He Koʼe Koa Ko Te Kau Fakamoʼoni ʼa Sehova ʼe Nātou Nofo Fakaonoono

“Ke koutou nofo fakaonoono, heʼe mole koutou ʼiloʼi pe ko te ʼaho fea ʼaē ʼe haʼu ai tokotou ʼAliki.”—Mateo 24:42.

1. ʼE faka ʼuhiga kia ai te tokoni ʼaē “ke nofo fakaonoono”?

KI TE kaugana takitokotahi ʼa te ʼAtua—peʼe ko he tūpulaga peʼe ko he matuʼa, peʼe ko he tahi neʼe mole heʼeki faʼa fualoa peʼe kua fualoa tana foaki ʼo tona maʼuli ki te ʼAtua—ʼe ʼaoga kia ia te tokoni ʼaenī ʼa te Tohi-Tapu: “Ke koutou nofo fakaonoono”! (Mateo 24:42) He koʼe koa ʼe maʼuhiga te faʼahi ʼaia?

2, 3. (a) Koteā te fakaʼiloga ʼaē neʼe fakamatalatala lelei e Sesu, pea koteā ʼaē neʼe ʼiloga ʼi te fakahoko ʼaē ʼo te lea faka polofeta? (b) Koteā te faʼahi ʼe talanoa kiai ia Mateo 24:42 ʼo fakahā ʼaki ai te moʼoni ʼaē ʼo tatatou tui, ʼo feafeaʼi?

² ʼI te fakaʼosi ʼo tana minisitelio ʼi te kele, neʼe fakakikite e Sesu te fakaʼiloga ʼo ʼuhiga mo tana haʼu fakapulipuli mokā hoko anai tona fakanofo hau. (Mateo, ʼu kapite 24 pea mo 25) Neʼe ina fakahāhā fakalelei te temi ʼaē ka haʼu fakaʼaliʼaliki ai—pea ko te ʼu meʼa ʼaē neʼe hoko ʼo ʼuhiga mo te lea faka polofeta ʼaia, ʼe fakahā ʼaki ai neʼe fakanofo Hau ia ia ʼi selo ʼi te taʼu 1914. Neʼe ina toe hinoʼi te gāue ʼaē ka fakahā ʼaki ai leva te moʼoni ʼaē ʼo tatatou tui. Neʼe faka ʼuhiga te faʼahi ʼaia ki te temi ʼaē ka haʼu ai anai ia ohage ko he Tagata Tau ʼo fakaʼauha te faʼahiga tuʼu agakovi ʼaenī ʼi te lolotoga ʼo te mamahi lahi, ʼaē neʼe ʼui e Sesu, ʼo fēnei: “Pea ki te ʼaho ʼaia mo te hola ʼaia, ʼe mole he tahi ʼe ina ʼiloʼi, pe ko te kau ʼaselo ʼo te lagi pe ko te ʼAlo, kaʼe gata pe ki te Tāmai.” Ko te manatu ʼaia neʼe ia te ia ʼi tana ʼui te meʼa ʼaenī: “Ke koutou nofo fakaonoono, heʼe mole koutou ʼiloʼi pe ko te ʼaho fea ʼaē ʼe haʼu ai tokotou ʼAliki.”—Mateo 24:36, 42.

³ Ko tatatou mole ʼiloʼi ʼaē ʼo te ʼaho pea mo te hola ʼaē ʼe kamata ai anai te mamahi lahi, ʼe fakamaʼua kia tatou mo kapau ʼe tou ʼui ko tatou ko te kau Kilisitiano, ke tou maʼuʼuli ohage ko ni kau Kilisitiano ʼi te ʼaho fuli pe. ʼE koutou fakaʼaogaʼi anai koa tokotou maʼuli moʼo maʼu te ʼofa ʼaē ʼo te ʼAliki mokā hoko mai te mamahi lahi? Peʼe ka hoko mai te mate, ʼe ina manatuʼi anai koa koutou ohage ko he tahi neʼe gāue agatonu kia Sehova ʼo kaku ki tokotou mate?—Mateo 24:13; Fakahā 2:10.

Ko Te Kau ʼUluaki Tisipulo Neʼe Nātou Faiga Ke Nātou Nofo Fakaonoono

4. Koteā te ako ʼe feala ke tou maʼu mai te faʼifaʼitaki ʼaē ʼa Sesu ʼo ʼuhiga mo tana nofo fakaonoono ʼi te faʼahi fakalaumālie?

