He Koʼe Koa ʼe Fakagafua e Te ʼAtua Te ʼu Mamahi?

1, 2. Koteā te ʼu faʼahiga mamahi ʼaē ʼe hoko ki te hahaʼi iā ʼaho nei, pea ʼe nātou lagaʼi ai te ʼu fehuʼi fea?

ʼI TE hili ʼa te tau fakamataku neʼe hoko ʼi te fenua, neʼe mamate ai te toko lauʼi afe hahaʼi fafine pea mo fānau, pea neʼe tanu nātou ʼi te foʼi luo, ʼo fakatuʼu ʼi ʼona tafaʼaki te ʼu kiʼi koluse, ʼe tohi ai te ʼu kupu ʼaenī: “He koʼe koa neʼe hoko te meʼa ʼaenī?” ʼE tau lagaʼi te fehuʼi ʼaia e te hahaʼi moʼo fakahā tanatou lotomamahi, tāfito la mo kapau neʼe hoko he tau, he tuʼutāmaki, he mahaki, peʼe ko he fai fakapō, ʼo mamate ai he ʼu hahaʼi neʼe nātou ʼoʼofa ai, pea mo maumau ai tonatou ʼu ʼapi, peʼe tupu ai he ʼu faigataʼaʼia lahi ʼi he tahi ʼu ʼaluʼaga. ʼE nātou fia ʼiloʼi pe koʼe neʼe hoko kiā nātou te ʼu meʼa fakaʼofaʼofa ʼaia.

² He koʼe ʼe fakagafua e te ʼAtua ia te ʼu mamahi? Kapau ko Sehova ʼe ko he ʼAtua māfimāfi, mo ʼofa, mo poto, pea mo faitotonu, he koʼe koa ʼe fonu te malamanei ʼi te fehiʼa pea mo te heʼe faitotonu? Neʼe kua koutou fai koa te ʼu fehuʼi ʼaia?

3, 4. (a) Koteā ʼaē ʼe hā ʼaki mai ʼe mole kovi hatatou fia ʼiloʼi pe koʼe ʼe fakagafua e te ʼAtua te ʼu mamahi? (b) E feafeaʼi kiā Sehova ia te agakovi pea mo te ʼu mamahi?

³ ʼE kovi koa hatatou fia ʼiloʼi pe koʼe ʼe fakagafua e te ʼAtua ia te ʼu mamahi? Ko ʼihi ʼe nātou tuʼania ʼi te lagaʼi ʼo te taʼi ʼu fehuʼi ʼaia, heʼe hage ko he fakaʼiloga ʼaia ʼo tanatou tui vaivai, peʼe mole ko he fakaʼapaʼapa ʼaia ki te ʼAtua. Kae kapau ʼe koutou lau ia te Tohi-Tapu, ʼe koutou fakatokagaʼi anai neʼe lagaʼi te ʼu fehuʼi ʼaia e te ʼu hahaʼi agatonu, neʼe manavasiʼi ki te ʼAtua. Ohage la, neʼe fehuʼi fēnei e te polofeta ko Hapakuke kiā Sehova: “He koʼe ʼe ke fakamamata mai kiā te au te meʼa ʼaē ʼe kovi pea mo ke haga sioʼi te maveuveu? Pea he koʼe ʼe tuʼu ʼi ʼoku muʼa ia te kaihaʼa ʼo te ʼu koloā pea mo te agamālohi, pea he koʼe ʼe ʼi ai te ʼu kē, pea he koʼe ʼe mālo te kē?”​—Hapakuke 1:3.

⁴ Neʼe ʼita koa ia Sehova ki te polofeta agatonu ʼaia ko Hapakuke ʼi tana fai age te ʼu fehuʼi ʼaia? Kailoa. Kae neʼe loto e te ʼAtua ke tohi ʼi te Tohi-Tapu te ʼu fehuʼi fakamalotoloto ʼaia ʼa Hapakuke. Neʼe toe tokoni age ia te ʼAtua ke lahi age tana mahino pea ke toe lahi age mo tana tui. ʼE loto e Sehova ke toe feiā mo tatou. Tou manatuʼi ʼe akoʼi mai ʼi te Tohi-Tapu ko Sehova “e tokaga ia kia [tatou].” (1 Petelo 5:7) ʼE mole he tahi ʼe tatau mo Sehova ʼo ʼuhiga mo te fehiʼa ki te agakovi pea mo te mamahi ʼaē ʼe tupu mai ai. (Isaia 55:​8, 9) Kae he koʼe koa ʼe lahi te ʼu mamahi ʼe hoko ʼi te malamanei?

