. ʼI te ʼita lahi ʼa Satana, neʼe ina fakatupu te ʼu malaʼia ki te hahaʼi ʼo te kele. Hoki tou vakaʼi anai ki muli age, ʼe tou lolotoga māʼuʼuli nei ʼi te temi ʼaē ʼe hoko ai te ʼu malaʼia ʼaia. Kae ko te malaʼia ʼaia ʼe mole loaloaga anai​—heʼe ʼui ʼe “kua nounou tona temi.” ʼE ʼiloʼi e Satana kua nounou tona temi. Pea ʼe ʼui ʼi te Tohi-Tapu ko te temi ʼaia ʼe ko “te ʼu ʼaho fakamuli.” (2 Timoteo 3:​1, MN ) Ko he toe fiafia ʼe tou maʼu ʼi tatatou ʼiloʼi kua vave fakagata e te ʼAtua te ʼu fakahala ʼa te Tevolo ʼaē ki te kele! Tou vakaʼi age muʼa te ʼu meʼa ʼaē neʼe fakakikite ʼi te Tohi-Tapu pea ʼe lolotoga hoko nei. ʼE ko te ʼu fakamoʼoni ʼaia ʼe tou māʼuʼuli nei ʼi te ʼu ʼaho fakamuli, pea ko te Puleʼaga ʼo te ʼAtua kua ina vave foaki mai te ʼu tapuakina kiā nātou ʼaē ʼe ʼoʼofa kiā Sehova. ʼUluaki, tou vakaʼi muʼa te ʼu agaaga e fā ʼo te fakaʼiloga ʼaē neʼe tala e Sesu ʼe hoko anai ʼi totatou temi.

KO TE ʼU MEʼA FAKAMATAKU ʼE HOKO ʼI TE ʼU AHO FAKAMULI

6, 7. Neʼe hoko feafeaʼi ia ʼaho nei ia te ʼu palalau ʼa Sesu ʼo ʼuhiga mo te ʼu tau pea mo te ʼu hoge?

⁶ “E malaga ake anai te puleaga o fakafehagai ki te puleaga, mo te puleagahau o fakafehagai ki te puleagahau.” (Mateo 24:7) ʼI te sēkulō ʼaenī kua hili, neʼe mamate ai te toko lauʼi miliona hahaʼi ʼi te ʼu tau ʼaē neʼe hoko. Neʼe ʼui fēnei e te tagata fai hisitolia Pilitania: “Ko te 20 sēkulō neʼe ko te sēkulō ʼaē neʼe lahi tāfito ai te kau mātea ʼi te hisitolia ʼo te tagata. . . . Neʼe ko te sēkulō neʼe hoko putuputu ai te ʼu tau, heʼe ʼi te ʼu potu fuli ʼo te kele neʼe ʼi ai tuʼumaʼu te ʼu tau, pea ko te ʼu kiʼi temi nounou pe ia ʼaē neʼe mole hoko ai he tau.” ʼE ʼui fēnei ʼi te Worldwatch Institute: “Neʼe lahi ʼaupito age te hahaʼi ʼaē neʼe mamate ʼi te ʼu tau ʼo te 20 sēkulō, ʼi te hahaʼi ʼaē neʼe mamate ʼi te ʼu tau ʼaē neʼe hoko ʼi te ʼuluaki sēkulō ʼo totatou temi ʼo aʼu mai ki te taʼu 1899.” Talu mai te taʼu 1914, neʼe mamate te lauʼi 100 miliona hahaʼi tupu ʼi te ʼu tau. Ko te ʼu lauʼi miliona hahaʼi ʼe nātou māʼuʼuli mamahi pea mo fakaʼofaʼofa koteʼuhi kua mate tanatou ʼu hahaʼi ʼi te tau. Lagi kua hoko pe la kiā koutou he ʼaluʼaga feiā.

