“ ʼAua Naʼa Tou Fiu ʼi Te Fai ʼo Te Meʼa ʼAe ʼe Lelei”

1, 2. Kotea te fakalotomalohi ʼe tou maʼu mai te ʼu meʼa ʼae neʼe ha ʼo ʼuhiga mo te kautahi ʼa Sehova?

ʼE KO he aluʼaga fakaofoofo tatatou iloʼi ʼae ʼe tou kau ki he kautahi ʼe ʼi ai tona koga ʼi te lagi pea mo te tahi ʼi te kele. Ko te ʼu meʼa ʼae neʼe ha ʼae ʼe fakamatala ʼi te ʼuluaki kapite ʼo Esekiele pea mo te kapite 7 ʼo Taniela, ʼe fakamatalatala ai peʼe fakahoko feafeaʼi e Sehova ia tana fakatuʼutuʼu. ʼE takitaki e Sesu ia te koga ʼo te kautahi ʼae ʼi te kele. ʼE ina takitaki te koga ʼaia moʼo fakahoko ia te gaue faifakamafola, mo akoʼi pea mo fakalotomalohiʼi ia natou ʼae ʼe natou fakahoko ia te gaue ʼaia, pea mo tokoni ki ʼihi ke natou liliu ko he kau atolasio ʼa Sehova. ʼE fakalotomalohiʼi tatou e te ʼu aluʼaga ʼaia ke tou falala ki te kautahi ʼa Sehova.—Mat. 24:45.

² ʼE kotou mulimuli koa ki te kautahi ʼo kotou maʼumaʼua ʼi te tauhi ʼae ki te ʼAtua? Neʼe lagi kotou tokagaʼi takotou mole kei faʼafai. Neʼe kua hoko pe te faʼahi ʼaia ki te kau Kilisitiano ʼo te temi ʼo te kau apositolo. Neʼe ʼaoga ki te apositolo ko Paulo ke ina fakamanatuʼi age ia te faʼafai ʼa Sesu. Neʼe ui e Paulo ʼe ko he tokoni ʼaia ke ʼaua naʼa natou “fiu pea mo lotovaivai.” (Hep. 12:3, MN) ʼI te alatike ʼo te vahaʼa ʼaeni kua hili atu, neʼe tou talanoa ai ki te ʼu gaue fakaofoofo ʼae ʼe lolotoga fakahoko nei e te kautahi ʼa Sehova. Ko te faʼifaʼitaki ʼo Kilisito neʼe ko he fakalotomalohi ʼaia maʼa te kau Kilisitiano ʼi te temi ʼo te kau apositolo, pea ʼe toe tokoni mai ia te kautahi ʼa Sehova ke tou katakiʼi tatatou tauhi ʼae ki te ʼAtua pea mo tou haga faʼafai.

3. Kotea ʼae ʼe tonu ke tou fai ke ʼaua naʼa tou fiu? Kotea ʼae ka tou talanoa anai ki ai ʼi te alatike ʼaeni?

³ Ke ʼaua naʼa tou “fiu,” ʼo mole tou toe faʼafai ʼi te tauhi ʼae ki te ʼAtua, ʼe mole tonu pe ke tou fakakaukauʼi ia te faʼifaʼitaki ʼo te kautahi ʼa te ʼAtua. Kaʼe neʼe ui e Paulo ʼe tonu ke tou haga “fai” te meʼa ʼae ʼe lelei. (Kal. 6:9, MN) ʼE tou talanoa anai kia aluʼaga ʼe nima ʼe tonu ke tou fakahoko ke feala ai hatatou taupau tatatou faʼafai pea mo mulimuli ki te kautahi ʼa Sehova. Pea ʼe tou iloʼi ai anai peʼe ko te aluʼaga fea ʼae ʼe tonu ke tou fakahoko e tatou totonu peʼe ko ʼotatou famili.