HE KOʼE ʼE LAHI TE ʼU MAMAHI?

5. ʼI te agamāhani, koteā te ʼu fakamahino ʼaē ʼe tuku mai ʼo ʼuhiga mo te ʼu mamahi ʼa te tagata, kae koteā ʼaē ʼe akoʼi mai ʼi te Tohi-Tapu?

⁵ Ko te hahaʼi ʼo te ʼu lotu kehekehe, neʼe nātou fehuʼi ki tanatou ʼu takitaki pea mo faiako lotu pe koʼe ʼe lahi te ʼu mamahi. ʼI te agamāhani, ʼe nātou tali age ʼe ko te finegalo ʼo te ʼAtua, pea talu mai fualoa neʼe kua ina fakatuʼutuʼu ia meʼa fuli ʼaē ʼe tonu ke hoko, ʼo feiā mo te ʼu mamahi. ʼE ʼui ki te tokolahi, ko te ʼu meʼa ʼaē ʼe fai e te ʼAtua, ʼe ko he misitelio, peʼe ʼui age kiā nātou ko te ʼAtua ʼe ina matehi te hahaʼi, pea mo te ʼu kihiʼi tamaliki, ke feala hanatou nonofo mo ia ʼi selo. Kae ʼaki te ʼu meʼa ʼaē neʼe koutou ako, kua koutou ʼiloʼi ʼe mole feala ʼi he temi ke fai e Sehova ʼAtua he meʼa ʼe kovi, heʼe ʼui ʼi te Tohi-Tapu: “ ʼE mole feala ki te ʼAtua moʼoni ke ina fai he meʼa ʼe kovi, pea ʼe mole fai e te Māfimāfi he aga ʼe heʼe faitotonu!”​—Sopo 34:10.

6. He koʼe ko te tokolahi ʼe nātou faihala ʼi tanatou tukugakoviʼi te ʼAtua ʼo ʼuhiga mo te ʼu mamahi ʼi te malamanei?

⁶ ʼE koutou ʼiloʼi pe koʼe ʼe faihala te hahaʼi ʼi tanatou tukugakoviʼi te ʼAtua ʼo ʼuhiga mo te ʼu mamahi fuli ʼaē ʼe hoko ʼi te malamanei? ʼE tupu tāfito tanatou tukugakoviʼi te ʼAtua Māfimāfi, heʼe ʼi tanatou manatu ʼe ko ia te pule ʼo te mālama ʼaenī. Kae ʼe mole nātou ʼiloʼi te moʼoni mahino gafua pea mo maʼuhiga ʼaē ʼe tuʼu ʼi te Tohi-Tapu. Neʼe koutou ako te moʼoni ʼaia ʼi te Kapite 3 ʼo te tohi ʼaenī, ʼaē ʼe ʼui ai ko te pule ʼo te malamanei, ʼe ko Satana te Tevolo.

7, 8. (a) ʼE hā feafeaʼi ʼi te malamanei te agaaga ʼo tona pule? (b) Koteā te ʼu mamahi ʼaē ʼe tupu mai te heʼe haohaoa ʼa te tagata, mo “te ʼu temi pea mo te ʼu ʼaluʼaga fakafokifā ʼe hoko kiā tatou”?

