Kapite 98

Kua Vave Mate Ia Sesu Kae Kē Pe Te Kau Tisipulo

KO SESU pea mo tana kau tisipulo kua nātou ōvi ki Solotane ʼo nātou fakalaka ai ke nātou ʼolo ʼi te tisitilike ʼo Pele ki Sutea. ʼO fakatahi mo nātou, neʼe tokolahi te tahi kau fagona ʼe ʼolo ki te ʼaho ʼo te Pāsikate ʼo te taʼu 33, ʼaē ʼe kei toe pe kiai te vāhaʼa e tahi.

Neʼe haʼele ia Sesu ʼi muʼa ʼo tana kau tisipulo, pea ʼe nātou ōfo ʼi tana pauga mālohi. ʼE tou manatuʼi, ʼi he ʼu vāhaʼa ki muʼa atu, ʼi te mate ʼaē ʼo Lasalo pea mo te teuteu ʼaē ʼa Sesu ke mavae ʼi Pele ʼo ʼalu ki Sutea, neʼe fakaloto mālohiʼi e Tomasi te kau tisipulo ʼaē ʼo ina ʼui fēnei: “Tou ʼolo, mo tatou foki, ke tou mamate mo ia.” ʼE tou toe manatuʼi foki neʼe faigaʼi e te Sanetualio ke matehi ia Sesu ʼi tana ʼosi fakatuʼuake ʼaē ia Lasalo. Koia ʼe mole fai he punamaʼuli ki te matataku ʼa te kau tisipulo ʼi tanatou toe hū atu ʼaē ki Sutea.

Moʼo teuteuʼi ʼo nātou ki te meʼa ʼaē ka hoko mai, neʼe toʼo e Sesu te toko hogofulu-ma-lua pea ina ʼui age kia nātou: “Koʼeni ʼe tou hake ki Selusalemi, pea ko te Foha ʼo te tagata ʼe ʼave anai ki te kau pelepitelo pule pea mo te kau sekelipa, pea ʼe nātou fakatūʼa anai ke matehi, pea ʼe nātou ʼave anai ia ia ki te kau tagata ʼo te ʼu puleʼaga ke manukiʼi, pea mo haha, pea mo tutuki ki he pou, pea ʼi te tolu ʼaho ʼe toe fakatuʼuake anai ia.”

ʼE ko te tuʼa tolu leva ʼaē ʼi he ʼu kiʼi māhina siʼisiʼipe mo te palalau ʼa Sesu ki tana kau tisipulo ʼo ʼuhiga mo tona mate pea mo tona toe fakatuʼuake. Pea ko nātou, logope la tanatou fagono age ʼaē ki ai, neʼe mole nātou mahino. ʼE mahalo pe e lagi nātou ʼui ko te puleʼaga ʼo Iselaele ʼe toe fakatuʼu anai ʼi te kele, pea ʼe nātou fakaʼamu mālohi ke nātou maʼu te kolōlia pea mo te fakaʼapaʼapa ʼi he puleʼaga ʼi te kele mo Kilisito.

ʼI te kau fagona ʼaia ʼe ʼolo ki te ʼaho ʼo te Pāsikate, neʼe kau ai ia Salome, te faʼe ʼa te ʼu ʼapositolo ko Sake pea mo Soane. Ko te ʼu tagata ʼaia, neʼe fakahigoaʼi e Sesu ko te ʼu “Foha ʼo te Mana”, neʼe lagi fakahigoa feiā ia nāua ʼuhi ko tanā agamālohi. Kae, talu mai te kiʼi temi heʼeki faʼa fualoa, mo tanā taupau ʼi tonā ʼu loto he falala ki he maʼu ʼo he tuʼulaga maʼuhiga ʼi te Puleʼaga ʼo Kilisito, pea neʼe nā fakahā tonā loto ki tanā faʼe. Koʼeni ia ia ʼe fakaōvi kia Sesu ʼo fakahā ki ai tonā loto; neʼe tulolo ia ʼi ʼona muʼa pea mo fai tana kole.

“Koteā ʼaē ʼe ke loto ki ai?” ko te fehuʼi age ʼaia ʼa Sesu.

“Fakatotonu, ko tana tali age ʼaia, ke heheka ʼaku tama ʼaenī e lua, ko te tahi ʼi tou toʼomataʼu pea ko te tahi ʼi tou toʼohema, ʼi tou puleʼaga.”

