“ ʼI Te Kele Katoa, Kua Mafola Ai Tonatou Leʼo”

“Koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni.”​—Mateo 28:19, MN.

1, 2. (a) Koteā te gāue ʼaē neʼe tuku age e Sesu ki tana ʼu tisipulo? (b) Koteā ʼaē neʼe tokoni ki te kau Kilisitiano ʼo te ʼuluaki sēkulō ke nātou fai he gāue lahi feiā?

ʼI MUʼA ʼo tana hake ki selo, neʼe foaki e Sesu he gāue ki tana kau tisipulo. Neʼe ina ʼui fēnei kia nātou: “Koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni.” (Mateo 28:19, MN ) Neʼe ko he toe gāue fakaofoofo ia!

² Koutou fakakaukauʼi age muʼa! ʼI te Penikosite ʼo te taʼu 33 ʼo totatou temi, neʼe ko te toko 120 tisipulo neʼe foaki age kia nātou te laumālie maʼoniʼoni pea neʼe nātou kamata fakahoko te gāue ʼaia ʼo nātou tala ki te hahaʼi ko Sesu ko te Mesia ʼaē neʼe fakapapauʼi mai talu mai fualoa, ʼe feala ke nātou maʼu ai te maʼuli. (Gaue 2:​1-36) Neʼe lava feafeaʼi ki te kiʼi kūtuga ʼaia hanatou aʼu ki “te hahaʼi ʼo te ʼu fenua fuli pe?” Ki te tagata ʼe mole feala ia, kae “ki te Atua e ina fealagia te meafuape.” (Mateo 19:26) Neʼe maʼu e te kau ʼuluaki Kilisitiano ia te tokoni ʼo te laumālie maʼoniʼoni ʼo Sehova, pea neʼe mahino kia nātou te maʼuhiga ʼo te temi. (Sakalia 4:6; 2 Timoteo 4:2) Koia neʼe feala ki te ʼapositolo ko Paulo ke ina ʼui ʼi te hili ʼo taʼu e hogofulu tupu, ko te logo lelei neʼe kua tala “ki te ʼu fakatupu fuape ʼo te lalo lagi.”​—Kolose 1:​23, MN.

3. Koteā ʼaē neʼe malumoea ai te “fulumeto,” ʼaē ʼe ina fakatātā te kau Kilisitiano moʼoni?

³ Teitei pe ʼi te ʼuluaki sēkulō, neʼe haga mafola ai te tauhi moʼoni. Kae neʼe fakakikite e Sesu ʼe hoko mai anai te temi ko Satana ʼe ina tūtū anai “te vao kovi,” pea ko te “fulumeto” ʼaē ʼe ina fakatātā te kau Kilisitiano moʼoni, ʼe nātou malumoea anai lolotoga te ʼu sēkulō ʼo aʼu ki te temi ʼo te taʼukai. ʼI te ʼosi mate ʼo te kau ʼapositolo, neʼe hoko moʼoni te lea faka polofeta ʼaia.​—Mateo 13:​24-39.

Te Tuputupu Vave Ia ʼAho Nei

4, 5. Talu mai te taʼu 1919, koteā te gāue ʼaē neʼe kamata fakahoko e te kau Kilisitiano fakanofo, pea he koʼe koa neʼe ko he meʼa faigataʼa?

⁴ ʼI te taʼu 1919, neʼe ko te temi ʼaia maʼa te kau Kilisitiano maʼa, ʼaē ʼe fakatātā e te fulumeto, ke nātou mavae mai te vao kovi. Neʼe mahino ki te kau Kilisitiano fakanofo ko te gāue lahi ʼa Sesu ʼe kei tonu ke hoko atu. Neʼe nātou tui papau, ʼe nātou lolotoga maʼuʼuli ʼi “te u aho fakamuli” pea neʼe nātou mahino ki te lea faka polofeta ʼaenī ʼa Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” (2 Timoteo 3:1; Mateo 24:​14, MN ) ʼIo, neʼe mahino kia nātou neʼe kei lahi te gāue neʼe tonu ke fai.