⁷ ʼE ʼui fakalelei mai ʼi te Tohi-Tapu: “Ko te malamanei kātoa ʼe takoto ia ʼi te mālohi ʼo te agakovi.” (1 Soane 5:​19, MN ) Ka koutou fakakaukauʼi ia te faʼahi ʼaia, pea ʼe koutou mahino ai leva pe koʼe ʼe feiā te malamanei. Ko te mālama ʼaenī ʼe ina maʼu te agaaga ʼo te ʼāselo fakapulipuli ʼaē “ ʼe ina fakahēʼi te kele kātoa.” (Apokalipesi 12:​9, MN ) Ko Satana ʼe agakovi, mo aga fakakākā, pea mo agamālohi, koia ʼaē ʼe fonu ai te malamanei ʼi te fehiʼa, mo te aga fakakākā, pea mo te agamālohi. ʼE ko te ʼuluaki tupuʼaga ʼaia ʼo te lahi ʼa te ʼu mamahi.

⁸ Ko te lua tupuʼaga ʼo te lahi ʼa te ʼu mamahi, heʼe toe ʼui ʼi te Kapite 3, ko te malamanei ʼe maʼuli heʼe haohaoa pea mo agahala talu mai te fakafeagai ʼaē neʼe hoko ʼi te ʼōloto ʼo Eteni. ʼE ko he agamāhani ʼa te hahaʼi agahala hanatou fefihiʼaki moʼo puleʼi ʼo te malamanei, koia ʼaē ʼe tupu ai te ʼu tau, te aga fefeka, pea mo te ʼu mamahi. (Tagata Tānaki 4:1; 8:9) Ko te tolu tupuʼaga ʼo te ʼu mamahi, “heʼe ko te ʼu temi pea mo te ʼu ʼaluʼaga fakafokifā ʼe hoko kiā tatou fuli.” (Tagata Tānaki 9:11) ʼI he mālama ʼe mole Pule ai ia Sehova moʼo puipui ia te malamanei, ʼe feala ki te hahaʼi ke nātou maʼuli mamahi heʼe nātou tō lotoa ʼi he ʼu koga meʼa pea mo ʼi he ʼu temi ʼe faigataʼa te maʼuli.

9. He koʼe ʼe tou lava tui papau ʼe ʼi ai te tupuʼaga lelei ʼo te fakagafua e Sehova ke hoholo te ʼu mamahi?

⁹ ʼE ko he meʼa fakaloto fīmālie hatatou ʼiloʼi ʼe mole ko te ʼAtua ʼaē ʼe tupu ai te ʼu mamahi. ʼE mole ko ia ʼaē ʼe tupu ai te ʼu tau, te ʼu fai fakapō, te aga fefeka, pea mo te ʼu tuʼutāmaki ʼaē ʼe maʼuli mamahi ai te hahaʼi. Kae ʼe mole heʼeki tou ʼiloʼi pe koʼe ʼe fakagafua e Sehova ia te ʼu mamahi fuli ʼaia? Kapau ʼe Māfimāfi, pea ʼe feala hana fakagata te ʼu mamahi ʼaia. Kae he koʼe koa ʼe mole ina fai ia te faʼahi ʼaia? Ko te ʼAtua ʼofa ʼaē kua tou ʼiloʼi, ʼe lagi ʼi ai he tupuʼaga lelei ʼo tana fakagafua ke hoholo te ʼu mamahi ʼaia.​—1 Soane 4:8.

NEʼE MALAGA TE FIHI MAʼUHIGA

10. Koteā ʼaē neʼe fakafihiʼi e Satana, pea koteā te ʼu tukugakovi ʼaē neʼe ina fai?

¹⁰ Ke feala hatatou ʼiloʼi pe koʼe ʼe fakagafua e te ʼAtua ia te ʼu mamahi, ʼe lelei ke tou toe vakaʼi te temi ʼaē neʼe kamata mai ai te ʼu mamahi. ʼI te temi ʼaē neʼe fakaneke ai e Satana ia Atama mo Eva ke nā talagataʼa kiā Sehova, neʼe malaga ai te fihi maʼuhiga. Neʼe mole fakafihiʼi e Satana ia te mālohi ʼo Sehova, he neʼe ina ʼiloʼi ʼe māfimāfi. Kae neʼe ina fakafihiʼi ia te lakatonu ʼaē ke pule ia Sehova. Neʼe tukugakoviʼi e Satana ia Sehova ʼo ina ʼui ʼe ko he pule agakovi, ʼo ina ʼui ko te ʼAtua ʼe gutuloi, pea ʼe mole ina fia foaki te ʼu meʼa ʼaē ʼe lelei ki tana hahaʼi. (Senesi 3:​2-5) Neʼe lau e Satana ʼe maʼuli lelei age anai ia te malamanei mo kapau ʼe mole pule te ʼAtua kiā nātou. Neʼe ko he fakafihiʼi ʼaia ʼo te pule faʼitaliha ʼa Sehova, tona maʼua ʼaē ke pule.

