Ko He Faʼifaʼitakiʼaga Ki Te Gāue Faka Misionea Faka Kilisitiano
“Koutou faʼifaʼitaki mai kia te ʼau, ohage ko taku faʼifaʼitakiʼi ia Kilisito.” — 1 Kolonito 11:1.
1. Koteā koa te ʼu faʼahiga meʼa neʼe fakahā ai e Sesu he faʼifaʼitaki lelei ke muliʼi e tana kau tisipulo (Filipe 2:5-9)?
ʼE KO he faʼifaʼitaki fakatalakitupua neʼe tuku e Sesu ki tana kau tisipulo! Neʼe ina tuku fakalelei tona ʼuhiga kolōlia ʼi selo kae haʼu ki te kele ʼo maʼuli mo te ʼu tagata agahala. Neʼe ina tali fakalelei ke hoko kia ia he toe mamahi lahi moʼo hāofaki te malamanei kae tāfito moʼo tāpuhā te huafa ʼo tana Tāmai ʼaē ʼi selo (Soane 3:16; 17:4). ʼI te temi ʼaē neʼe fakamāuʼi ai ia ia, neʼe tala fakagahatonu e Sesu ʼo fēnei: “Neʼe ʼau tupu ko te potu ʼaenī, pea neʼe ʼau haʼu ki te malamanei ko te potu ʼaenī: ko te fakamoʼoni ki te moʼoni.” — Soane 18:37.
2. He koʼe koa ʼi te toe fakatuʼuake ʼo Sesu neʼe feala ke ina fakatotonu ki tana kau tisipulo ke nātou hoko atu te gāue ʼaē neʼe ina kamata?
2 Ia muʼa ʼo tona mate neʼe foaki e Sesu te akonaki lelei ki tana kau tisipulo ke nātou hoko atu te gāue ʼaē ko te ʼave ʼo te fakamoʼoni ʼo te Puleʼaga (Mateo 10:5-23; Luka 10:1-16). Koia, ʼi tona toe fakatuʼuake, neʼe feala ke foaki e Sesu te fakatotonu ʼaenī: “Koutou ʼolo pea mo koutou fai he kau tisipulo ʼi te hahaʼi ʼo te fenua fuli pe, ʼo koutou papitemaʼi ia nātou ʼaki te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou akonakiʼi ia nātou ke nātou taupau te ʼu meʼa fuli pe neʼe ʼau fakatotonu atu.” — Mateo 28:19, 20.
3. Neʼe feafeaʼi koa te faka mafola ʼo te gāue fagonogono, pea ko te ʼu fenua fea ʼaē neʼe fai tāfito ki ai?
3 ʼI te ʼu taʼu e tolu vaelua ki muli mai, neʼe fai e te kau tisipulo ʼa Sesu te fakatotonu ʼaia, kae neʼe faka tuʼakoi pe tanatou fai tisipulo ki te kau Sutea mo te kau poloselite, pea mo te kau Samalita kua silikosisio. Pea, ʼi te taʼu 36 ʼo totatou temi, neʼe taki e te ʼAtua te logo lelei ke faka mafola ki te tagata ʼe mole silikosisio, ko Kolonelio, pea mo tona famili. ʼI te ʼu taʼu e hogofulu ki muli age, ko ʼihi kau Senitile neʼe fakahu ki te kokelekasio. Koia, neʼe kua lahi leva te fagono ki te logo ʼi te ʼu fenua ʼo te potu hahake metitelanea. — Gāue 10:24, 44-48; 11:19-21.
4. Koteā koa te meʼa maʼuhiga neʼe hoko ʼi te lagi taʼu 47-48 ʼo totatou temi?
4 Neʼe ʼi ai te meʼa neʼe ʼaoga moʼo uga peʼe moʼo fakagafua ki te kau kilisitiano ke nātou fai he ʼu tisipulo Sutea pea mo Senitile ʼi he ʼu fenua ʼe mamaʼo atu. Koia, lagi ʼi te taʼu 47-48 ʼo totatou temi, ko te kau tagata ʼāfea ʼo te kokelekasio ʼo Atiokia ʼi Silia neʼe nātou maʼu te logo fakaʼatua ʼaenī: “Koutou vaheʼi keheʼi age ia Palenapasi mo Saulo ki te gāue ʼaē neʼe ʼau pāuʼiʼi nāua ki ai.” (Gāue 13:2). Koutou fakatokagaʼi foki ko Paulo neʼe ʼiloa ʼi tona higoa ʼuluaki ʼaē ko Saulo. Koutou toe fakatokagaʼi foki neʼe hinoʼi muʼa e te ʼAtua ia Palenapasi, e lagi mahalope ʼi te temi ʼaia, ko Palenapasi neʼe hage kua matuʼa ia nāua.