⁷ “E i ai anai he u hoge.” (Mateo 24:7) ʼE ʼui e te hahaʼi ʼaē ʼe nātou fai te ʼu kumi, logola ko te meʼa kai kua lahi ʼaupito ʼi te ʼu taʼu e 30 ʼaenī kua hili, kae ko te hoge ʼe kei hoko hoholo pe ia, heʼe tokolahi te hahaʼi ʼe mole lahi tanatou falā moʼo totogi ʼaki hanatou meʼa kai, peʼe mole nātou maʼu honatou kele moʼo to magisi ai. ʼI te ʼu fenua māsisiva, ʼe fakalaka ʼi te 1 miliale te hahaʼi ʼaē ʼe nātou māʼuʼuli ʼi te ʼaho fuli ʼaki pe te foʼi falā e 120 peʼe veliveli age pe la. Tokolahi ʼi te hahaʼi ʼaia ʼe nātou māʼuʼuli pakupaku. Ko te Kautahi Faka Malamanei Ki Te Maʼuli Haohaoa, ʼe ina fakafuafua ʼe mamate ʼi te taʼu fuli ia te toko nima miliona tamaliki ʼuhi pe ko te pakupaku.

8, 9. Koteā te ʼu fakamoʼoni ʼaē kua hoko ia te ʼu lea faka polofeta ʼa Sesu ʼo ʼuhiga mo te ʼu mafuike pea mo te ʼu hoge?

⁸ “E i ai anai he u mafuike lalahi.” (Luka 21:11) ʼE ʼui e te kautahi ʼaē ko te U.S. Geological Survey, talu mai te taʼu 1990, neʼe fakafuafua ʼe hoko ʼi te taʼu fuli te ʼu mafuike e 17 ʼe mālohi feʼauga moʼo faka mafaʼafaʼa te ʼu falefata lalahi pea mo te kele. Pea neʼe fakafuafua neʼe hoko ʼi te taʼu fuli, te ʼu mafuike neʼe mālohi feʼauga moʼo maumauʼi kātoa te ʼu falefata lalahi. ʼE ʼui fēnei ʼi te tahi nusipepa: “ ʼI te ʼu taʼu e 100 kua hili, neʼe lau ko te toko 600 000 hahaʼi tupu neʼe mamate ʼi te ʼu mafuike, pea ko te ʼu meʼa foʼou ʼaē neʼe faʼu e te tagata moʼo puipui ia te hahaʼi ʼi te ʼu mafuike, neʼe nātou fakasiʼisiʼi veliveli pe te kaugamālie ʼo te kau mātea.”

⁹ “E i ai anai . . . he u [taʼi mahaki].” (Luka 21:11) Logola te ʼu faitoʼo foʼou faka tōketā, kae ʼe kei hoko pe ki te malamanei te ʼu mahaki ʼāfea pea mo te ʼu mahaki foʼou. ʼE ʼui ʼi te nusipepa ko te ʼu mahaki e 20 kua tou māhani kiai​—ohage la ko te tuberculose, te malaria, pea mo te choléra​—neʼe maʼu e te tokolahi ʼi te ʼu taʼu e hogofulu ʼaenī kua hili, pea ko ʼihi mahaki kua fakahaʼu ʼo faigataʼa tona faitoʼo ʼaki he ʼu meʼa faitoʼo. Ei, kua maʼu te ʼu mahaki foʼou e 30. Pea ʼe mole heʼeki maʼu he ʼu meʼa faitoʼo ki te ʼu mahaki fuli ʼaia, pea ʼe feala ki te hahaʼi ke nātou mamate ai.

TE ʼU AGAAGA ʼO TE HAHAʼI ʼI TE ʼU ʼAHO FAKAMULI

10. Koteā te ʼu agaaga neʼe fakakikite iā 2 Timoteo 3:​1-5 ʼe koutou sisio kiai ʼi te hahaʼi ia ʼaho nei?

¹⁰ ʼO hilifaki ki te ʼu meʼa fakamataku ʼaē ʼe hoko ʼi te malamanei, neʼe fakakikite ʼi te Tohi-Tapu ʼi te ʼu ʼaho fakamuli ʼe fetogi anai te ʼu agaaga ʼa te hahaʼi. Neʼe fakamatalatala e te ʼapositolo ko Paulo ia te ʼu agaaga ʼa te hahaʼi ʼaia. Iā 2 Timoteo 3:​1-5 (MN ), ʼe tou lau fēnei: “ ʼI te ʼu ʼaho fakamuli ʼe ʼi ai anai te ʼu temi maʼuhiga ʼaupito mo faigataʼa.” Moʼo fakanounou te manatu ʼa Paulo, neʼe ina ʼui ko te hahaʼi ʼe nātou

