Teuteuʼi Takotou Fakahā Ki Fepualio
1 ʼI fepualio, ʼe tou fakahā te tohi Le plus grand homme de tous les temps. Ko te tohi lelei ʼaia ʼe ʼaoga ki te fakahā ʼo te logo lelei ʼi tona ʼu fahaʼi kehekehe. ʼE koutou leleiʼia ānai te ako pea mo fakaʼaogaʼi ʼo he fakahā ʼi te ʼu fakahā ki lalo mai.
2 Te kele: nofoʼaga tuʼumaʼu ʼo te tagata: Kapau ʼe koutou fia palalau mo te ʼu hahaʼi ʼaē ʼe nātou tuʼania ia te kele pea mo te ʼu meʼa ʼe hoko ʼi ai, koutou ʼahiʼahiʼi te kupu tāfito “Ko te kele ʼe ko te nofoʼaga heʼe gata ʼo te tagata”. ʼE faigafua tona fakaʼaogaʼi ki te hahaʼi ʼe pipiki ki tonatou famili, kia nātou ʼe manako ki te kele. Ko te vaega ʼaē ke fakaʼaoga ko Luka 23:43. Ko te kupu tāfito pea mo te vaega ʼaia ʼe fakamahino leleiʼi mai ʼi te tohi Le plus grand homme de tous les temps ʼi te kapite 133.
3 ʼI te ʼosi ʼo takotou fakahā ia koutou, ʼe feala ke koutou ʼui age:
◼ “ ʼE ʼau haʼu ʼo ʼaʼahi mai kia koutou mo palalau ki te fehuʼi ʼe fia logo ki ai te tokolahi ia tatou. Ko te kele ko totatou nofoʼaga, pea ʼe lagi ʼe koutou tuʼania ia, mokā koutou sisio ki tona gaohi koviʼi. Ko te kau tagata popoto ʼe hoholo tanatou fakahā mai kapau ʼe hoko atu te gaohi koviʼi ʼo te kele, ʼe mole feala ānai ke toe nofoʼi. ʼE koutou maʼu koa he tonu ki te fahaʼi ʼaia? [Tuku he kiʼi temi ke feala ai he fai mai ʼo hana tali mokā ʼe loto ia ki ai.] ʼE ʼau fia fakahā atu te fakapapau ʼaē neʼe fai e Sesu Kilisito ki te tagata agakovi ʼi tana nofo ʼi te pou.” Lau ia Luka 23:43 pea fakahā te ʼu manatu ʼe tuʼu ʼi te ʼu kapite 125 pea 133 ʼo te tohi Le plus grand homme de tous les temps.
4 Ko te agakovi ka pulihi ānai: Moʼo faigaʼi ke fia logo te hahaʼi ʼaē ʼe nātou tuʼania ia te ʼu fakapō, te agamālohi, pea mo te tau, ʼe feala ke koutou palalau mo nātou ki te kupu tāfito “Ko te agakovi ka pulihi ānai ke feala ai kia nātou ʼaē ʼe ʼoʼofa ki te ʼAtua ke nātou maʼuʼuli ʼi te fiafia pea mo te tokalelei”. Ko te manatu ʼaia ʼe tuʼu ia Pesalemo 37:29. ʼE feala takotou fakaʼaogaʼi te ʼu manatu ʼe tuʼu ʼi te kapite 132 ʼo te tohi Le plus grand homme de tous les temps.
5 ʼI te ʼosi ʼo takotou fakaʼaogaʼi he ʼuluaki palalau, ʼe feala ke koutou ʼui age:
◼ “ ʼI takotou manatu ʼe ʼi ai koa he ʼaho ʼe pulihi ai te fakapō pea mo te agamālohi? [Tuku ke fai mai hana tali.] ʼE fakahā mai e te Tohi-Tapu pe ʼe feafeaʼi te pulihi ʼo te ʼu mamahi ʼaia ʼo talu ai ia Pesalemo 37:29.” Lau te vaega ʼaia, ʼo avahi te tohi Le plus grand homme de tous les temps ʼi te kapite 132 pea lau he ʼu manatu ʼo te kapite ʼaia.
6 Te falala ki te fakatuʼuake: Neʼe lahi te hahaʼi neʼe mamahi koteʼuhi he neʼe kua mate he tahi ʼe ʼoʼofa mamahi ia ki ai, ko ia ʼe ko he meʼa fakafiafia mokā kamata hatatou fai palalau ki te fahaʼi ʼaenī “Ko te Puleʼaga ka ina fakatuʼu mai te mate totatou ʼu kāiga ke nātou maʼuʼuli ʼi te fīmālie ʼi te palatiso”. ʼE feala takotou lau ia Soane 5:28, 29 pea mo fakahā te ʼu manatu neʼe fai ʼo ʼuhiga mo te fahaʼi ʼaia ʼi te tohi Le plus grand homme de tous les temps, ʼi te kapite 90 pea mo te 91.
7 ʼE feala hakotou kamata palalau ʼo fakaʼaogaʼi te fā ʼo te ʼu ʼuluaki palalau ʼaē ʼi te pasina 14 ʼo te tohi “Comment raisonner”, ʼosi ʼaia pea koutou ʼui age:
◼ “Tokolahi ia tatou ʼe manatu ʼi he kiʼi temi ki totatou ʼu kāiga neʼe tou ʼoʼofa mamahi ki ai neʼe kua mamate. Kae ʼi takotou manatu ʼe feala koa hatatou toe sisio kia nātou ʼi he ʼaho? [Tuku he fealagia kia ia ke fakahā mai hana manatu.] ʼI te ʼu hahaʼi ʼaē ʼe palalau mo tatou, tokolahi nātou ʼaē ʼe puna’maʼuli ʼi tanatou ʼiloʼi te ʼu fakapapau ʼo te Folafola ʼa te ʼAtua pea mo ʼiloʼi kua vave pe tona fakahoko ʼi te kele. Vakaʼi te fakapapau faka tohi-tapu ʼe tuʼu ia ...” Lau ia Soane 5:28, 29, pea faka ʼalu tahi te vaega ʼaia mo te ʼu manatu ʼi te ʼu kapite 90 pea mo te 91 ʼo te tohi Le plus grand homme de tous les temps.
8 Teuteuʼi pea fakaʼaogaʼi he fakahā ʼi te ʼu fakahā ʼaia lolotoga te māhina. ʼE mole faigataʼa ānai ha kotou maʼu he ʼu manatu pea mo he ʼu fakatā ʼe ʼaoga ʼi te ʼu tohi kehekehe ʼaia ʼe koutou fakaʼaoga. Kapau ko he tahi ʼe mole lahi tona fia logo, tuku age ki ai he kiʼi pepa lotu ʼe palalau ki te manatu ʼaia.