5. He koʼe koa ko te fakamatala ʼo te ʼu folau misionea ʼa Paulo mo Palenapasi ʼe maʼuhiga ʼaupito ki te kau kilisitiano ʼo te temi nei?
5 Ko te fakamatalatala ʼo te folau misionea ʼa Paulo mo Palenapasi ʼe fakaloto mālohi ʼaupito ki te kau Fakamoʼoni ʼa Sehova, tāfito ki te kau misionea mo te kau pionie ʼaē ʼe mavae ʼi tonatou ʼu fenua moʼo tauhi kia Sehova ʼi he ʼu fenua kehe. ʼI hanatou lau te ʼu kapite 13 pea mo te 14 ʼo te tohi Gāue, ʼe toe uga tāfito aipe anai ia nātou ke nātou faʼifaʼitakiʼi tuʼumaʼu ia Paulo mo Palenapasi pea mo fakalahi tanatou kau ki te gāue maʼuhiga ʼaē ko te fai ʼo he kau tisipulo.
Te motu ko Sīpele
6. Koteā koa te faʼifaʼitaki neʼe tuku mai e te ʼu misionea ʼaē ʼi Sīpele?
6 Neʼe mole tuai foki, ko te ʼu misionea neʼe mavae atu ʼi te ʼuafu Silia ʼo Seleusia ki te motu ko Sīpele. ʼI tanā aʼu atu ki Salamine, neʼe mole nā maliu ʼi tanā gāue kae “neʼe nā kamata fagonogono aipe te folafola ʼa te ʼAtua ʼi te ʼu sinakoka ʼo te kau Sutea”. Neʼe nā mulimuli ki te faʼifaʼitaki ʼa Sesu, neʼe mole nā nonofo pe ʼi te kolo pea mo talitali ke ʼomai te hahaʼi ʼo te motu kia nāua. Neʼe nā fetuʼulaki ʼi te “motu katoa”. Neʼe lagi lahi tanā haʼele pea mo he fai ʼo he ʼu faʼahiga fetogi kehekehe heʼe ko Sīpele ko te motu ʼe lahi, pea neʼe nā fakalaka ʼi te faʼahi laulahi ʼo te motu. — Gāue 13:5, 6.
7. a) Koteā te meʼa fakatalakitupua neʼe hoko ʼi Pafosi? b) Ko te fakamatala ʼaia ʼe ina fakaloto mālohiʼi tatou ke tou fai koa te ā?
7 ʼI te ʼosi ʼo tanā nonofo ʼi te motu, ko te ʼu tagata ʼaia e lua neʼe fakapale nāua ʼaki he meʼa fakatalakitupua neʼe hoko ʼi te kolo ʼo Pafosi. Ko te pule ʼo te motu, ko Selesio Paulo, neʼe fagono ki tana fai faka mafola pea “neʼe liliu ia ʼo tui”. (Gāue 13:7, 12.) Ki muli age neʼe tohi fēnei e Paulo: “Kua koutou mamata ki tokotou pāuʼi, ʼu tēhina: ʼe mole lahi he kau popoto ʼi te kakano neʼe pāuʼiʼi, pe ko he kau pule, pe ko he kau tama ʼaliki.” (1 Kolonito 1:26). Kae, ʼi te te kau pule ʼaē neʼe tali ki te pāuʼi ʼaia, neʼe kau ai ia Selesio Paulo. Ko te meʼa ʼaia ʼe tonu ke ina fakaloto mālohiʼi tatou fuli, tāfito te kau misionea, ke nātou lotomālohi ʼo ʼuhiga mo te faka mafola ʼi he ʼu puleʼaga kua tali ai te gāue, pea ʼe toe fakaloto mālohi pe mo tatou ke tou fai te faʼahi ʼaia ia 1 Timoteo 2:1-4. Neʼe ʼi ai te ʼu tagata pule neʼe nātou tau lagolago ʼaupito te kau kaugana ʼa te ʼAtua. — Nehemia 2:4-8.
