Te Annuaire—Ko He Koloā Fakaloto Mālohi
1 Ko te ʼu tānaki pea mo te ʼu fakamatala ʼo te ʼu gāue taulekaleka ʼa te kau Fakamoʼoni ʼa Sehova ʼe fakaloto mālohi tuʼumaʼu ki te ʼu kaugana ʼa te ʼAtua. (Sopo 38:4, 7; Taag. 25:25; Luka 7:22; Gāue 15:31) Koʼena la te tupuʼaga ʼo te ʼui ʼaē ko te Annuaire des Témoins de Jéhovah ʼe ko he koloā fakaloto mālohi.
2 Ko te ʼu Annuaire fuli ʼe nātou fakahāhā te ʼu tānaki gāue fakaloto mālohi pea mo te ʼu meʼa ʼaē ʼe fakahoko e te kau Fakamoʼoni ʼa Sehova ʼi te malamanei katoa. Ko te ʼu fakamatala ʼaia ʼe fakaloto mālohiʼi ai te tui, ʼe nātou faka maʼuhigaʼi te taki ʼa Sehova, tana puipui, pea mo tana tapuakina ʼo tana hahaʼi. Ko te Annuaire ʼe talanoa ki te ʼu tagata lotomālohi pea mo te ʼu fafine neʼe nātou mavae ʼi tonatou famili, tonatou ʼu kaumeʼa, pea ʼi tonatou fenua ʼo nātou ʼave te ʼu moʼoni ʼo te Tohi-Tapu ki te hahaʼi ʼo te ʼu ʼatu fenua pea mo te ʼu ʼatu motu.
3 Ko te Annuaire neʼe ina uga te hahaʼi lautohi ke nātou fakatuputupu tanatou gāue ki te ʼAtua. Neʼe tohi fēnei e he fafine: “Neʼe mole feala taku lau fakavilivili te tohi ʼaia. Ko te meʼa ʼaē neʼe ʼau lau neʼe fakaloto mālohi ʼaupito ai ʼau. Neʼe ʼau logoʼi ai ʼe feala ke lahi ʼaupito taku faka mafola te logo lelei ʼi taku sio ki te gāue ʼa ʼihi logope la te faigataʼa.”
4 ʼI te taʼu fuli talu mai te taʼu 1927, ko te Annuaire des Témoins de Jéhovah ko he koloā moʼoni ʼaē ʼe tuʼu ai te ʼu tānaki pea mo te ʼu fakamatala. ʼE koutou fakaʼaogaʼi katoa koa te matapuna fakaloto mālohi ʼaia e tahi? Moʼo fai ʼo te faʼahi ʼaia, ʼe ʼaoga ke koutou tokaga ʼo lau te Annuaire ʼi te temi pe ʼaē ʼe koutou maʼu ai. ʼOsi ʼaia ʼi te lolotoga ʼo te taʼu, ke koutou toe vakaʼi he ʼu puani makehe ʼe ʼaoga kia koutou pea mo tokotou famili.