ʼE Mole Fakaʼosi Ia Meʼa Fuli ʼi Te Mate

Ko Petania, neʼe ko te kiʼi kolo neʼe tuʼu ovi ki Selusalemi ʼi ni kilometa ʼe tolu. (Soane 11:18) Neʼe hoko ai te aluʼaga fakaʼofaʼofa ʼi ni vahaʼa ʼi muʼa ʼo te mate ʼa Sesu. Neʼe mahaki fakapunamaʼuli ia Lasalo, te kaumeʼa lelei ʼo Sesu pea mate ai.

ʼI te logo ʼa Sesu ki te aluʼaga ʼaia, neʼe ina ui age ki ʼana tisipulo ʼe moe ia Lasalo pea ʼe alu ʼo fafagu ia ia. (Soane 11:11) Kaʼe neʼe mole mahino te kau tisipulo ki ʼana palalau, koia neʼe ui fakahagatonu age e Sesu: “Kua mate ia Lasalo.”—Soane 11:14.

Hili ʼaho ʼe fa ki tona ʼavaifo, neʼe tau atu ia Sesu ki Petania pea mo faiga ke ina fakalotofimalieʼi ia Maleta, te tokolua ʼo Lasalo. Neʼe ui fenei age e Maleta: “Kana nee ke i heni, nee mole mate anai toku tuagaane.” (Soane 11:17, 21) Neʼe tali fenei age ia Sesu: “Ko au ko te toe tuuake mo te mauli, ko ae e tui mai kia au e mauli anai ia, tatau pe e mate ia.”—Soane 11:25.

Neʼe fakaha e Sesu ʼe moʼoni ʼana palalau ʼaia ʼi tana fakaovi ki te fale maka pea mo kalaga fenei: “Lasalo, hu mai ki tuà!” (Soane 11:43, Tauhi Foou) Pea neʼe punamaʼuli leva te kau mamata he neʼe hu mai ki tuʼa te mate.

Neʼe kua ʼosi fakatuʼuake e Sesu te foʼi tokolua. Ohage la ko tana fakatuʼuake te kiʼi taʼahine, ia te ʼofafine ʼo Sailusi. ʼI muʼa ʼo tana fakatuʼuake ia ia, neʼe toe ui e Sesu ʼe moe te kiʼi taʼahine.—Luka 8:52.

ʼE ke tokagaʼi neʼe fakatatau e Sesu ia te mate ʼo Lasalo pea mo ʼae ʼo te ʼofafine ʼo Sailusi ki te moe. ʼE ko he fakatatau ʼe totonu. Kotea tona tupuʼaga? Koteʼuhi moka moe he tahi pea ʼe mole malama ki te ʼu aluʼaga ʼae ʼe hoko, koia ʼe mole kei mamahi ia. (Ekelesiasi 9:5; vakaʼi te fakamatala ʼae ʼi te ʼa takai “Ko Te Mate ʼe Hage Ko Te Moe.”) Neʼe mahino lelei ki te kau ʼuluaki tisipulo te aluʼaga moʼoni ʼo te kau mate. ʼI te tikisionalio ʼo ʼuhiga mo te ʼu lotu, ʼe ui fenei ai: “Ki te kau tisipulo ʼa Sesu, ko te mate neʼe hage ko te moe, pea ko te faitoka ʼe ko te malolōʼaga . . . ki te hahaʼi tui ʼae kua mamate.”a

ʼE tou lotofimalie ʼi tatatou iloʼi ʼae ʼe momoe te kau mate ʼi te faitoka kaʼe ʼe mole natou mamahi. Koia ko te mate ʼe mole ko he misitelio pea ʼe mole tonu ke tou matataku ki ai.

“KAPAU ʼE MATE HE TAGATA, ʼE FEALA KOA HANA TOE MAʼULI?”

Moka tou momoe lelei ʼi he po katoa, ʼe tou fiafia heʼe feala hatatou malolō ai, kaʼe ʼe mole tou fia momoe ʼo talu ai. He ko ʼe ʼe tou ʼamanaki ki te toe fakamaʼuli ʼo natou ʼae ʼe momoe ʼi te faitoka, ohage pe ko Lasalo pea mo te ʼofafine ʼo Sailusi?

