ʼI Tana Faifagona Ki Sutea, Neʼe Faiakonaki ʼi Pele

Neʼe nofo ia Sesu lolotoga he temi ʼi te koga meʼa neʼe higoa ko Pele, ʼi “te tahi kauvai ʼo Solotane.” (Soane 10:40) Ki muli age, ʼe faifagona anai ki Selusalemi, ʼi te potu saute.

Neʼe mole ko Sesu tokotahi pe. Neʼe faifagona mo ʼana tisipulo pea mo “te hahaʼi tokolahi,” ʼo kau ai te kau tanaki tukuhau mo te kau agahala. (Luka 14:25; 15:1) Neʼe toe ʼi ai foki mo te kau Faliseo pea mo te kau sekelipa, ʼae neʼe natou valoki te ʼu meʼa ʼae neʼe ui pea mo fai e Sesu. Neʼe lahi te ʼu manatu neʼe feala ke natou fakakaukau ki ai, he neʼe fakamatala e Sesu te ʼu lea fakatata ʼo te ovi ʼae neʼe puli, mo te foha ʼae neʼe puli, pea mo te tagata maʼu koloa mo Lasalo.—Luka 15:2; 16:14.

Neʼe haga leva ia Sesu ki ʼana tisipulo, pea neʼe lagi ina manatuʼi tona valoki pea mo tona nukinukiʼi e te hahaʼi ʼae neʼe fakafeagai kia te ia. Neʼe palalau ai ki he ʼu manatu neʼe kua ʼosi palalau pe ki ai ʼi Kalilea.

Ohage la, neʼe ui fenei e Sesu: “ ʼE mole feala ke taʼofi te hoko mai ʼo te ʼu meʼa fakatupu tukia. Kaʼe malaʼia kia ia ʼae ʼe fakatupu tukia! . . . Kotou tokakaga kia koutou. Pea kapau ʼe agahala hou tehina, fakatonutonuʼi ia ia, pea ka fakahemala, fakamolemole ki ai. Tatau aipe pe ʼe agahala tuʼa fitu kia koe ʼi te ʼaho pea mo liliu atu tuʼa fitu ʼo ui fenei: ‘ ʼE au fakahemala,’ ʼe tonu ke ke fakamolemole ki ai.” (Luka 17:1-4) Ko te manatu fakamuli ʼaeni neʼe lagi manatuʼi e Petelo te fehuʼi ʼae neʼe ina fai ʼo ʼuhiga mo te fakamolemole ʼo kaku ki te tuʼa fitu.—Mateo 18:21.

Neʼe feala koa ki te ʼu tisipulo ke natou mulimuli ki te ʼu palalau ʼae neʼe fai e Sesu? ʼI tanatou kole age kia Sesu “Fakatuputupu tamatou tui,” neʼe ina ui fenei age kia natou: “Kapau ʼe hage takotou tui ko he kiʼi tegaʼi sinapi, ʼe kotou ui anai ki te fuʼu milie ʼaeni: ‘Mataʼaki ia koe, pea ke to ia koe ki te tai!’ pea ʼe hoko anai ia.” (Luka 17:5, 6) ʼEi, tatau aipe pe ʼe veliveli te tui ʼae ʼe maʼu e he tahi, kaʼe ʼe lahi te ʼu meʼa ʼae ʼe feala ke ina fai.

Hili ʼaia, neʼe akoʼi age e Sesu ki ʼana apositolo te maʼuhiga ʼae ke natou maʼu te agavaivai pea mo he ʼu manatu fakapotopoto ʼo ʼuhiga mo natou, ʼi tana ui fenei: “Ko ai ia koutou ʼe ina maʼu hana kaugana ʼe fuli kele peʼe tauhi ovi, ʼe ina ui fenei age anai ki ai ʼi tana liliu mai te gaueʼaga: ‘Haʼu ki heni pea mo heka ʼi te laupapa ʼo kai’? Kaʼe ʼe mole ina ui age anai koa ki ai: ‘Teuteuʼi haku meʼa kai ki te afiafi, pea ke hulu tou kie pea mo tauhi au ʼo kaku ki te ʼosi ʼo taku kai mo inu, pea ʼosi leva pea ke kai mo inu’? ʼE mahino ia, ʼe mole lotofakafetaʼi anai ki te kaugana, koteʼuhi neʼe ina fai pe te meʼa ʼae neʼe fakatotonu age ke ina fai. ʼO toe feia pe, ka kotou fai ia meʼa fuli ʼae neʼe fakatotonu atu, kotou ui fenei: ‘Ko matou ko te ʼu kaugana heʼe ʼaoga. Ko te meʼa ʼae neʼe matou fai ʼe ko te meʼa pe ʼae neʼe tonu ke matou fai.’ ”—Luka 17:7-10.