⁴ Ko Sesu Kilisito totonu neʼe ina tuku te faʼifaʼitaki lelei ʼo ʼuhiga mo te nofo fakaonoono ʼi te faʼahi fakalaumālie. ʼI te temi fuli pe neʼe faikole fakamalotoloto ia ki tana Tāmai. (Luka 6:12; 22:42-44) ʼI te temi ʼaē neʼe tau ai mo te ʼu ʼahiʼahi, neʼe falala pe ia ki te taki maʼuhiga ʼaē haʼu mai te Tohi-Tapu. (Mateo 4:3-10; 26:52-54) Neʼe mole ina faka fealagia ki he faʼahiga meʼa ke fakahēhē ia ia mai te gāue ʼaē neʼe hinoʼi age e Sehova kia te ia. (Luka 4:40-44; Soane 6:15) Ko nātou koa ʼaē ʼe nātou ʼui ko nātou ko te kau tisipulo ʼa Sesu ʼe nātou nonofo tokakaga anai ʼo feiā?

5. (a) He koʼe koa neʼe faigataʼa ki te kau ʼapositolo ʼa Sesu te taupau maʼu ʼo te agatonu ʼi te faʼahi fakalaumālie? (b) Koteā te tokoni neʼe foaki age e Sesu ki tana kau tisipulo ʼi tona ʼosi fakatuʼuake?

⁵ ʼI ʼihi temi, māʼiape la mo te kau ʼapositolo ʼa Sesu neʼe nātou lotolotolua. ʼI te lahi ʼaē ʼo te ʼu fakakaukau hala, neʼe nātou felāveʼi mo te ʼu meʼa fakatupu lotovaivai. (Luka 19:11; Gāue 1:6) ʼI muʼa ʼo tanatou ako ʼaē ʼe tonu ke nātou falala katoa kia Sehova, neʼe hoko te ʼu ʼaʼahi fakafokifā kia nātou ʼo tupu ai tanatou hēhē. Koia la ʼaē, ʼi te temi ʼaē neʼe tāʼofi ai Sesu, neʼe feholaki tana kau ʼapositolo. ʼI te po ʼaia, ko Petelo, ʼuhi ko tana mataku, neʼe liuliuga tana fakafisi ʼaē ʼe mole ina ʼiloʼi ia Kilisito. Neʼe mole heʼeki tokagaʼi fakamalotoloto e te kau tisipulo te tokoni ʼaenī ʼa Sesu: “Koutou nonofo fakaonoono pea ke koutou faikole tuʼumaʼu.” (Mateo 26:41, 55, 56, 69-75) ʼI tona ʼosi fakatuʼuake neʼe fakaʼaogaʼi e Sesu te ʼu tohi ʼo te Tohi-Tapu moʼo fakaloto mālohiʼi tanatou tui. (Luka 24:44-48) Pea ʼi te temi ʼaē neʼe hā ai, ko ʼihi ia nātou neʼe nātou tuku te minisitelio ʼaē neʼe foaki age, ke tuʼulaga lua ʼi tonatou maʼuli, neʼe fakaloto mālohiʼi e Sesu tanatou faiga ke tuku katoa tanatou manatu ki te gāue ʼaē ʼe maʼuhiga age.—Soane 21:15-17.

6. Neʼe koteā te ʼu hele e lua ʼaē neʼe ʼuluaki fakatokagaʼi e Sesu ki tana kau tisipulo?

⁶ ʼI muʼa ʼo te hoko ʼo te faʼahi ʼaia, neʼe fakatokagaʼi e Sesu ki tana kau tisipulo ʼe mole tonu ke nātou kau ki te malamanei. (Soane 15:19) Neʼe toe tokoni age kia nātou ke ʼaua naʼa nātou tahi fia pule ki ʼaē mo ʼaē kae ke nātou gāue ohage ko ni ʼu tēhina. (Mateo 20:25-27; 23:8-12) Neʼe nātou tokagaʼi koa tana tokoni? Neʼe nātou fakamuʼamuʼa koa te gāue ʼaē neʼe ina foaki age kia nātou?

7, 8. (a) Koteā ʼaē ʼe hā ʼaki mai ʼi te fakamatala ʼaē neʼe fai e te kau Kilisitiano ʼi te ʼuluaki sēkulō neʼe nātou mulimuli pe ki te tokoni ʼaē ʼa Sesu? (b) He koʼe koa ko te haga nofo fakaonoono ʼi te faʼahi fakalaumālie neʼe maʼuhiga?

