Kei Koutou Manatuʼi Koa?

Neʼe ʼaoga koa kia koutou te ʼu Tule Leʼo fakamuli? Koutou vakaʼi peʼe koutou manatuʼi tona ʼu puani maʼuhiga ʼo koutou tali ki te ʼu fehuʼi ʼaenī:

◻ Koteā te ʼu fehuʼi e lua ʼaē neʼe ʼaoga ki te kau Kilisitiano tokolahi moʼo fai he tonu ʼo ʼuhiga mo he gāue?

Koʼeni te ʼuluaki fehuʼi: ʼE tapuʼi koa e te Tohi-Tapu te gāue ʼaia? Koʼeni te lua fehuʼi: Kapau ʼe ʼau fai te gāue ʼaia, ʼe ʼau kau anai koa ʼi he ʼu meʼa ʼe tapuʼi e Sehova?​—15/4, pasina 28.

◻ Koteā te faka ʼuhiga ʼo te ʼui ʼaē ‘neʼe tuku te keleasio ki te vaʼiga’? (Loma 8:​20)

Neʼe tuku tatou ki te vaʼiga ʼuhi ko te agahala ʼa tatatou ʼu ʼuluaki mātuʼa, ia Atama mo Eva. Neʼe ‘mole tou loto kiai,’ pea neʼe mole tou filifili. Kae neʼe tuku fakaholo mai kia tatou te ʼaluʼaga ʼaia. ʼI tana manavaʼofa, neʼe faka fealagia e Sehova ke nā maʼu fānau logope la tana ʼiloʼi ʼaē ʼe nā tuku anai kia nātou te heʼe haohaoa, mo te agahala pea mo te mate. Ko te mate neʼe mafola leva ki te tagata fuape, ko te faka ʼuhiga ʼaia ʼo te ʼui ʼaē “neʼe tuku [e te ʼAtua] te keleasio ki te vaʼiga.”​—1/5, pasina 5.

◻ He koʼe ʼe feala hatatou ʼui, ʼe ‘tuʼu anai te meʼa fakalialia ʼi he potu tapu’ ʼi te ka haʼu? (Mateo 24:15)

ʼI te ʼuluaki fakahoko ʼo te lea faka polofeta, ‘ko te meʼa fakalialia ʼaē neʼe tuʼu ʼi he potu tapu’ neʼe faka ʼuhiga ki te ʼohofiʼi ʼo Selusalemi e te kau Loma ʼaē neʼe takitaki e te Senelale ko Gallus ʼi te taʼu 66 ʼo totatou temi. Ko te fakahoko ʼo te ʼohofiʼi ʼaia ʼi te temi ʼaenī​—te kamata ʼo te mamahi lahi—​ʼe mole heʼeki hoko ia. (Mateo 24:21) Koia, “ko te meʼa fakalialia ʼaē ʼe ina fakatupu te maumau,” ʼe mole heʼeki tuʼu ia ʼi he potu tapu.​—1/5, pasina 16, 17.

◻ ʼE lava feafeaʼi ki he tāmai pea mo he faʼe ʼe nā gāue, ke nā maʼu he temi ke nā fakatahi ai mo tanā fānau?

Ko te faʼe ʼaē ʼe gaʼegaʼe ʼi tana liliu mai te gāue, ʼe feala ke ina kole ki tana fānau ke nātou gaohi fakatahi te meʼa kai mo ia. Ko te tāmai ʼaē ʼe lahi tana ʼu gāue ʼi te fakaʼosi vāhaʼa, ʼe feala ke ina vaevae te ʼu gāue ʼaia mo tana fānau.​—15/5, pasina 6.

◻ Koteā te meʼa ʼaē ʼe tonu ke fai e nātou ʼaē ʼe nātou ‘haʼele ʼi te ala ʼa Sehova’? (Selemia 7:​23)

Kapau ʼe tou fia haʼele ʼi te ala ʼa Sehova, pea ʼe maʼua ke tou agatonu kia te ia—ke tou lotomālohi ʼo tauhi ʼāteaina pe kia te ia. ʼE ʼaoga ke tou falala kia te ia—ke tou tui fakamalotoloto ʼe moʼoni tana ʼu fakapapau pea ʼe hoko katoa anai. Ko tatatou haʼele ʼi te ala ʼa Sehova, ʼe fakamaʼua ai ke tou fakalogo—ke tou mulimuli tuʼumaʼu ki tana ʼu lao pea mo tana ʼu lekula māʼoluga. (Pesalemo 11:7)​—15/5, pasina 14.

◻ Koteā te ʼu maʼua maʼuhiga e fā ʼaē ʼe feala ke fakahoko e te ʼu ‘tagata ʼaē neʼe foaki’? (Efeso 4:8)

ʼE feala ke nātou fakatonutonuʼi tatou ʼaki te agamālū, mo fakaloto mālohiʼi tatou ʼaki te ʼofa, mo taupau te logo tahi ʼo te kokelekasio, pea mo puipui tatou ʼaki he lototoʼa. (Efeso 4:​12-​14)​—1/6, pasina 14.

