“Kotou Iloʼi Papau Te ʼu Meʼa ʼAe ʼe Maʼuhiga Tafitō”

1, 2. Ko te lea fakapolofeta fea ʼo ʼuhiga mo te ʼu ʼaho fakamuli neʼe fia mahino ki ai ia te kau tisipulo? Kotea tona tupuʼaga?

NEʼE hoki fakaha age pe e Sesu ki tana kau tisipulo ʼe fakaʼauha anai ia te fale lotu. Neʼe hoha ai ia Petelo, mo Sakopo, mo Soane pea mo Atelea. (Mko. 13:1-4) Pea ʼi tanatou nonofo ʼateaina leva mo ia, neʼe natou fehuʼi fenei age kia Sesu: “Fakaha mai kia matou, pe ko te temi fea ae e hoko ai anai te mea aia, pea kotea anai te fakailoga o tau toe liliu mai pea mo te fakaosi o te malamanei?” (Mat. 24:1-3) Pea neʼe mole fakaha age pe e Sesu ia te ʼu aluʼaga ʼae ka hoko anai ʼi muʼa ʼo te fakaʼauha ʼo Selusalemi, kaʼe neʼe toe talanoa ki te ʼu aluʼaga ʼae ka hoko anai ʼi te ʼu ʼaho fakamuli ʼo te malama ʼa Satana. Neʼe fakakikite e Sesu ʼe hoko anai he ʼu aluʼaga fakamataku ohage ko te ʼu tau, te hoge pea mo te ʼaʼasili ʼo te agakovi. Pea neʼe toe fakakikite e Sesu ia he aluʼaga ʼe lelei. Neʼe ina ui fenei: “E fakamafola anai te logo lelei aeni o te puleaga i te malamanei katoa, ke fakamooni ki te u puleaga fuli. Pea e hau anai te fakaosi.”—Mat. 24:7-14.

² Neʼe kua gaue fakatahi ia te kau tisipulo mo Sesu ki te fakamafola ʼo te logo lelei ʼo te Puleʼaga. (Luka 8:1; 9:1, 2) Pea neʼe lagi natou toe manatuʼi ia te ui ʼae ʼa Sesu: “E lahi te taukai, kae e toko sii te kau gaue. Koia koutou kole ki te pule o te taukai ke ina fekaui ni tagata gaue ki tana taukai.” (Luka 10:2) Kaʼe neʼe lagi natou feʼekeʼaki fenei: “ ʼE feafeaʼi anai hatatou fakamafola ia te logo lelei ʼi te malamanei katoa pea mo foaki he fakamoʼoni ki te ʼu puleʼaga fuli? ʼE ʼomai anai maifea ia te kau gaue?” Neʼe mole iloʼi e te kau tisipulo peʼe hoko moʼoni feafeaʼi anai ia te lea fakapolofeta ʼae ʼe tuʼu ia Mateo 24:14.

3. He ko ʼe ʼe maʼuhiga tafitō kia tatou ia te ʼu palalau ʼa Sesu ʼae ʼe tuʼu ia Luka 21:34? Kotea te ʼu fehuʼi ʼe tonu ke tou fai kia tatou totonu?

³ ʼE lolotoga hoko nei ia te lea fakapolofeta ʼae neʼe fai e Sesu. Ko te toko lau ʼi miliona hahaʼi ʼe natou fakamafola ia te logo lelei ʼo te Puleʼaga ʼi te kele katoa. (Esa. 60:22) Kaʼe neʼe toe fakaha e Sesu ʼe faigataʼa anai ki ʼihi hanatou fakamuʼamuʼa ia te gaue faifakamafola ʼi tonatou maʼuli. ʼE natou “mafasia” anai ʼuhi ko tanatou fakamuʼamuʼa ʼihi atu ʼu gaue. (Lau ia Luka 21:34.) ʼE maʼuhiga tafitō te ʼu palalau ʼaia ʼa Sesu kia tatou koteʼuhi ko ʼihi ʼu kaugana ʼa te ʼAtua ʼe mole kei natou fakamuʼamuʼa ia te ʼu meʼa ʼae ʼe maʼuhiga tafitō ʼi tonatou maʼuli. ʼE ha ia te faʼahi ʼaia ʼi te ʼu tonu ʼae ʼe natou fai ʼo ʼuhiga mo te gaue, peʼe ko te loaloaga ʼo tonatou temi ako, peʼe ko te maʼu koloa. Ko ʼihi ʼe pulinoa tonatou temi ki te faigaoʼi peʼe ki te ʼu fakafiafia. Ko ʼihi ʼe mole natou tauhi ki te ʼAtua ʼaki tonatou malohi katoa ʼuhi ko te ʼu tuʼania ʼo te maʼuli. Kotou feʼekeʼaki fenei: “Kaʼe ʼe feafeaʼi kia au? ʼE au fakamuʼamuʼa koa ia te finegalo ʼo te ʼAtua ʼi toku maʼuli?”