• kaumeʼa pe anai mo nātou totonu

• kaumeʼa mo te paʼaga

• talagataʼa ki te ʼu mātuʼa

• heʼe agatonu

• heʼeʼofa

• heʼe fakatātāʼofi

• fekai

• kaumeʼa mo te ʼu fakafiafia kae mole kaumeʼa mo te ʼAtua

• ʼe hage ʼe nātou pipiki ki te ʼAtua, kae nātou lītuʼa ki tona mālohi

11. ʼE fakahā feafeaʼi iā Pesalemo 92:7 te meʼa ʼaē ka hoko anai ki te kau agakovi?

¹¹ ʼE koutou sisio koa ki ni hahaʼi ʼe agaaga feiā? Ei. ʼI te ʼu potu fuli ʼo te kele, ʼe lahi te hahaʼi ʼe nātou maʼu te ʼu agaaga ʼaia. ʼE hā ʼaki mai ai ia te temi ʼaē kua vave haga ai te ʼAtua ʼo fakaʼauha nātou, heʼe ʼui fēnei ʼi te Tohi-Tapu: “ ʼE homo ake te kau agakovi ohage ko te vao pea ʼe mātala ia nātou fuli ʼaē ʼe nātou fai te meʼa ʼaē ʼe kovi, ke fakaʼauha nātou ʼo talu ai.”​—Pesalemo 92:7.

TE ʼU TAPUAKINA

12, 13. ʼE mahu feafeaʼi anai “te ʼatamai mālama moʼoni” ʼi “te temi fakaʼosi” ʼaenī?

¹² Ohage ko tona fakakikite ʼi te Tohi-Tapu, ʼe hoko moʼoni te ʼu malaʼia ʼi te ʼu ʼaho fakamuli. Kae logola te maveuveu ʼo te mālama ʼaenī, ʼe maʼu te ʼu tapuakina e te kau atolasio ʼa Sehova.

¹³ Neʼe fakakikite fēnei ʼi te tohi ʼo Taniela: “Ko te ʼatamai mālama moʼoni ʼe mahu anai.” ʼE hoko anai te meʼa ʼaia ʼi te temi fea? ʼE ʼui ʼi te tohi ʼo Taniela ʼi te lolotoga ʼo “te temi fakaʼosi.” (Taniela 12:4) Tāfito talu mai te taʼu 1914, neʼe foaki lahi e Sehova ia te mahino faka Tohi-Tapu kiā nātou ʼaē ʼe nātou fia tauhi moʼoni kiā te ia. Neʼe tuputupu ia tanatou mahino ʼaē ki te ʼu moʼoni faka Tohi-Tapu ʼo ʼuhiga mo te huafa ʼo te ʼAtua pea mo tana fakatuʼutuʼu, mo te sākilifisio faitotogi ʼo Sesu Kilisito, mo te ʼaluʼaga ʼo te kau mate, pea mo te fakatuʼuake. Tahi ʼaē meʼa, neʼe ako e te kau atolasio ʼa Sehova te mulimuli ki te faʼahiga maʼuli ʼaē ʼe nātou fīmālie ai pea mo fakavikiviki ai ki te ʼAtua. Kua toe lahi age tanatou mahino ki te gāue ʼa te Puleʼaga ʼo te ʼAtua, pea mo te ʼu fakatuʼutuʼu ʼaē moʼo fakatokatoka te ʼu fihifihia ʼo te kele. ʼE nātou fakaʼaogaʼi feafeaʼi ia te ʼatamai mālama ʼaia? Moʼo tali kiai, ʼe tou vakaʼi anai te tahi lea faka polofeta ʼe lolotoga hoko nei ʼi te ʼu ʼaho fakamuli.