TOU FAKATAHITAHI ʼI TE ʼU FONO

4. He ko ʼe ʼe feala ke tou ui neʼe kau tuʼumaʼu pe te ʼu fono ki te tauhi moʼoni?

⁴ Neʼe maʼuhiga tuʼumaʼu ia te ʼu fono ki te ʼu kaugana ʼa Sehova. ʼE fono ia Sehova mo te kau ʼaselo ʼi te lagi. (1 Hau 22:19; Sopo 1:6; 2:1; Tan. 7:10) ʼI te temi muʼa, neʼe fakatotonu e te ʼAtua ki te kau Iselaele ke natou fakatahitahi “o tupu ke natou logo, pea ke natou iloi.” (Tet. 31:10-12) ʼI te temi ʼo te kau apositolo, neʼe tautau fakatahitahi ia te kau Sutea ʼi te ʼu sinakoka ʼo lau ia te Tohi-Tapu. (Luka 4:16; Gaue 15:21) Neʼe toe maʼuhiga ia te ʼu fono ʼi te temi ʼae neʼe fakatuʼu ai te kokelekasio Fakakilisitiano pea ʼe toe maʼuhiga pe kia tatou ia ʼaho nei. Ko te kau Kilisitiano moʼoni ʼe natou feʼekenaki ki te ofa pea mo te ʼu gaue lelei. ʼE tonu “ke tou fetokoniaki ia tatou,” tafitō ʼi te ʼu ʼaho fakamuli.—Hep. 10:24, 25.

5. ʼE feafeaʼi hatatou fetokoniʼaki ʼi te ʼu fono?

⁵ ʼE tou fetokoniʼaki ʼi te ʼu fono mo kapau ʼe tou fai he ʼu tali. Ohage la, ʼe feala ke tou tali ki te fehuʼi ʼo te palakalafe peʼe tou talanoa ki he vaega Tohi-Tapu peʼe tou fakamatala pe neʼe fua lelei feafeaʼi kia tatou ia te maʼuliʼi ʼo he pelesepeto Fakatohi-tapu. (Pes. 22:23; 40:10) Ko te ʼu tali ʼae ʼe fai e te kau tupulaga pea mo te kau matutuʼa ʼe ko he fakalotomalohi kia tatou fuli, peʼe kei tou foʼofoʼou ʼi te moʼoni peʼe kailoa.

6. Kotea te ʼu tokoni ʼe tou maʼu mai ʼatatou fono?

⁶ ʼE lahi te ʼu tokoni ʼe tou maʼu mai ʼatatou fono pea mo ʼatatou fakatahi lalahi. Ohage la, ʼe tokoni mai ke tou lototoʼa ʼo fakahoko ia te gaue faifakamafola logo la te fakafeagai pea mo te mole fia fakalogo ʼa te hahaʼi ʼo totatou telituale. (Gaue 4:23, 31) ʼE malohi tatatou tui ʼuhi ko te ʼu akonaki ʼe fakatafito ki te Tohi-Tapu. (Gaue 15:32; Loma 1:11, 12) ʼE tou maʼu mai ʼatatou fakatahitahi mo ʼotatou tehina mo tuagaʼane ia te fiafia pea mo te lotofimalie. (Pes. 94:12, 13) ʼE fakatuʼutuʼu e te Komite Faiako ʼo te Kolesi Pule ia te polokalama ʼo te ʼu fono ʼa te hahaʼi ʼa Sehova. Koia ʼe tou lotofakafetaʼi ai ki te ʼu ako ʼe foaki mai ʼi te ʼu fono ʼi te ʼu vahaʼa fuli.

7, 8. (1) Kotea te tupuʼaga tafitō ʼo tatatou kau ki te ʼu fono? (2) Kotea te ʼu tokoni ʼe tou maʼu mai te ʼu fono?

⁷ ʼE mole tou kau ki te ʼu fono ʼuhi pe ko te ʼu lelei ʼe tou maʼu mai ai. Ko te tupuʼaga tafitō ʼo tatatou kau ki te ʼu fono, ʼe ko tatatou fia tauhi ʼae kia Sehova. (Lau ia Pesalemo 95:6.) ʼE ko he pilivilesio maʼuhiga ia te fakavikiviki ʼo totatou ʼAtua lahi ʼaki he ʼu katiko. (Kol. 3:16) Pea ʼe tou toe fakavikiviki ia Sehova ʼaki tatatou fai tali ʼi te ʼu fono. ʼE tau pea mo Sehova ia tatatou faʼahiga tauhi ʼaia. (Apk. 4:11) Koia, ʼe tou tui papau ai ki te maʼuhiga ʼae ke tou kau tuʼumaʼu ki ʼatatou fono.—Hep. 10:25.

⁸ Ko ʼatatou fono ʼe ko he meʼa ʼofa neʼe foaki mai e Sehova moʼo tokoni mai ke tou kataki ʼo kaku ki te fakaʼauha ʼo te malama agakovi ʼaeni. ʼE tou manatu feia koa? Kapau koia, ʼe tou faiga anai ke tou kau ki te ʼu fono fuli, logo la ʼe tou maʼumaʼua. (Filp. 1:10, MN) Tou faigaʼi ke ʼaua naʼa tou to ʼi te ʼu fono.

