Ke Ia Tatou Te Mālohi Fakalaumālie, Tou Nonofo Maʼa Mo Gāue Kia Sehova
1 Ia Isaia 60:22, neʼe fai e Sehova te fakapapau ʼe lolotoga nei tona hoko ʼo tou sio mata ki ai: “Ko ia ʼaē ʼe veliveli ʼe liliu anai ko te laui afe e tahi, pea ko ia ʼaē ʼe veliveli ʼe liliu ia ko te puleʼaga mālohi. Ko ʼau, Sehova, ʼe ʼau fakahaʼele ki muʼa te fahaʼi ʼaia mokā hoko tona temi.” Ka tou palalau ki te puleʼaga, ʼe tou manatu ki he foʼi kaugā hahaʼi maʼuhiga ʼe nātou piki tahi ʼuhi ko ni ʼu lelei fakatahi ʼe takitaki e he puleʼaga neʼe fakatuʼu.
2 Ko te tānaki gāue ʼo te taʼu 1991 neʼe ko tona lahi ko te toko 4 278 820 kau faka mafola ʼo te logo lelei ʼi te malamanei, ko tona tupu ko te 6,5 ki te 100 ʼi te taʼu ki muʼa atu. Neʼe tānaki moʼoni e Sehova te hahaʼi ʼe tokolahi ʼe holi fakamalotoloto ʼo nātou mavae mai te tuʼu ʼo te mālama agakovi ʼaenī pea nātou liliu ko he ʼu hahaʼi agatonu ʼo te Puleʼaga faka mesia ʼo tona ʼAlo, ia Sesu Kilisito. ʼI te taʼu mo te taʼu, ko te lahi ʼo te hahaʼi ʼe tānaki ʼe hakehake ki muʼa tonatou hahaʼi. ʼE tou fakafiafia ʼi tatatou kau ki te puleʼaga ʼaia ka liliu anai ʼo maʼuli ʼi te mālama foʼou. ʼI te taʼu 1991, ko te toko 10 650 158 hahaʼi neʼe ʼomai ki te ʼaho Fakamanatu, ko te 7 ki te 100 tona lahi age ʼi te taʼu 1990. ʼE hā mai ai ʼe lahi te hahaʼi ʼe fia maʼuli ʼi te tuʼu ʼa te Puleʼaga ʼaia kei toe ke hu mai ʼo fakatahi mo tatou.
3 ʼE tou ʼiloʼi papau ko te lahi ʼo te hahaʼi ʼaē neʼe ʼomai ki te ʼaho Fakamanatu ʼe mole ko nātou fuli ʼaē neʼe kua mavae mai te mālama ʼo nātou liliu ʼo gāue kia Sehova. Ko te ʼu hahaʼi mai te ʼu puleʼaga fuli ‘ ʼe nātou ʼomai ki te fale ʼo Sehova’, kae ʼe tonu tāfito ke nātou ‘ako ki tana ʼu ala’ ke nātou ‘haʼele ʼi tona ʼu ala’. (Is. 2:2-4.) Ia nātou fuli ʼaē neʼe ʼomai ki te ʼaho Fakamanatu, ʼe laka ʼi te fā miliona nātou ʼaē kua nātou tali te ako ʼaia ʼe haʼu mai te ʼAtua pea kua ia nātou te mālohi fakalaumālie ke uga ai nātou ke nātou taupau he aga ʼe maʼa pea mo nātou fai te ʼu meʼa fuli ʼe ʼaoga ke feala ai hanatou kau ki te faka mafola ʼo te Puleʼaga ʼe hoko ʼi te temi nei (Mat. 24:14). ʼE nātou nonofo ʼi he fahaʼi ʼe leleiʼia e Sehova pea ʼe nātou maʼu ai he ʼu manuʼia mai te ʼu fakatuʼutuʼu neʼe ina fai maʼa nātou. Koteā te meʼa ʼe tonu ke fai ʼe ʼihi hahaʼi, ʼaē ko te toko ono miliona, mokā ʼe nātou fia mālohi fakalaumālie pea mo maʼa ki te gāue kia Sehova?