8. a) Koteā leva ʼaē neʼe kua fetogi ʼi te vāhaʼa ʼaē ʼo Palenapasi mo Paulo? b) Ko te faʼahi fea ʼaē neʼe tuku mai ai e Palenapasi he faʼifaʼitaki lelei?
8 ʼAki te taki mālohi ʼa te laumālie ʼo Sehova, neʼe fai e Paulo te gāue maʼuhiga ʼo ʼuhiga mo te fakamaliu ʼo Selesio Paulo ki te lotu faka kilisitiano (Gāue 13:8-12). Koia, kua ʼiloga mai ko Paulo ʼaē neʼe kua ina taki te gāue ʼaia (Vakaʼi ia Gāue 13:7 mo Gāue 13:15, 16, 43). Ko te meʼa ʼaia ʼe ʼalu tahi mo te gāue fakaʼatua ʼaē neʼe maʼu e Paulo ʼi te temi ʼaē neʼe tui ai kia Kilisito (Gāue 9:15). Ko te meʼa ʼaia neʼe hoko neʼe lagi ko he ʼahiʼahiʼi ʼo te agavaivai ʼa Palenapasi. Koia, neʼe mole fuaʼā ia Palenapasi, neʼe lagi mahino ia ki te ʼuhiga ʼaē ʼo tona higoa “ko te foha ʼo te fakafimālie”, pea mo ina lagolago lelei aipe kia Paulo ʼi tanā folau faka misionea ʼo feiā aipe mo te temi ʼaē neʼe fakafihi ai te kau kilisitiano Sutea ki tanā minisitelio ʼaē ki te kau Senitile ʼaē neʼe mole silikosisio (Gāue 15:1, 2). ʼE ko he faʼifaʼitaki lelei ia kia tatou fuli, ʼo kau ai foki mo nātou ʼaē ʼe nonofo ʼi te ʼu ʼapi misionea pea mo nātou ʼaē ʼi te ʼu Petele! ʼE tonu ke tou tali tuʼumaʼu te ʼu fetogi faka teokalatike pea mo tou lagolago katoa kia nātou ʼaē neʼe hinoʼi ko he kau takitaki ia tatou. — Hepeleo 13:17.
Te fenua māʼoluga ʼo te Asia Hihifo
9. Koteā koa te ako ʼe tou maʼu ʼi te folau ʼaē neʼe tali leleiʼi e Paulo mo Palenapasi ki Atiokia ʼi Pisitia?
9 Mai Sīpele, neʼe folau ia Paulo mo Palenapasi mai te potu tokelau ki te fenua ʼo Asia. ʼE mole fakahā mai e te Tohi-Tapu te ʼu tupuʼaga ʼaē ʼo tanā mole nonofo ʼi te ʼu potu fenua ʼo te mata tai, kae neʼe nā fai te toe fagona fakamataku, lagi ko kilometa e 180 ki Atiokia ʼi Pisitia, ʼaē ʼe tuʼu ʼi te lotolotoiga ʼo te Asia Hihifo. Neʼe nā hake pea mo hifo ʼi te moʼuga ʼe meta 1 100 tona māʼoluga. ʼE ʼui e te tagata ko J. Howson ʼo fēnei: “Ko te ʼu aga kaihaʼa māhani ʼo mole fakaʼapaʼapa ki he lao ʼa te hahaʼi ʼaē ʼe nonofo ʼi te ʼu moʼuga ʼaē ʼe ina vaeluaʼi te potu fenua māʼoluga (...) mai te ʼu potu fenua mālalo ʼo te potu toga ʼo te fenua, neʼe logona ia ʼi te temi Muʼa.” Pea tahi foki ko te ʼu misionea neʼe tonu ke tokaga ki te ʼu tuʼutāmaki ʼe haʼu mai te ʼu vai. ʼE toe ʼui ʼo fēnei e Howson ʼo ʼuhiga mo te faʼahi ʼaia, “ ʼe mole he tahi age koga meʼa ʼi te ʼAsia Hihifo ʼe tatau mo te ʼu pokoʼi moʼuga ʼaia ʼo Pisitia ʼi te lahi ʼo tona ʼu puvai, heʼe ʼasi te ʼu vaitafe ʼi te ʼu mata maka lalahi ʼi te ʼu vaʼe moʼuga pea puna ʼo to ki te ʼu mata vanu e fā veliveli”. Ko te ʼu meʼa ʼaia ʼe tokoni aipe kia tatou ke tou fakakaukauʼi te faʼahiga folau neʼe nā tali lelei ʼo fai moʼo faka mafola ʼo te logo lelei (2 Kolonito 11:26). Koia ia ʼaho nei, tokolahi te kau kaugana ʼa Sehova neʼe nātou felāveʼi mo te ʼu faigataʼaʼia kehekehe koteʼuhi ke nātou aʼu ki te hahaʼi ʼo foaki te logo lelei kia nātou.