⁷ ʼI te kei maʼuʼuli ʼaē ʼo te kau ʼapositolo, neʼe nātou taupau aipe te nofo tokaga ʼaē ʼa te kokelekasio. ʼE fakahā e te hisitolia ko te kau ʼuluaki Kilisitiano neʼe mole nātou kau ki te ʼu meʼa faka politike ʼo te Puleʼaga Loma pea neʼe mole nātou fakatuʼutuʼu he kalasi takitaki lotu. Kae ʼi te tahi faʼahi, neʼe ko te kau fai faka mafola faiga fakamalotoloto ʼo te Puleʼaga ʼo te ʼAtua. ʼI te fakaʼosi ʼo te ʼuluaki sēkulō, neʼe kua nātou fagonogono ʼi te Puleʼaga fuli ʼo Loma, ʼo nātou fai te ʼu tisipulo ʼi Asia, ʼi Eulopa, pea mo te Potu Tokelau ʼo Afelika.—Kolose 1:23.

⁸ Kae, ko te ʼu fua ʼo te fai faka mafola neʼe mole faka ʼuhiga ʼaki leva neʼe mole kei ʼaoga ke nofo fakaonoono ʼi te faʼahi fakalaumālie. Ko te fakakikite ʼo te haʼu ʼa Sesu neʼe tonu ke hoko ki muli age. Pea ʼi te fakahaʼuhaʼu ʼa te kokelekasio ki te lua sēkulō ʼo totatou temi, neʼe tuputupu te ʼu ʼaluʼaga neʼe feala ai ke tuʼutāmakiʼia te faʼahi fakalaumālie ʼo te kau Kilisitiano. ʼO feafeaʼi?

Ko Nātou ʼAē Neʼe Mole Kei Nonofo Fakaonoono

9, 10. (a) Hili te mate ʼa te kau ʼapositolo, koteā niʼihi ake ʼu meʼa neʼe hoko neʼe fakahā ʼaki ai, tokolahi neʼe nātou ʼui ko nātou ko te kau Kilisitiano neʼe mole nātou nonofo fakaonoono? (b) Ko te ʼu vaega fea ʼo te Tohi-Tapu ʼe tuʼu ʼi te palakalafe ʼaia neʼe feala ke tokoni ki te kau Kilisitiano ke nātou nonofo mālohi ʼi te faʼahi fakalaumālie?

⁹ Ko ʼihi ʼaē neʼe hū ki te kokelekasio, neʼe nātou kamata talanoa ki tanatou ʼu akonaki ʼaki te ʼu lea ʼo te filosofia faka Keleka, koteʼuhi ke tali lelei e te hahaʼi ʼo te mālama ʼaenī te ʼu meʼa ʼaē neʼe nātou faka mafola. ʼO faifai pe, ko te ʼu akonaki faka pagani, ohage la ko te Tahitolu, pea mo te tuputupua ʼo te nefesi, neʼe liliu ko he koga ʼo te Lotu Faka Kilisitiano ʼaē neʼe mole kei maʼa. ʼO tupu ai leva te situʼa ʼaē ki te ʼamanaki ʼo te ʼu taʼu ʼe lauʼi afe. Koteā tona tupuʼaga? Ko nātou ʼaē neʼe nātou tali te akonaki ʼo ʼuhiga mo te tuputupua ʼo te nefesi, neʼe nātou tukuʼaki ko te ʼu tapuakina ʼo te ʼafio ʼa Kilisito ʼe maʼu katoa anai ʼi selo ʼaki he laumālie ʼe haʼu anai mai te sinoʼi tagata. Koia ʼaē neʼe mole maʼuhiga ai kia nātou ke nātou tokakaga ki te fakanofo hau fakaʼaliʼaliki ʼa Kilisito.—Vakaʼi ia Kalate 5:7-9; Kolose 2:8; 1 Tesalonika 5:21.

¹⁰ Ko te manatu ʼaia neʼe ʼāʼāsili tona mālohi tupu mai ʼihi ake ʼu meʼa neʼe hoko. Ko ʼihi neʼe nātou ʼui ko nātou ko ni ʼu tagata taupau Kilisitiano, neʼe nātou kamata fakaʼaogaʼi tanatou ʼu kokelekasio ohage ko ni ʼu meʼa moʼo fakahikihiki ʼo nātou totonu pe. Neʼe nātou foaki ki ʼanatou ʼu manatu pea mo tanatou ʼu akonaki he faka maʼuhiga ʼe tatau mo te Tohi-Tapu peʼe laka age ia ʼi te ʼu tohi ʼo te Tohi-Tapu. Mokā neʼe maʼu he fealagia, ko te ʼēkelesia ʼaposita ʼaia neʼe kaugana ki te ʼu meʼa faka politike ʼo te fenua.—Gāue 20:30; 2 Petelo 2:1, 3.