TOU FAʼAFAI ʼI TE FAIFAKAMAFOLA

9. ʼE feafeaʼi hatatou iloʼi te maʼuhiga ʼo te gaue faifakamafola?

⁹ Kapau ʼe tou loto ke tou mulimuli ki te takitaki ʼa te kautahi ʼa Sehova, ʼe tonu ke tou faʼafai ʼi te faifakamafola. Neʼe kamata e Sesu ia te gaue faifakamafola ʼi tana ʼi te kele. (Mat. 28:19, 20) Pea talu mai ai, ko te faifakamafola pea mo te fai ʼo ni tisipulo neʼe ko te fakatuʼutuʼu maʼuhiga ʼaia ʼa te kautahi ʼa Sehova. ʼE lahi te ʼu aluʼaga neʼe ha ai te lagolago ʼa te kau ʼaselo ki tatatou gaue ke feala ai hatatou maʼu ia natou ʼae ka natou tali anai te moʼoni. (Gaue 13:48; Apk. 14:6, 7) Pea ko te fakatuʼutuʼu tafitō ʼo te koga ʼo te kautahi ʼa Sehova ʼi te kele, ʼe ko te fakatuʼutuʼu pea mo lagolago ki te gaue faifakamafola. ʼE maʼuhiga tokotahi koa ia te gaue ʼaia ʼi tokotou maʼuli?

10. (1) Kotea ʼae ʼe fai e te tehina ke malohi ai tona ʼofa ʼae ki te moʼoni? (2) ʼE tokoni feafeaʼi atu ia te gaue faifakamafola ke malohi ai tokotou ʼofa ki te moʼoni?

¹⁰ Kapau ʼe tou faʼafai ʼi te faifakamafola, ʼe haga malohi ai totatou ʼofa ʼae ki te moʼoni. Ko te faʼahi ʼaia ʼe fai e Mitchel, ko he tagata ʼafeā pea mo pionie kua fotufotuʼa. Neʼe ina ui fenei: “ ʼE au fiafia moka au palalau ki te hahaʼi ʼo ʼuhiga mo te moʼoni. Ka au lau he alatike foʼou ʼi Te Tule Leʼo peʼe ko te Réveillez-vous ! ʼe au punamaʼuli ʼosi ʼi te ʼu manatu fakapotopoto ʼae ʼe tohi ai ʼaki he fakasiosio poto. Pea ʼe tupu ai leva taku fia alu ʼo ʼahiʼahi ki te hahaʼi peʼe natou leleiʼia ia te ʼu alatike ʼaia.” Neʼe toe ui e Mitchel ko te gaue faifakamafola ʼe tokoni age ke ina fakamuʼamuʼa tuʼumaʼu ia te ʼu meʼa ʼae ʼe maʼuhiga ʼi tona maʼuli pea mo tokaga ke ʼaua naʼa puli tona temi ki he tahi age ʼu gaue. Koia ʼe feala ke tou katakiʼi te ʼu ʼaho fakamuli ʼaeni mo kapau ʼe tou maʼumaʼua tuʼumaʼu ki tatatou tauhi ʼae ki te ʼAtua.—Lau ia 1 Kolinito 15:58.

TE ʼU LELEI MAI ʼATATOU TOHI

11. He ko ʼe ʼe tonu ke tou lau pea mo metitasioʼi ʼatatou tohi?

¹¹ ʼE foaki mai e Sehova ia te malohi ʼaki ʼatatou tohi. Neʼe lagi kua kotou lau ia he tohi pea mo kotou manatu fenei: “Ko te tohi ʼaeni neʼe au fakaʼamu ki ai! Neʼe hage ʼosi pe neʼe tohi e Sehova maʼa ʼaku!” He ko ʼe ʼe kotou maʼu ia te taʼi manatu ʼaia? Koteʼuhi ʼe akoʼi pea mo takitaki tatou e Sehova ʼaki te ʼu tohi ʼaia. Neʼe ina ui fenei: “E au ako anai kia koe pea e au fakaha anai kia koe te ala ae e tonu ke ke muli ai.” (Pes. 32:8) ʼE kotou faiga koa ke kotou lau pea mo metitasioʼi ia te ʼu tohi ʼae ʼe foaki atu? ʼE tokoni mai anai te ʼu tohi ʼaia ke tou katakiʼi pea mo tou haga faʼafai ʼi te tauhi ʼae ki te ʼAtua, ʼi te ʼu ʼaho fakamuli ʼaeni.—Lau ia Pesalemo 1:1-3; 35:28; 119:97.