⁵ Kae ohage ko te kau tisipulo ʼi te taʼu 33 ʼo totatou temi, neʼe mole ko he kihiʼi gāue ʼaē neʼe tonu ke fai e te kau Kilisitiano fakanofo. Neʼe nātou lauʼi afe pe, pea neʼe mole nātou nonofo ʼi te ʼu fenua fuli. ʼE lava feafeaʼi anai hanatou faka mafola te logo lelei “ ʼi te kele katoa”? Koutou manatuʼi, ko te hahaʼi ʼo te kele neʼe kua nātou tuputupu mai te toko 300 miliona ʼo te temi ʼo te ʼu Sesale ʼo nātou teitei toko 2 miliale ʼi te hili ʼo te ʼuluaki tau faka malamanei. Pea ʼi te 20 sēkulō, neʼe haga tuputupu vave aipe.

6. ʼI te ʼu taʼu 1930, koteā te tuputupu ʼaē neʼe hoko ʼi te faka mafola ʼo te logo lelei?

⁶ Kae ko te kau kaugana fakanofo ʼa Sehova, ohage ko tonatou ʼu tēhina ʼo te ʼuluaki sēkulō, neʼe nātou fai ʼaki he tui mālohi kia Sehova, te gāue ʼaē neʼe tuku age kia nātou pea neʼe nofo tona laumālie mo nātou. ʼI te vaelua ʼo te ʼu taʼu 1930, ko te toko 56 000 kau fai faka mafola evaselio neʼe nātou tala te ʼu moʼoni ʼo te Tohi-Tapu ki te ʼu fenua e 115. Neʼe kua lahi te gāue ʼaē neʼe fai, kae neʼe kei toe lahi te gāue.

7. (a) Koteā te fihifihia foʼou ʼaē neʼe tau mo te kau Kilisitiano fakanofo? (b) ʼAki te tokoni ʼa “te tahi ʼu ōvi,” neʼe tuputupu feafeaʼi ʼo aʼu mai ki te temi nei, ia te gāue ʼaē ko te tānaki?

⁷ ʼOsi ʼaia, ʼaki tanatou mahino lelei peʼe ko ai te “toe hahaʼi tokolahi” ʼaē ʼe talanoa ki ai ia Apokalipesi 7:9 (MN ), neʼe ʼi ai te tahi gāue lahi neʼe tonu ke nātou fai pea neʼe ko he fakapapau ki te kau Kilisitiano gāue kinakina ʼaia ʼe nātou maʼu anai he tokoni. Ko he toe hahaʼi tokolahi ʼo “te tahi ʼu ōvi,” ko he hahaʼi tui ʼe nātou ʼamanaki ki te maʼuli ʼi te kele, neʼe tonu ke tānaki “mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli.” (Soane 10:​16, MN ) Ko te ʼu ōvi ʼaia ʼe nātou ‘fai he tauhi taputapu kia Sehova ʼi te ʼaho mo te po.’ (Apokalipesi 7:15) Ko tona faka ʼuhiga ʼaē ʼe nātou tokoni anai ki te gāue fai faka mafola pea mo akoʼi te hahaʼi. (Isaia 61:5) Koia, neʼe fiafia ai te kau Kilisitiano fakanofo ʼi tanatou sio ki te ʼatu kau fai faka mafola evaselio ʼe nātou tuputupu ʼo toko lauʼi afe pea ki muli age ʼo toko lauʼi miliona. ʼI te taʼu 2003, ko te tuputupu foʼou, ko te toko 6 429 351 neʼe nātou kau ki te fai faka mafola​—ko te tokolahi tāfito ʼe nātou kau ki te toe hahaʼi tokolahi.a ʼE loto fakafetaʼi te kau Kilisitiano fakanofo ki te tokoni ʼaia, pea ko te tahi ʼu ōvi ʼe nātou fakafetaʼi ki te pilivilesio ʼaē ko te lagolago ki tonatou ʼu tēhina fakanofo.​—Mateo 25:​34-40.

8. Koteā ʼaē neʼe fai e te kau Fakamoʼoni ʼa Sehova logola te ʼu fakataga mālohi ʼaē neʼe hoko kia nātou ʼi te lolotoga ʼo te lua tau faka malamanei?