4. (1) Kotea te kole neʼe fai e Paulo ʼo ʼuhiga mo te kau Kilisitiano ʼo Filipe? Pea kotea tona tupuʼaga? (2) Kotea ʼae ka tou vakaʼi anai ʼi te alatike ʼaeni pea mo ʼae ka hoa mai? Kotea tona ʼaoga kia tatou?

⁴ Neʼe tonu ke faiga malohi ia te kau Kilisitiano ʼi te temi ʼo te kau apositolo ke feala ai hanatou haga fakamuʼamuʼa ia tanatou tauhi ki te ʼAtua ʼi tonatou maʼuli. Ko te tupuʼaga la ʼaia ʼo te kole e te apositolo ko Paulo ki te kau Filipe ke natou “filifili te u mea ae e lelei tukupau” peʼe ke natou iloʼi papau te ʼu meʼa ʼae ʼe maʼuhiga tafitō. (Lau ia Filipe 1:9-11.) Ohage ko te apositolo ko Paulo, tokolahi te kau Kilisitiano “kua natou asilisili lototoa i te fakaha o te Evaselio [peʼe ko “te Folafola ʼa te ʼAtua,” MN], e mole kei natou mataku.” (Filp. 1:12-14) ʼO toe feia pe ia ʼaho nei, tokolahi ia tatou ʼe tou fakamafola ia te Folafola ʼa te ʼAtua ʼaki he lototoʼa. Koia ʼe ko he fakalotomalohi kia tatou tatatou talanoa ʼi te alatike ʼaeni ʼo ʼuhiga mo te fakaʼaogaʼi e Sehova ia tana kautahi moʼo fakahoko moʼoni ia te lea fakapolofeta ʼae ʼe tuʼu ia Mateo 24:14. ʼE tou liliu ai ʼo faʼafai ʼi te gaue faifakamafola. Kotea ia te gaue ʼae ʼe fai e te kautahi ʼa Sehova, pea ʼe tokoni feafeaʼi mai kia tatou pea mo totatou famili? ʼE tou vakaʼi anai ʼi te alatike ʼae ka hoa mai pe kotea ʼae ka tokoni mai anai ke tou hoko atu tatatou tauhi ʼae ki te ʼAtua pea mo tou mulimuli ki te takitaki ʼo te kautahi ʼa Sehova.

TE KOGA ʼO TE KAUTAHI ʼA SEHOVA ʼAE ʼI TE LAGI

5, 6. (1) He ko ʼe neʼe fakaha e Sehova ki ʼana kaugana ia te ʼu aluʼaga ʼe lolotoga hoko nei ʼi te lagi? (2) Kotea te meʼa ʼae neʼe ha kia Esekiele?