10, 11. a) Neʼe feafeaʼi te maʼu e Paulo te felogoi lelei mo te hahaʼi ʼo te fakatahi? b) He koʼe koa neʼe tokolahi te kau Sutea neʼe nātou puna’maʼuli ʼi te ʼui ʼaē ʼe mamahi anai te Mesia? c) Ko te faʼahiga faka ʼāteaina feafeaʼi koa ʼaē neʼe fakahā e Paulo ki te hahaʼi?
10 Neʼe nā kamata faka mafola ʼi te sinakoka ʼo te kau Sutea ʼi Atiokia ʼi Pisitia, koteʼuhi ko ʼihi ia nātou ʼaia kua nātou māhani mo te Folafola ʼa te ʼAtua ʼo faigamalie ai kia nātou hanatou tali te logo lelei. ʼI te fakaafe ʼaē ʼo Paulo ke palalau, neʼe tuʼu ia ki ʼaluga ʼo ina fai te akonaki fakatalakitupua. Lolotoga ʼo tana akonaki, neʼe ina maʼu te felogoi lelei mo te kau Sutea pea mo te kau poloselite ʼi te fakatahi ʼaia (Gāue 13:13-16, 26). ʼI tana ʼosi fakaʼapaʼapa, neʼe fakamanatuʼi age e Paulo te hisitolia ʼo te kau Sutea, ʼo ina ʼui age kia nātou, ko Sehova neʼe ina fili tanatou ʼu kui pea mo ina hāofaki nātou mai Esipito, ʼo toe feiā aipe mo tana tokoni kia nātou ke nātou mālo ʼi te ʼu hahaʼi ʼo te Kele ʼo te fakapapau. Pea neʼe faka maʼuhigaʼi e Paulo te ʼu felogoi ʼaē neʼe hoko ia Sehova mo Tavite. Ko te ʼu fakamanatu ʼaia moʼo uga te ʼu loto ʼo te kau Sutea ʼo te ʼuluaki sēkulō koteʼuhi neʼe nātou falala ko te ʼAtua ʼe ina fakatupu anai ʼi te hākoga ʼo Tavite he tagata ko he fakamaʼuli mo he pule heʼegata. ʼO ʼuhiga mo te puani ʼaia, neʼe tala fakahagatonu e Paulo ʼo fēnei: “ ʼI te hākoga ʼo te tagata ʼaia [ko Tavite] ko te ʼAtua, ʼaki tana fakapapau, neʼe ina foaki ki Iselaele te fakamaʼuli, ko Sesu.” — Gāue 13:17-23.
11 Kae, ko te faʼahiga fakamaʼuli foki ʼaē neʼe talitali ki ai te kau Sutea, ʼe ko he tagata taki tau ʼiloa ia, ke ina faka ʼāteaina nātou mai te pule ʼa te kau Loma pea mo ina fai ke tuʼulaga māʼoluga te fenua ʼo Sutea ʼi te ʼu fenua fuli. Koia, neʼe lagi nātou puna’maʼuli ʼi te ʼui ʼaē e Paulo ko te Mesia neʼe foaki ke matehi ʼe tonatou ʼu takitaki lotu totonu. Neʼe tala fakagahatonu e Paulo: “Kae neʼe toe fakatuʼuake ia e te ʼAtua mai te mate.” ʼI te fakaʼosi ʼo tana akonaki, neʼe ina fakahā ki te fakatahi ʼaia, ʼe feala hanatou falala ki he faʼahiga faka ʼāteaina taulekaleka. Neʼe ina ʼui ʼo fēnei: “Ke koutou ʼiloʼi (...): ʼaki ia Ia ʼaenī, ʼe fakahā atu kia koutou te fakamolemole ʼo te ʼu agahala; pea mo te ʼu meʼa fuli ʼaē neʼe mole lava ke tala ia koutou ʼe koutou maʼa ʼaki te lao ʼa Moisese, ko ʼaē ʼe tui ʼe tala ia kua maʼa ʼaki ia Ia ʼaenī.” Neʼe fakaʼosi leva e Paulo tana akonaki ʼo ina fakaloto mālohiʼi ia nātou ke ʼaua naʼa nātou kau ia nātou ʼaē neʼe fakakikite ki ai e te ʼAtua ʼaē ʼe mole nātou tokaga ki te fakamaʼuli taulekaleka ʼaia. — Gāue 13:30-41.