11. He koʼe koa neʼe mole haga pe Sehova ʼo fakaʼauha te kau fakafeagai ʼi Eteni?

¹¹ Ko Atama mo Eva neʼe nā fakafeagai kiā Sehova, he neʼe nā ʼui fēnei: “ ʼE mole mā loto ke Pule Sehova kiā māua. ʼE feala pe hamā filifili maʼa māua te meʼa ʼaē ʼe lelei pea mo te meʼa ʼaē ʼe kovi.” Neʼe lava fakatokatoka feafeaʼi e Sehova ia te fihi ʼaia? Neʼe lava feafeaʼi hana akoʼi ki te kau ʼāselo pea mo te hahaʼi, neʼe faihala te kau fakafeagai ʼaia, pea ʼe lelei age hanatou fakalogo kiā te ia? ʼE lava ʼui e he tahi, neʼe feala noa pe ki te ʼAtua ke ina fakaʼauha te kau fakafeagai ʼaia, pea ke ina toe fakatupu he tahi ʼu hahaʼi. Kae neʼe ʼui e Sehova ko tana fakatuʼutuʼu ke ina fakafonu te kele ʼaki te hōloga ʼo Atama mo Eva, pea neʼe ina fakaʼamu ke nātou māʼuʼuli ʼi he palatiso fakakelekele. (Senesi 1:28) ʼE fakahoko tuʼumaʼu e Sehova tana ʼu fakatuʼutuʼu. (Isaia 55:​10, 11) Tahi ʼaē meʼa, kapau neʼe fakaʼauha e Sehova te kau fakafeagai ʼi Eteni, pea neʼe mole feala anai ke ina fakatokatoka ai te fihi ʼaē neʼe malaga ʼo ʼuhiga mo tona maʼua ʼaē ke pule faʼitaliha.

12, 13. ʼAki he faʼifaʼitaki, koutou fakahā mai pe koʼe neʼe fakagafua e Sehova kiā Satana ke liliu ko te pule ʼo te malamanei, pea he koʼe neʼe ina fakagafua ki te tagata ke pule kiā ia totonu.

¹² Tou fakatā muʼa ia te ʼaluʼaga ʼaia. ʼE ko he tagata faiako ʼe ina fakamahino ki te ʼu tamaliki ʼe ina ako, ia te puleʼaki moʼo fakatokatoka ʼo te fihifihia faka numelo. Kae ʼe ʼi ai te tama ʼe ʼatamai kae agatuʼu, ʼe ina lau ia ʼe mole lelei ia te puleʼaki ʼaē neʼe fai e te tagata faiako moʼo fakatokatoka ʼo te fihifihia. Kiā ia ko te tagata faiako ʼe mole poto ia, pea ʼe ina lau ia ʼe ina ʼiloʼi ia te puleʼaki lelei ʼaē moʼo fakatokatoka ʼo te fihifihia faka numelo. ʼO toe feiā mo ʼihi ʼu kau ako, ʼe manatu nātou ʼe tonu te tama ia, ʼo toe fakafeagai mo nātou ki te tagata faiako. Koteā te meʼa ʼaē ʼe tonu ke fai e te tagata faiako? Kapau ʼe ina fakamavae nātou ʼaē ʼe fakafeagai, koteā anai te manatu ia ʼa nātou ʼu kau ako ʼaē? ʼE mole feala anai koa ke toe manatu mo nātou ʼaia ʼe tonu te tama mo nātou ʼaē neʼe nātou muliʼi ia ia? ʼE toe feala anai mo te ʼu kau ako fuli ʼaia, ke nātou toe agatuʼu mo nātou ki te tagata faiako, mo manatu ʼe mataku ia naʼa fakamoʼoni e nātou ʼaē ia te mole lelei ʼo tana puleʼaki. Koia ʼe fakagafua anai e te tagata faiako ki te tama agatuʼu, ke ina fakahā ki te ʼu kau ako fuli te puleʼaki ʼaē moʼo fakatokatoka ʼo te fihifihia.