4 ʼE tonu ke nātou ‘tau fakamālohi maʼa te tui’. (Suta 3.) Mai te temi neʼe nātou fili ai ke nātou haʼele ʼi te ʼu ala ʼo Sehova, ʼe hoko kia nātou te ʼu faigataʼa ia mai ia Satana, ohage he ʼu fakahala pea mo he ʼu faʼahiga meʼa ʼe feala ke tou to ai ki te malaʼia. ʼAki te faʼifaʼitaki ʼa Paulo, ʼe tonu ke nātou kole kia Sehova ke ina foaki age te mālohi ke ia nātou te faʼa kātaki (Filp. 4:13). ʼE foaki age e Sehova kia nātou te mālolohi ʼaki ia nātou ʼaē kua mālohi ʼi te tui. ʼE tokoniʼi tatou e Paulo, “tatou ʼaenī ʼe mālolohi, [ke] tou fua ia te ʼu vaivai ʼo nātou ʼaē ʼe mole mālolohi”. (Lom. 15:1, 2.) Ko te fetokoniʼaki lelei ʼa nātou ʼe mālolohi pea mo nātou ʼe vaivavai ʼe fua ai te mālohi moʼo nonofo maʼu ʼi te moʼoni. “ ʼE lelei age te tokolua ʼi he tokotahi. (...) Pea kapau ʼe feala he taʼofi ʼo he tahi ʼe he tokotahi, ʼe feala anai te faʼa kātakiʼi e he tokolua.” — Tagata Tānaki 4:9, 12.
5 Ko tona ʼuhiga ko nātou ʼaē neʼe hoki fia logo nei pe ki te moʼoni ʼe fakalogo kia tatou, ko tona ʼuhiga ʼaē ʼe nātou maʼu te mālohi mai ia Sehova ʼaki ia tatou. Kapau ko te kau kilisitiano ʼaē kua ʼosi papitema ʼe nātou fia tokoni ki te ʼu hahaʼi ʼaia, ʼe tonu ke nātou nonofo mālolohi. Ko te kau kilisitiano mālolohi ʼe feala ke nātou ‘fakahā te ʼu ʼofa fakalaumālie’, pea ʼe maʼu ai “ ʼo he fetokoniʼaki”. (Lom. 1:11, 12.) ʼE ko he meʼa tāfito ia ʼe fakaʼaogaʼi e Sehova moʼo fakatahiʼi ʼo tatou pea mo tou ‘loto taʼofi pea mo loto mālohi’. — 1 Petelo 5:9-11.
6 ʼE tonu ke tou fai he fakatuʼutuʼu moʼo tokoniʼi ʼo te ʼu hahaʼi ʼaē neʼe hoki fia logo ki te moʼoni, mo tou nonofo tokaga pe ʼo ʼiloʼi te maʼuhiga ʼo te ʼu meʼa fakalaumālie kia tatou totonu (Mat. 5:3). Ko te tāfito ʼo totatou mālohi ʼe haʼu mai totatou mālohi fakalaumālie. ʼE ko te kalitate ʼaia ʼe tonu ke taupau pea mo fafaga ʼaki te fakaʼaogaʼi tuʼumaʼu ʼo te meʼa kai fakalaumālie. ʼAki tona kautahi, ʼe foaki mai e Sehova he ʼu polokalama ʼaoga ki te ako ʼo tana Folafola. Ko te ʼu fono e nima ʼi te vahaʼa ʼa te kokelekasio ʼe ko he fakatuʼutuʼu lelei ʼaia ke hakehake ai ki muʼa tatatou mālolohi; ʼe ko he uga ʼaia ʼo tatou ki te ʼofa pea mo te ʼu gāue ʼaē ʼe ʼaoga’. — Hep. 10:24.