⁵ ʼE lahi te ʼu aluʼaga neʼe mole loto e Sehova ke tohi ʼi te Tohi-Tapu. Ohage la, neʼe mole ina foaki he ʼu fakamahino ʼo ʼuhiga mo te ʼuto ʼo te tagata peʼe ʼo ʼuhiga mo te ʼatulaulau. Kaʼe neʼe ina tuku mai he ʼu fakamahino ʼe ʼaoga ke tou iloʼi ai tona finegalo pea mo tou talagafua kia te ia. (2 Tim. 3:16, 17) Kaʼe ʼe tou fiafia he neʼe fia fakamatala mai e Sehova ia te agaaga ʼo te koga ʼo tana kautahi ʼae ʼi te lagi. ʼE tou fiafia moka tou lau te ʼu fakamatala ʼaia ʼi te ʼu tohi ʼa Esaia, mo Esekiele, mo Taniela pea mo te tohi ʼo Apokalipisi. (Esa. 6:1-4; Esk. 1:4-14, 22-24; Tan. 7:9-14; Apk. 4:1-11) He ko ʼe neʼe loto e Sehova ke tou iloʼi ʼihi aluʼaga ʼe lolotoga hoko nei ʼi te lagi?

⁶ ʼE loto e Sehova ke ʼaua naʼa galo kia tatou ʼe ʼi ai tana kautahi ʼi te lagi pea mo te kele pea ʼe tou kau ki ai. ʼE gaue malohi ia te koga ʼo te kautahi ʼaia ʼi te lagi moʼo fakahoko ia tona finegalo. Ohage la, neʼe sio ia Esekiele ki te saliote ʼe lahi ʼaupito ʼe fakata ki te koga ʼo te kautahi ʼa Sehova ʼae ʼi te lagi. ʼE vave te feʼaluʼaki ʼo te saliote ʼaia pea ʼe feala pe ke ofe fakapunamaʼuli ki he faʼahi pe. (Esk. 1:15-21) Pea neʼe toe sio kia Ia ʼae ʼe ina taki te saliote. Neʼe ui fenei e Esekiele: “Nee au toe sio foki ki he mea o hage ko he sila gigila, o hage ko he afi.” Neʼe ina toe ui fenei: “Ko he paaki aia o te kololia o [Sehova].” (Esk. 1:25-28) Neʼe lagi ofo ai ia Esekiele. Neʼe sio ia Esekiele ʼe puleʼi katoa e Sehova ia tana kautahi pea mo ina takitaki ʼaki tona laumalie maʼoniʼoni. ʼE fakata ia te feʼaluʼaki ʼo te saliote ki te ʼu gaue ʼo te koga ʼo te kautahi ʼa Sehova ʼae ʼi te lagi.

7. ʼE fakamalohiʼi feafeaʼi ia tatatou tui e te meʼa ʼae neʼe ha kia Taniela?

⁷ Ko te meʼa ʼae neʼe ha kia Taniela ʼe ina fakamalohiʼi tatatou tui. Neʼe sio kia Sehova, te “Matua o te u aho,” ʼe heka ʼi he hekaʼaga fakahau neʼe ʼi ai ʼona teka. (Tan. 7:9) Neʼe loto e Sehova ke sio ia Taniela ki te feʼaluʼaki ʼo Tana kautahi, ko tona fakaʼuhiga ʼe gaue moʼo fakahoko ia tona finegalo. Pea neʼe sio leva ia Taniela ki he tahi “nee hage ko he foha o he tagata,” ia Sesu, ʼe foaki age ki ai ia te pule ki te koga ʼo te kautahi ʼa Sehova ʼae ʼi te kele. ʼE mole pule ia Sesu ki te malamanei lolotoga pe ni taʼu kaʼe ko tana pule ʼe “ko he pule heegata, ae e mole toe gata anai, pea e mole toe maumaui anai tona puleaga i he aho.” (Tan. 7:13, 14) Ko te meʼa ʼaia neʼe ha ʼe ina fakamalohiʼi ai tatatou falala ʼae kia Sehova pea mo ʼana gaue. Pea ʼe tou toe falala kia Sesu totatou Takitaki koteʼuhi neʼe sio ia Taniela ki te foaki ʼae e Sehova ki ai ia te pule.

8. Neʼe malave feafeaʼi kia Esekiele pea mo Esaia ia te ʼu meʼa ʼae neʼe nā sisio ki ai? Kaʼe ʼe tonu ke malave feafeaʼi kia tatou?