⁸ ʼI te temi ʼaē neʼe kua toe ʼiloʼi lelei ai ia te kalasi ʼo te fulumeto, neʼe fakafeagai mālohi ki ai ia Satana. (Apokalipesi 12:17) Koteā ʼaē neʼe ina fai ʼi te temi ʼaē neʼe ʼiloʼi ai ia te toe hahaʼi tokolahi? Neʼe lēsili age tana agamālohi! ʼE tou tui papau koa neʼe ko ia ʼaē neʼe ina tauʼi te tauhi moʼoni ʼi te lua tau faka malamanei? ʼI te ʼu faʼahi lualua ʼo te tau, neʼe gaohi koviʼi te kau Kilisitiano. Tokolahi te ʼu tēhina mo te ʼu tuagaʼane neʼe hoko kia nātou te ʼu ʼahiʼahi fakamataku, pea ko ʼihi neʼe nātou mamate ʼuhi ko tanatou tui. Logola te faʼahi ʼaia, neʼe nātou maʼu te ʼu manatu ʼaenī ʼa te tagata fai pesalemo: “ ʼI te logo tahi mo te ʼAtua ʼe ʼau fakavikiviki anai tana folafola. Neʼe ʼau tuku taku falala ki te ʼAtua; ʼe mole ʼau mataku anai. Koteā ʼaē ʼe lava fai mai e te tagata?” (Pesalemo 56:4; Mateo 10:28) Ko te kau Kilisitiano fakanofo pea mo te tahi ʼu ōvi, ʼaē neʼe fakamālohiʼi e te laumālie ʼo Sehova, neʼe nātou haga taupau tanatou agatonu. (2 Kolonito 4:7) Pea “nee mafola [ai] te Folafola a te Atua.” (Gaue 6:7) ʼI te 1939, ʼi te temi ʼaē neʼe hoko ai te tau, ko te toko 72 475 kau Kilisitiano agatonu neʼe nātou ʼaumai tanatou pepa tānaki gāue fai faka mafola. Kae ko te tānaki gāue ʼaē neʼe mole katoa ʼo te taʼu 1945, ʼaē neʼe fakaʼosi ai te tau, neʼe hā ai ko te toko 156 299 kau Fakamoʼoni neʼe nātou tala te logo lelei. Neʼe mole feala kia Satana ke ina tāʼofi nātou!

9. Koteā te ʼu ako foʼou neʼe fakatuʼu lolotoga te Lua Tau Faka Malamanei?

⁹ ʼE mahino ia, ko te maveuveu ʼo te lua tau faka malamanei neʼe mole ina fakatupu ai he lotolotolua ʼa te kau kaugana ʼa Sehova ki te hoko anai ʼo te gāue fai faka mafola. ʼI tona fakahagatonu, ʼi te 1943, ʼi te temi ʼaē neʼe mālohi ai te tau, neʼe fakatuʼu te ʼu ako foʼou e lua. Ko te tahi neʼe higoaʼi ko te Ako ʼo Te Minisitelio Faka Teokalatike, neʼe fai ʼi te ʼu kokelekasio fuli, moʼo akoʼi ki te kau Fakamoʼoni takitokotahi ia te fai faka mafola pea mo te fai ʼo ni ʼu tisipulo. Ko te tahi ako, ko te Faleako Faka Tohi-Tapu ʼo Kalaate ʼo te Watchtower, neʼe fai moʼo akoʼi te kau misionea ʼaē ka fai faka mafola anai ʼi te ʼu fenua tai. Ei, ʼi te ʼosi leva ʼo te tau, neʼe kua tokalelei te kau Kilisitiano moʼoni moʼo fakalahi te gāue.

10. Neʼe ʼiloga feafeaʼi ia te faʼafai ʼo te hahaʼi ʼa Sehova lolotoga te taʼu 2003?

¹⁰ Pea neʼe nātou fai te gāue fakaofoofo! ʼI tonatou akoʼi ʼi te Ako ʼo Te Minisitelio Faka Teokalatike, ko nātou fuli​—te kau tūpulaga mo nātou kua matutuʼa, te ʼu mātuʼa mo te tamaliki, ʼo feiā mo nātou ʼe mahahaki​—neʼe nātou kau pea ʼe kei hoko atu pe tanatou kau ki te fakahoko ʼo te gāue lahi ʼaē neʼe fakatotonu mai e Sesu. (Pesalemo 148:​12, 13; Soele 2:​28, 29) ʼI te taʼu 2003, neʼe fakahā e te toko 825 185 tanatou mahino ki te maʼuhiga ʼo totatou temi ʼo nātou kau ki te gāue pionie, peʼe fakavaha peʼe fai hoholo. ʼI te taʼu pe ʼaia, ko te kau Fakamoʼoni ʼa Sehova neʼe nātou fakaʼaogaʼi te ʼu hola e 1 234 796 477 moʼo faka mafola ki te hahaʼi ia te logo lelei ʼo te Puleʼaga. ʼE mahino ia ʼe fiafia ia Sehova ʼi te faʼafai ʼo tana hahaʼi!