ʼI tana logoʼi kua vave mate, neʼe feʼekeʼaki te pateliaka ko Sopo “kapau ʼe mate he tagata, ʼe feala koa hana toe maʼuli?”—Sopo 14:14, MN.

Pea neʼe fai e Sopo tana tali ʼaeni, ʼi tana palalau ki te ʼAtua Mafimafi: “ ʼE ke pauʼi anai pea ʼe au tali atu anai. ʼE ke fakaʼamu anai ke ke sio ki te gaue ʼo ʼou nima.” (Sopo 14:15, MN) Neʼe tui papau ia Sopo ʼe fakaʼamu ia Sehova ke hoko mai te ʼaho ʼae ka Ina fakatuʼuake ai Tana kaugana agatonu. ʼE moʼoni koa te faʼahi ʼaia? ʼEi.

Neʼe feala kia Sesu ke ina fakahoko te ʼu fakatuʼuake he neʼe kua foaki age e te ʼAtua te pule ki te mate. Koia la ʼae ʼe ui ai ʼi te Tohi-Tapu, ʼe maʼu e Sesu “te u kalavi o te mate.” (Apokalipisi 1:18) Koia ʼi te ka haʼu ʼe ina maʼu anai te pule moʼo fakatuʼuake te hahaʼi ohage pe ko tana fakatuʼuake ia Lasalo.

ʼE talanoa liuliuga ʼi te Tohi-Tapu ki te fakapapau ʼo ʼuhiga mo te fakatuʼuake. Neʼe fakalotomalohiʼi e te ʼaselo ia te polofeta ko Taniela ʼaki te ʼu palalau ʼaeni: “E ke malolo anai, pea e ke tuu ake anai ki tou tofiga i te fakaosi o te u aho.” (Taniela 12:13) Ko te kau Satuseo neʼe ko te kau takitaki lotu Sutea neʼe mole natou tui ki te fakapapau ʼo ʼuhiga mo te fakatuʼuake, pea neʼe ui fenei age e Sesu kia natou: “E kotou nofo i te faihala, koteuhi e mole pe kotou mahino ki te Tohi pea mo te mafimafi o te Atua.” (Mateo 22:23, 29) Neʼe toe ui fenei e te apositolo ko Paulo: “ ʼE au maʼu te ʼamanaki ʼaeni ki te ʼAtua, . . . ʼe ʼi ai anai he fakatuʼuake ʼo te kau faitotonu pea mo te kau heʼe faitotonu.”—Gaue 24:15, MN.

KO ʼAFEA ʼAE KA TUTUʼU AKE ANAI TE KAU MATE?

Ko ʼafea ʼae ka hoko ai anai te fakatuʼuake ʼo te kau faitotonu pea mo te kau heʼe faitotonu? Neʼe ui e te ʼaselo ki te tagata faitotonu ko Taniela, ʼe tuʼu ake anai “i te fakaosi o te u aho.” Neʼe toe tui ia Maleta ʼe tuʼu ake anai tona tokolua ko Lasalo “i te aho fakamuli.”—Soane 11:24.

ʼE ha lelei mai ʼi te Tohi-Tapu ko “te aho fakamuli” ʼaia ʼe pipiki ki te ʼafio ʼa Kilisito ʼi tona Puleʼaga. Neʼe tohi fenei e Paulo: “Koteuhi e tonu ke pule ia [Kilisito] o kaku ki tana tuku ona fili fuli ki lalo o ona vae. Ko te fili fakamuli e maumaui anai, ko te mate.” (1 Kolinito 15:25, 26) Ko te tupuʼaga maʼuhiga ʼaia ʼe tonu ai ke tou faikole ke hoko mai te Puleʼaga ʼo te ʼAtua pea ke fai tona finegalo ʼi te kele.b

ʼE ko te finegalo ʼo te ʼAtua ke fakatuʼuake te kau mate pea neʼe tui papau ki ai ia Sopo. Moka hoko te temi ʼaia, pea ʼe pulihi anai te mate. Pea ʼe mole toe fai anai e te hahaʼi te fehuʼi ʼaeni: “ ʼE fakaʼosi koa ia meʼa fuli ʼi te mate?”