ʼU Tūpulaga—Koutou Fakaʼaogaʼi Fakalelei Tokotou Temi Ako
1 Koteā takotou manatu ʼi takotou ʼolo ki te faleako? ʼE koutou fia fakaʼaogaʼi koa ʼi takotou ka haʼu, te ʼu meʼa ʼaē neʼe koutou ako ʼi te faleako? ʼE koutou fakaʼaogaʼi anai koa te ʼu faigamālie ʼi te faleako ke koutou fakahā te moʼoni ki tokotou ʼu kaugā ako pea mo takotou ʼu faiako? ʼE mātou ʼiloʼi papau, ʼe koutou fia gāue lelei ʼi te faleako.
2 Koutou Ako Fakalelei: Kapau ʼe koutou teuteuʼi lelei takotou ʼu meʼa ako pea mo koutou fakalogo lelei ʼi te kalasi ako, pea ʼe koutou maʼu ai anai he ʼu fua lelei. Koutou fai fakalelei te ʼu meʼa ako ʼaē ʼe kole atu ke koutou fai ʼi fale, kae ʼaua naʼa koutou tuku te ʼu meʼa ʼaia ke nātou tāʼofi takotou ʼu gāue faka teokalatike.—Filp. 1:10.
3 Ka kamata he taʼu foʼou ʼo te faleako, pea ʼe tonu ke koutou lau te kaupepa lahi Les Témoins de Jéhovah et lʼinstruction. ʼOsi ʼaia, pea ʼe lelei anai ke koutou foaki e koutou totonu peʼe ko takotou ʼu mātuʼa he kaupepa feiā ki takotou ʼu faiako. Koutou fakahā age kia nātou, ko meʼa fuli ʼaē ʼe nātou fia ʼiloʼi ʼe tuʼu ʼi te kaupepa. Ko te kaupepa ʼaia ʼe tokoni anai kia nātou ke nātou mālama lelei ki takotou tui pea ke nātou lagolago kia koutou mo kapau ʼe koutou mulimuli ki te ʼu meʼa ʼaē neʼe koutou ako. ʼE toe tokoni anai te kaupepa ʼaia ki takotou ʼu faiako ke nātou ʼiloʼi, ko koutou pea mo takotou ʼu mātuʼa ʼe koutou fia lagolago kia nātou ʼi tanatou faiga ʼaē ke nātou akoʼi fakalelei koutou.
4 Koutou Faka Mafola Fakalelei: He koʼe ʼe mole koutou fakaʼaogaʼi te faleako ko hokotou telituale makehe moʼo fai ai te fagonogono faigamālie? ʼE koutou maʼu ai anai he ʼu faigamālie lelei ʼaupito moʼo fakahā te moʼoni. Kapau ʼe koutou vaevae mo ʼihi te ʼatamai mālama fakalaumālie ʼaē ʼe koutou maʼu, pea ʼe feala ke ina “hāofaki ia [koutou], pea mo nātou ʼaē ʼe fakalogo kia [koutou].” (1 Tim. 4:16) Kapau ʼe koutou maʼu he aga faka Kilisitiano ʼe lelei pea mo koutou faka mafola ʼi te ʼu faigamālie lelei, ʼe fua lelei anai kia koutou pea mo ʼihi.
5 Ko te tēhina kei tūpulaga neʼe fai fagonogono faigamālie ki tana ʼu kaugā ako ʼi te faleako. Ko nātou ʼaē neʼe nātou tali tana fai faka mafola, neʼe ʼi ai te tūpulaga Katolika, mo te tahi neʼe mole tui ki te ʼAtua pea neʼe ina vāʼi tuʼumaʼu ia nātou ʼaē ʼe nātou tui ki ai, pea mo te tahi tūpulaga neʼe lahi tana suluka pea mo tana ʼinu kava. Ko te tēhina ʼaia neʼe tokoni ki te toko 15 ʼo tona ʼu kaugā ako ke nātou foaki tonatou maʼuli ki te ʼAtua pea mo nātou papitema!
6 Koia, ʼu tūpulaga, koutou faiga ke koutou ʼiloʼi pea mo fakaʼaogaʼi fakalelei tokotou telituale makehe ʼaia. ʼE koutou maʼu ai anai he ʼu fua lelei ʼi takotou ʼolo ʼo ako.