◻ Koteā ʼaē ʼe tou ako mai te felogoi ʼa Paulo mo te toko teau hahaʼi ʼaē ʼe talanoa kiai ʼi te tohi ʼo Gaue pea mo tana tahi ʼu tohi?

ʼE tonu ke tou kaugā gāue tuʼumaʼu mo te kautahi ʼa te ʼAtua, mo totatou kokelekasio pea mo totatou ʼu tēhina mo tuagaʼane. ʼE ʼaoga kia tatou tanatou tokoni, mo tanatou lagolago mai kia tatou pea mo tanatou fakaloto fīmālieʼi tatou ʼi te ʼu temi ʼaē ʼe lelei mo te ʼu temi faigataʼa.​—1/6, pasina 31.

◻ Koteā te ʼu faʼahi e tolu ʼaē ka koutou fakaʼaogaʼi moʼo tokoni ki te hahaʼi ke nātou manatu ki te Tupuʼaga?

ʼE feala ke kita talanoa ki te lelei ʼaupito ʼo te fakaʼaluʼalu ʼo te ʼatulaulau, mo te haʼuʼaga ʼo te maʼuli ʼi te kele, pea mo te makehe ʼaupito ʼo te ʼuto ʼa te tagata, pea mo tona ʼu fealagia kehekehe.​—15/6, pasina 18.

◻ He koʼe ʼe maʼuhiga ke tou mahino ki te faka ʼuhiga ʼo te huafa ʼo te Tupuʼaga?

Ko te huafa ʼa te ʼAtua ko tona faka ʼuhiga “ ʼE Ina Fakahoko,” pea ʼe hā ʼaki mai ʼe ina fai he ʼu fakatuʼutuʼu pea mo ina fakahoko. Kapau ʼe tou ʼiloʼi pea mo tou fakaʼaogaʼi tona huafa, pea ʼe mahino lelei anai kia tatou ʼe ina fakahoko tana ʼu fakapapau pea ʼe gāue moʼo fakahoko tana fakatuʼutuʼu.​—15/6, pasina 21.

◻ Koteā ʼaē ʼe feala ke tou fai ke kau te fānau ki te ako faka famili ʼo te Tohi-Tapu?

Kapau ʼe feala, pea koutou fakatuʼutuʼu ke maʼu e takotou ʼu fānau fuli hanatou Tohi-Tapu pea mo hanatou nusipepa. ʼE feala ke kole e te tāmai ki he toe veliveli ke ina fakamahino he paki ʼi te tohi ʼaē ʼe nātou ako. Peʼe feala ke ina kole ki he tahi tamasiʼi ke ina teuteuʼi fakatomuʼa he vaega ke ina lau. ʼE feala ki te ʼu fānau lalahi ke nātou fakamahino he faʼahiga fakaʼaogaʼi ʼo he puani ʼo te ako.​—1/7, pasina 15.

◻ Koteā te ʼu fakatuʼutuʼu ʼaē ʼe feala ke tou fai mokā tou teuteuʼi te ʼu fono ʼi tatatou ako faka famili?

(1) ʼE fai anai e takotou famili fuli hanatou tali ʼi te ʼu fono ʼo te kokelekasio; (2) ʼe nātou tali anai ʼaki tanatou faʼahiga palalau māhani; (3) ʼe nātou fakaʼaogaʼi anai he ʼu vaega Tohi-Tapu; (4) ʼe nātou vakaʼi anai te ʼu meʼa ʼaē ʼe nātou ako ke feala hanatou maʼuliʼi moʼo fakaʼaogaʼi kia nātou totonu.​—1/7, pasina 20.

◻ Koteā te puleʼaki ke lelei te nofo ʼohoana?

ʼE ʼaoga tāfito ke felogoi lelei te tagata pea mo te fafine, pea mo nā palalau fakahagatonu mo kapau ʼe nā loto ke maui mālie tonā maʼuli faka taumatuʼa. ʼE tonu ke nā fakahā te ʼu meʼa ʼaē ʼe ʼi tonā loto pea mo tanā ʼu manatu. Pea ko te felogoi lelei ʼe toe faka ʼuhiga ki te palalau ki te ʼu meʼa lelei ʼaē ʼe nātou lagalaga he tahi, mo fakaloto mālohiʼi, pe ko he ʼu vilitute, pea ko he ʼu meʼa ʼe vikiʼi pea mo fakaloto fīmālie. (Efeso 4:​29-​32; Filipe 4:8)​—15/7, pasina 21.

◻ Koteā te ‘ala ʼa Sehova’? (Pesalemo 25:​8, 9, 12)

Ko te ala ʼaia ʼe ko te ala ʼo te ʼofa. ʼE fakatafito ki te fai ʼo te meʼa ʼaē ʼe lelei ʼo mulimuli ki te ʼu lekula ʼa te ʼAtua. ʼE fakahigoaʼi e te Tohi-Tapu te maʼuliʼi ʼo te ʼofa ʼaia ko “he ala takimua aupito.” (1 Kolonito 12:31)​—1/8, pasina 12.