12. Kotea ʼae ʼe tonu ke tou fai moʼo fakamaʼuhigaʼi ʼatatou tohi?

¹² ʼE tou fakamaʼuhigaʼi anai ʼatatou tohi mo kapau ʼe tou fakakaukauʼi ia te ʼu gaue fuli ʼe maʼua ke fakahoko ke feala ai hatatou maʼu ia te ʼu tohi ʼaia. ʼE maʼua ke fai he ʼu fekumi, mo tohi, mo sivisivi, mo ʼai he ʼu pakī, pea mo fakaliliu ia te ʼu tohi fuli ʼae ʼe tou ta ki he tahi age ʼu lea pea mo ʼai ki te Neti. ʼE tokaga ia te Komite Faitohi ʼo te Kolesi Pule ki te gaue ʼaia. Ko te ʼu filiale ʼae ʼe ta ai te ʼu tohi ʼe natou momoli te ʼu tohi ki te ʼu kokelekasio ʼo tonatou fenua. Kotea te tupuʼaga ʼo te fai ʼo te gaue ʼaia? Ke feala ki te hahaʼi ʼa Sehova ke natou maʼu ia te ako pea mo te takitaki ʼae ʼe ʼaoga kia natou ke natou nonofo agatonu ai kia te ia. (Esa. 65:13) ʼE tou maʼu he ʼu lelei mai te ʼu tohi fuli ʼae ʼe foaki mai e te kautahi ʼa Sehova.—Pes. 119:27.

TOU LAGOLAGO KI TE KAUTAHI ʼA SEHOVA

13, 14. Ko ai ʼi te lagi ʼe natou lagolago ki te kautahi ʼa Sehova? ʼE feafeaʼi hatatou faʼifaʼitakiʼi ia natou?

¹³ ʼI te tahi aluʼaga neʼe ha, neʼe sio ai ia Soane kia Sesu ʼe heka ʼi he hosi hina ʼo tauʼi ia natou ʼae ʼe fakafeagai kia Sehova. (Apk. 19:11-15) Pea neʼe toe sio ki te ʼu tehina fakanofo ʼae neʼe fakatuʼu ake ki te lagi pea mo te kau ʼaselo agatonu ʼe natou heheka ʼi te ʼu hosi ʼo mulimuli ia Sesu. ʼE natou fakaha ai ʼe natou lagolago ki tonatou Takitaki. (Apk. 2:26, 27) ʼE ha mai ʼaki tanatou faʼifaʼitaki ʼe tonu ke tou lagolago kia natou ʼae ʼe natou takitaki ia te kautahi ʼa Sehova.

¹⁴ ʼO toe feia aipe, ʼe lagolago katoa ia te toe hahaʼi tokolahi ki te gaue ʼa te kau Kilisitiano fakanofo ʼo Kilisito ʼae ʼe kei maʼuʼuli ʼi te kele. (Lau ia Sakalia 8:23.) ʼE kotou fakaha feafeaʼi ʼe kotou lagolago ki te kautahi? ʼE tou toe fakaha tatatou lagolago ki te kau tagata ʼafeā ʼaki tatatou fakalogo. (Hep. 13:7, 17) Ka tou palalau ʼo ʼuhiga mo te kau tagata ʼafeā, ʼe tou uga koa ʼihi ke natou fakaʼapaʼapa kia natou pea mo te ʼu gaue ʼae ʼe natou fakahoko? ʼE tou akoʼi koa ki ʼatatou fanau ke natou fakaʼapaʼapa ki te ʼu tehina agatonu ʼaia pea mo fakalogo ki ʼanatou tokoni? ʼE ʼi ai te tahi ʼu aluʼaga ʼe feala ke tou fakaha ai ʼe tou lagolago ki te kautahi. Ohage la, ʼe feala ke tou fai he fakatuʼutuʼu fakafamili ke tou foaki he meʼa ʼofa moʼo tokoni ki te gaue faifakamafola. (Taag. 3:9; 1 Ko. 16:2; 2 Ko. 8:12) Pea tahi, ʼe feala ke tou tokoni ki te fakamaʼa ʼo te Fale Fono. Ka sio ia Sehova ki tatatou lagolago ki he faʼahiga gaue pe ʼo te kautahi, ʼe ina foaki mai ia tona laumalie maʼoniʼoni. Pea ʼe foaki mai e tona laumalie ia te malohi ʼae ke tou katakiʼi ia te ʼu ʼaho fakamuli ʼaeni.—Esa. 40:29-31.