¹³ Neʼe fai e Sehova te puleʼaki ʼe hage ko te puleʼaki ʼaē neʼe fai e te tagata faiako. Koutou manatuʼi neʼe ʼi ai te ʼu lauʼi miliona ʼāselo neʼe nātou sioʼi te meʼa ʼaē neʼe hoko ʼaki te kau fakafeagai ʼi Eteni. (Sopo 38:7; Taniela 7:10) Ko te faʼahi ʼaē neʼe fai e Sehova moʼo tali ki te fakafeagai ʼaia neʼe ʼi ai tona fua ki te kau ʼāselo fuli ʼaia pea mo te malamanei kātoa. Koteā ʼaē neʼe fai e Sehova? Neʼe ina fakagafua kiā Satana ke ina fakahā peʼe feafeaʼi anai tana takitaki ia te malamanei, pea neʼe ina toe fakagafua ki te tagata ke pule kiā ia totonu ʼo fakalogo ki te takitaki ʼa Satana.

14. Koteā anai tona fua lelei kiā tatou ia te fakagafua ʼaē ʼa Sehova ke puleʼi e te tagata ia ia totonu?

¹⁴ Ko te tagata faiako ʼo te kiʼi fakatā, ʼe ina ʼiloʼi ʼe faihala te tama agatuʼu pea mo te ʼu kau ako ʼaē neʼe kau mo ia. Kae ʼe ina toe ʼiloʼi foki, ʼe toe fua lelei anai ki te kalasi kātoa, mo kapau ʼe ina fakagafua ki te kau ako ʼaē neʼe fakafeagai ke nātou fakahā peʼe moʼoni tanatou manatu. ʼI te temi ʼaē ʼe ʼiloga ai neʼe nātou faihala, pea ʼe mahino anai ki te kau ako fuli ʼaē ʼe loto moʼoni, ʼe lelei age te takitaki ʼa te tagata faiako ki te kalasi. ʼE nātou toe mahino anai pe koʼe ki muli age ʼe fakamavae anai e te tagata faiako he tamasiʼi agatuʼu. ʼO toe feiā pe, ʼe ʼiloʼi e Sehova ʼe fua lelei anai ki te hahaʼi loto moʼoni fuli pea mo te kau ʼāselo, ke nātou sio ko Satana mo tana kau temonio neʼe nātou faihala, pea ʼe mole feala ki te tagata ke ina puleʼi ia ia totonu. Ohage ko Selemia ʼi te temi muʼa, ʼe nātou mahino anai ki te moʼoni maʼuhiga ʼaenī: “ ʼE au ʼiloʼi pe, Ê Sehova, ko te tagata kelekele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.”​—Selemia 10:23.

HE KOʼE NEʼE INA TUKU HE TEMI LOALOAGA?

15, 16. (a) He koʼe neʼe tuku e Sehova ke hoko te ʼu mamahi ʼi he temi loaloaga? (b) He koʼe neʼe mole tāʼofi e Sehova te hoko ʼa te ʼu fai fakapō fakalialia?

