“Koutou Fetuku Mai Te Hogofulu ʼo Te Vahe Fuli Ki Te Faleoko”

“Ke koutou fakalelei age, ke koutou ʼahiʼahiʼi ʼau ki te faʼahi ʼaia, (...) ke koutou mamata peʼe mole ʼau avahi anai kia koutou te ʼu matapā ʼo selo.” — Malakia 3:10.

1. a) ʼI te nima sēkulō ʼi muʼa ʼo totatou temi, koteā te fakaafe neʼe fai e Sehova ki tana hahaʼi? b) ʼI te ʼuluaki sēkulō ʼi muʼa ʼo totatou temi, koteā te meʼa neʼe hoko ʼi te haʼu ʼaē ʼa Sehova ki te fale lotu ʼo fakamāu?

ʼI TE nima sēkulō ʼi muʼa ʼo totatou temi, neʼe mole agatonu te kau Iselaele kia Sehova. Neʼe mole nātou foaki te ʼu time pea neʼe nātou mōlaga te ʼu manu heʼemaʼa ki te fale lotu. Kae, neʼe fakapapau age e Sehova kapau ʼe nātou foaki katoa te time ki te faleoko, ʼe ina foaki anai he tapuakina (Malakia 3:8-10). Hili ki ai te ʼu taʼu e 500, ko Sehova ʼaē neʼe fakafofoga e Sesu ko te faifekau ʼo te fuakava, neʼe haʼu ki te fale lotu ʼo Selusalemi moʼo fakamāu (Malakia 3:1). Neʼe hāla Iselaele mo tana taupau te fuakava ʼaia, kae ko nātou ʼaē neʼe liliu kia Sehova neʼe nātou maʼu te tapuaki lahi (Malakia 3:7). Neʼe fakanofo nātou ko te ʼu foha fakalaumālie ʼo Sehova, ko te fakatupu foʼou, “ko te Iselaele ʼa te ʼAtua”. — Kalate 6:16; Loma 3:25, 26.

2. Ko te temi fea ʼaē neʼe liuga lua ai te fakahoko ʼo te ʼu palalau ia Malakia 3:1-10, pea koteā te fakaafe ʼe fai kia tatou ʼo ʼuhiga mo te faʼahi ʼaia?

² Lagi hili ki ai taʼu e 1 900, ʼi te taʼu 1914, neʼe fakanofo Sesu ko te Hau ʼo te Puleʼaga ʼo te ʼAtua ʼi selo, pea ko te ʼu palalau fakaʼatua ia Malakia 3:1-10 neʼe liuga lua tona fakahoko. ʼO ʼuhiga mo te meʼa fakaofoofo ʼaia neʼe hoko, ʼe fakaafe te kau kilisitiano ʼo te temi nei ke nātou foaki katoa te time ki te faleoko. Kapau ʼe tou fai te meʼa ʼaia, ʼe tou maʼu anai te ʼu tapuakina ʼo aʼu ki te temi ʼe mole kei ʼi ai he hoge.

3. Ko ai koa te faifekau ʼaē neʼe ina tofa te ala ia muʼa ʼo Sehova a) ʼi te ʼuluaki sēkulō? b) ʼi muʼa ʼo te ʼuluaki tau faka malamanei?

³ ʼO ʼuhiga mo tana haʼu ʼaē ki te fale lotu, ʼe fēnei te ʼui ʼa Sehova: “Koʼeni ʼe ʼau fekauʼi atu taku faifekau, pea ʼe ina tofa anai he ala ʼi ʼoku muʼa.” (Malakia 3:1). Neʼe hoko te meʼa ʼaia ʼi te ʼuluaki sēkulō ʼi te temi ʼaē neʼe faka mafola e Soane Patita ki te kau Iselaele ke nātou fakahemala ʼi tanatou ʼu agahala (Maleko 1:2, 3). ʼE ʼi ai koa he teuteu ʼo ʼuhiga mo te lua haʼu ʼa Sehova ki tona fale lotu? Ei. Ia taʼu ʼe lauʼi hogofulu ʼi muʼa ʼo te ʼuluaki tau faka malamanei, ko te kau ako ʼo te Tohi-Tapu neʼe nātou tala te akonaki maʼa ʼo te Tohi-Tapu feiā aipe mo te ʼu akonaki loi ʼaē ʼe fakalainoaʼi te ʼAtua, ohage la ko te Tahi Tolu pea mo te ʼu akonaki ʼo te ʼifeli. Neʼe nātou toe valoki te fakaʼosi ʼo te temi ʼo te kau Senetile ʼi te taʼu 1914. Tokolahi neʼe nātou liliu ko te kau toʼo ʼo te mālama ʼo te moʼoni. — Pesalemo 43:3; Mateo 5:14, 16.