14. ʼE fakahoko feafeaʼi ia ʼaho nei ia te faka mafola ʼo te logo lelei ʼo te Puleʼaga, pea ko ai ʼaē ʼe nātou faka mafola ia te logo ʼaia?

¹⁴ ʼI tana lea faka polofeta ʼo ʼuhiga mo “te fakaʼosi ʼo te tuʼu ʼo te ʼu faʼahiga meʼa ʼaenī,” neʼe ʼui e Sesu Kilisito ʼi tana lea faka polofeta, “ko te logo lelei ʼaenī ʼo te puleʼaga ʼe faka mafola anai ʼi te kele kātoa.” (Mateo 24:​3, 14, MN ) ʼI te ʼu potu fuli ʼo te kele, neʼe faka mafola ʼi te ʼu fenua e 230 ia lea e 400 tupu ia te logo lelei ʼo te Puleʼaga​—te ʼuhiga ʼo te Puleʼaga ʼaia, te ʼu gāue ʼaē ka ina fai, pea mo te ʼu meʼa ʼaē ʼe feala ke tou fai ke tou maʼu tana ʼu tapuakina. Ko te ʼu lauʼi miliona kau Fakamoʼoni ʼa Sehova ʼe nātou faka mafola te logo lelei ʼo te Puleʼaga ʼaki he loto faʼafai. ʼE nātou ʼōmai mai “te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli.” (Apokalipesi 7:​9, MN ) ʼE fai e te kau Fakamoʼoni te ʼu ako Tohi-Tapu ʼe mole totogi mo te ʼu hahaʼi e lauʼi miliona ʼe nātou fia mahino pe koteā ʼaē ʼe akoʼi moʼoni mai ʼi te Tohi-Tapu. ʼE ko he fakahoko fakaofoofo ʼaia ʼo te lea faka polofeta ʼo Mateo 24:​14, tāfito la he neʼe fakakikite e Sesu ko te kau Kilisitiano moʼoni ʼe “[fehiʼaʼinaʼi] anai [e] te tagata fuape”!​—Luka 21:17.

KOTEĀ ANAI ʼAĒ KA KOUTOU FAI?

15. (a) ʼE koutou fakamoʼoni koa ʼe tou māʼuʼuli nei ʼi te ʼu ʼaho fakamuli, pea he koʼe ʼe koutou fakatui kiai? (b) Koteā ʼaē ka hoko anai ʼi “te fakaʼosi” ki te hahaʼi ʼaē ʼe nātou fakafeagai kiā Sehova pea mo te hahaʼi ʼaē ʼe nātou fakalogo ki te takitaki ʼa te Puleʼaga ʼo te ʼAtua?

¹⁵ ʼI te lahi ʼo te ʼu lea faka polofeta ʼaē ʼe lolotoga hoko nei, ʼe koutou fakamoʼoni koa ʼe tou māʼuʼuli nei ʼi te ʼu ʼaho fakamuli? Ka ʼosi anai te faka mafola ʼo te logo lelei ohage ko tona loto kiai ia Sehova, pea ʼe hoko moʼoni mai anai “te fakaʼosi.” (Mateo 24:​14, MN ) Ko “te fakaʼosi” ʼe ko te temi ʼaē ka pulihi ai anai e te ʼAtua ia te agakovi ʼi te kele. Moʼo fakaʼauha ia nātou fuli ʼaē ʼe nātou fakafeagai kiā te Ia, ʼe fakaʼaogaʼi anai e Sehova ia Sesu pea mo te ʼu ʼāselo mālohi. (2 Tesalonika 1:​6-9) Ko Satana pea mo tana ʼu temonio ʼe mole nātou toe fakahēʼi anai te hahaʼi. ʼOsi ʼaia, pea ko te Puleʼaga ʼo te ʼAtua ʼe ina foaki anai te ʼu tapuakina lahi kiā nātou fuli ʼaē ʼe fakalogo ki tana takitaki faitotonu.​—Apokalipesi 20:​1-3; 21:​3-5.

