Kei Koutou Manatuʼi Koa?

Neʼe koutou lau fakalelei koa te ʼu alatike ʼo te ʼu numelo ʼo Te Tule Leʼo? ʼE koutou leleiʼia anai hakotou toe fakamanatuʼi te ʼu puani ʼaē ki lalo:

▫ Koteā te fakamoʼoni fakalotoʼi neʼe foaki e te ʼu faʼahiga gāue ʼa te laumālie maʼoniʼoni ʼi te ʼuluaki sēkulō?

Neʼe tuku e te ʼu gāue ʼaia te fakamoʼoni ko te ʼAtua ʼe mole kei ina fakaʼaoga te kokelekasio ʼo Iselaele ʼaē kua taʼu 1 500 ohage ko hana hahaʼi makehe, kae ko tana tapuakina ʼi te temi nei kua tuku ifo ki te kokelekasio faka kilisitiano foʼou, ʼaē neʼe fakanofo e tona ʼAlo (Vakaʼi ia Hepeleo 2:2-4). — 15/8, pasina 5.

▫ Koteā te ʼu fakamatala ʼo ʼuhiga mo te tuputupu fakaofoofo neʼe maʼu e te kau Fakamoʼoni ʼa Sehova?

ʼUluaki, ʼe nātou maʼu te tapuaki ʼa te ʼAtua. Ko te gāue ʼaia ʼa te ʼAtua. Ko te ako ʼaē ʼe fai ʼi te gāue faka mafola evaselio ʼa te kau Fakamoʼoni ʼa Sehova ʼe fakatafito ki te Tohi-Tapu. Ko te tahi tupuʼaga ʼo te fua manuʼia ʼo tanatou gāue ʼaia, heʼe nātou fakamoʼoni katoa ko Kilisito Sesu ko te Pule ʼo te kokelekasio faka kilisitiano. — 1/9, pasina 19.

▫ He koʼe koa neʼe manavaʼofa ia Sehova ki te agahala mamafa ʼaē ʼa Tavite pea mo Pati-Sepa?

Koteʼuhi ko te fuakava ʼo te Puleʼaga ʼaē neʼe ina fai pea mo Tavite, kae tāfito ko te loto manavaʼofa pea mo te fakahemala moʼoni ʼaē ʼa Tavite (1 Samuele 24:4-7; 2 Samuele 7:12; 12:13; Pesalemo 51:1, 2, 17). — 15/9, ʼu pasina 10, 11.

▫ Koteā te ʼu faʼahiga fakamoʼoni e tolu ʼe maʼu ʼi te ʼu Tohi faka keleka faka kilisitiano moʼo tekeni te ʼuhiga Mesia ʼaē ʼo Sesu?

Ko te hākoga ʼo Sesu ʼe ko he fakamoʼoni ʼuluaki ʼaia (Mateo 1:1-16; Luka 3:23-38). Lua, ko te fakahoko ʼo te ʼu lea faka polofeta. Ko te ʼu tuʼuga lea faka polofeta ohage ko ʼaē ʼe tou maʼu ia Taniela 9:25, ʼaē ʼe ina fakahā ko Sesu ko te Mesia. Tolu, ko te fakamoʼoni totonu ʼa te ʼAtua; neʼe ina fai te faʼahi ʼaia ʼi te ʼu ʼaluʼaga ʼe tuʼa tolu ʼaki tona leʼo ʼo ia totonu (Mateo 17:5; Luka 3:21, 22; Soane 12:28). — 1/10, ʼu pasina 10, 12.

▫ Koteā te faka ʼuhiga ʼo te ʼui ʼaē ʼa Sesu ia Mateo 24:37 fēnei: “Ohage ko te ʼu ʼaho ʼo Noe, ʼe toe feiā anai mo te haʼu ʼo te Foha ʼo te tagata”?

Neʼe faʼu e Noe te aleka pea neʼe ina fakatokagaʼi ki te kau agakovi lolotoga taʼu ʼe lauʼi hogofulu ʼi muʼa ʼo te haʼu ʼo te Tulivio ʼo faka ʼauha te mālama fakahehema ʼo te temi ʼaia. ʼO toe feiā aipe, ko te haʼu fakapulipuli ʼa Kilisito ʼe tonu ke hoko ʼi ni ʼu taʼu ʼe lauʼi hogofulu tupu lolotoga te temi ʼaē ʼe hoko ai te fakamoʼoni lahi ʼi muʼa ʼo te toe mamahi lahi. — 1/10, pasina 16.