4. Koteā te fehuʼi neʼe fai lolotoga ʼo te ʼaho ʼo te ʼAliki?

⁴ ʼE fakahā e te Tohi-Tapu, neʼe kamata te taʼu 1914 ʼaki “te ʼaho ʼo te ʼAliki”. (Fakahā 1:10.) Ko te ʼu meʼa fakamataku ʼaē neʼe hoko ʼi te ʼaho ʼaia, ohage ko te mahino ʼaē ki “te tagata kaugana agatonu mo poto” pea mo tona fakanofo “ki tana [te Pule] ʼu meʼa fuli”. (Mateo 24:45-47.) Talu te taʼu 1914, ko te toko lauʼi afe ʼēkelesia ʼe nātou tala ʼe nātou kilisitiano. Ko ai koa te kūtuga ʼaē ʼe hinoʼi e te Pule, ko Sesu Kilisito, ko tana tagata kaugana agatonu mo poto? Ko te fehuʼi ʼaia neʼe hoko ʼi te temi ʼaē neʼe haʼu ai Sehova ki te fale lotu.

Tana haʼu ki te fale lotu fakalaumālie

5, 6. a) Ko te fale lotu fea ʼaē neʼe haʼu ia Sehova ʼo fakamāu? b) Neʼe fakamāuʼi feafeaʼi e Sehova te keletiate?

⁵ Kae ko te fale lotu fea ʼaē neʼe ʼalu kiai? ʼE tou mahino foki ʼe mole ko te fale lotu ʼaē neʼe tuʼu ʼi Selusalemi. Ko te fale lotu fakamuli ʼaia neʼe faka ʼauha ʼi te taʼu 70 ʼo totatou temi. Kae, ko Sehova ʼe ʼi ai tona fale lotu lahi age ʼaē neʼe fakatā e te fale lotu ʼi Selusalemi. Neʼe talanoa ia Paulo ki te fale lotu lahi ʼaia pea mo fakahā ʼe lahi moʼoni age ia, ʼaki te potu maʼoniʼoni ʼi selo pea mo te malaʼe ʼaē ʼi heni ko te kele (Hepeleo 9:11, 12, 24; 10:19, 20). Ko te fale lotu fakalaumālie lahi ʼaia ʼaē neʼe haʼu ki ai Sehova moʼo fakamāu. — Vakaʼi ia Fakahā 11:1; 15:8.

⁶ Ko te meʼa ʼaia neʼe hoko ʼanafea? ʼAki te fakamoʼoni ʼaē ʼe maʼu, neʼe hoko ʼi te taʼu 1918a te meʼa ʼaia. Koteā tona fua? Ohage la ki te keletiate, neʼe mamata ia Sehova ki te kautahi ʼe liligi toto, pea mo te faʼahiga tuʼu faka lotu fakahehema neʼe tono mo te mālama ʼaenī, neʼe kaugā gāue mo te koloā pea mo fakamamahi te masiva, ʼo ina akoʼi tāfito te ʼu akonaki faka pagani ʼo mole ina mulimuli ki te tauhi maʼa (Sake 1:27; 4:4). ʼAki ia Malakia, neʼe fēnei te fakatokaga ʼa Sehova: “ ʼE ʼau liliu anai ko te fakamoʼoni vave ʼe fakafeagai ki te kau hahaʼi gāue faka temonio, pea mo te kau tono, pea mo nātou ʼaē ʼe nātou fai te ʼu fakapapau loi, pea mo nātou ʼaē ʼe nātou aga fakakākā mo te totogi ʼo ia ʼe gāue, mo te fafine vitua pea mo ʼaē ʼe mole hana tāmai.” (Malakia 3:5). Neʼe fai e te keletiate te meʼa fuli ʼaia pea neʼe kovi ʼaupito. ʼI te taʼu 1919 neʼe ʼiloga lelei ko Sehova neʼe ina tautea ia ia ki te faka ʼauha feiā aipe mo te toe ʼo te Papiloni Lahi, te puleʼaga faka malamanei ʼo te lotu hāla. Talu te taʼu ʼaia, neʼe fai te kalaga ki te hahaʼi agatonu ʼo fēnei: “Koutou mavae mai ai, ʼe taku hahaʼi.” — Fakahā 18:1, 4.

