Kapite 89

ʼI Sutea Moʼo Fai ʼo Te Fekau Faka Manavaʼofa

ʼI TE lolotoga ʼo te lafeti ʼo te Tetikase ʼi Selusalemi, ʼi he ʼu vāhaʼa ki muʼa atu, neʼe faiga te kau Sutea ke nātou matehi ia Sesu. ʼI tana ʼalu ki te potu tokelau, ʼe hage ia neʼe kaku ki he potu fenua ʼe ōvi ki te tai ʼo Kalilea.

Pea heʼeki faʼa fualoa, kua toe ʼalu ia ʼi te ala ʼo te potu toga ki Selusalemi, ʼo fai faka mafola ʼi te ʼu ala ʼo te ʼu kolo liliki ʼo Pele, ko he potu fenua ʼe tuʼu ʼi te potu hahake ʼo Solotane. ʼI te ʼosi ʼo tana fai te lea fakatātā ʼo te tagata maʼu meʼa pea mo Lasalo, neʼe ina toe hoko atu ʼaki tana akonaki ki tana ʼu tisipulo te ʼu meʼa neʼe kua ʼosi ina akoʼi age kia nātou ʼi tana nofo ʼaē ʼi Kalilea.

Neʼe ina ʼui age fēnei kia nātou ʼe lelei age anai ki he tahi “ke tautau ki tona kia he maka momosi fulumeto pea lī ki te tai” ʼi he faka tūkia ʼo he tahi ʼi te kau “liliki” ʼaē ʼa te ʼAtua. Neʼe ina toe fakatokagaʼi age te ʼaoga ʼaē ʼo te fakamolemole, ʼaki te ʼu palalau ʼaenī: “Tatau aipe peʼe agahala [he tēhina] kia te koe ʼo tuʼa fitu ʼi te ʼaho pea toe haʼu tuʼa fitu kia te koe, ʼo ʼui maʼana: ‘ ʼE ʼau fakahemala’, pea ʼe tonu ke ke fakamolemole kia te ia.”

ʼI te fehuʼi age e te kau tisipulo kia Sesu: “Foaki mai kia mātou he tui e lahi ake”, neʼe ina tali age kia nātou: “Ka na neʼe fualahi la takotou tui ohage ko he tegaʼi sinapi, ʼe koutou ʼui age anai ki te fuʼu milie ʼuli ʼaenī: ‘Taʼaki ake ia koe pea ke ʼalu ʼo to ia koe ʼi te loto tai!’, pea ʼe fakalogo anai ia kia koutou.” ʼI tona tahi faʼahiga ʼui, tatau aipe pe ko he tui ʼe siʼisiʼi ʼe feala tana fai he ʼu meʼa lahi.

ʼOsi ʼaia pea fakaʼaogaʼi leva e Sesu te faʼahiga meʼa māhani ʼo te maʼuli moʼo fakatātā ʼaki te faʼahiga fakakaukau ʼaē ʼe tonu ke maʼu e he tagata kaugana ʼa te ʼAtua Māfimāfi. “Ko ai ia koutou, mo kapau ʼe ʼi ai hana tagata kaugana ʼe gāue kele peʼe tauhi manu, ko tona fakatokagaʼi age ʼaia e Sesu, ʼe ina ʼui age anai ki ai ʼi tana liliu mai te ʼu gāueʼaga: ‘Haʼu la ʼo nofo ifo ʼo kai’? ʼE mole koa la ina ʼui age anai ia: ‘Teuteuʼi maʼaku he meʼa moʼo fai ʼaki haku ōmoe, pea ke ʼai hou tapilie ke ke tauhi ʼau, ʼo aʼu ki taku ʼosi kai mo ʼinu; pea hili ia pea hoki feala ai leva tau kai pea mo ʼinu’? ʼE ina maʼu anai koa he loto fakafetaʼi ki te tagata kaugana ʼaia koteʼuhi he neʼe ina fai te ʼu meʼa ʼaē neʼe ina fakatotonu age? Pea ke toe feiā foki mo koutou, ka koutou ʼosi fai anai te ʼu meʼa fuli ʼaē neʼe fakatotonu atu, koutou ʼui: ‘Ko mātou ko te kau kaugana ʼe mole homatou ʼaoga. Neʼe mātou fai pe te meʼa ʼaē ʼe tonu ke mātou fai.’ ” Ko he tagata kaugana ʼa te ʼAtua ʼe mole tonu anai ke ina ʼui ʼe ina fai he meʼa fakaʼofa ki te ʼAtua ʼi tana tauhi ʼaē kia te ia. Kailoa ia, ʼe tonu anai ke ina manatuʼi tuʼumaʼu ʼe ko he pilivilesio ia te atolasio kia te ia pea mo he liliu ko he tagata ʼo Tona ʼapi ʼe feala te falala ki ai.