ʼI Te ʼu Fenua Tai

11, 12. Koteā te ʼu faʼifaʼitaki ʼe nātou fakamoʼoni ki te tuputupu foʼou ʼaē neʼe hoko ʼaki te kau misionea?

¹¹ Lolotoga te ʼu taʼu, neʼe hoko te ʼu tuputupu foʼou ʼaki te kau maʼu pepa ʼo Kalaate pea mo te kau maʼu pepa ʼo te Ako ʼaē ʼe ina Teuteuʼi Ki Te Minisitelio. Ohage la, ʼi Pelesile, neʼe mole laka ʼi te toko 400 te kau fai faka mafola, ʼi te temi ʼaē neʼe tau age kiai ia te ʼu ʼuluaki misionea ʼi te 1945. Ko te kau misionea ʼaia pea mo te tahi kau misionea neʼe hoa mai kia nātou, neʼe nātou gāue kinakina mo tonatou ʼu tēhina faʼafai ʼo Pelesile, pea neʼe tapuakina lahi tanatou ʼu faiga e Sehova. Ko ia ʼaē ʼe kei ina manatuʼi ia te kamataʼaga ʼo te gāue ʼi Pelesile, ʼe fiafia ʼaupito ʼi tana sio ki te tānaki foʼou ʼo te toko 607 362 ʼi te 2003!

¹² Tou vakaʼi age muʼa ia Saponia. ʼI muʼa ʼo te lua tau faka malamanei, neʼe teitei pe ke maʼu he toko teau kau fai faka mafola ʼo te Puleʼaga ʼi te fenua ʼaia. Lolotoga te tau, neʼe lāvaki te kau fai faka mafola ʼuhi ko te ʼu fakataga, pea ʼi te ʼosi ʼo te tau, neʼe tokosiʼi te kau Fakamoʼoni neʼe kei nātou maʼuʼuli ʼi te faʼahi fakasino pea mo te faʼahi fakalaumālie. (Tāʼaga Lea 14:32) ʼE mahino ia neʼe fiafia ia te kau Fakamoʼoni agatonu ʼaia ʼaē neʼe nātou tokosiʼi ʼi te taʼu 1949, ʼi tanatou fakatalitali ki te toko 13 kau misionea ʼaē neʼe ako ʼi Kalaate, pea neʼe ʼoʼofa atu aipe ia te kau misionea ki tonatou ʼu tēhina Saponia agaʼofa pea tali kāiga. Hili kiai te ʼu taʼu e 50, ʼi te taʼu 2003, neʼe maʼu ʼi Saponia te toko 217 508 kau fai faka mafola! ʼE mahino ia neʼe tapuakina lahi e Sehova tana hahaʼi ʼi te fenua ʼaia. ʼE ʼi ai te ʼu tānaki feiā mai te tahi ʼu fenua. Ko te kau misionea ʼaia neʼe nātou lava fai faka mafola ʼi te ʼu fenua tai, neʼe nātou tokoni ki te faka mafola ʼo te logo lelei, ʼi te 2003 ʼi te ʼu fenua e 235, mo te ʼu motu pea mo te ʼu telituale ʼi te malamanei katoa. Ei, ko te toe hahaʼi tokolahi neʼe ʼōmai “mai te ʼu fenua fuli.”

“Mai . . . Te ʼu Telepi Pea Mo Te ʼu Hahaʼi Pea Mo Te ʼu Lea Fuli”

13, 14. Neʼe fakahā feafeaʼi e Sehova ia te maʼuhiga ʼaē ke faka mafola ia te logo lelei ʼi “te u lea fuape”?