12. Koteā te fua ʼo te akonaki ʼa Paulo, pea ʼe feafeaʼi koa tana fakaloto mālohiʼi tatou?
12 ʼE ko he akonaki maʼuhiga ia neʼe fakatafito ki te Tohi-Tapu! Neʼe feafeaʼi koa te tali ʼa te hahaʼi ki ai? “Tokolahi te kau Sutea pea mo te kau poloselite ʼaē ʼe ʼatolasio ki te ʼAtua neʼe nātou muliʼi ia Paulo mo Palenapasi.” (Gāue 13:43). ʼE ko he fakaloto mālohi ia kia tatou ʼi te temi nei! Koia ke tou fai ʼi te temi nei ke tou fakahā fakalelei te moʼoni, ʼi tatatou minisitelio ʼi te ʼu ʼapi peʼe ko ʼatatou ʼu tali ki te ʼu fehuʼi ʼi te ʼu fono peʼe ko te ʼu akonaki ʼi te ʼu fono ʼo te kokelekasio. — 1 Timoteo 4:13-16.
13. Heʼe koʼe koa neʼe mavae te kau misionea mai Atiokia ʼi Pisitia, pea koteā te ʼu fehuʼi ʼe malaga ai ʼo ʼuhiga mo te kau tisipulo foʼou?
13 Ko te hahaʼi ʼo Atiokia ʼi Pisitia ʼaē ko tanatou hoki fagonoe ki te logo lelei neʼe mole nātou taupau pe maʼa nātou. Koteā tona fua? “Ko te sapato neʼe hoko mai ki ai, neʼe teitei ko te kolo katoa ʼaē neʼe fakatahi ke nātou fagono ki te folafola ʼa Sehova.” Pea mole tuai foki, ko te logo neʼe mafola ʼo mamaʼo atu ʼi te kolo. ʼIo, “ko te folafola ʼa Sehova neʼe haga ʼave aipe ʼi te fenua katoa”. (Gāue 13:44, 49.) ʼO mole ʼui ke fakafetaʼi te kau Sutea ki te faʼahi ʼaia, kae ʼi tanatou fuaʼā neʼe nātou kapu te ʼu misionea ʼi te kolo (Gāue 13:45, 50). Neʼe lave feafeaʼi koa te meʼa ʼaia ki te kau tisipulo foʼou? Neʼe nātou lotovaivai ai koa pea mo nātou līaki te moʼoni?
14. He koʼe koa neʼe mole feala tāʼofi te gāue ʼaē neʼe kamata e te ʼu misionea, pea koteā te ako ʼe tou maʼu mai ai?
14 Kailoa, heʼe ko te gāue ʼaia ʼa te ʼAtua. Pea tahi foki, neʼe nā fai he fakatafito mālohi ʼo te tui ki te ʼAliki ko Sesu Kilisito ʼaē kua fakatuʼuake mai te mate. ʼE ʼiloga mai, neʼe ko Kilisito ʼaē neʼe falala ki ai te kau tisipulo foʼou ohage ko honatou Takitaki kae neʼe mole ko te ʼu misionea ia. Koia, ʼe tou lau ai neʼe haga “fonu aipe ʼi te fiafia mo te laumālie maʼoniʼoni ia te kau tisipulo”. (Gāue 13:52.) ʼE ko he meʼa fakaloto mālohi ki te kau misionea pea mo ʼihi tisipulo ʼo te temi nei! Kapau ʼe tou fai totatou maʼua ʼaki te agavaivai mo te mālohi, ko Sehova ʼAtua mo Sesu Kilisito ʼe nā tapuaki anai tatatou minisitelio. — 1 Kolonito 3:9.