7. Ko ai koa ʼaē neʼe hinoʼi e Sesu ko tana tagata kaugana agatonu mo poto?

⁷ Pea ko ai koa te tagata kaugana agatonu mo poto? ʼI te ʼuluaki sēkulō, neʼe kamata ʼaki te kiʼi kūtuga ʼaē neʼe ina tali te gāue faka mafola ʼa Soane Patita pea mo Sesu ʼaē ko te faifekau ʼo te fuakava. ʼI totatou temi, neʼe ko te kiʼi toko lauʼi afe neʼe nātou tali lelei te gāue teuteu ʼa te kau Ako Tohi-Tapu ʼi te ʼu taʼu ʼi muʼa atu ʼo te ʼuluaki tau faka malamanei. Neʼe nātou faʼa kātakiʼi te ʼu fakataga mālohi ʼi te lolotoga ʼo te ʼuluaki tau faka malamanei, ʼo nātou fakahā aipe tanatou kau ʼaē mo Sehova.

Te gāue fakamaʼa

8, 9. Talu mai te taʼu 1918, ko te ʼu faʼahi fea ʼaē neʼe ʼaoga ke fakamaʼa ai te tagata kaugana agatonu mo poto, pea koteā te fakapapau neʼe fai e Sehova ki te faʼahi ʼaia?

⁸ Kae, neʼe ʼaoga pe la ki te kūtuga ʼaia ke fakamaʼa ia nātou. Ko ʼihi ia nātou neʼe pipiki ki te keletiate neʼe nātou liliu ko te kau fili ʼo te tui pea neʼe toʼo nātou ʼi te hahaʼi ʼa Sehova (Filipe 3:18). Ko ʼihi age neʼe mole nātou fia ʼamo tonatou ʼu maʼua ʼaē ko te tauhi kia Sehova pea neʼe nātou hēhē (Hepeleo 2:1). Pea tahi foki ʼaē, neʼe ʼi ai mo te ʼu gāue faka papiloni neʼe ʼaoga ke pulihi. Mo te tagata kaugana agatonu mo poto neʼe fakamaʼa foki. Neʼe akoʼi nātou ki he aga fakapotopoto ʼo ʼuhiga mo te ʼu meʼa ʼo te mālama ʼaenī pea ke nātou maʼuliʼi. Māʼia pe la te kovi ʼaupito ʼo te mālama ʼaenī, neʼe tonu aipe ke nātou tau fakamālohi moʼo taupau te kokelekasio ke maʼa ʼi te ʼu faʼahi ʼo te aga pea mo te ʼu meʼa fakalaumālie. — Vakaʼi ia Suta 3, 4.

⁹ ʼIo, ko te fakamaʼa neʼe ʼaoga, kae ʼi te ʼofa ʼo Sehova neʼe ina fakapapau ʼo ʼuhiga mo te fakanofo hau ʼo Sesu, ʼo fēnei: “ ʼE tonu anai ke nofo ohage ko he tagata afi tutu ukamea pea ko he tagata fakamaʼa ʼo te siliva, pea ʼe tonu anai ke ina fakamaʼa te ʼu foha ʼo Levi; pea ʼe tonu anai ke ina fakamaʼa ia nātou ohage ko te aulo pea mo te siliva, pea ʼe mahino papau ia, ko nātou ko te kau mōlaga faitotonu anai maʼa Sehova.” (Malakia 3:3). Talu te taʼu 1918, ko Sehova, ʼaki te faifekau ʼo te fuakava ʼaia, neʼe ina fakahoko tana fakapapau pea mo ina fakamaʼa tana hahaʼi.

