Koteā Anai Te Meʼa Ka Tou Fai Lolotoga Te Taʼu Gāue ʼAenī?
1 ʼAki te kamata ʼo te taʼu gāue 1994 ʼi te ʼaho 1 ʼo sepetepeli, ʼe ko he temi ʼaoga ʼaenī kia tatou fuli ʼaē ko te hahaʼi ʼa Sehova ke mālama lelei totatou ʼatamai ki te meʼa ʼaē ʼe tou fia fakahoko takitokotahi pea mo te kautahi ʼi te taʼu gāue foʼou ʼaenī.
2 Tou haga tuputupu ʼi te faʼahi fakalaumālie: Kapau ʼe tou foʼofoʼou mai ki te moʼoni, ʼe tou loto anai ke tou liliu ʼo mālohi ʼi te tui (Hep. 6:1-3). Kapau kua tou mālohi ʼi te faʼahi fakalaumālie, ʼe mole gata ʼaki pe tatatou tokoni ki te hahaʼi foʼou pea mo niʼihi, kae ʼe tonu foki ke tou fakatokaga kia tatou totonu ʼi te faʼahi fakalaumālie, ke ʼaua naʼa tou ʼui kua ʼosi tou maʼu ia te ʼatamai mālama faka tohi-tapu pea mo te fakapotopoto ʼi te maʼuli faka kilisitiano. ʼE tou vakaʼi koa te Tohi-Tapu ʼi te ʼaho fuli, ʼo tou mulimuli fakalelei ki te polokalama lau ʼo te Tohi-Tapu ʼaē ʼe fai ʼi te Ako ʼo te minisitelio faka teokalatike, pea mo tou teuteuʼi te ʼu ako tohi ʼo te kokelekasio pea mo te ako ʼo Te Tule Leʼo? Ko te faʼahi ʼaia ʼe feala pe ke tou fai fuli. ʼE tonu ke tou haga tuputupu ʼi te faʼahi fakalaumālie mokā ʼe tou fia maʼuʼuli ʼi te temi ʼaē ʼe fakaʼauha ai te faʼahiga meʼa ʼo te tuʼu agakovi ʼaenī pea mo hāofaki tatou ke tou maʼuli ʼi te mālama foʼou ʼa te ʼAtua. — Vakaʼi ia Filipe 3:12-16.
3 Ke tou nonofo maʼa ʼi te faʼahi fakalaumālie: Ke feala hotatou tali katoa ia muʼa ʼo Sehova, ʼe tonu ke tou fakamaʼa “mai te meʼa ʼuli fuli pe ʼo te kakano pea mo te laumālie”. (2 Ko. 7:1.) Kapau kua tou maʼa, he koʼe leva ʼe tou loto ke tou toe ‘fetaliuliuʼaki ʼi te pela’ ʼo te mālama ʼāfea agakovi ʼaenī (vakaʼi ia 2 Petelo 2:22). ʼE tonu ke tou faigaʼi ke tou mālohi ʼi te faʼahi fakalaumālie pea mo maʼa. Pea ke ʼaua naʼa tou fakapōʼuli ki te ʼu fakatuʼutuʼu agakovi ʼa Satana pea ke ʼaua naʼa ina fakahalaʼi tatou, ʼo tou tō ai ki te agahala pea mo tou mamaʼo mo te ʼofa ʼo Sehova. — 2 Ko. 2:11.
4 Tou tokagaʼi te tokoni fakapotopoto: Ia Tāʼaga Lea 15:22 ʼe ʼui fēnei: “ ʼI te lahi ʼo te ʼu tokoni ʼe iku lelei ai te fakatuʼutuʼu.” Tou manatuʼi, ko te tagata ʼaē neʼe talanoa ki te manatu ʼaenī ko Salomone, ʼaē ki muli age neʼe ina faka fealagia ki ‘ ʼona ʼu ʼohoana ke nātou fakamafuli tona loto ke ina muliʼi niʼihi ʼu ʼatua’ koteʼuhi neʼe mole ina tokagaʼi te tokoni ʼa te ʼAtua ʼaē ke ʼaua naʼa ʼohoana mo he ʼu fafine matāpule (1 Hau 11:1-4). Pea ka tou tokaga takitokotahi ki te tokoni fakapotopoto, e feafeaʼi hatatou ʼamanaki ke tou faiva ʼi te gāue ʼa Sehova peʼe ko he foaki ʼo he faʼifaʼitaki ʼe ʼaoga ke muliʼi (1 Tim. 4:15)? Ko te ʼu tokoni ʼa te Tohi-Tapu ʼe ina tokoni anai tatou ke tou hāofaki totatou loto (Taag. 4:23). Ko te ʼofa ki te meʼa ʼaē ʼe ʼofa ai Sehova, pea mo fehiʼa ki te meʼa ʼaē ʼe fehiʼa ia ki ai, pea mo kumi tuʼumaʼu ʼo tana taki pea mo fai ʼo te meʼa ʼaē ʼe ina leleiʼia ʼe ko he hāofakiʼaga lelei ʼaia. — Taag. 8:13; Soane 8:29; Hep. 1:9.
5 Ko tatatou tauhi kia Sehova ʼe mole ko he meʼa ʼe fai ʼuhi pe heʼe tonu ke fai, ʼe mole ko he faʼahiga tauhi faka lotu ohage ko te hahaʼi ʼo te mālama ʼaē ʼe nātou ʼui ʼe nātou kilisitiano, kae ko tatatou tauhi ʼe haʼele ki muʼa, ʼe gāue, pea ʼe tou maʼuliʼi te moʼoni ʼaē ʼe maʼu ʼi te Folafola ʼa te ʼAtua. — Soane 4:23, 24.
6 Ko tatatou faiga fakamalotoloto ke tou fai te finegalo ʼo te ʼAtua ʼe feala ko he ʼahiʼahiʼi ʼo tatou ʼi te ʼaho fuli. ʼE tou lotomālohi anai ʼuhi ko tatatou ʼiloʼi ʼaē ko te “famili katoa ʼi te malamanei” ʼo totatou ʼu tēhina ʼe tau mo te ʼu fakataga pea ʼo ʼuhiga mo te faʼahi ʼaia ko Sehova ʼaē ka ina foaki mai anai te mālohi (1 Pe. 5:9, 10). Pea ʼe feala anai tatatou fai katoa totatou minisitelio lolotoga te taʼu gāue 1994. — 2 Tim. 4:5.