Lagi neʼe hili pe he kiʼi temi ki te fai ʼaē e Sesu te lea fakatātā ʼaia, mo te kaku mai ʼa te tagata ʼave logo. Neʼe fekauʼi mai e Malia pea mo Maleta, te ʼu tokolua ʼo Lasalo, ʼaē ʼe nonofo ʼi Petania ʼi Sutea. “ ʼAliki, ko te ʼui ʼaia ʼa te tagata ʼave logo, koʼeni ia ia ʼaē ʼe ke ʼofa ai ʼe mahaki.”

Neʼe tali age e Sesu: “Ko te mahaki ʼaia ʼe mole ko hona huʼuga ia te mate, kae ko he meʼa ia moʼo kolōlia ʼo te ʼAtua, koteʼuhi ke faka kolōliaʼi ai te ʼAlo ʼo te ʼAtua.” Neʼe nofo Sesu ia ʼaho e lua ʼi te koga meʼa ʼaia, pea ʼosi ʼaia pea ina ʼui age ki tana ʼu tisipulo: “Tou toe ʼolo ki Sutea.” Kae neʼe nātou fai age te fakamanatu ʼaenī: “Lapi, neʼe mole heʼeki faʼa fualoa pe la ki te faiga ʼaē ʼa te kau Sutea ke nātou taumakaʼi koe, pea ʼe ke toe ʼalu pe koe ki ai?”

“ ʼE mole ko hola koa la e hogofulu-ma-lua ʼi te ʼaho? ko te fehuʼi age ʼaia ʼa Sesu moʼo tali kia nātou. Kapau ʼe haʼele he tahi ʼi te ʼaho, pea ʼe mole tūkia ia ki he meʼa, koteʼuhi heʼe sio ia ki te mālama ʼo te malamanei. Kae kapau ʼe haʼele he tahi ʼi te pōʼuli, pea ʼe tūkia ia ki he meʼa, koteʼuhi ko te mālama ʼe mole ia te ia.”

Ko te faka ʼuhiga ʼo te palalau ʼa Sesu, ʼe ʼiloga mai ia ko te “ ʼu hola ʼaē ʼi te ʼaho”, ʼi tona tahi faʼahiga ʼui ko te loaloaga ʼo te temi ʼaē neʼe faka tuʼakoi e te ʼAtua ʼo ʼuhiga mo tona minisitelio ʼi te kele, ʼe mole heʼeki ʼosi pea, ʼi tona mole heʼeki ʼosi, ʼe mole he tahi ʼe feala ke ina fai age he meʼa ʼe kovi kia ia. ʼE tonu ke ina fakaʼaogaʼi katoa te temi nounou ʼaē kei toe kia ia ʼi te lolotoga ʼo “te ʼaho”, heʼe hoko mai anai “te pōʼuli”, mokā ʼosi matehi anai ia ia e tona ʼu fili.

Neʼe toe ʼui age e Sesu: “Ko Lasalo, totatou kaumeʼa, ʼe mālōlō, kae ʼe ʼau ʼalu ki ai ʼo fafagu ia ia mai tana moe.”

ʼAki tanatou lagi manatu ʼaē ko Lasalo ʼe moe mālōlō pea ʼe ko he fakaʼiloga lelei ia ki te kua lelei ʼo tona mahaki, neʼe ʼui age e te kau tisipulo ki ai: “ ʼAliki, kapau ʼe moe, pea ʼe ina toe maʼu anai te mālōlō.”

Pea ʼui fakahagatonu age ai e Sesu kia nātou: “Ko Lasalo kua mate, pea ʼe ʼau fiafia, ʼuhi ko koutou, ʼi taku mole nofo ʼi ai, koteʼuhi ke koutou tui ai. Kae ke tou ʼolo la ki ai.”

Neʼe manatu ia Tomasi ʼe feala ke matehi ia Sesu ʼi Sutea. Kae, ʼi tana fia lagolago ʼaē ki ai, neʼe ina fakaloto mālohiʼi fēnei te kau tisipulo ʼaē: “Tou ʼolo mo tatou, ʼo mamate mo ia.” Koia, ʼi te feala ʼaē ke tuʼutāmaki ai tonatou maʼuli neʼe kaugā fagona ai te kau tisipulo mo Sesu ki Sutea, moʼo fai ʼo te fekau faka manavaʼofa ʼaia. Luka 13:22; 17:1-10; Soane 10:22, 31, 40-42; 11:1-16.

▪ ʼE fai faka mafola nei Sesu ʼifea?

▪ Koteā te akonaki ʼaē ʼe toe fakamanatuʼi age e Sesu? Koteā te faʼahiga meʼa māhani ʼo te maʼuli ʼaē neʼe palalau kiai, pea moʼo fakatātā ʼo te manatu fea?

▪ Koteā te logo ʼaē neʼe maʼu e Sesu, pea koteā te faka ʼuhiga ʼo te ʼu palalau ʼaē ko “te ʼaho” pea mo “te pōʼuli”?

▪ Koteā te faka ʼuhiga ʼo te ʼui ʼaē ʼa Tomasi: ‘Tou ʼolo ʼo mamate mo ia’?