10. Koteā te faʼahiga mōlaga ke foaki e te hahaʼi ʼa te ʼAtua, pea koteā te fakaafe ʼaē ʼe fai e Sehova kia nātou?

¹⁰ Ko te ʼu tēhina fakanofo ʼa Kilisito pea mo te toe hahaʼi tokolahi ʼaē ki muli age neʼe nātou kau fakatahi ki te gāue ʼaē kia Sehova, ʼe nātou maʼu fuli te gāue ʼa Sehova ohage ko he tagata afi tutu ukameʼa pea ko he tagata fakamaʼa ʼo te siliva (Fakahā 7:9, 14, 15). Ohage ko he kautahi ʼe nātou foaki tuʼumaʼu aipe te ʼu mōlaga ʼaki te faitotonu. Pea ko tanatou ʼu mōlaga ʼe “leleiʼia e Sehova, ohage ko te ʼu ʼaho ʼaē pea mo te ʼu taʼu kua hili atu”. (Malakia 3:4.) Ko nātou ʼaia neʼe fakaafe fakatomuʼa e Sehova fēnei: “ ‘Koutou fetuku mai te hogofulu ʼo te vahe fuli ki te faleoko, koteʼuhi ke maʼu he meʼa kai ʼi toku ʼapi; pea, ke koutou fakalelei age, ke koutou ʼahiʼahiʼi ʼau ki te faʼahi ʼaia’, ko te ʼui ʼaia ʼa Sehova ʼo te kautau, ‘pea ke koutou mamata peʼe mole ʼau avahi anai kia koutou te ʼu matapā ʼo selo feiā aipe ki te liligi anai kia koutou he tapuakina ʼo aʼu ki te temi ʼe mole toe hoge ai’.” — Malakia 3:10.

Te ʼu mōlaga pea mo te ʼu time

11. He koʼe koa ʼe mole kei fakamaʼua te ʼu mōlaga ʼaē ʼe tuʼu ʼi te Lao ʼa Moisese?

¹¹ ʼI te ʼu ʼaho ʼo Malakia, ko te hahaʼi ʼa te ʼAtua neʼe nātou foaki te ʼu mōlaga pea mo te ʼu time, ohage ko te pulapula, te fua ʼo te fuʼu ʼakau, pea mo te faga manu. ʼO toe feiā aipe mo te temi ʼo Sesu, ko te kau Iselaele agatonu neʼe nātou fai te ʼu mōlaga fakasino ki te fale lotu. Kae, ʼi te ʼosi mate ʼaē ʼa Sesu, ko meʼa fuli neʼe fetogi. Ko te Lao neʼe molehi, ʼo kau ai mo te ʼu mōlaga fakasino pea mo te ʼu time (Efesi 2:15). Neʼe fakahoko e Sesu te ʼu faʼahiga mōlaga ʼaē neʼe fai ʼi te Lao (Efesi 5:2; Hepeleo 10:1, 2, 10). Pea ʼe feafeaʼi koa he faʼahiga foaki e te kau kilisitiano he ʼu mōlaga pea mo he ʼu time?