16. Koteā te ʼu meʼa ʼaē ʼe lelei anai ke koutou fai?

¹⁶ ʼI te kua ōvi mai ʼo te fakaʼosi ʼo te tuʼu ʼa Satana, ʼe tonu ke koutou tahi fai te fehuʼi ʼaenī, ‘Koteā ʼaē ʼe tonu ke au fai?’ ʼE lelei ke tou haga ako ke koutouʼiloʼi lelei ia Sehova pea mo tana ʼu lēkula ʼo ʼuhiga mo tatou. (Soane 17:3) Koutou ako fakalelei te Tohi-Tapu. Koutou fakatahi tuʼumaʼu kiā nātou ʼaē ʼe nātou fia fai te finegalo ʼo Sehova. (Hepeleo 10:​24, 25) Koutou metitāsioʼi te ʼatamai mālama lahi ʼaē ʼe foaki e Sehova ʼAtua ki tana hahaʼi ʼi te malamanei kātoa, pea mo koutou fai te ʼu fetogi ʼaē ʼe ʼaoga ʼi tokotou maʼuli ke feala ke tapuakina koutou e te ʼAtua.​—Sakopo 4:8.

17. He koʼe ko te fakaʼauha ʼo te kau agakovi ʼe hoko fakapunamaʼuli anai ki te tokolahi?

¹⁷ Neʼe fakakikite e Sesu ko te tokolahi ʼe mole nātou ʼiloʼi anai ʼe tou māʼuʼuli nei ʼi te ʼu ʼaho fakamuli. ʼE hoko fakafokifā anai te fakaʼauha ʼo te kau agakovi, pea ʼe punamaʼuli anai te tokolahi ʼi te ʼaho ʼaia, ohage pe te hoko mai ʼo te ʼaho ʼaia ko te haʼu ʼa he tagata kaihaʼa ʼi te poʼuli. (1 Tesalonika 5:2) Neʼe fakatokaga fēnei e Sesu: “[Ohage] ko te temi o Noe, e feia anai te haele mai o te Foha o te tagata. Koteuhi i te temi aia, i mua o te tulivio, nee natou [“kakai pea mo ʼiʼinu,” MN ], nee natou faiʼohoana mo talaga ohoana o kaku ki te aho nee hu ai Noe ki te aleka. Pea nee mole natou [“nonofo tōkakaga,” MN ] o kaku ki te hoki to a te tulivio pea nee ina ave fuli natou, e feia anai mo te haele mai o te Foha o te tagata.”​—Mateo 24:​37-39.

18. Koteā te fakatokaga ʼa Sesu ʼe tonu anai ke tou mulimuli lelei kiai?

¹⁸ Koia, neʼe ʼui fēnei e Sesu ki te hahaʼi ʼaē neʼe fakalogo ki tana ʼu faiakonaki: “Koutou tokaga kia koutou, naa mafasia outou loto i te maveuveu, mo te inu vale pea mo te u fakahoha o te mauli, naa ha fakapunamauli kia koutou te aho aia o hage he kupega; koteuhi e to anai kia natou e nonofo i te kelekele katoa. Kae koutou alaʼala pea koutou faikole i te temi fuape, ke koutou malohi o feholaki maia meafuape alâ e amanaki hoko mai, pea ke koutou tutuu ia mua o te Foha o te tagata [heʼe tali koutou e te ʼAtua].” (Luka 21:​34-36) ʼE lelei ke tou mulimuli lelei ki te ʼu palalau ʼa Sesu. Koteā tona tupuʼaga? Koteʼuhi ko nātou ʼaē ka tali e Sehova ʼAtua pea mo “te Foha o te tagata,” ia Sesu Kilisito, ʼe feala anai ke nātou hāo ʼi te fakaʼosi ʼo te tuʼu ʼa Satana pea mo māʼuʼuli ʼo heʼegata ʼi te mālama foʼou taulekaleka ʼaē kua ōvi mai!​—Soane 3:16; 2 Petelo 3:13.