ʼE tonu ki te ʼu kaugana ʼa te ʼAtua ke natou tahi mahino ki te maʼuhiga ʼo te fakamuʼamuʼa ʼo te tauhi ki te ʼAtua. Pea tahi ʼae, ʼe tonu ke natou tahi manatuʼi te pilivilesio ʼae ʼe natou maʼu he ʼe natou kau ki te hahaʼi ʼo tona loto fale.

ʼI tana lagi ʼosi fai pe te ʼu palalau ʼaia, neʼe tau mai he tagata mo he logo mai ia Malia mo Maleta. Neʼe ko te ʼu tokolua ʼo Lasalo, pea neʼe natou maʼuʼuli ʼi te kolo ko Petania, ʼi Sutea. Neʼe fakaha age e te tagata te logo ʼaeni: “ ʼAliki, ko ia ʼae ʼe ke ʼofa ai kua mahaki.”—Soane 11:1-3.

Logo la neʼe lotomamahi ia Sesu ʼi te fakaha age ʼe mahaki kovi tona kaumeʼa ko Lasalo, kaʼe neʼe mole ina tuku ai tana gaue. Neʼe ina ui fenei: “Ko te mahaki ʼaeni ʼe mole iku anai ki te mate, kaʼe ke fakakololiaʼi ai te ʼAtua, pea ke fakakololiaʼi te ʼAlo ʼo te ʼAtua.” Neʼe nofo ʼi ai lolotoga ʼaho ʼe lua, pea neʼe ina ui fenei leva ki ʼana tisipulo: “Tou toe olo ki Sutea.” Kaʼe neʼe natou ui fenei: “Lapi, heʼeki faʼa fualoa neʼe faigaʼi e te kau Sutea ke natou taumakaʼi koe, kaʼe ʼe ke toe fia alu pe koe ki ai?”—Soane 11:4, 7, 8.

Neʼe tali fenei age e Sesu: “ ʼE mahino ia, ko hola ʼe 12 ʼi te ʼaho. Kapau ʼe haʼele he tahi ʼi te ʼaho, ʼe mole tukia ʼi he meʼa, koteʼuhi ʼe sio ki te malama ʼo te malamanei. Kaʼe kapau ʼe haʼele he tahi ʼi te poʼuli, ʼe tukia koteʼuhi ʼe mole ia ia te malama.” (Soane 11:9, 10) Neʼe lagi fia ui e Sesu, neʼe heʼeki ʼosi te temi ʼae neʼe tuku age ai e te ʼAtua ke fakahoko ai tona minisitelio. Koia, neʼe tonu ke fakaʼaogaʼi lelei e Sesu te kiʼi temi ʼae neʼe kei toe.

Pea neʼe hoko atu fenei e Sesu: “ ʼE moe ia totatou kaumeʼa ko Lasalo, kaʼe ʼe au alu ʼo fafagu ia ia.” ʼE mahino ia, neʼe manatu e te ʼu tisipulo neʼe malolo pe ia Lasalo pea ʼe toe malohi anai, koia neʼe natou ui fenei: “ ʼAliki, kapau ʼe moe, ʼe lelei anai ia.” Neʼe ui fakahagatonu fenei age e Sesu: “Kua mate ia Lasalo . . . Kaʼe tou olo ki ai.”—Soane 11:11-15.

Neʼe iloʼi e Tomasi neʼe feala ke matehi ia Sesu ʼi Sutea, kaʼe neʼe fia lagolago ki ai, koia neʼe ina uga fenei te tahi ʼu tisipulo: “Tou olo mo tatou, ke tou mamate mo ia.”—Soane 11:16.