12. Koteā te faʼahiga mōlaga pea mo te ʼu sakilifisio fakalaumālie ʼe fai e te kau kilisitiano?

¹² Maʼa nātou ʼaia, ko te ʼu mōlaga ʼe ko he ʼofa fakalaumālie fakaofoofo (Vakaʼi ia Filipe 2:17; 2 Timoteo 4:6). Ohage la, ʼe talanoa ia Paulo ki te gāue faka mafola ohage ko he mōlaga ʼi tana ʼui te meʼa ʼaenī: “ ʼAki ia ia, tou momoli tuʼumaʼu ki te ʼAtua he sakilifisio fakavikiviki, ko tona faka ʼuhiga ko te fua ʼo te ʼu laugutu ʼaē ʼe nātou fai te fakahā ʼi muʼa ʼo te hahaʼi maʼa tona huafa.” Neʼe ina fakahā te tahi sakilifisio ʼofa fakalaumālie ʼi tana tokoni ʼaenī: “ ʼAua naʼa galo ke koutou fai te meʼa ʼe lelei pea mo vaevae mo ʼihi, heʼe ko te ʼu sakilifisio ʼaia ʼaē ʼe leleiʼia e te ʼAtua.” (Hepeleo 13:15, 16). ʼI te temi ʼaē ʼe fakaloto mālohiʼi ai e te ʼu mātuʼa ʼanatou ʼu fānau ki te gāue pionie, ʼe feala ko hanatou mōlaga ʼaia kia Sehova, ohage ko te foaki e Sepeteo tona ʼofafine ko he “holokoseta” ki te ʼAtua, koteʼuhi ko Sehova neʼe ina foaki kia Sepeteo ia te mālo. — Kau Fakamāu 11:30, 31, 39.

13. He koʼe ʼe mole fakamaʼua ki te kau kilisitiano ke nātou foaki te hogofulu ʼo te vahe ʼo tonatou ʼu koloā?

¹³ Koteā te ʼui ʼo ʼuhiga mo te ʼu time? ʼE fakamaʼua koa ki te kau kilisitiano ke nātou tuku kehe ʼi tonatou ʼu koloā he vahe hogofulu moʼo foaki ki te kautahi ʼa Sehova ohage la ko tona fai ʼaē ʼi ʼihi ʼēkelesia ʼo te keletiate? Kailoa ia, ʼe mole fakamaʼua te faʼahi ʼaia. ʼE mole maʼu he talanoa ʼo ʼuhiga mo he ʼu lekula feiā ki te kau kilisitiano. ʼI te tānaki ʼaē e Paulo te ʼu mōlaga maʼa te hahaʼi masisiva ʼo Suta, neʼe mole ina fakahā te lahi ʼaē ʼo te meʼa ʼe tonu ke foaki. Kae neʼe ina ʼui fēnei: “Ke tahi fai pe ki te meʼa kua ina fakatotonu ʼi tona loto, ʼo mole fai ʼaki he fakahemala peʼe ʼaki hona fakamaʼua, heʼe ʼofa te ʼAtua kia ia ʼaē ʼe ina foaki ʼaki te lotofiafia.” (2 Kolonito 9:7). ʼO ʼuhiga mo nātou ʼaē ʼe nātou kau ʼi te ʼu minisitelio makehe, neʼe fakahā e Paulo neʼe ʼi ai pe tana gāue moʼo taupau tona maʼuli fakasino logope la ko ʼihi neʼe nātou lagolago ia ia ʼaki he ʼu mōlaga (Gāue 18:3, 4; 1 Kolonito 9:13-15). Neʼe mole fakamaʼua he ʼu time ki te faʼahi ʼaia.

14. a) He koʼe ko te tuku ʼo he time ʼe mole ko he fakatā ʼaia ʼo tatatou foaki katoa ia tatou totonu kia Sehova? b) Koteā ʼe fakatā e te time?

¹⁴ ʼE ʼiloga ai, ko te time ʼe fakatā, peʼe fakafofoga, ko he faʼahiga meʼa pe. Ko te numelo hogofulu ʼe fakatā tuʼumaʼu e te Tohi-Tapu ki te ʼu meʼa ʼaē ʼe katoa ʼi te kele, ko te time ʼe fakatā koa tatatou foaki te meʼa fuli ʼaē kia Sehova? Kailoa. ʼI te temi ʼaē ʼe tou fakapapau ai kia Sehova pea mo fakatā te faʼahi ʼaia ʼi te papitema ʼaē ʼi te vai, ko te temi ʼaia ʼe tou foaki ai ia tatou katoa kia ia. ʼI te temi ʼaia ʼo tatatou fakapapau, ʼe mole he meʼa ʼa tatou ʼe mole ʼa Sehova. Kae, ʼe tokaga tāfito ia Sehova ki tanatou ʼu meʼa ʼa nātou. Koia ʼaē ko te time ʼe fakatā ki he vahe ʼo te meʼa ʼaē ʼa tatou ʼe tou foaki kia Sehova, peʼe mo fakaʼaoga ki te gāue ʼa Sehova, ohage ko he fakaʼiloga ʼo totatou ʼofa kia ia pea mo tatatou fakamoʼoni ʼaē ʼe tou fakalogo kia ia. Ko te time ʼo te temi nei ʼe mole gata ʼaki pe te hogofulu ʼo te vahe. ʼI ʼihi ʼaluʼaga ʼe veliveli. ʼI ʼihi ʼaluʼaga ʼe lahi age anai ia. Ko te hahaʼi takitokotahi ʼe ina foaki te meʼa kia ia ʼaki tona loto pea mo fakalogo pe foki ki te ʼu fealagia.