TOU MAʼULIʼI TE ʼU LAO ʼA TE ʼATUA

15. He ko ʼe ʼe tonu ke tou faiga malohi ke tou haga fai ia te meʼa ʼae ʼe lelei?

¹⁵ Kapau ʼe tou loto ke tou katakiʼi pea mo mulimuli ki te takitaki ʼo te kautahi ʼa Sehova, ʼe tonu ke tou maʼuliʼi ʼana lao. (Efe. 5:10, 11) ʼE faigataʼa kia tatou hatatou fakahoko tuʼumaʼu ia te meʼa ʼae ʼe lelei, ʼuhi ko Satana, pea mo tona malama agakovi ʼaeni pea mo totatou ʼuhiga heʼe haohaoa. Ko ʼihi ia koutou, naʼi tehina mo tuagaʼane ʼe tonu ʼi te ʼaho fuli ke kotou faiga malohi ke kotou taupau maʼu ʼakotou felogoʼi lelei pea mo Sehova. ʼE malave ki te loto ʼo Sehova ia te ʼu faiga ʼae ʼe kotou fakahoko. ʼAua naʼa kotou fiu ʼi te fai ʼo te meʼa ʼae ʼe lelei! Ka tou maʼuliʼi ia te ʼu lao ʼa te ʼAtua, ʼe tou maʼuli fiafia pea mo tou iloʼi papau ʼe ʼofa ia Sehova kia tatou.—1 Ko. 9:24-27.

16, 17. (1) Kotea ʼae ʼe tonu ke tou fai moka tou fai he agahala mamafa? (2) Kotea te ako ʼe tou taʼofi mai te faʼifaʼitaki ʼo Anne?

¹⁶ Kaʼe kotea ʼae ʼe tonu ke tou fai moka tou fai he agahala mamafa? ʼAua naʼa kotou faigaʼi ke kotou fufu. Kotou kumi tokoni. Kotou manatuʼi te mamahi ʼa Tavite ʼuhi ko tana faigaʼi ʼae ke ina fufu ʼana agahala. Neʼe ina ui fenei: “Nee au fakalogologo ai nee [kaina] oku hui, nee au tagi i te aho katoa.” (Pes. 32:3) Kapau ʼe tou faigaʼi ke tou fufu ʼatatou agahala, ʼe puli anai tatatou fiafia pea mo ʼatatou felogoʼi mo Sehova. Kaʼe kapau ʼe tou fakaha ʼatatou agahala, ʼe ina fakaha mai anai kia tatou ia tona manavaʼofa.—Taag. 28:13.

¹⁷ Kotou tokagaʼi te faʼifaʼitaki ʼo Anne.a Neʼe kamata fai e Anne ia he ʼu aga ʼe kovi, kaʼe neʼe lolotoga pionie ʼi tana kei tupulaga. Pea neʼe vevele ai tona leʼo ʼo loto. Neʼe ina ui fenei: “Neʼe mole kei au fiafia pea neʼe au lotomamahi ʼi te temi fuli pe.” ʼI te tahi ʼaho, neʼe talanoaʼi ʼi te fono ki te vaega ʼo Sakopo 5:14, 15. Neʼe mahino ai leva ia Anne ʼe ʼaoga ki ai he tokoni. Kotea ʼae neʼe ina fai? Neʼe mulimuli ki te tokoni ʼo te Tohi-Tapu, neʼe alu ʼo palalau ki te kau tagata ʼafeā. ʼE moʼoni ʼe mole ko he faʼahi ʼe faigafua, kaʼe kia ia neʼe faitoʼo e Sehova tona mahaki. Neʼe ina ui fenei: “ ʼE moʼoni ʼe mole tou leleiʼia te folo ʼo he faitoʼo, kaʼe ʼe iku ia ki te malolō.” ʼI te temi nei, kua toe liliu ia Anne ʼo faʼafai pea mo tauhi kia Sehova ʼaki he leʼo ʼo loto ʼe maʼa.

18. Kotea ʼae ʼe tonu ke tou faiga malohi ki ai?

¹⁸ ʼAua naʼa galo kia tatou, ko te kau ʼae ki te kautahi ʼa Sehova ʼi te ʼu ʼaho fakamuli, ʼe ko he toe pilivilesio lahi ʼaia! Tou faiga malohi ke tou kau mo ʼotatou famili ki te ʼu fono, mo faʼafai ʼi te gaue faifakamafola pea mo maʼu he ʼu lelei mai ʼatatou tohi. Tou lagolago kia natou ʼae ʼe natou takitaki te gaue pea mo tou maʼuliʼi te ʼu lao ʼa Sehova. Kapau ʼe tou fai ia te faʼahi ʼaia, ʼe tou mulimuli anai ki te takitaki ʼo te kautahi ʼa Sehova pea ʼe mole tou fiu anai.