Ikoniume, Lisite pea mo Telepē
15. Koteā te faʼahiga meʼa neʼe fai e te ʼu misionea ʼi Ikoniume, pea koteā tona ʼu fua?
15 ʼI te temi leva ʼaē ko Paulo mo Palenapasi kua nā folau leva ki Ikoniume, lagi ko kilometa e 140 ki te potu toga. Neʼe mole nā tuku te manavahe ʼo te fakataga ke tāʼofi ia nāua ohage ko tanā fai ʼaē ʼi Atiokia ʼi Pisitia. ʼI te ʼui ʼa te Tohi-Tapu neʼe fēnei tona fua: “Ko te toe hahaʼi Sutea mo Keleka neʼe tui.” (Gāue 14:1). ʼO toe hage pe ko Atiokia, ko te kau Sutea ʼaē neʼe mole nātou tali te logo lelei neʼe nātou fakafeagai kia nāua. Kae neʼe faʼa kātaki aipe te ʼu misionea pea mo nā maʼu te temi moʼo tokoni ki te kau tisipulo foʼou ʼi Ikoniume. Ki muli age, ʼi tanā logo ʼaē ko te kau Sutea ʼaē ʼe fakafeagai ʼe nātou fia taumakaʼi ia nāua, neʼe nā mavae ai ʼo ʼolo ki te tahi telituale, ko ‘Lisite mo Telepē, pea mo te fenua ʼe ōvi mai’. — Gāue 14:2-6.
16, 17. a) Koteā te meʼa neʼe hoko kia Paulo ʼi Lisite? b) Neʼe lave feafeaʼi koa te ʼu gāue ʼa te ʼAtua ʼo ʼuhiga mo te ʼapositolo ki te talavou ʼi Lisite?
16 ʼAki te lototoʼa, “neʼe nā haga faka mafola aipe te logo lelei” ʼi te telituale foʼou ʼaia ʼaē kua hoki tala ai te logo (Gāue 14:7). ʼI te logo ʼaē ʼa te kau Sutea mai Atiokia ʼi Pisitia mo Ikoniume ki te meʼa ʼaia, neʼe nātou fakalotoʼi ia nātou ʼaē ʼi Lisite ke nātou taumakaʼi ia Paulo (Gāue 14:7). Neʼe mole lava hana hola, ʼo liu taumakaʼi ai ia Paulo, pea ʼi te manatu ʼa te kau Sutea ʼaē ʼe fakafeagai kua mate ia. ʼO nātou toho ai ia ia ki te tuʼa ʼo te kolo. — Gāue 14:19.
17 Koutou fakakaukauʼi age muʼa te lotomamahi neʼe tau mo te kau tisipulo foʼou. Kae meʼa fakaofoofo foki, ʼi tanatou ʼā takataka ia Paulo, neʼe tuʼuake ia ki ʼaluga! ʼE mole tala e te Tohi-Tapu ko te talavou e higoa ko Timoteo neʼe kau ia nātou ʼaē ko te ʼu tisipulo foʼou. ʼE mahalope ia ko te ʼu gāue ʼa te ʼAtua ʼo ʼuhiga mo Paulo ʼi te temi ʼaē neʼe ina ʼiloʼi lelei pea neʼe fakaʼiloga loloto ʼi tona ʼatamai. Neʼe tohi e Paulo ʼi tana lua tohi kia Timoteo ʼo fēnei: “Kae ko koe neʼe ke pipiki agatonu ki taku akonaki, ki toku faʼahiga maʼuli, (...) ki te ʼu faʼahiga meʼa neʼe hoko kia ʼau ʼi Atiokia, ʼi Ikoniume, ʼi Lisite, ki te ʼu faʼahiga fakataga neʼe ʼau katakiʼi; kae ʼi te ʼu meʼa fuli ʼaia neʼe hāofaki aipe ʼau e te ʼAliki.” (2 Timoteo 3:10, 11). Neʼe lagi hili te taʼu katoa peʼe lua ki te taumakaʼi ʼo Paulo, neʼe toe liliu ia ki Lisite pea ina maʼu ai te tūpulaga ko Timoteo, ko he kilisitiano neʼe ina tuku te faʼifaʼitaki lelei, “ko te ʼu tēhina ʼo Lisite mo Ikoniume neʼe nātou talanoa lelei ʼo ʼuhiga mo ia”. (Gāue 16:1, 2.) Koia, neʼe fili ai ia e Paulo ko tona kau fagona gāue. Ko he tahi pe ʼaenā tokoni kia Timoteo ke tuputupu ʼi te faʼahi poto fakalaumālie, pea ʼi tana kua māhani ʼi te gāue, neʼe fekauʼi ai leva e Paulo ke ʼalu ʼo ʼaʼahi ki te ʼu kokelekasio kehekehe (Filipe 2:19, 20; 1 Timoteo 1:3). Ohage pe ko te temi nei, ko te kau kaugana faʼa gāue ʼa te ʼAtua ʼe ko he ʼu faʼifaʼitaki taulekaleka ia ki te kau tūpulaga, ko ʼihi neʼe tuputupu ʼo liliu ko he ʼu kaugana maʼuhiga ʼa te ʼAtua ohage ko Timoteo.