15, 16. Koteā te meʼa ʼaē ʼe pipiki ki tatatou time fakalaumālie?

¹⁵ Koteā ʼaē ʼe pipiki ki te time fakalaumālie ʼaia? ʼUluaki, ko totatou temi pea mo totatou mālohi ʼaē ʼe tou foaki kia Sehova. Ko te temi ʼaē ʼe tou tuku ki te ʼu fono, ki te ʼu fakatahi, ki te gāue faka mafola, ko te ʼu meʼa fuli ʼaia ʼe tou foaki maʼa Sehova — ko he vahe ʼo totatou time. Ko te temi pea mo te mālohi ʼaē ʼe tou fai moʼo ʼaʼahi pea mo tokoni ʼihi ʼe mahahaki — ko he ʼu meʼa pe ʼaia ʼo totatou time. Ko te tokoni ki te laga ʼo te ʼu Fale ʼo te Puleʼaga pea mo kau ki te taupau mo te fakamaʼa ʼo te fale ʼe toe hage ko he vahe ʼe lelei.

¹⁶ ʼE toe pipiki foki ki tatatou time hatatou ʼu mōlaga faka paʼaga. ʼI te tuputupu fakaofoofo ʼa te kautahi ʼa Sehova ʼi te ʼu taʼu ʼaenī, ko te ʼu maʼua faka paʼaga foki neʼe tuputupu. ʼE ʼaoga foki ke toe laga he ʼu Fale foʼou ʼo te Puleʼaga, feiā aipe mo he ʼu filiale foʼou pea mo he ʼu Fale Fakatahi foʼou, ʼo fakatahi ʼaki te taupau ʼo te ʼu fale ʼaē neʼe kua laga. Moʼo totogi te ʼu fale ʼaē neʼe fai ki he gāue makehe — ʼe fakamaʼua foki ki te ʼu sakilifisio lahi takitokotahi ke fai — ʼe ko he toe meʼa faigataʼa. ʼI te taʼu 1991 ko te totogi moʼo tokoni ʼo te kau misionea, pea mo te kau taupau feʼaluʼaki, feiā aipe mo te kau pionie makehe, neʼe ko te fā miliale tupu, ko te falā fuli ʼaia neʼe maʼu mai te ʼu mōlaga ʼofa.

17. Koteā ʼe tonu anai ke tou foaki ohage ko tatatou time fakalaumālie?

¹⁷ Koteā te meʼa ʼe tonu anai ke tou foaki ʼi totatou time fakalaumālie? Neʼe mole fakatuʼu e Sehova tona lahi. Kae, ʼaki he fakapapau, he ʼofa moʼoni kia Sehova mo ʼotatou ʼu tēhina, feiā aipe mo te ʼiloʼi ke hāofaki fakavilivili te hahaʼi, ko te ʼu meʼa fuli ʼaia ʼe nātou uga tatou ke tou foaki he time fakalaumālie katoa. ʼE tou logoʼi ʼe tonu ke tou gāue lahi maʼa Sehova. Kapau ʼe mole tou gāue katoa ki te faʼahi ʼaia peʼe mo foaki he meʼa fakamalualoi ʼi ʼatatou ʼu koloā, ʼe fakatatau anai te meʼa ʼaia ohage ko hatatou kaihaʼa totatou ʼAtua. — Vakaʼi ia Luka 21:1-4.