¹⁵ He koʼe neʼe tuku e Sehova ke maʼuli mamahi te tagata lolotoga he temi loaloaga? Pea he koʼe neʼe mole ina tāʼofi te hoko ʼa te ʼu malaʼia? Moʼo tali kiai, tou vakaʼi te ʼu faʼahi e lua ʼe mole fai anai e te tagata faiako ʼo te kiʼi fakatā. ʼUluaki, ʼe mole ina tāʼofi te tama agatuʼu ke ina fakahā tana puleʼaki, pea lua, ʼe mole tokoni anai ki te tama agatuʼu ʼaia ke ina fakamoʼoni ʼe lelei age tana puleʼaki. ʼO toe feiā pe, koʼeni meʼa e lua neʼe fakatuʼutuʼu e Sehova ke mole ina fai. ʼUluaki, neʼe mole ina tāʼofi ia Satana pea mo nātou ʼaē neʼe lagolago kiā ia ke nātou fakahā peʼe moʼoni tanatou manatu. Neʼe tonu ke ina tuku he temi loaloaga ki te faʼahi ʼaia. ʼI te ʼu lauʼi afe taʼu ʼo te hisitolia ʼa te tagata, neʼe feala ki te malamanei ke nātou ʼahiʼahi te ʼu faʼahiga puleʼaga kehekehe moʼo takitaki ʼo nātou totonu. Kua laka ki muʼa te poto ʼa te tagata ʼi te ʼu meʼa fakapoto lalahi pea mo te tahi ʼu faʼahi, kae kua toe ʼāsili te aga heʼe faitotonu, te masiva, te fai fakapō, pea mo te ʼu tau. Kua tou ʼiloʼi ʼi te temi nei, ʼe mole lelei te pule ʼa te tagata.

¹⁶ Lua, neʼe mole tokoni ia Sehova kiā Satana moʼo takitaki ia te malamanei. Kanapaula neʼe tāʼofi e te ʼAtua ke mole hoko ia te ʼu fai fakapō fakalialia, ʼe hage pe leva ia ko hana lagolago ki te kau fakafeagai. Heʼe kanapaula neʼe ina fai ia te faʼahi ʼaia, neʼe feala pe ke manatu te tagata ʼe feala hana puleʼi ia ia totonu, kae mole hoko kiā ia he ʼu tuʼutāmaki. ʼE moʼoni, kanapaula neʼe tāʼofi e Sehova ia te ʼu malaʼia, ʼe hage pe ia ʼe lagolago ki te loi, kae “ ʼe mole feala ki te ʼAtua ke loi.”​—Hepeleo 6:​18, MN.

17, 18. Koteā ʼaē ka fai anai e Sehova ʼo ʼuhiga mo te ʼu mamahi ʼaē neʼe tupu ʼuhi ko te pule ʼa te tagata pea mo te pule ʼa Satana?

¹⁷ Koteā ʼaē ka fai anai ʼo ʼuhiga mo te ʼu mamahi ʼaē neʼe tupu mai te fakafeagai loaloaga ʼaē neʼe fai ki te ʼAtua? Tou manatuʼi ko Sehova ʼe māfimāfi. Koia ʼe feala pea ʼe ina molehi anai te ʼu mamahi ʼaē ʼe tau mo te malamanei. Ohage ko te faʼahi ʼaē neʼe kua tou vakaʼi, ʼe fakagata anai te maumauʼi ʼo te kele, pea ʼe liliu anai ko he Palatiso. Ko te hahaʼi ʼaē ʼe faka tui ki te sakilifisio faitotogi ʼa Sesu, ʼe faka ʼāteaina anai nātou mai te ʼu fua kovi ʼo te agahala, pea ʼe fetogi anai e te fakatuʼuake, te ʼu fua kovi ʼo te mate. ʼE fakaʼaogaʼi anai e te ʼAtua ia Sesu moʼo “maumauʼi te ʼu gāue ʼa te Tevolo.” (1 Soane 3:​8, MN ) ʼE fakahoko anai e Sehova ia te ʼu gāue fuli ʼaia ʼi tona temi totonu. ʼE feala ke tou fakafetaʼi ki tana mole fakahoko vave ia tana fakatuʼutuʼu, heʼe ʼaki tana faʼa kātaki neʼe tou maʼu te faigamālie ke tou ako te moʼoni pea mo tou tauhi kiā te ia. (2 Petelo 3:​9, 10) Lolotoga te temi ʼaenī, ʼe kumi e Sehova te hahaʼi tauhi fakamalotoloto, pea mo tokoni kiā nātou ke nātou kātakiʼi te ʼu mamahi kehekehe ʼaē ʼe feala ke hoko kiā nātou ʼi te mālama maveuveu ʼaenī.​—Soane 4:23; 1 Kolonito 10:13.

