Te ʼu Fehuʼi ʼa Te Kau Lautohi

Neʼe matehi koa e te kau Iselaele ia te hahaʼi agakovi ʼo natou tautau ia natou ki he pou?

Neʼe tutuki peʼe haʼi e te kau Loma ia te kau agakovi ʼaia ki he pou. Neʼe feala ki te tagata agakovi ke maʼuli lolotoga he ʼu ʼaho, ʼo kaku pe ki tana mole kei lavaʼi ia te mamahi, mo te fia inu pea mo te fia kai, mo tana laʼaina pea mo tana mokosia. Ki te manatu ʼa te kau Loma, ko te tutuki ʼo he tahi ki he pou, ʼe ko he aga fakaufiufi, pea neʼe fai feia ki te kau agakovi ʼosi.

Kaʼe neʼe feafeaʼi ia te kau Iselaele ʼo te temi muʼa? Neʼe natou matehi koa ia te hahaʼi agakovi ʼo natou tautau ia natou ki he pou? ʼE ui fenei ʼi te Lao ʼa Moisese: “Kapau e tamatei anai he tagata, ae e ina fai anai he agahala ae e tonu ke fakatua ki te mate, o ke tautau anai ia ia ki he akau, e mole ke tuku anai te mate ke tautau i te akau mai te pouli ki te aho. Kae e ke tanu anai ia ia i te aho aena.” (Tet. 21:22, 23) ʼE mahino ia, ko he tahi neʼe tuha mo te mate, neʼe tonu ia ke matehi ʼi muʼa ʼo tona tautau ki he pou peʼe ki he fuʼu ʼakau.

ʼO ʼuhiga mo te aluʼaga ʼaia, koʼeni te manatu ʼe tou maʼu ia Levitiko 20:2: “E ke ui anai ki te u fanau a Iselaele: Kapau anai e foaki e he tagata i te u fanau a Iselaele pee ko he matapule ae e mauli i Iselaele he tahi o ana fanau kia Moloke, e tautea anai te tagata aia ki te mate: e tuki makai anai ia ia e te hahai o te fenua.” Ko natou ʼae ʼe natou maʼu ia “te laumalie o he mate pee ko te laumalie faikikite,” neʼe tonu ke matehi mo natou. ʼO feafeaʼi? Neʼe tuki makaʼi natou.—Lev. 20:27.

ʼE tou lau fenei ia Tetelonome 22:23, 24: “Kapau nee fakatahi leva he taahine tupulaga taupoou ki he tagata, pea nee felavei leva mo ia he tahi tagata kehe i te kolo pea nee momoe leva mo ia, e kotou ave anai naua toko lua ki te matapa o te kolo, pea e kotou tuki makai anai naua. E na mamate anai, te taahine o tupu nee mole kalaga ia ia i te kolo, mo te tagata o tupu nee ina fakamatagafuai te ohoana o tona [kaiga]. E ke too anai i ai te kovi i te lotolotoga o Iselaele.” ʼI Iselaele, ko te tuki makaʼi ʼo he tahi, neʼe ko te faʼahiga matehi tafitō ʼaia ʼo he tahi neʼe agakovi.a

ʼE tou lau ia Tetelonome 21:23, “ko ia ae e tau i te akau ko he malaia ia ia mua o te Atua.” Ko te tuku feia ia muʼa ʼo te hahaʼi ʼo te sino ʼo he tagata neʼe fakamalaʼia e te ʼAtua, neʼe malave ki te kau Iselaele. Ko te tautau ʼo te sino mate ʼo he tagata agakovi ki he pou, neʼe ko he fakatokaga ia kia natou.