Te ʼu Fua ʼo Te Lahi ʼAē ʼo Te Nofo Fakaonoono

11, 12. He koʼe koa ko te Polotesita neʼe mole ina fakaʼiloga te toe liliu ʼaē ki te tauhi moʼoni?

¹¹ ʼI te hili ʼo te ʼu sēkulō ki te gaohi koviʼi ʼo nātou ʼaē e te ’Ēkelesia Katolika Loma, neʼe fakatutuʼu leva ʼihi ʼu kūtuga, ʼaē neʼe nātou holi ke fai ni ʼu fetogi ʼi te 16 sēkulō. Kae neʼe mole fakatupu aipe la he toe maliu ki te tauhi moʼoni. He koʼe neʼe mole hoko?

¹² Logope te mavae kehe ʼaē ʼa te ʼu kūtuga Polotesita kehekehe mai te pule ʼo Loma, neʼe lahi te ʼu akonaki pea mo te ʼu agaaga faka ʼaposita neʼe ʼolo mo nātou—ko te akonaki ʼaē ʼe ina fakatahiʼi te kau takitaki lotu pea mo te kau laïques, ʼo toe feiā aipe mo te akonaki ʼaē ʼo ʼuhiga mo te Tahitolu, mo te tuputupua ʼo te nefesi, pea mo te ʼifeli mokā hili te mate. Pea, ohage ko te ’Ēkelesia Katolika Loma, neʼe hoholo atu aipe tanatou kau ki te malamanei, ʼo nātou fakatahi lelei mo te ʼu meʼa faka politike. Koia neʼe hage mai ai neʼe nātou tekeʼi te ʼu fakaʼamu fuli ʼo ʼuhiga mo te haʼu ʼa Kilisito ʼi tona ʼuhiga Hau.

13. (a) Koteā ʼaē ʼe ʼiloga ko ʼihi neʼe nātou faka maʼuhigaʼi moʼoni te Folafola ʼaē ki te ʼAtua? (b) ʼI te lolotoga ʼo te 19 sēkulō, koteā te meʼa ʼaē neʼe liliu ko he meʼa maʼuhiga makehe ki ʼihi kau Kilisitiano? (c) He koʼe koa neʼe lahi te ʼu fakaʼamu neʼe mole iku lelei?

¹³ Kae, neʼe fakakikite e Sesu, ka mamate anai te kau ʼapositolo, ko nātou ʼaē ka nātou maʼu moʼoni anai te tofiʼa ʼaē ʼo te Puleʼaga (ʼaē neʼe ina fakatatau ki te fulumeto), ʼe nātou haga tuputupu anai ia tafa ʼo te kau Kilisitiano loi (te vao kovi) ʼo aʼu ki te temi ʼo te taʼukai. (Mateo 13:29, 30) ʼE mahino ia ʼe mole feala ia ʼaho nei ke fai he lisi e katoa ʼo nātou ʼaē neʼe sioʼi e te Pule ohage ko he fulumeto. Kae ʼe ʼaoga ke tokagaʼi ʼi te lolotoga ʼo te 14 sēkulō, pea mo te 15 sēkulō, feiā ki te 16 sēkulō, neʼe ʼi ai te ʼu tagata neʼe nātou sakilifisioʼi tonatou maʼuli pea mo tonatou ʼāteaina he neʼe nātou fakaliliu te Tohi-Tapu ki te lea māhani ʼaē ʼa te hahaʼi. Ko ʼihi neʼe mole gata ʼaki pe tanatou tali ʼaē ʼo te Tohi-Tapu ohage ko te Folafola ʼa te ʼAtua kae neʼe nātou toe fakafeagai ʼaupito ki te Tahitolu ʼaē ʼe mole ko he akonaki ia mai te Tohi-Tapu. Ko ʼihi neʼe nātou fakafisi ki te akonaki ʼaē ʼo ʼuhiga mo te tuputupua ʼo te nefesi pea mo te ʼifeli ʼo nātou mulimuli pe ki te Folafola ʼa te ʼAtua. ʼO toe feiā aipe ʼi te lolotoga ʼo te 19 sēkulō, ʼaki te tuputupu ʼaē ʼo te ʼu ako ʼo te Tohi-Tapu, ko te ʼu kūtuga ʼi te ʼu ʼAtu Fenua ʼo Amelika, ʼi Siamani, ʼi Pilitania, pea mo Lusia neʼe nātou kamata fakahā ko te temi liliu mai ʼaē ʼo Kilisito kua tonu ke tokagaʼi. Kae neʼe lahi tanatou ʼu fakaʼamu neʼe mole iku lelei ia. Koteā tona tupuʼaga? Mai tona tupuʼaga tāfito ʼaenī neʼe lahi age tanatou falala ʼaē ki te tagata ʼi te ʼu tohi ʼaē ʼo te Tohi-Tapu.