ʼI tana ʼiloʼi ʼaē te haʼuʼaga ʼo te loto ʼaia, neʼe ʼui age e Sesu kia Sake pea mo Soane: “ ʼE mole koulua ʼiloʼi te meʼa ʼaē ʼe koulua kole mai. ʼE koulua lavaʼi koa te ʼinu ʼo te ipu ʼaē ʼe ʼamanaki ke ʼau ʼinu?”

“ ʼE ma lavaʼi”, ko tanā tali age ʼaia. Logope la te hoki ʼosi ifo pe ʼaē ʼo te fakahā age e Sesu ʼe hoko anai kia ia he fakataga ʼo iku ai mo tona mate, ʼe hage ʼe mole nā mahino neʼe ko te meʼa ʼaia ʼaē neʼe ina ʼui ko “te ipu” ʼaē ʼe ʼamanaki ke ina ʼinu.

Kae, neʼe ʼui age e Sesu kia nāua: “ ʼIo, ʼe koulua ʼinu anai toku ipu, kae ki te heka ʼaē ʼi toku toʼomataʼu pea mo toku toʼohema, ʼe mole ʼa ʼaku ia tona foaki, kae ʼa nātou ʼaē neʼe kua teuteuʼi ki ai e taku Tāmai.”

Ki muli age, neʼe ʼiloʼi e te ʼu ʼapositolo ʼaē e toko hogofulu te meʼa ʼaē neʼe kole e Sake pea mo Soane, pea neʼe nātou ʼiʼita ai. E lagi neʼe lahi ʼaupito te ʼu palalau ʼa Sake pea mo Soane ʼi te fai palalau ʼaē neʼe hoko ʼi muʼa atu, ʼuhi ko tanā fia ʼiloʼi ʼaē pe ko ai ʼaē ia nātou e lahi ake. Ko tanā kole fakamuli ʼe hā mai ai neʼe mole nā taupau te tokoni ʼaē neʼe fai age e Sesu ʼo ʼuhiga mo te faʼahi ʼaia. Kae logo la he meʼa ke feafeaʼi! ko tonā loto ʼaē ʼo nāua ke nā hā ʼe kei mālohi ia.

Moʼo fakatokatoka ʼo te fihi fakamuli ʼaia pea mo fakamalūlū te loto fehiʼa ʼaē neʼe tupu mai ai, neʼe fakatahiʼi e Sesu te toko hogofulu-ma-lua. Pea ʼaki tona ʼofa, neʼe ina fai age te tokoni ʼaenī: “ ʼE koutou ʼiloʼi ko te ʼu pule ʼo te ʼu puleʼaga ʼe nātou pule fakahau kia nātou pea ko te kau lalahi ʼe nātou fai kia nātou te pule mālohi. Kae mole feiā ia koutou; ko ʼaē ʼe loto ke liliu ʼo lahi ia koutou ʼe tonu ia ke liliu ko takotou tagata faifekau, pea ko ʼaē ʼe loto ke ʼuluaki ia koutou ʼe tonu ia ke liliu ko takotou kaugana.”

Neʼe fai e Sesu te faʼifaʼitaki ʼaē ʼe tonu ke nātou muliʼi; ʼe ko te meʼa ʼaia ʼaē neʼe ina ʼui age: “Ohage pe ko te Foha ʼo te tagata, neʼe mole haʼu ke tauhi ia ia, kae ke tauhi pea mo ina foaki tona maʼuli ko he totogi moʼo fetogi ʼaki ʼo te tokolahi.” Neʼe mole gata ʼaki pe te gāue ʼa Sesu ki te hahaʼi, kae ʼe toe mate anai ia maʼa te malamanei katoa! ʼE tonu ke maʼu e te kau tisipulo te fakakaukau ʼaia: ʼE tonu ke nātou fia tauhi te kāiga ʼi hanatou loto ke tauhi ia nātou, ke nātou fia mālalo ʼi he holi ia ki he tuʼulaga ʼe hā. Mateo 20:17-28; Maleko 3:17; 9:33-37; 10:32-45; Luka 18:31-34; Soane 11:16.

▪ He koʼe, ʼi te temi nei, kua matataku te kau tisipulo?

▪ Neʼe feafeaʼi te teuteuʼi e Sesu tana kau tisipulo ki te meʼa ʼaē ka hoko mai?

▪ Koteā te kole ʼaē neʼe fai kia Sesu, pea neʼe feafeaʼi te kau ʼapositolo ʼaē?

▪ Neʼe feafeaʼi te fakatokatoka e Sesu te meʼa ʼaē neʼe logo kehekehe ai tana kau ʼapositolo?