▫ Koteā te ʼu meʼa tāfito ke lelei he ako faka tohi-tapu faka famili?

ʼE tonu ke totogi te temi ʼo ʼuhiga mo te ako ʼaia. ʼAua naʼa faʼao e te televisio peʼe mo ʼihi ake meʼa, totatou temi ʼaē ki te ako. Ko te ʼu meʼa ʼe ʼaoga tāfito ki te famili ʼe tonu ke tokagaʼi. Koutou fai he ʼu fehuʼi ke koutou ʼiloʼi ai ko takotou fānau ʼe nātou mahino ki te ʼu meʼa ʼaē neʼe nātou ako (Mateo 17:25). Koutou taupau te ʼaluʼaga ʼo te ako ke leleiʼia e te fānau. Koutou fiafia lolotoga ʼo te ako, pea ke koutou fai ke kau fuli te fānau ki te ako ʼaia. — 15/10, pasina 17.

▫ ʼE feafeaʼi anai te manatu ʼa te kau kilisitiano ʼo ʼuhiga mo te ʼu meʼa kai ʼaē ʼe feala ke fai ʼaki te toto?

ʼE tonu ke tokaga te kau kilisitiano naʼa nātou tui fakavale ki he ʼu logo fakalotolotolua ʼe ʼave haʼele, feiā aipe mo te vakaʼi ki te meʼa neʼe tohi peʼe ko te kumi ki te ʼu hahaʼi gāue kanoʼi manu. Kae, kapau ʼe tou ʼiloʼi papau ʼe lahi te fakaʼaogaʼi ʼo te toto — ʼi te mea kai pea mo te ʼu faitoʼo — ʼe tonu aipe ke haga fakalogo te kau kilisitiano ki te fakatotonu ʼaē ʼa te ʼAtua ke ʼaua naʼa tou fakaʼaogaʼi te toto (Gāue 15:28, 29). — 15/10, ʼu pasina 30, 31.

▫ ʼE fakaʼiloga feafeaʼi e te tohi ʼo Tāʼaga Lea te loloto ʼaē ʼo te ʼu faʼahiga fai ako fakalaumālie neʼe fakaʼaogaʼi ʼi Iselaele?

ʼE fakahā e te tohi ʼo Tāʼaga Lea ko te ako ʼaia neʼe fakatuʼutuʼu ʼo ʼuhiga mo nātou ʼaē “ ʼe mole heʼeki māhani” ki te ʼu meʼa maʼuhiga ko te poto, te akonaki, te ʼatamai, te fakasiosio tonu, te fakamāu, te mālama pea mo te poto fakakaukau — ko meʼa fuli ʼi “te manavasiʼi kia Sehova”. (Tāʼaga Lea 1:1-7; 2:1-14.) — 1/11, pasina 12.

▫ Koteā te manatu poto ʼo ʼuhiga mo te ako ʼe tonu ke maʼu e te kau tūpulaga ʼi te temi nei?

ʼE tonu ke fakaʼaoga e te kau kilisitiano te ako ohage ko he meʼa moʼo fakahoko he meʼa ke fai. Ko tanatou fakatuʼutuʼu ʼi te ʼu ʼaho fakamuli ʼaenī ke nātou gāue lahi pea mo gāue lelei kia Sehova, pea mo kapau ʼe fealagia kia nātou ke nātou liliu ʼo pionie. — 1/11, pasina 18.

▫ He koʼe neʼe fakamaʼua e Sehova ki te fenua ʼo Iselaele ke ina totogi te ʼu time?

ʼUluaki, ʼe feala ke nātou fakahā ai tanatou leleiʼia te agalelei ʼa Sehova. Lua, ʼe feala hanatou kau ki te lagolago ʼo te kau Levite, ʼaē neʼe feala ai leva hanatou tokaga tāfito ki tonatou ʼu maʼua, ohage la ko te akoʼi ʼo te Lao (Vakaʼi ia 2 Fakamatala 17:7-9). — 1/12, pasina 9.

▫ Koteā te time ʼaē ʼe tonu ke foaki e te kau kilisitiano (Malakia 3:10)?

ʼE fakatā te time ki te vahe ʼaē ʼo ʼatatou meʼa ʼe tou foaki kia Sehova peʼe mo fakaʼaoga ki tana gāue. ʼE ko he fakamoʼoni ʼaia ʼo totatou ʼofa kia ia pea mo tatatou ʼiloʼi ko tatou ko te meʼa ʼa ia.— 1/12, pasina 15.