Tou Tokoni Ki Te Kau Pionie
1 Ko te kau kaugana ʼa te ʼAtua ʼe ʼiloʼi nātou ʼi tonatou faiva ʼi te minisitelio. ʼE mole feala foki ke tou toʼo fuli te gaūe pionie, kae ʼe tonu ke ia tatou te manatu ki te pionie ʼo fai mo totatou loto katoa. Tou tokoni kia nātou fuli ʼaē ʼe feala tanatou toʼo te gāue pionie, pea ʼe tou vaevae ānai mo nātou tonatou fiafia.
2 Ko te liliu ʼo pionie pea mo te nofo ʼi ai ʼe mole ko he meʼa ʼe faigafua. Ko te kau pionie ʼe nātou kau tāfito ki te gāue ʼaē ko te fai faka mafola pea mo te ako faka tohi-tapu, ʼo ʼaoga ai foki ke nātou fai fakamālohi pea mo fai sakilifisio. ʼE feafeaʼi te tokoniʼi ʼo te kau pionie katoa faiva ʼaia?
3 Te meʼa ʼe tonu ke fai: Ko te kau pionie ʼe ʼaoga kia nātou te tokoni ʼa te ʼu tagata ʼāfea. Ka nātou fai faka mafola mo te kau pionie, ko te ʼu tagata ʼāfea ʼe ko he meʼa fakaloto mālohi ia kia nātou. ʼE lahi te ʼu tagata ʼāfea ʼe nātou faiga ʼo fai faka mafola, tuʼa tahi ʼi te taʼu mo te ʼu pionie ʼo te kokelekasio, ko he fahaʼi ʼaia ke tokoni ai kia nātou pea ke hoko atu aipe tanatou gāue ki muʼa. Ko te ʼu pionie ʼe tonu ke nātou toe vakaʼi tonatou polokalama ke feala ai hanatou fai faka mafola mokā ʼe fealagia e te kau tagata ʼāfea. Ko te ʼu tagata ʼāfea ʼe nātou vakaʼi ānai pe ʼe feʼauga tanatou telituale. ʼO manatuʼi foki te polokalama ʼa te kau pionie, ʼe feala he fakatuʼutuʼu ʼo he ʼu fono ki te fai faka mafola, ʼi te hoʼatā pe ʼe ko te afiafi, tāfito te ʼu māhina ʼaē ʼe lahi ai te ʼu pionie vaeluaʼi temi. — Is. 40:11.
4 Ko te ʼu tagata faifekau faka minisitelio ʼe ʼaoga ke nātou tokoniʼi te kau pionie, ʼonatou tokoni kia nātou ʼi te minisitelio pea mo tokoni lelei ki te ʼu fakatuʼutuʼu ʼi te kokelekasio. Ko te kau pionie ʼe nātou leleiʼia mokā fakatuʼutuʼu he ʼu kaugā ki te fai faka mafola. Ko nātou ʼaē ʼe fakasiosio te ʼu tohi pea mo te ʼu nusipepa ʼe nātou fakatokaga ānai pe ʼe feʼauga te ʼu tohi. Ko te tokaga lelei ki te fahaʼi ʼaia, ʼe feala ai ki te kau pionie ke nātou fai faka leleiʼi tonatou minisitelio.
5 Tatou fuli ʼe feala ke tou foaki hatatou tokoni: Ko te kau fai faka mafola ʼe nātou tokoni ānai ki te kau pionie ʼonatou ʼolo tuʼumaʼu ʼo fai faka mafola mo nātou. Ko te kau pionie ʼe nātou leleiʼia mokā tokoniʼi nātou e niʼihi ʼi te kau fai faka mafola. ʼE feala ānai hatatou fai he fakatuʼutuʼu ke feala ai hatatou fai faka mafola mo nātou tuʼa tahi ʼi te vahaʼa pe ʼe tuʼa lua ʼi te māhina. Kapau ʼe tou tokoniʼi te kau pionie ʼi te ʼu meʼa fakamālama, ʼe nātou fai mai ānai hanatou fakafetaʼi kia tatou. — Filp. 4:14-19.
6 Ko he famili ʼe feala hanatou faiga ʼo tokoni ki niʼihi ia nātou ʼe pionie. Tuʼumaʼu, ko he fakatuʼutuʼu ʼo te ʼu gāue ʼi te loto fale ke faka fealagia ai ki ʼihi ia nātou ke nātou toʼo te gāue pionie. Ko he tuagaʼane mo tana ʼu toe e tolu ʼe gāue tuʼa lua ʼi te vahaʼa. Ko tona ʼu foha ʼe tokoni kia ia ʼo fai te ʼu fekau pea mo fakamaʼa ʼi tuʼa ʼo tonatou ʼapi. Ko tana taʼahine ʼe ina fakamaʼa te loto fale pea mo fai te meʼa kai. Talu mai te ʼosi ʼo tana ako, neʼe ina toʼo te pionie ʼo vaevae te ʼu mahina mo tana faʼe. Ko te faʼifaʼitahi ʼi he famili ʼe feala ai ke tokolahi ʼe nātou toʼo te gāue pionie pea ʼe nātou maʼu ai he ʼu tapuakina lahi.
7 Ko te ʼu pionie faiva ʼe, ko nātou ʼaia, ko he manuʼia ki te kokelekasio. ʼAki tonatou faiva pea mo tonatou faʼifaʼitaki, tokolahi ʼe nātou holi ke natou kau mālohi ki te minisitelio. ʼE tou faiga ānai ke tou tokoniʼi lelei kia nātou. Ko te gāue fakamālohi ʼaia ʼe tou maʼu ānai he fiafia pea ʼe faka kolōlia ai kia Sehova.