18. a) Koteā te meʼa neʼe hoko ki te ʼu misionea ʼi Telepē? b) Koteā te meʼa kua nā fealagia lelei ki ai ʼi te temi leva ʼaia, kae koteā te ala ia ʼaē neʼe nā fili?
18 ʼI te pogipogi uhu ake ʼaē neʼe hoko atu ki te ʼaho ʼaē neʼe hāo mai ai ʼi Lisite, neʼe mavae ia Paulo mo Palenapasi ki Telepē. Ko te temi ʼaia, neʼe mole muliʼi nāua e te kau fakafeagai, pea ʼe ʼui e te Tohi-Tapu “neʼe nā fai ai te ʼu tisipulo tokolahi”. (Gāue 14:20, 21.) ʼI tana fakatuʼu te kokelekasio ʼi Telepē, neʼe fakatuʼutuʼu e Paulo mo Palenapasi te tonu. Ko te ala fai fagona ʼaē neʼe fai e te kau Loma ʼe ʼalu atu ʼi Telepē ki Talasisio. ʼE fakanounou ai leva te ʼalu ki Atiokia ʼi Silia. Neʼe lagi ko te ala lelei pe ʼaia ke nā toe liliu mai ai, pea lagi ʼi te manatu ʼa te ʼu misionea ʼaia kua tau mo nāua hana mālōlō leva ʼi te temi ʼaia. ʼI tanā fia mulimuli aipe ki te faʼifaʼitakiʼi ʼo tonā Pule, neʼe nā logoʼi ʼe ʼi ai te meʼa maʼuhiga tāfito ke nā fai. — Maleko 6:31-34.
Ko te gāue ʼa te ʼAtua kua fai katoa
19, 20. a) Neʼe feafeaʼi koa te tapuaki e Sehova te ʼu misionea ʼi tanā toe liliu ki Lisite, Ikoniume, pea mo Atiokia? b) Koteā koa te ako ʼe ʼiloga mai ai, ʼaē ʼe foaki mai e Sehova ki tana hahaʼi ʼi te temi nei?
19 Neʼe mole nā liliu mai ʼi te ala ʼaē ʼe nounou ki tona ʼapi, neʼe nā loto kātaki aipe ʼo toe liliu ki muli, pea mo nā toe ʼaʼahi te ʼu kolo pe ʼaia neʼe nā tuʼutāmaki ai. Neʼe tapuakiʼi koa e Sehova tanā tokaga ki te ʼu ōvi foʼou ʼaia? Ei, ʼe ʼui e te fakamatala neʼe nā ‘fakaloto mālohiʼi aipe te ʼu nefesi ʼo te ʼu tisipulo, ʼo nā fakaloto mālohiʼi nātou ke nātou pipiki maʼu ʼi te tui’. Koia neʼe lava ai ke nā ʼui ki te ʼu tisipulo foʼou ʼaia, ʼo fēnei: “ ʼE tou hu anai ki te puleʼaga ʼo te ʼAtua ʼi te lotolotoiga ʼo te lahi ʼo te ʼu mamahi.” (Gāue 14:21, 22). Neʼe toe fakamanatuʼi age foki e Paulo mo Palenapasi kia nātou ke nātou manatuʼi tonatou pāuʼiʼi ʼaē ke nātou pule fakatahi mo Kilisito ʼi te Puleʼaga ʼo te ʼAtua. ʼI te temi nei, ʼe tou foaki aipe te fakaloto mālohiʼi ʼaia ki te ʼu tisipulo foʼou. ʼE feala ke tou fakaloto mālohiʼi nātou ke nātou kātakiʼi te ʼu mamahi ʼo foaki age kia nātou te ʼamanaki ʼo he maʼuli heʼegata ʼi te kele ʼi te pule ʼa te Puleʼaga ʼo te ʼAtua ʼaē neʼe faka mafola e Paulo mo Palenapasi.