⁸ ʼE tonu ke malave feafeaʼi kia tatou ia te ʼu meʼa ʼaia neʼe ha ʼo ʼuhiga mo te kautahi ʼa Sehova? Ohage ko Esekiele, ʼe tonu ke malave ki totatou loto ia te gaue ʼae ʼe fai e Sehova. (Esk. 1:28) Neʼe toe sio mo te polofeta ko Esaia ki te ʼu aluʼaga ʼe lolotoga hoko nei ʼi te lagi. Neʼe ina tali lelei ia te fakaafe ʼae ke ina tala ia te ʼu logo ʼaia ki te hahaʼi. (Lau ia Esaia 6:5, 8.) Neʼe iloʼi lelei e Esaia, ʼe mole he aluʼaga ʼe feala ke ina taʼofi tana fakahoko tana gaue fakapolofeta, koteʼuhi neʼe tokoni age ia Sehova. Ohage ko Esaia, ʼe tou fakalahi ia tatatou gaue ʼae ki te ʼAtua heʼe tou fia lagolago ki te kautahi ʼa Sehova. ʼE ko he aluʼaga ʼe fakalotomalohi kia tatou ia tatatou iloʼi ʼae ʼe tou kau ki he kautahi ʼe maʼumaʼua tuʼumaʼu pe ki te fakahoko ʼo te finegalo ʼo Sehova.

TE KOGA ʼO TE KAUTAHI ʼA SEHOVA ʼAE ʼI TE KELE

9, 10. He ko ʼe ʼe ʼaoga ke ʼi ai he koga ʼo te kautahi ʼa Sehova ʼi te kele?

⁹ Neʼe fakaʼaogaʼi e Sehova ia tona ʼAlo moʼo fakatuʼu he koga ʼo tana kautahi ʼi te kele, ʼe gaue fakatahi mo te koga ʼae ʼi te lagi. Neʼe maʼua ke fai ia te faʼahi ʼaia ke feala ke fakahoko ia te lea fakapolofeta ʼae ʼe tuʼu ia Mateo 24:14. Kotea tona tupuʼaga? Tou vakaʼi ia tupuʼaga ʼe tolu.

¹⁰ ʼUluaki, he neʼe ui e Sesu ʼe fakamafola anai e tana kau tisipulo ia te logo lelei ʼo kaku ki “te u potu fuli o te malamanei.” (Gaue 1:8) Lua, ʼe ʼaoga anai kia natou ʼae ʼe natou fai ia te gaue faifakamafola he ʼu tokoni Fakatohi-tapu pea mo he fakalotomalohi. (Soa. 21:15-17) Pea tolu, ʼe ʼaoga anai kia natou he ʼu fono ʼe natou fakatahitahi ai anai ʼo tauhi kia Sehova pea mo akoako ai te gaue faifakamafola. (Hep. 10:24, 25) Koia ʼe tonu anai ke fakatuʼutuʼu lelei ia te gaue ʼa te kau tisipulo ʼa Sesu ke feala ke lava lelei ia te ʼu aluʼaga ʼaia ʼe tolu.

11. ʼE tou lava lagolago feafeaʼi ki te kautahi ʼa Sehova?

¹¹ ʼE tou lava lagolago feafeaʼi ki te kautahi ʼa Sehova? ʼE tonu muʼa ke tou falala ki te ʼu tehina ʼae ʼe natou takitaki ia te gaue faifakamafola. ʼE tonu ke tou falala kia natou koteʼuhi ʼe falala ia Sehova pea mo Sesu kia natou. Neʼe feala pe ke fakaʼaogaʼi e te ʼu tehina ʼaia tonatou temi pea mo tonatou malohi moʼo faigaʼi ke natou fakatokatoka ia te ʼu fihifihia ʼo te malamanei, kaʼe neʼe mole natou fai ia te faʼahi ʼaia. Tou vakaʼi pe kotea te fakatuʼutuʼu tafitō ʼae neʼe tokaga tuʼumaʼu ki ai ia te koga ʼo te kautahi ʼa Sehova ʼae ʼi te kele.