7 Ko te ʼu manuʼia ʼe haʼu mai te ʼu fono ʼaia ʼe lahi ʼaupito mo kapau ʼe māhani tatatou fai hatatou ako tokotahi pe ʼe faka famili. Ke kita fai he fakatuʼutuʼu ʼo vakaʼi te koga tohi ʼi te ʼaho fuli, mo mulimuli ki te polokalama lau Tohi-Tapu neʼe fakatuʼutuʼu ki te Ako ʼo te minisitelio faka teokalatike, ʼo teuteu ki te ako tohi pea mo Te Tule Leʼo. Ko te famili takitokotahi ʼe fakasiosio anai pe ʼe feafeaʼi tana fai tuʼumaʼu te fahaʼi ʼaia. Ko te pule ʼo te famili ʼe ina fakasiosio foki ki te polokalama ako ke ʼalu tahi mo te ʼu meʼa fakalaumālie ʼe ʼaoga tāfito ki tona famili. Koia, ko te “loto fale ʼe mālohi anai, (...) ʼe ʼiloga lelei anai te lelei ʼo tona fakatafito”. (Tāʼaga Lea 24:3.) Ke ia tatou te falala, kapau ʼe tou fakasiosio lelei ʼo fai tuʼumaʼu tatatou ako, pe ʼe tokotahi pe ʼe faka famili, ʼe tapuakina anai tatou e Sehova pea ko tona laumālie ʼe ina tokoniʼi anai tatou ke tou faʼa kātakiʼi totatou ʼu faigataʼa ia. — Sake 1:2, 3; 1 Petelo 4:11.
8 Tou nonofo maʼa pea mo fai he ʼu aga ʼe lelei: ʼE fakaafe tatou e Sehova ke tou fakaōvi age kia te ia. Kae, ʼe ina toe fakahā mai ko te meʼa ʼaia ʼe hoko anai mokā ʼe tou tui ki te sakilifisio neʼe fai e Sesu ʼaē “ ʼe ina fakamaʼa tatou mai te agahala”. (1 Soane 1:7; toe vakaʼi Hepeleo 9:14.) ʼE feala ke hoko atu te fakamālohiʼi ʼo tatatou tui ʼaki te ako ʼo te Folafola ʼa te ʼAtua pea mo te maʼuliʼi ʼo te ʼu meʼa ʼaē ʼe tou akoʼi. Ko ʼihi ʼe hoko kia nātou te lotovaivai, koteʼuhi heʼe mole nātou tokaga ki tanatou meʼa kai fakalaumālie, pe ʼe mole lahi tanatou faiga ʼaē ke nātou maʼuliʼi te ʼu fahaʼi ʼaia ʼi tonatou maʼuli. Ko te fahaʼi ʼaia ʼe feala ai ke mālo ia Satana. Ko ʼihi kua nātou vaivai fakalaumālie pea ʼe mole kei ia nātou te fia gāue. Kae, ko ʼihi neʼe nātou fai he ʼu hala mamafa ia muʼa ʼo Sehova, pea neʼe fakamavae nātou. Koʼeni te fakatokaga mai ʼa Paulo: “Ko ia ʼaē ʼe mahalo ia ʼe tuʼu ke tokaga naʼa to.” (1 Ko. 10:12). Kapau kua tou līaki te ako, te ʼolo ʼaē ki te ʼu fono pea mo te fai faka mafola, ʼe faigafua anai tatatou to ki te malaʼia pea mo te ʼu fakahala.— Hep. 2:1, 2; 2 Petelo 2:20-22.
