Ko Te Toe Hū Ako
1 ʼI te māhina ʼo Malesio, ʼe hū te kau tūpulaga ki te tahi taʼu ʼo te ako. ʼE ʼi ai te ʼu meʼa fakafiafia ʼe feala ke ʼiloʼi fakatomuʼa, kae ʼe toe ʼi ai pe foki mo te ʼu kiʼi faʼahiga meʼa ʼe fakatupu tuʼania. Tokolahi te kau tūpulaga ʼe ʼi ai anai ʼanatou ʼu tagata faiako kehe, pea ʼe ʼi ai anai mo te ʼu meʼa foʼou ke nātou fai, pea ʼe lahi anai hanatou fakatahi mo he kau ako ʼe mole nātou feʼiloʼiʼaki. ʼE fia fakalogo lelei anai ʼatatou kau tūpulaga ki te kau takitaki ako pea mo felogoi lelei mo ʼonatou ʼu kaugā ako, kae ʼe tonu ke manatuʼi e nātou, ʼe tonu ke nātou fakamamaʼo mai te ʼu faʼahiga meʼa fuli pe ʼe feala ke fakatupu tuʼutāmaki ki te faʼahi fakalaumālie.—1 Ko. 15:33.
2 Ko te tuʼania tāfito ʼa te tamaliki pea mo te kau tūpulaga ʼaē ko te kau Fakamoʼoni ʼa Sehova, ko te mālohi ʼaē ʼe pikisia gafua ʼa te mālama, ʼaē kua mafola ʼi te ʼu faleako ʼi te ʼu fenua kehekehe ʼi te temi nei. ʼE tonu ki te kau Kilisitiano ʼaē tūpulaga ʼo feiā mo nātou matutuʼa, ke nātou kātaki ʼo tekeʼi te ʼu lekula pea mo te faʼahiga manatu ʼa te mālama ʼo ʼuhiga mo te aga ʼaē ʼe tonu ke fai, pea ʼe tonu ai ke nātou ‘tokakaga’ ʼo vakaʼi te Folafola ʼa te ʼAtua pea mo nātou tuku ke ina takitaki nātou. (Pes. 119:9) ʼE ʼaoga ke ʼiloʼi e te ʼu mātuʼa te ʼu faʼahiga meʼa ʼaē ka ako, ke feala hanatou tuku he faʼahiga takitaki ʼe feʼauga lelei ki ʼanatou ʼu tamaliki. Kapau ko te ʼu meʼa ʼaē ʼe ako ʼi te faleako peʼe ʼi he tahi faʼahi ʼe fakafeagai ki te ʼuhiga maʼa pea mo maʼoniʼoni ʼaē ʼe fakamaʼua ki te kau kaugana ʼa Sehova, pea ʼe tonu ia ke līaki.—1 Pe. 1:15, 16.
3 ʼE ko he meʼa māhani foki hanatou felāveʼi mo te ʼu meʼa ʼaē ohage ko te ʼu toʼotoʼoga faka puleʼaga, mo te ʼu ʼaho lafeti, mo te ʼu faigaoʼi, peʼe ko ʼihi fakatahi fakafiafia. ʼO ʼuhiga mo te ʼu faʼahi ʼaia, ʼe ʼaoga te kaupepa L’école et les Témoins de Jéhovah ki te kau tūpulaga Kilisitiano. Ko te ʼu ʼaluʼaga faigataʼa ʼe feala ke maʼu hona puleʼaki peʼe fakasiʼisiʼi, mo kapau ʼe fai he fakatuʼutuʼu e te ʼu mātuʼa ʼa te kau ako ʼaē ʼe kei liliki ke nātou faka felogoi mo te kau faiako ʼaki te kaupepa ʼaia. ʼE feala ke nātou fakamahino age ko te kaupepa ʼaia ʼe tokoni anai kia ia ʼaē ʼe faiako ke mahino pe koʼe ʼe filifili e te kau Fakamoʼoni ʼa Sehova ke ʼaua naʼa nātou kau ki te ʼu faʼahiga meʼa ʼaia. Ko te fakahā ʼo te manatu ʼaia kia ia ʼaē ʼe fai ako ʼe feala ia ke lahi ai he femahinoʼaki.
4 Pea tahi ʼaē meʼa, ʼe lelei ki te kau ako Kilisitiano ke nātou tahi maʼu te kaupepa L’école ʼi tanatou ʼu tohi ako. ʼE tau maʼu te ʼu temi faigamālie ke nātou fai he fagonogono ki ʼihi kau ako ʼe nātou fai age te ʼu fehuʼi ʼo ʼuhiga mo te ʼu meʼa ʼaē ʼe nātou tui kiai. ʼE tonu foki ke tahi maʼu e te kau tamaliki ʼaē ko te kau Fakamoʼoni ʼa Sehova ʼonatou kate Instructions médicales/Décharge peʼe ko te Carte dʼidentité kua katoa te ʼu meʼa ʼe tohi ai, kua fakamoʼoni lelei kiai pea mo sinie. Ko nātou ʼaē ʼe nātou fakaʼaogaʼi te tokoni ʼaia ʼe nātou hage anai ko te ‘tagata poto ʼi tana sio ki te malaʼia, ʼe nono.’—Taag. 22:3.