20 Ia muʼa ʼo hanā mavae ʼi he kolo, neʼe tokoniʼi aipe e Paulo mo Palenapasi te ʼu kokelekasio ke nātou fai he fakatuʼutuʼu lelei. ʼE ʼiloga mai, neʼe nā akoʼi te ʼu tagata ke māhani mo te gāue ʼaia pea mo nā hinoʼi ia nātou ke nātou takitaki te ʼu kokelekasio (Gāue 14:23). ʼIo neʼe ko he tahi pe ʼaenā meʼa moʼo hikihiki te faka mafola. Ohage pe ko te temi nei, ko te kau misionea pea mo ʼihi age, ʼi tanatou ʼosi tokoniʼi niʼihi ke nātou lava ʼamo te ʼu maʼua, ʼe nātou ʼolo ki niʼihi atu ʼu koga meʼa ʼe ʼaoga tāfito tanatou gāue ʼi ai.
21, 22. a) Koteā koa te meʼa ʼaē neʼe hoko ʼi te ʼosi fai katoa e Paulo mo Palenapasi tanā ʼu folau faka misionea? b) Koteā koa te ʼu fehuʼi ʼe fai anai ki te faʼahi ʼaia?
21 ʼI te kua toe liliu leva ʼa te ʼu misionea ki Atiokia ʼi Silia, neʼe nā fiafia ʼaupito ʼosi. ʼE fakahā e te Tohi-Tapu neʼe nā ‘fai katoa’ te gāue ʼaē neʼe foaki age e te ʼAtua kia nāua (Gāue 14:26). Koia, ko te ʼu meʼa ʼaē neʼe hoko kia nāua neʼe fakatupu ai “te fiafia lahi ki te ʼu tēhina fuli”. (Gāue 15:3.) Kae koteā te ʼui ki te temi neʼe hoko atu ki ai? Kua nā nonofo noa koa ʼi tana ʼosi liliu mai ʼo talitali pe? Kailoa ia. ʼI tana ʼosi liliu mai te kolesi pule ʼaē ʼi Selusalemi ʼo ʼuhiga mo te fihi ʼaē ki te silikosisio, neʼe nā toe folau faka misionea. ʼI te temi leva ʼaia, neʼe nā mavete ai. Neʼe kau fagona ia Palenapasi mo Soane Maleko ʼo folau ki Sīpele, pea kau fagona ia Paulo mo Silasi ʼo nā ʼolo ki Silia pea mo Silisia (Gāue 15:39-41). Ko te folau leva ʼaia ka ina fili ai leva te tūpulaga ʼaē ko Timoteo ke kaugā fagona mo ia.
22 ʼE mole fakahā e te Tohi-Tapu te ʼaluʼaga ʼo te folau tuʼa lua ʼaē ʼa Palenapasi. Ohage pe ko Paulo, neʼe hoko atu ia ʼi te telituale foʼou pea mo ina fakatuʼu te ʼu kokelekasio ia kolo e nima: ko Filipe, Pelea, Tesalonika, Kolonito, mo Efese. Neʼe kotēa koa te tafitoʼaga ʼo te fua manuʼia ʼa te gāue ʼa Paulo? Ko te ʼu fakatuʼutuʼu gāue koa ʼa te kau kilisitiano ʼo te temi nei moʼo fai he kau tisipulo ʼe tatau koa?
Kei koutou manatuʼi koa?
◻ He koʼe koa ko Sesu e ko te faʼifaʼitakiʼaga fakatalakitupua ke muliʼi?
◻ Ko te faʼahi fea koa ʼaē ʼe ʼui ai ko Palenapasi e ko te faʼifaʼitaki?
◻ Koteā koa te ako ʼe tou maʼu mai te akonaki ʼa Paulo ʼaē ʼi Atiokia ʼi Pisitia?
◻ Neʼe feafeaʼi koa te fai katoa e Paulo mo Palenapasi tonā maʼua?
[Paki ʼo te pasina 15]
Ko te faʼa kātakiʼi e te ʼapositolo ko Paulo tona ʼu fakataga neʼe fakaʼiloga loloto ki te ʼatamai ʼo te tama talavou ʼaē ko Timoteo.