9 ʼE tonu ke tou nonofo maʼa ʼi te ʼu fahaʼi fuli: ʼi totatou sino, tatatou fakakaukau, ʼi te fahaʼi fakalaumālie pea mo tatatou manatu (2 Ko. 7:1). Ko te mālama ʼe tou maʼuli ai ʼi te temi nei kua fakalialia pea mo aga faikehe. Ko te Tevolo ʼe ina fakaʼaogaʼi tuʼumaʼu te ʼu faʼahiga meʼa kehekehe moʼo tou fakahalaʼi. Kapau ʼe tou mālohi fakalaumālie, ʼe tou ʼiloʼi papau ʼe mole ‘feala ke puli kia tatou tona finegalo pea ʼe mole feala anai tana fakahalaʼi tatou’. (2 Ko. 2:11.) Ko te ʼu fakatuʼutuʼu pea mo te ʼu tokoni ʼe foaki mai e te kautahi ʼa Sehova ʼe feala ai hatatou fakasiosio ke tou ʼiloʼi te ʼu faʼahiga meʼa ʼe kovi pea ke tou tauʼi.
10 Ko nātou ʼe takitaki ʼi te kokelekasio ko tonatou maʼua ʼaē ko te foaki ʼo he faʼifaʼitaki lelei ʼo ʼuhiga mo te nonofo mālolohi pea mo te nonofo maʼa. Neʼe palalau ia Paulo ki te maʼua ʼaia: “Koutou manatuʼi ia nātou ʼaē ʼe takitaki kia koutou, (...) pea, ʼo fakasiosio ki te ikuʼaga ʼo tanatou aga, faʼifaʼitakiʼi tanatou tui.” (Hep. 13:7).ʼE tonu foki ko te ʼu tagata ʼāfea pea mo te ʼu tagata faifekau faka minisitelio ke nātou fai he faʼifaʼitaki lelei ʼi tonatou maʼuli pea mo nātou fai fakalelei tonatou maʼua ʼaē ko te ʼu pule faka famili. ʼE tonu ke nātou faiga ʼo mulimuli ki te faʼifaʼitaki neʼe tuku mai e Timoteo, ʼaē neʼe tokoniʼi ‘ke liliu ko he faʼifaʼitaki ʼi tana palalau, ʼi tona maʼuli, ʼi tona ʼofa, ʼi tana tui pea mo tana nofo maʼa’. (1 Tim. 4:12; 1 Petelo 5:3.) Kae ko totatou maʼua fuli ke tou liliu ko he ʼu faʼifaʼitaki lelei ʼo tou fakahā he aga ʼe ʼaoga. Ko te ʼu hahaʼi ʼaē ʼe fia logo ki te moʼoni ʼe nātou fakamāu te fahaʼi ʼaia pea mo te kautahi ʼa Sehova ʼuhi ko tanatou sioʼi totatou maʼuli. ʼE tou tokakaga ki totatou maʼuli ke tokoni lelei kia nātou ke feala ai hanatou ʼomai ki te kautahi maʼa ʼo Sehova.
11 Ko te tānaki ʼo nātou ka maʼuli anai ʼi te “mamahi lahi” ʼe haʼele ia ki muʼa (Fkhā. 7:14). Gata pe ko nātou ʼaē ʼe mālolohi fakalaumālie pea mo nonofo maʼa ʼe maʼuʼuli anai. ʼO fakalogo ia ki te ʼu meʼa ʼaenī: 1) ke fai tuʼumaʼu he ako faka tohi-tapu pea mo metitasio ki te Folafola ʼa te ʼAtua; 2) ke tou ʼoʼofa fakamalotoloto ki ʼotatou ʼu tēhina mo tuagaʼane ʼaki te loto ʼaē ke foaki he ʼu tokoni; pea 3) ke gāue ʼi te logotahi mo taupau he aga maʼa ʼo fakaʼapaʼapa ai ki te huafa ʼo Sehova. ʼI te fahaʼi ʼaia, ʼe tou falala ki te tapuakina ʼa Sehova, feiā foki mo tana taupau tatou ʼi te temi ʼe pulihi ai anai te mālama ʼaenī. Ke tou falala ʼe tou kau anai kia nātou ʼaē ‘ ʼe agatonu pea mo taupau e Sehova’. — Pes. 31:23.