¹⁸ ʼE feala pe ke fai e ʼihi ia te fehuʼi ʼaenī: Neʼe feala koa ke mole hoko te ʼu mamahi fuli ʼaenī, mo kanapaula neʼe faʼu e te ʼAtua ia Atama mo Eva, ke mole feala hanā fakafeagai? Moʼo tali ki te fehuʼi ʼaia, ʼe tonu ke koutou manatuʼi te meʼa ʼofa maʼuhiga neʼe foaki atu e te ʼAtua.

ʼE KOUTOU FAKAʼAOGAʼI FEAFEAʼI ANAI TE MEʼA ʼOFA ʼAĒ NEʼE FOAKI ATU E TE ʼATUA?

19. Koteā te meʼa ʼofa maʼuhiga ʼaē neʼe foaki mai e Sehova, pea heʼe koʼe ʼe tonu ke tou leleiʼia?

¹⁹ Ohage ko te meʼa ʼaē neʼe tou vakaʼi ʼi te Kapite 5, neʼe faʼu te tagata ʼaki te loto faʼitaliha. ʼE maʼuhiga koa kiā koutou ia te meʼa ʼofa ʼaia? Neʼe faʼu e te ʼAtua te ʼu manu kehekehe, pea ko te ʼu manu ʼaia ʼe nātou mulimuli ki tonatou ʼu fealagia. (Tāʼaga Lea 30:24) Neʼe faʼu e te tagata te ʼu masini ʼe mulimuli ki te ʼu polokalama neʼe ina fakatuʼutuʼu kiai. ʼE tou fiafia anai koa mo kanapaula neʼe faʼu feiā tatou e te ʼAtua? Kailoa, ʼe tou fiafia heʼe tou loto faʼitaliha ʼo filifili peʼe feafeaʼi anai totatou ʼulugaaga, mo filifili te faʼahiga maʼuli ʼaē ʼe tou loto kiai, totatou ʼu kaumeʼa, pea mo te tahi atu ʼu meʼa. ʼE tou leleiʼia te fealagia ʼaē ke tou loto faʼitaliha, pea ʼe loto e te ʼAtua ke tou fakaʼaogaʼi te fealagia ʼaia.

20, 21. E feafeaʼi hatatou fakaʼaogaʼi lelei ia te meʼa ʼofa ʼaē ko te loto faʼitaliha, pea he koʼe ʼe tou fia fakaʼaogaʼi feiā?

²⁰ ʼE mole loto e Sehova ke tou tauhi kiā te ia ohage ko he meʼa ʼe tou fai fakakinau. (2 Kolonito 9:7) Ohage la: Koteā ʼaē ʼe fiafia lahi ai ia he tāmai peʼe ko he faʼe? Ko te fakahā age e tana tamasiʼi ʼe ʼofa kiā nāua he neʼe akoʼi age ke ina fakahā te faʼahi ʼaia, peʼe ina fai te ʼu palalau ʼaia heʼe ko he meʼa ʼe haʼu mai tona loto? Koia ʼe tou lagaʼi ai te fehuʼi ʼaenī: ʼE koutou fakaʼaogaʼi feafeaʼi anai tokotou loto faʼitaliha ʼaē neʼe foaki atu e Sehova? Ko Satana, mo Atama, mo Eva, neʼe nātou fakaʼaogaʼi kovi tonatou loto faʼitaliha, he neʼe nātou fakafisi kiā Sehova ʼAtua. Kaeā koutou?

²¹ ʼE koutou maʼu te faigamālie ʼaē ke koutou fakaʼaogaʼi lelei te meʼa ʼofa fakaofoofo ʼaē ko te loto faʼitaliha. ʼE feala hakotou kau fakatahi ki te ʼu lauʼi miliona hahaʼi ʼaē kua nātou kau kiā Sehova. ʼE nātou fakafiafia ia te ʼAtua heʼe nātou gāue moʼo fakamoʼoni ko Satana ʼe gutuloi, pea ʼe mole ko he pule lelei. (Tāʼaga Lea 27:11) ʼE feala mo koutou ke koutou fai ia te faʼahi ʼaia, mo kapau ʼe koutou filifili ia te faʼahiga maʼuli ʼaē ʼe lelei. Pea ʼe tou vakaʼi anai te faʼahi ʼaia ʼi te kapite ʼaē ka hoa mai.