¹³ Ko te ʼuluaki milakulo ʼaē neʼe hoko ʼi te ʼosi fakanofo ʼo te kau tisipulo e te laumālie maʼoniʼoni ʼi te Penikosite ʼo te taʼu 33 ʼo totatou temi, neʼe ko tanatou palalau ʼi te ʼu lea kehekehe ki te hahaʼi ʼaē neʼe maʼopoʼopo ai. Ko te nofoʼaki katoa ʼaia, neʼe lagi nātou palalau ki te lea ʼaē neʼe mafola ʼi te temi ʼaia, te faka Keleka. Neʼe ko te ʼu hahaʼi neʼe “tauhilotu,” koia neʼe lagi nātou mahino ki te ʼu gāue ʼaē neʼe fai e te kau Sutea ʼi te fale lotu. Kae neʼe nātou fia fakalogo ʼi tanatou logo ki te fakamatala ʼo te logo lelei ʼi te lea ʼaē neʼe nātou fakaʼaogaʼi talu mai tanatou liliki.​—Gaue 2:​5, 7-12.

¹⁴ ʼO toe feiā ia ʼaho nei, ʼe lahi te ʼu lea ʼe fakaʼaogaʼi ʼi te gāue fai faka mafola. Neʼe fakakikite ko te toe hahaʼi tokolahi ʼe mole nātou ʼōmai pe mai te ʼu fenua fuli, kae neʼe nātou ʼōmai foki mai “te ʼu telepi pea mo te ʼu hahaʼi pea mo te ʼu lea fuli.” ʼO mulimuli ki te faʼahi ʼaia, neʼe fakakikite e Sehova ʼaki ia Sakalia: “Ko te ʼu tagata e toko hogofulu mai te ʼu lea kehekehe ʼo te ʼu puleʼaga ʼe nātou puke anai te tapaʼi kofu ʼo te tagata Sutea, ʼo nātou ʼui fēnei: ‘ ʼE mātou ʼolo anai mo koutou, koteʼuhi neʼe mātou logo ko te ʼAtua ʼe nofo mo koutou.’ ” (Sakalia 8:23) Logola ʼe mole kei maʼu e te kau Fakamoʼoni ʼa Sehova ia te fealagia ʼo te ʼu lea, kae ʼe nātou mahino ki te maʼuhiga ʼo te akoʼi ʼo te hahaʼi ʼi te lea ʼaē ʼe nātou mahino kiai.

15, 16. Koteā te ʼu faiga mālohi ʼaē neʼe fai e te kau misionea pea mo te tahi ʼu tēhina moʼo faka mafola ʼi te ʼu lea ʼo te fenua ʼaē neʼe nātou gāue ai?

¹⁵ ʼE moʼoni, ʼe mole lahi te ʼu lea ʼaē ʼe fakaʼaogaʼi lahi, ohage ko te faka Pilitania, mo te Fakafalani, pea mo te Faka Sepania. Kae ko nātou ʼaē neʼe mavae ʼi tonatou fenua ʼo ʼolo ʼo gāue ʼi te tahi ʼu fenua, ʼe nātou faigaʼi ke nātou ako te ʼu lea ʼo te fenua moʼo fakaaʼu te logo lelei kia nātou ʼaē ʼe “nātou tali te maʼuli heʼegata.” (Gaue 13:​48, MN ) ʼE feala ke faigataʼaʼia te faʼahi ʼaia. ʼI te temi ʼaē neʼe ʼaoga ai he ʼu tohi ki te lea ʼo te ʼu tēhina ʼi te puleʼaga ʼo Tuvalu ʼi te Pasifika Saute, neʼe fai e te misionea ia te gāue faigataʼa. Mai te ʼaluʼaga ʼaē neʼe mole ʼi ai he tikisionalio, neʼe ina kamata fakatuʼu he lisi ʼo te ʼu kupuʼi palalau faka Tuvalu. ʼAki te temi, neʼe tā te tohi E Feala Keke Mauli O Heegata Ite Palatiso Ite Keleb ʼi te lea faka Tuvalu. ʼI te temi ʼaē neʼe tau ai te kau misionea ki Curaçao, neʼe mole ʼi ai he ʼu tohi faka Tohi-Tapu peʼe ko he tikisionalio ʼi te lea ʼo te fenua, ʼaē ko te Papiamento. Neʼe faigataʼa te felogoi ʼo ʼuhiga mo te faʼahiga tohi ʼo te lea ʼaia. Logope te ʼu faigataʼaʼia ʼaia, kae ʼi te ʼu taʼu e lua ʼo te tau mai ʼa te ʼu ʼuluaki misionea, neʼe tā ia te ʼuluaki pepa lotu faka Kilisitiano ʼi te lea ʼaia. Ia ʼaho nei, ʼe kau ia te lea faka Papiamento ʼi te ʼu lea e 133 ʼaē ʼe tā fakatahi ai ia Te Tule Leʼo mo te nusipepa faka Pilitania.