ʼE ʼina tapuakina ʼo aʼu ki te temi ʼe mole toe hoge ai

18, 19. Neʼe feafeaʼi te tapuakiʼi ʼo te hahaʼi ʼa Sehova ʼi tanatou foaki katoa tanatou time?

¹⁸ Talu te taʼu 1919, neʼe foaki katoa e te hahaʼi ʼa Sehova tonatou temi, feiā mo te paʼaga neʼe ʼaoga ki te faka mafola. Neʼe nātou foaki moʼoni te time katoa ki te faleoko. Ko tona fua, neʼe fakahoko e Sehova tana fakapapau pea mo ina liligi kia nātou te tapuakina ʼo aʼu ki te temi ʼe mole toe hoge ai. Neʼe tou mamata ki te meʼa fakaofoofo ʼaia ʼi te lahi ʼo tanatou tuputupu. ʼI te toko lauʼi afe fakanofo ʼaē neʼe nātou gāue kia Sehova ʼi te temi ʼaē neʼe haʼu ai ki tona fale lotu ʼi te taʼu 1918, ʼe nātou tutupu aipe ʼo aʼu mai ki te temi nei, pea ʼe nātou tokaga ki ʼonatou ʼu kau fagona, ko te tahi ʼu ōvi, ʼe fakalaka tona hahaʼi ʼi te fā miliona ʼi te ʼu fenua kehekehe e 211 (Isaia 60:22). Neʼe tapuakiʼi aipe nātou ke nātou haga tuputupu ʼi tanatou mālama ʼaē ki te moʼoni. Ko te folafola faka polofeta neʼe moʼoni ʼaupito ʼo ʼuhiga mo nātou. Ko tanatou falala ʼaē ki te fakahoko ʼo te ʼu fakatuʼutuʼu ʼa Sehova neʼe tuʼu mālohi ia (2 Petelo 1:19). Ko nātou ko te hahaʼi moʼoni “ ʼe akoʼi e Sehova”. — Isaia 54:13.

¹⁹ ʼAki ia Malakia, neʼe fakakikite e Sehova te tapuaki ki he temi ki ʼamuli: “ ʼI te temi ʼaia, ko nātou ʼaē ʼe manavasiʼi kia Sehova neʼe nātou fai palalau ia nātou, takitokotahi pe mo tona kaumeʼa, pea neʼe tokaga ia Sehova pea mo fakalogo. Pea neʼe ʼi ai te tohi fakamanatu neʼe kamata tohi ʼi ʼona muʼa maʼa nātou ʼaē ʼe manavasiʼi kia Sehova pea mo nātou ʼaē ʼe fakaanau ki tona huafa.” (Malakia 3:16). ʼI te ʼu kautahi fuli ʼaē ʼe nātou tala ʼe nātou tui kia Kilisito, ko te kau Fakamoʼoni ʼa Sehova pe ʼaē ʼe nātou manatuʼi tāfito tona huafa pea mo tala te huafa ʼaia ʼi te lotolotoiga ʼo te ʼu puleʼaga (Pesalemo 34:3). ʼE ko he meʼa fakafiafia hanatou ʼiloʼi papau ʼe manatuʼi e Sehova tanatou agatonu!

20, 21. a) Koteā te felogoi manuʼia ʼe maʼu e te kau kilisitiano moʼoni? b) ʼO ʼuhiga mo te lotu faka kilisitiano, koteā te meʼa ʼaē kua ʼiloga mamalie pe?

²⁰ Ko te toe ʼo te kau kilisitiano fakanofo ʼe ko he hahaʼi makehe ʼa Sehova, pea ko te toe hahaʼi tokolahi, ʼaē ko te faga ōvi, ʼe nātou maʼu mo nātou te ʼu tapuakina ʼo te tauhi moʼoni (Sakalia 8:23). ʼAkia ia Malakia ʼe fakapapau e Sehova fēnei: “ ‘Pea, ʼe mahino papau ia, ʼe nātou liliu anai ko taku ʼu meʼa’, ko te ʼui ʼaia ʼa Sehova ʼo te kautau, ‘ ʼi te ʼaho ʼaē ka ʼau fakatupu anai te meʼa makehe. Pea ʼe ʼau fakahā anai kia nātou te manavaʼofa ohage ko he tagata ʼe manavaʼofa ki tona foha ʼe gāue kia ia’.” (Malakia 3:17). ʼE ko he tapuaki te tokaga ʼaia ʼa Sehova kia nātou!