ʼE NATOU FAKAMUʼAMUʼA IA “TE ʼU MEʼA ʼAE ʼE MAʼUHIGA TAFITŌ”

12, 13. ʼE fakahoko feafeaʼi e te kau tagata ʼafeā ʼonatou maʼua fakalaumalie? He ko ʼe ʼe ko he fakalotomalohi ʼaia maʼa tatou?

¹² ʼI te kele katoa, neʼe tuku ki te ʼu tagata ʼafeā kua fotufotuʼa, ke natou fakatuʼutuʼu pea mo takitaki ia te gaue faifakamafola ʼi tonatou fenua. ʼE natou fakahoko feafeaʼi ia te faʼahi ʼaia? Ka natou toʼo he ʼu tonu ʼe natou kumi ia te takitaki ʼa Sehova ʼi te Tohi-Tapu, ʼo natou fakaliliu ia Tohi-Tapu ko “he malama taki i [ʼonatou] vae, pea ko he malama i [ʼonatou] ala” pea mo te faikole. ʼAki te faʼahiga fai ʼaia, ʼe natou mulimuli ai ki te takitaki ʼo te koga ʼo te kautahi ʼa Sehova ʼae ʼi te kele.—Pes. 119:105; Mat. 7:7, 8.

¹³ Ko te ʼu tagata ʼafeā ʼae ʼe natou fakatuʼutuʼu ia te gaue faifakamafola ia ʼaho nei, ʼe natou faʼifaʼitakiʼi ia te kau apositolo ʼo te temi muʼa ʼo natou fakamuʼamuʼa ia “te gaue ki te folafola.” (Gaue 6:4) ʼE natou fiafia ʼi tanatou sisio ʼae ki te tuputupu ʼo te gaue faifakamafola ʼi tonatou fenua ʼo toe feia pe ʼi te kele katoa. (Gaue 21:19, 20) ʼE mole natou fai he ʼu tuʼuga lekula moʼo takitaki te hahaʼi ʼa te ʼAtua, kaʼe ʼe natou tokaga tafitō ki te fakamafola ʼo te logo lelei ʼo mulimuli ki te takitaki ʼa te Tohi-Tapu pea mo te laumalie maʼoniʼoni. (Lau ia Gaue 15:28.) ʼE natou foaki ai he faʼifaʼitaki lelei ki te ʼu tehina mo tuagaʼane ʼo te kokelekasio.—Efe. 4:11, 12.

14, 15. (1) Kotea te ʼu fakatuʼutuʼu ʼe fai nei ke feala ai hatatou faifakamafola ʼi te kele katoa? (2) Kotea takotou manatu ʼo ʼuhiga mo ʼakotou faiga ʼae ke kotou lagolago ki te gaue faifakamafola?

¹⁴ Tokolahi te ʼu tehina ʼe natou gaue ʼi te ʼaho fuli moʼo teuteuʼi ia te ʼu tohi, mo te ʼu fono pea mo te ʼu fakatahi lalahi. Ohage la, ko te toko lau ʼi afe tehina mo tuagaʼane ʼe natou gaue kinakina moʼo fakaliliu ia te ʼu tohi kia lea ʼe 600 tupu. Ko he fakafealagia ʼaia ki te hahaʼi kauga malie ke natou logo ki “te u mea matalelei a te Atua” ʼi tanatou lea. (Gaue 2:7-11) ʼE ko he ʼu tehina mo tuagaʼane tupulaga ʼe natou fakaʼaogaʼi ia te ʼu masini moʼo ta ia te ʼu tohi. ʼOsi ʼaia pea ʼe momoli ia te ʼu tohi ʼaia ki te ʼu kokelekasio ʼi te ʼu potu fuli pe ʼo te kele.