¹⁶ ʼI Namibie neʼe faigataʼa ki te ʼu ʼuluaki misionea ke nātou maʼu he Fakamoʼoni ʼo te fenua ke tokoni age kia nātou moʼo fakaliliu te ʼu tohi ʼi tanatou lea. Pea tahi ʼaē meʼa, ʼe ʼi ai te ʼu kupu ʼe mole maʼu ʼi te lea e tahi ʼi te fenua, te Nama, ohage ko te kupu “haohaoa.” ʼE fakamatala fēnei e te misionea: “Moʼo fakahoko te fakaliliu neʼe ʼau fakaʼaogaʼi tāfito te kau faiako ʼaē neʼe nātou ako te Tohi-Tapu. Mai te ʼaluʼaga ʼaē neʼe mole nātou faʼa mālama ki te moʼoni, neʼe tonu muʼa ke ʼau gāue mo nātou ke ʼau ʼiloʼi papau ʼe totonu fuli te ʼu kupuʼi palalau ʼaē ʼe nātou fakaʼaogaʼi.” Ko te kiʼi pepa lotu La vie dans un monde nouveau neʼe fakaliliu kia lea e fa ʼaē ʼe maʼu ʼi Namibie. Ia ʼaho nei, ko Te Tule Leʼo faka Kwanyama pea mo Ndonga, te tahi ʼu lea ʼo te fenua, kua tā fakatahi mo te faka Pilitania.

17, 18. ʼO ʼuhiga mo te lea, koteā te ʼu puleʼaki neʼe fai ʼi Mekesike pea mo te tahi ʼu fenua?

¹⁷ Ko te lea tāfito ʼi Mekesike, ko te Sepania. Kae ʼi muʼa ʼo te tau mai ʼa te kau Sepania, neʼe lahi te ʼu lea ʼi te fenua, pea ʼe kei ʼi ai pe te ʼu lea ʼe kei fakaʼaogaʼi. Koia ko te ʼu tohi ʼa te kau Fakamoʼoni ʼa Sehova kua tā nei ʼi te ʼu lea e fitu ʼo Mekesike, ʼo feiā mo te faka Mekesike ʼaē ʼe fai ʼaki te ʼu nima. Ko Te Minisitelio ʼo Te Puleʼaga ʼi te lea faka Maya, ʼe ko te ʼuluaki pepa ʼaia kua tā ʼi he lea ʼo te kau Initia ʼo Amelika. Ko te toko lauʼi afe kau Mayas, mo te kau Aztèques, pea mo te tahi kau Initia ʼe kau ki te toko 572 530 kau fai faka mafola ʼo te Puleʼaga ʼi Mekesike.

¹⁸ Mole heʼeki faʼa fualoa, ko te ʼu lauʼi miliona hahaʼi neʼe nātou feholaki ki te tahi ʼu fenua, peʼe neʼe nātou mavae ki te tahi ʼu fenua ʼuhi ko te ʼu faigataʼaʼia faka ekonomika. ʼUhi ko te faʼahi ʼaia, ʼe lahi te ʼu fenua ʼe maʼu ai te hahaʼi kaugamālie ʼe mole palalau ki te lea ʼo te fenua. Neʼe maʼu puleʼaki te kau Fakamoʼoni ʼa Sehova ki te faʼahi ʼaia. Ohage la ʼi Italia, ʼe ʼi ai te ʼu kokelekasio pea mo te ʼu kūtuga ia lea kehekehe e 22. Moʼo tokoni ki te ʼu tēhina ke nātou fai faka mafola ki te hahaʼi ʼaē ʼe palalau ki te tahi ʼu lea, neʼe fakatuʼutuʼu te ʼu kalasi moʼo akoʼi te ʼu lea e 16, ʼo kau kiai mo te lea faka Italia ʼaē ʼe fai ʼaki te ʼu nima. ʼE lahi te tahi ʼu fenua, ʼe faiga feiā ai te kau Fakamoʼoni ʼa Sehova ke nātou lava palalau ki te hahaʼi kaugamālie ʼaē ʼe ʼōmai mai te tahi ʼu fenua. Ei, ʼaki te tokoni ʼa Sehova, ʼe hoko moʼoni te mavae mai ʼa te toe hahaʼi tokolahi mai te ʼu tahi lea.