Neʼe Feafeaʼi Tanatou Fakahā ʼo Tanatou Nofo Fakaonoono

14. Koutou fakamatalatala te faʼahiga fai ʼaē moʼo ako ʼo te Tohi-Tapu e Charles Taze Russell pea mo nātou ʼaē neʼe kau mo ia.

¹⁴ Pea ʼi te taʼu 1870, ko Charles Taze Russell pea mo ʼona kaugā gāue neʼe nātou faʼufaʼu te kūtuga moʼo ako te Tohi-Tapu ʼi Allegheny, ʼi Pennsylvanie. Neʼe mole ko nātou ʼaē neʼe nātou ʼuluaki maʼu te fakasiosio tonu ʼo ʼuhiga mo ʼihi ʼu moʼoni ʼo te Tohi-Tapu neʼe kua hā, kae lolotoga ʼo tanatou ako, neʼe ko hanatou agamāhani, ia te kumi fakalelei ʼo te ʼu vaega ʼo te Tohi-Tapu ʼo ʼuhiga mo he fehuʼi.a Ko tanatou fakatuʼutuʼu neʼe mole ko te maʼu ʼo he ʼu koga tohi moʼo fakamoʼoni he ʼu manatu neʼe ʼuluaki fakakaukauʼi, kae ke nātou ʼiloʼi papau neʼe felogoi tahi tanatou ʼu manatu pea mo te ʼu meʼa fuli ʼaē ʼe fakahā e te Tohi-Tapu ʼo ʼuhiga mo te faʼahi ʼaia.

15. (a) ʼO mole gata pe ki te Tēhina ko Russell, koteā te meʼa ʼaē neʼe kua mahino kiai ʼihi ake ʼu hahaʼi? (b) Koteā ʼaē neʼe fakaʼiloga kehe ai te kau Ako ʼo te Tohi-Tapu?

¹⁵ Neʼe kua mahino pe ki ʼihi ʼe fakapulipuli anai te liliu mai ʼa Kilisito ohage ko he laumālie. Ko ʼihi neʼe mahino kia nātou ko te liliu mai ʼaē ʼa Kilisito, ʼe mole ko hana haʼu ʼo tutu te kele pea mo fakaʼauha te tagata fuli, kae ʼe haʼu ia ʼo tapuakiʼi te ʼu famili fuli ʼo te kele. Neʼe kua mahino pe ki ʼihi ko te taʼu 1914 ʼe ina fakaʼiloga anai te fakaʼosi ʼo te ʼu Temi ʼo te kau Senitile. Kae ki te kau Ako ʼo te Tohi-Tapu ʼaē neʼe kaugā gāue mo te Tēhina ko Russell, neʼe maʼuhiga age te ʼu puani ia ʼaia ʼi he ʼu puani faka teolosia. Neʼe fakatafito tonatou maʼuli ʼaki te ʼu moʼoni ʼaia pea neʼe nātou fakahā te ʼu moʼoni ʼaia ʼi te ʼatu ʼu fenua ʼaki he faka mafola ʼe mole hona fakatatau.

16. ʼI te taʼu 1914, he koʼe neʼe tohi e te Tēhina ko Russell te manatu ʼaenī: “ ʼE tou maʼuli nei ʼi te temi ʼo te ʼahiʼahi”?

¹⁶ Kae, neʼe ʼaoga kia nātou ke nātou nonofo fakaonoono. Koteā tona tupuʼaga? Ohage la, logope la tanatou ʼiloʼi ʼaē ko te taʼu 1914 neʼe faka maʼuhigaʼi e te fakakikite ʼo te Tohi-Tapu, neʼe mole heʼeki nātou ʼiloʼi papau te meʼa ʼaē neʼe tonu ke hoko ʼi te taʼu ʼaia. Neʼe ko he ʼahiʼahi ʼaia kia nātou. ʼI Te Tule Leʼo ʼo te ʼaho 1 ʼo Novepeli 1914 (fakapilitānia), neʼe tohi e te Tēhina ko Russell fēnei: “Tou manatuʼi ʼe tou lolotoga maʼuli nei ʼi te temi ʼo te ʼahiʼahi. . . . ʼE ʼi ai koa he tahi ʼu tupuʼaga ke nātou fakamamaʼo ai tatou mai te ʼAliki pea mo Tona Moʼoni, ʼo feala ai ke nātou fakaneke ia tatou ke tou līaki tatatou sakilifisio ʼaē ki te ʼAliki pea mo tana gāue, kapau koia ʼe mole ko te ʼofa ki te ʼAtua ʼaē ʼe ʼi ʼotatou ʼu loto ʼaē neʼe ina uga ia nātou ke tokakaga ki te ʼAliki, kae ko te tahi age ia meʼa; mahalo pe ko te fakaʼamu ʼaē ko te sakilifisio ʼe nounou anai ia, ko tatatou fakapapau ʼaē ki te ʼAtua ʼe maʼuhiga anai pe ia ʼi he kiʼi temi siʼisiʼi.”