²¹ ʼIo, ʼe ʼiloga mamalie pe te kehekehe ʼaē ʼo te kau kilisitiano moʼoni pea mo nātou ʼaē ʼe mole kilisitiano. Ko te hahaʼi ʼa Sehova ʼe nātou faiga ke nātou taupau tana ʼu lekula, ko te keletiate ʼe ʼāsili agahala pe ia ʼi te ʼu potu fuli ʼo te mālama ʼaenī. ʼIo, neʼe fakahā e te folafola ʼa Sehova tona moʼoni: “Pea, ʼe mahino papau ia, ʼe koutou toe mamata anai ki te kehekehe ʼa te tagata faitotonu ʼi ʼaē ʼe agakovi, ʼi ʼaē ʼe gāue ki te ʼAtua pea mo ʼaē neʼe mole gāue kia ia.” — Malakia 3:18.

22. Koteā te ʼu tapuaki ʼe feala ke tou falala ki ai mo kapau ʼe tou haga foaki te katoa ʼo te time?

²² Kua vave pe te ʼaho ʼaē ʼe fakamāu ai anai te kau kilisitiano hāla. “ ‘Koʼeni ʼe haʼu ia te ʼaho ʼaē ʼe vela ohage ko he gutuʼumu, pea ko nātou fuli ʼe fialahi pea mo nātou fuli ʼe nātou fai te agakovi ʼe nātou liliu anai ohage ko he eveeve. Pea ko te ʼaho ʼaia ʼe haʼu ʼe ina tutu anai ia natou’, ko te lea ʼaia ʼa Sehova ʼo te kautau.” (Malakia 4:1). ʼE ʼiloʼi e te hahaʼi ʼa Sehova ʼe taupau anai nātou e Sehova ʼi te ʼaho ʼaia, ohage pe ko tana hāofaki te puleʼaga fakalaumālie ʼi te taʼu 70 ʼo totatou temi (Malakia 4:2). ʼE ko he manuʼia hanatou ʼiloʼi te fakapapau ʼaia! Koia ʼaē, ʼi totatou temi ʼe tou tahi fakahā takitokotahi tatatou leleiʼia pea mo totatou ʼofa ʼaē kia Sehova ʼo tou foaki te time katoa ki te faleoko. Pea, ʼe feala leva ke tou falala ʼe ina haga tapuaki anai tatou ʼo aʼu ki te temi ʼe mole toe hoge ia.

[Nota ʼi te lalo pasina]

ʼE feala koa takotou fakamatala?

◻ ʼI te temi nei, ko te temi fea ʼaē neʼe haʼu ai Sehova ki te fale lotu pea mo tana faifekau ʼo te fuakava?

◻ Ko ai koa ʼaē ko te tagata kaugana agatonu mo poto, pea ko te fakamaʼa feafeaʼi ʼaē neʼe ʼaoga kia nātou ʼi te hili ʼo te taʼu 1918?

◻ Koteā te faʼahiga mōlaga fakalaumālie ʼe foaki e te kau kilisitiano?

◻ Ko te time feafeaʼi ʼaē ʼe fakaafe ke foaki e te kau kilisitiano ki te faleoko?

◻ Koteā te ʼu tapuaki ʼe maʼu e te hahaʼi ʼa te ʼAtua ʼi tanatou mōlaga te ʼu time fakalaumālie?

[Paki ʼo te pasina 15]

Ko tatatou ʼu time fakalaumālie ko totatou mālohi pea mo totatou ʼu koloā moʼo laga te ʼu Fale ʼo te Puleʼaga.

[Paki ʼo te pasina 16]

ʼUhi ʼaē ko te tapuaki ʼa Sehova neʼe ʼi tana hahaʼi, neʼe ʼaoga ke laga he ʼu fale ohage ko te ʼu Fale ʼo te Puleʼaga pea mo te ʼu Fale Fakatahi.