“ ʼI Te Kele Katoa”

19, 20. Koteā te ʼu palalau ʼa Paulo ʼe lolotoga hoko ʼi te temi nei ʼi hona ʼaluʼaga fakaofoofo? Koutou fakamahino.

¹⁹ ʼI te ʼuluaki sēkulō, neʼe tohi fēnei e te ʼapositolo ko Paulo: “Neʼe mole nātou logo koa? ʼIo, ʼe moʼoni ia, ‘ ʼi te kele katoa, kua mafola ai tonatou leʼo, pea ko tanatou ʼu akonaki kua kaku ki te ʼu potu taupotu ʼo te kele ʼaē ʼe nofoʼi.’ ” (Loma 10:18, MN ) Neʼe hoko moʼoni te faʼahi ʼaia ʼi te ʼuluaki sēkulō, kae neʼe hoko tāfito ia ʼaho nei! Ko te ʼu toko lauʼi miliona​—ʼo lagi mole hona fakatatau ki muʼa atu​—ʼe nātou ʼui fēnei: “ ʼE ʼau fakavikiviki anai kia Sehova ʼi te temi fuli pe; ʼe fakavikiviki tuʼumaʼu anai toku gutu kia te ia.”​—Pesalemo 34:1.

²⁰ Tahi ʼaē meʼa, ʼe mole fakavaivai ifo ia te gāue. ʼE haga tuputupu aipe ia te kaugamālie ʼa te kau fai faka mafola ʼo te Puleʼaga. Kua toe lahi age te temi ʼaē ʼe fakaʼaogaʼi ki te gāue fai faka mafola. ʼE fai te ʼu lauʼi miliona ʼaʼahi pea mo te ʼu ako faka Tohi-Tapu e lauʼi teau afe. Pea ʼe tuputupu te fia logo ʼa te hahaʼi. ʼI te taʼu kua hili, neʼe maʼu te tupu foʼou ʼo nātou ʼaē neʼe kau ki te Fakamanatu ʼo te mate ʼo Sesu: ko te toko 16 097 622. ʼE mahino mai ia ʼe kei lahi te gāue ʼaē ʼe tonu ke fai. ʼOfa pe ke tou haga faʼifaʼitakiʼi te agatonu ʼo totatou ʼu tēhina ʼaē neʼe nātou kātakiʼi te ʼu fakataga mālohi. Pea ʼofa pe ke tou maʼu te faʼafai ʼo totatou ʼu tēhina fuli ʼaē talu mai te 1919 neʼe nātou gāue mālohi ʼi te gāue kia Sehova. Tou haga tali fuli ki te hiva ʼaenī ʼa te tagata fai pesalemo: “Ko te maʼuli fuape​—ke fakavikiviki kia Sah. Koutou fakavikiviki kia Sah!”​—Pesalemo 150:6.

[Kiʼi nota]

ʼE Feala Koa Hakotou Fakamahino?

• Koteā te gāue ʼaē neʼe kamata fakahoko e te ʼu tēhina ʼi te 1919, pea he koʼe koa neʼe faigataʼa?

• Ko ai ʼaē neʼe tānaki moʼo tokoni ki te gāue fai faka mafola?

• Koteā te tuputupu ʼaē neʼe hoko ʼi te ʼu fenua tai, ʼaki te gāue ʼa te kau misionea pea mo ʼihi?

• Koteā te fakamoʼoni ʼe koutou maʼu moʼo fakahā ko Sehova ʼe ina tapuakina te gāue ʼo tana hahaʼi ia ʼaho nei?

[Paki ʼo te pasina 14, 15]

ʼAki te ʼu maveuveu ʼo te lua tau faka malamanei, neʼe mole lotolotolua ia te kau Kilisitiano ʼo ʼuhiga mo te maʼua ʼaē ke faka mafola ia te logo lelei

[Haʼuʼaga ʼo paki]

Explosion: U.S. Navy photo; others: U.S. Coast Guard photo

[Paki ʼo te pasina 17]

ʼE ʼōmai te toe hahaʼi tokolahi mai te ʼu telepi pea mo te ʼu lea fuape