17. Neʼe feafeaʼi kia A. H. Macmillan, pea mo ʼihi ake tanatou taupau maʼu te aga fakapotopoto fakalaumālie?

¹⁷ Ko ʼihi neʼe nātou līaki te kaugana kia Sehova ʼi te temi ʼaia. Kae ko Alexander Macmillan neʼe mole ina fai te aga ʼaia. ʼI te ʼu taʼu ki muli age, neʼe ina fakahā fakahagatonu te meʼa ʼaenī: “ ʼI ʼihi temi ko ʼamatou ʼu fakafuafua ʼo ʼuhiga mo ni ʼu ʼaho neʼe fakalaka ia ʼi te ʼu meʼa ʼaē ʼe fakapapau e te Tohi-Tapu.” Koteā ʼaē neʼe tokoni kia ia ke ina taupau maʼu aipe te aga fakapotopoto? Neʼe mahino ia ohage ko tana ʼui ʼaenī “ ʼi te temi ʼaē neʼe mole hoko ai te ʼu fakaʼamu ʼaia, ko te faʼahi ʼaia ʼe mole nātou fetogi te ʼu fakatuʼutuʼu ʼa te ʼAtua.” Neʼe ina toe ʼui fēnei: “Neʼe mahino kia ʼau ʼe tonu ke tou ʼiloʼi tatatou ʼu hala pea mo tou haga kumi te Folafola ʼaē ʼa te ʼAtua moʼo fakamālamaʼi tatou.”b ʼAki te agavaivai, ko te kau ʼuluaki Ako ʼaia ʼo te Tohi-Tapu neʼe nātou tuku ke haga te Folafola ʼa te ʼAtua ʼo fakatonutonuʼi tanatou ʼu manatu.—2 Timoteo 3:16, 17.

18. Neʼe feafeaʼi ki te Kilisitiano ʼaē ʼe nofo fakaonoono hana maʼu ʼo he ʼu fua lelei ʼi tana mole kau ki te mālama?

¹⁸ ʼI te lolotoga ʼo te ʼu taʼu ʼaē ki muli age, ko tanatou nofo fakaonoono neʼe tuʼu mālohi aipe. ʼE moʼoni neʼe nātou ʼiloʼi ko te kau Kilisitiano neʼe mole tonu ke nātou kau ki te malamanei. (Soane 17:14; Sake 4:4) ʼO mulimuli pe ki te faʼahi ʼaia, neʼe mole nātou fakatahi ki te Keletiate ʼo ʼuhiga mo te lagolago ʼaē ki te Sosiete ʼo te ʼu ʼatu Puleʼaga ohage ko he fakafofoga faka politike ʼaia ʼo te Puleʼaga ʼo te ʼAtua. Kae neʼe ko te taʼu 1939 pe ʼaē neʼe nātou mahino fakalelei ai ki te manatu ʼaē ʼo ʼuhiga mo te tauʼāteaina faka Kilisitiano.—Vakaʼi ʼi Te Tule Leʼo, ʼo te ʼaho 1 ʼo Novepeli 1939 (fakapilitānia).

19. Koteā te ʼu fua lelei neʼe maʼu ki te leʼoleʼo ʼo te kokelekasio ʼuhi he neʼe nofo fakaonoono te kautahi?

¹⁹ Neʼe mole he temi neʼe maʼu ai he kalasi takitaki lotu, logope la ki te manatu ʼa ʼihi tagata ʼāfea neʼe fakanofo ʼaki te vote, ko te fai faka mafola ʼi te kokelekasio neʼe ko te gāue pe ʼaia neʼe fakamaʼua kia nātou. Kae, ʼaki he fia muliʼi fakamalotoloto ʼo te Tohi-Tapu, neʼe toe vakavakaʼi e te kautahi te gāue ʼa te kau tagata ʼāfea ʼaki te Tohi-Tapu, ʼo liuliuga tanatou fai ʼaia ʼi te ʼu Tule Leʼo. Ko te ʼu fetogi faka kautahi neʼe fai ʼo mulimuli pe ki te ʼu fakatuʼutuʼu ʼaē ʼa te Tohi-Tapu.