¹⁵ ʼE toe feia pe ʼi totatou fenua, tokolahi ʼe natou gaue kinakina ke feala hatatou tokaga tafitō ki te fakamafola ʼo te logo lelei. Ohage la, ko te toko lau ʼi afe kau gaue ʼe natou laga ia te ʼu Fale Fono peʼe ko he ʼu Fale Fakatahi. Ko ʼihi ʼe natou lagolago kia natou ʼae ʼe tau mo te ʼu tuʼutamaki fakanatula peʼe ko he ʼu aluʼaga fakatoketa ʼe kovi ʼe hoko fakafokifa. Ko ʼihi ʼe natou fakatuʼutuʼu ia te ʼu fakatahi lalahi, pea ko ʼihi ʼe natou faiako ʼi te ʼu ako Fakatohi-tapu. He ko ʼe ʼe fai ia te ʼu fakatuʼutuʼu fuli ʼaia? ʼE fai moʼo tokoni mai ke tou fakamafola ia te logo lelei, mo tou tuputupu ʼi te faʼahi fakalaumalie, pea mo tokoni ki te hahaʼi ke natou liliu ko he kau atolasio ʼa Sehova. Koia ko te koga ʼo te kautahi ʼa Sehova ʼae ʼi te kele ʼe ina fakamuʼamuʼa ia te meʼa ʼae ʼe maʼuhiga tafitō.

KOTOU MULIMULI KI TE KAUTAHI ʼA SEHOVA

16. Kotea te ʼu fekumi ʼe feala ke kotou fai ki takotou ako fakafamili, peʼe ko takotou ako takitokotahi?

¹⁶ ʼE lelei ke tou toʼo he temi moʼo fakakaukauʼi ia te gaue ʼae ʼe fai e te kautahi ʼa Sehova. ʼE feala ke kotou vakavakaʼi ia te faʼahi ʼaia ʼi takotou ako fakafamili, peʼe ko takotou ako takitokotahi pea mo metitasioʼi. Ohage la, ʼe kotou fiafia anai ʼi takotou ako te ʼu meʼa ʼae neʼe ha kia Esaia, mo Esekiele, mo Taniela pea mo Soane. Pea ʼe lahi te ʼu aluʼaga ʼe feala ke tou ako ʼo ʼuhiga mo te kautahi ʼa Sehova ʼi te kaupepa lahi Ko Ai ʼe Ina Fai Te Finegalo ʼo Sehova Iā ʼAho Nei?, pea mo ʼihi atu ʼu tohi peʼe ko he ʼu foʼi ʼata.

17, 18. (1) Kotea te tokoni ʼe tou maʼu ʼi te alatike ʼaeni? (2) Kotea te ʼu fehuʼi ʼe feala ke tou fai kia tatou totonu?

¹⁷ ʼE lelei ke tou metitasio ki te faʼahiga fakaʼaogaʼi e Sehova ia tana kautahi moʼo lagolago ki te gaue faifakamafola. Tou mulimuli ki te kautahi taulekaleka ʼaia ʼo tou fakamuʼamuʼa ia te ʼu meʼa ʼae ʼe maʼuhiga tafitō. ʼE tou manatu tahi anai mo Paulo ʼae neʼe ina tohi fenei: “I tama mau te gaue aeni o mulimuli ki te manavaofa nee tuku mai kia maua, e mole ma lotovaivai.” (2 Ko. 4:1) Pea neʼe ina toe fakalotomalohiʼi fenei ʼona tehina: “ ʼAua naʼa tou fiu ʼi te fai ʼo te meʼa ʼae ʼe lelei, heʼe tou utu anai ʼi tona temi totonu, mo kapau ʼe mole tou fiu.”—Kal. 6:9, MN.

¹⁸ ʼE ʼaoga koa ke kotou fai he ʼu fetogi ʼi tokotou maʼuli ke feala ai hakotou fakamuʼamuʼa ia te ʼu meʼa ʼae ʼe maʼuhiga tafitō? ʼE feala koa ke kotou fakafaigafua tokotou maʼuli ke feala ai hakotou lagolago malohi ki te gaue faifakamafola? ʼI te alatike ʼae ka hoa mai, ʼe tou vakaʼi anai he ʼu aluʼaga ʼe nima ʼe tokoni mai anai ke tou mulimuli ki te kautahi ʼa Sehova pea mo tou taupau maʼu tatatou faʼafai ʼi te tauhi ʼae ki te ʼAtua.