Te Aga ʼa Te Kau Kilisitiano ʼi Te Faleako
1 Kapau ko koutou ko he kau tūpulaga Kilisitiano ʼe kei koutou ako, ʼe ʼaoga ke mālohi takotou tui ke feala ai hakotou taupau takotou agatonu. ʼE koutou felāveʼi anai mo te ʼu fakakaugā kovi pea mo te ʼu ʼaluʼaga ʼe feala ke ʼahiʼahiʼi ai takotou tui. ʼE maʼuhiga ke koutou maʼuliʼi te tokoni ʼa Petelo moʼo “taupau maʼu takotou aga lelei ʼi te lotolotoiga ʼo te ʼu puleʼaga, koteʼuhi ke feala . . . ʼaki takotou ʼu gāue lelei ʼaē ʼe nātou sio mata kiai, ke nātou faka kolōliaʼi te ʼAtua.” (1 Pe. 2:12) ʼE tonu ke koutou lotomālohi pea mo faiga fakamalotoloto ke koutou mālo ʼi te faʼahi ʼaia.
2 ʼI te faleako peʼe ʼi tuʼa atu ʼo te faleako, ʼe tauʼi koutou e te ʼu manatu ʼo ʼuhiga mo te ʼu felāveʼi fakasino ʼi muʼa ʼo te ʼohoana, te ʼu tauvele, te suluka, pea mo te fakaʼaogaʼi ʼo te toloke. ʼI te ʼaho fuli, ʼe koutou felāveʼi mo te ʼu fakahala ʼe fakatupu tuʼutāmaki ki takotou aga ʼaē ʼe lelei. Ohage ko te hahaʼi lalahi, ʼe tonu ke koutou “tau mālohi maʼa te tui” mo kapau ʼe koutou tau mo te ʼu fihifihia ʼaia.—Suta 3; vakaʼi Te Tule Leʼo ʼo te ʼaho 15 ʼo Sūlio 1991, ʼi te lea Fakafalani, ʼi te pasina 23 ki te 26.
3 ʼI te faleako, ʼe ʼi ai te ʼu ʼaho lalahi fakafenua pea mo te ʼu ʼaho lafeti ʼo te mālama. ʼE koutou ʼiloʼi koa te ʼu ʼaho lafeti faka puleʼaga pea mo te ʼu ʼaho lafeti faka lotu ʼaē ʼe fai ʼi tokotou faleako? Kapau ʼe hoko he fihifihia, ʼe feala koa hakotou “taupau maʼu he leʼo ʼo loto ʼe lelei, . . . ke feala ai he ufiufi ʼo nātou ʼaē ʼe talanoa kovi ki takotou aga ʼaē ʼe lelei”?—1 Pe. 3:16.
4 ʼE lagi feala ke koutou fia kau ki te ʼu faigaoʼi ʼo te faleako peʼe ko te tahi ʼu meʼa ʼe fai e te faleako. ʼE tonu ke koutou nofo tokaga ke koutou ʼiloʼi peʼe lava feafeaʼi ki te ʼu meʼa ʼaia ʼaē ʼe hage ʼe fakafiafia, ke fakatupu kovi ki takotou tui. ʼE tonu ke koutou filifili ia nātou ʼaē ʼe feala ke koutou “fefakaloto mālohiʼaki,” ʼo koutou fefakaloto mālohiʼaki ʼi te tui.—Loma 1:12.
5 ʼE Feala Hakotou Kātaki, ʼAki Te Tokoni ʼa Sehova: ʼE ʼahiʼahiʼi tuʼumaʼu e Satana takotou tui. Ko te ʼu ʼahiʼahi ʼaē ʼe tonu ke koutou kātakiʼi ʼe feala ke faigataʼa, kae ko te ʼu fakapale ʼaē ka koutou maʼu ʼe lahi age ia. (1 Pe. 1:6, 7) ʼE mole feala ke koutou kātakiʼi ʼaki tokotou mālohi totonu; ʼe tonu ke koutou falala ki te tokoni ʼa Sehova. Neʼe uga mālohi e Sesu tana ʼu tisipulo ʼo fēnei: “Koutou nonofo fakaonoono pea ke koutou faikole tuʼumaʼu, ke ʼaua naʼa koutou tō ki he fakahala.” (Mat. 26:41) ʼE maʼuhiga te akonakiʼi ʼo tatou totonu pea mo tou maʼu te loto lolomi.—1 Ko. 9:27.
6 Koutou manatuʼi tuʼumaʼu ʼe koutou huʼi maʼua kia Sehova ʼo ʼuhiga mo takotou aga. (Tnk. 11:9) Tatau aipe peʼe mole tokagaʼi e ʼihi te meʼa ʼaē ʼe koutou fai, ʼe ʼiloʼi e Sehova te meʼa ʼaē ʼe koutou fai pea ʼe ina fakamāu koutou ʼo ʼuhiga mo te faʼahi ʼaia. (Hep. 4:13) Ko takotou holi fakamalotoloto ʼaē ke leleiʼia koutou e te ʼAtua, ʼe tonu ke ina uga ai koutou ke koutou “gāue ki tokotou maʼuli ʼaki te manavahe pea mo te tekelili.” (Filp. 2:12) Ko te lau ʼo te Folafola ʼa te ʼAtua ʼi te ʼaho fuli ʼe ko he tokoni lahi. ʼE lahi ai te ʼu tokoni ʼe lelei pea mo te ʼu faʼifaʼitaki lelei ke koutou mulimuli kiai.—Hep. 12:1-3.
7 ʼU mātuʼa, ʼe ʼi ai tokotou maʼua tāfito. ʼE tonu ke koutou tokakaga ki takotou fānau, ke koutou ʼiloʼi te ʼu fihifihia ʼaē ʼe tau mo nātou, pea mo koutou foaki kia nātou he ʼu tokoni mokā ʼe ʼaoga kia nātou. ʼE koutou felogoi lelei koa mo takotou fānau? Neʼe koutou akoʼi koa kia nātou ke nātou mahino ki te ʼu lao pea mo te ʼu pelesepeto ʼa te ʼAtua? Ka nātou felāveʼi mo he ʼu fihifihia peʼe ko he ʼu ʼahiʼahi, ʼe mālohi koa takotou fānau, peʼe nātou vaivai gafua? ʼE nātou lotovaivai koa ʼuhi ko te maʼua ʼaē ke nātou kehekehe mo te ʼu tamaliki ʼaē ʼe taʼu tahi mo nātou? ʼI tokotou ʼuhiga mātuʼa, ʼe ko tokotou maʼua ke koutou tokoni kia nātou. (Teu. 6:6, 7) Kapau ʼe koutou fai fakalelei tokotou maʼua, ʼe feala ke koutou tokoni kia nātou ke nātou mālo ʼi te tau ʼo ʼuhiga mo te tui.—Taag. 22:6.