20-22. Neʼe feafeaʼi ki te kautahi katoa tana fai ʼo he fakatuʼutuʼu tuputupu fakavilivili moʼo fakahoko ʼo te gāue faka malamanei ʼaē neʼe fakakikite ʼo ʼuhiga mo te faka mafola ʼo te Puleʼaga?

²⁰ Ko te kautahi katoa neʼe ina fai fakavilivili te fakatuʼutuʼu moʼo fakahoko fuli te gāue ʼaē neʼe hinoʼi ki totatou temi e te Folafola ʼa te ʼAtua. (Isaia 61:1, 2) Neʼe tonu koa ke faka mafola feafeaʼi te logo lelei ʼi totatou temi? Neʼe ʼui e Sesu fēnei: “ ʼE tonu muʼa ko te logo lelei ke faka mafola ʼi te ʼu fenua fuli.” (Maleko 13:10) ʼI te manatu ʼa te tagata, ko te gāue ʼaia neʼe hage ia ʼe mata faigataʼa.

²¹ Kae, ʼaki te falala ʼaē kia Kilisito ko te Pule ʼo te kokelekasio, ko te kalasi ʼo te kaugana agatonu mo poto neʼe haʼele pe ia ki muʼa. (Mateo 24:45) ʼAki te agatonu pea mo te faiga fakamalotoloto neʼe nātou hinoʼi ki te hahaʼi ʼa Sehova te gāue ʼaē ʼe tonu ke fai. Mai te taʼu 1919, neʼe faka maʼuhiga ʼaupito te gāue ʼaia ʼi te minisitelio. Ki te tokolahi, neʼe mole ko he meʼa faigafua te ʼalu ʼaē ki te ʼu ʼapi ʼo palalau ki ni ʼu hahaʼi ʼe mole feʼiloʼiʼaki mo nātou. (Gāue 20:20) Kae ko te ʼu alatike ako ohage la “Manuʼia Ia Nātou ʼAē ʼe Mole Matataku” (ʼi te taʼu 1919) pea “Tou Lototoʼa” (ʼi te taʼu 1921) neʼe tokoni ki ʼihi ke nātou kumi muʼa te gāue, ʼaki te falala ʼaē kia Sehova.

²² Ko te pāui ʼaē ʼi te taʼu 1922, moʼo “kalagaʼi, kalagaʼi, kalagaʼi, te Hau pea mo tona puleʼaga” neʼe ina foaki te fakaloto mālohi ʼaē neʼe ʼaoga moʼo tuku ki te gāue ʼaia te maʼuhiga ʼaē neʼe tau mo ia. Mai te taʼu 1927, ko te kau tagata ʼāfea ʼaē neʼe mole nātou tali te maʼua faka Tohi-Tapu ʼaia neʼe fakamavae ia nātou. ʼO ʼuhiga mo te temi ʼaia, ko te kau fakafofoga feʼaluʼaki ʼo te Sosiete, ko te kau hahaʼi feʼaluʼaki, neʼe tonu ke hinoʼi ko te kau takitaki gāue ʼi te ʼu koga meʼa, moʼo foaki he ako ki te kau fai faka mafola ʼi te gāue fai faka mafola. Neʼe mole feala ke pionie fuli te hahaʼi, kae ʼi te ʼu fakaʼosi vāhaʼa, tokolahi neʼe nātou kau ki te gāue, ʼo nātou kamata tautonu ʼi te uhu, pea nātou mānava siʼisiʼi ʼo taumafa, ʼosi pe pea nātou toe hoko tanatou faka mafola ʼo aʼu ʼosi ki te afiafi. Ko he ʼu temi ʼaia ʼe maʼuhiga ki te tuputupu faka teokalatike, pea ʼe tou maʼu ʼaupito ai te faʼahiga taki ʼaē ʼa Sehova ki tana hahaʼi. Kei hoko atu pe tana taki ʼaia. ʼAki tana tapuaki, ko te gāue ʼaē ʼo te faka mafola ʼo te logo lelei ʼo ʼuhiga mo te kua fakatuʼu ʼo te Puleʼaga ʼe aʼu anai ki he ikuʼaga manuʼia.

ʼE Koutou Lolotoga Nofo Fakaonoono Koa?

23. ʼO ʼuhiga mo te ʼofa faka Kilisitiano pea mo te mavae kehe ʼi te mālama ʼaenī, e feafeaʼi hakita fakahā takitokotahi ʼe tou nonofo fakaonoono?

²³ Moʼo tali ki te taki ʼaē ʼa Sehova, ko tana kautahi ʼe ina haga ʼo fakatokagaʼi tatou ki te ʼu gāue pea mo te ʼu agaaga ʼaē ʼe fakahā ʼaki ai anai ʼe tou kau ki te mālama ʼaenī, ʼo feala aipe ke fakaʼauha tatou mo te mālama ʼaenī. (1 Soane 2:17) Pea kia tatou, ʼe ʼaoga ke tou nonofo fakaonoono takitokotahi ʼo tou tali te taki ʼaē ʼa Sehova. ʼE toe foaki mai e Sehova te ako kia tatou ʼo ʼuhiga mo te maʼuli pea mo te gāue fakatahi. Ko tana kautahi neʼe tokoni kia tatou ke tou tuputupu pea mo leleiʼia te faka ʼuhiga moʼoni ʼaē ʼo te feʼofani faka Kilisitiano. (1 Petelo 4:7, 8) Ko tatatou nonofo fakaonoono ʼe fakamaʼua kia tatou ke tou fai fakamalotoloto ʼo muliʼi te tokoni ʼaia, logope la ʼaē totatou ʼuhiga agahala.

24, 25. Koteā te ʼu faʼahi tāfito ʼaē ʼe tonu anai ke tou nofo fakaonoono ai, pea ʼaki te fakaʼamu fea?

²⁴ ʼO mole fai he faka aga, ko te kaugana agatonu mo poto ʼe ina fakamanatuʼi mai kia tatou, ʼo fēnei: “Tuku tau falala kia Sehova ʼaki tou loto katoa pea ʼaua naʼa ke falala ki tou ʼatamai ʼāteaina.” (Tāʼaga Lea 3:5) “Haga faikole tuʼumaʼu.” (1 Tesalonika 5:17) Neʼe tokoniʼi tatou ke tou ako, ke tou fakatafito tatatou ʼu tonu ki te Folafola ʼa te ʼAtua, ke liliu te folafola ‘ko he mālama taki ki [totatou] vaʼe, pea ʼe ko he mālama ki [totatou] ala.’ (Pesalemo 119:105) ʼAki te ʼofa, neʼe fakaloto mālohiʼi tatou ke tou fakamuʼamuʼa te faka mafola ʼo te logo lelei ʼo te Puleʼaga, te gāue ʼaē neʼe fakakikite e Sesu ʼo ʼuhiga mo totatou temi.—Mateo 24:14.

²⁵ ʼIo, ko te kaugana agatonu mo poto ʼe mahino ia ʼe nofo tokaga. Mo tatou pe foki takitokotahi ʼe ʼaoga ke tou nofo fakaonoono. Koia kapau ʼe tou fai te faʼahi ʼaia, ʼofa pe ke tou kau ia nātou ʼaē ka tali ʼi muʼa ʼo te Foha ʼo te tagata mokā haʼu ʼo fakahoko te tautea.—Mateo 24:30; Luka 21:34-36.

[Nota ʼi te lalo pasina]

Toe Vakaʼi

◻ Ohage ko tona fakahā ia Mateo 24:42, he koʼe koa ʼe ʼaoga ke tou nofo fakaonoono?

◻ Neʼe feafeaʼi te nofo fakaonoono ʼi te faʼahi fakalaumālie ʼa Sesu pea mo tana kau tisipulo ʼi te ʼuluaki sēkulō?

◻ Talu mai te taʼu 1870, koteā te ʼu meʼa neʼe hoko ʼuhi he neʼe nofo fakaonoono te ʼu kaugana ʼa Sehova?

◻ Koteā ʼaē ka ina fakahā anai ʼe tou lolotoga nofo fakaonoono takitokotahi?

[Paki ʼo te pasina 23]

Neʼe maʼumaʼua Sesu ʼi te gāue ʼaē neʼe hinoʼi age e tana Tāmai. Neʼe toe faikole fakamalotoloto

[Paki ʼo te pasina 24]

Ko Charles Taze Russell ʼi te ʼu taʼu fakamuli ʼo tona maʼuli

[Paki ʼo te pasina 25]

Ko te toko 4 700 000 kau faka mafola ʼo te Puleʼaga e lolotoga gāue fakamalotoloto ʼi te kele katoa