ʼAua Naʼa Kotou Tātāʼofi Te Fakamahino ʼo Takotou Tui ʼi Te Faleako
1. He koʼē ʼe ʼaoga te lototoʼa?
1 ʼE ʼaoga ke kotou lototoʼa moʼo fakamahino takotou tui ʼi te faleako. Ko te tuʼania ʼaē naʼa manukiʼi koutou ʼe feala ai ke ina tātāʼofi koutou, tāfito lā ia nātou ʼaē ʼe aga ufiufi. Koteā ʼaē kā tokoni atu anai kiā koutou?
2. Koteā ʼaē ʼe tonu ke kotou fakakaukauʼi lelei moʼo fakamahino takotou tui?
2 Ke Fakakaukauʼi Lelei: ʼE tonu ke kotou fakakaukauʼi lelei moʼo ʼiloʼi te temi ʼaē ʼe kotou palalau ai. (Tnk. 3:1, 7) Ko he kupu tāfito ʼo he ako peʼe ko he fakamatala, ʼe lagi ʼe ina tuku atu anai te faigamālie ʼaē ke kotou fakamahino takotou tui. Peʼe ko he kaugā ako ʼe ina fehuʼi atu anai te tupuʼaga ʼo takotou fakafisi ki ʼihi ʼu meʼa ʼaē ʼe fai ʼi te faleako. ʼI te kamata pē ʼo te hū ako, ko ʼihi kau tūpulaga ʼe natou fakahā ki tonatou ʼu faiako tonatou ʼuhiga Fakamoʼoni ʼa Sehova. Ko ʼihi ʼe natou fakahā tonatou lotu mokā ʼe tauʼi tonatou tui.
3. ʼE feafeaʼi hakotou teuteu moʼo fakamahino takotou tui?
3 Kotou Teuteu: Kapau ʼe kotou teuteu, ʼe lahi age anai takotou falala. (1 Pet. 3:15) Koia, kotou fakakaukauʼi fakatomuʼa ki ni ʼu fehuʼi ʼaē ʼe feala ke lagaʼi atu, pea mo kumi ni ʼu tali kiai. (Taag. 15:28) Kotou teuteuʼi he ʼu manatu ʼo fakatafito ki te ʼu vaega ʼo te Tohi-Tapu pea mo te ʼu tohi Fakatohi-tapu tāfito lā te ʼu kaupepa lalahi La vie a-t-elle été créée ? peʼe Cinq questions à se poser sur lʼorigine de la vie. Kotou kole ki ʼakotou matuʼa ke fai he ʼu faʼifaʼitaki ʼe ʼaoga lolotoga takotou tauhi fakafāmili.
4. He koʼē ʼe tonu ke kotou taupau he manatu ʼe lelei?
4 Kotou Maʼu He Manatu ʼe Lelei: ʼAua takotou manatu ʼaē ʼe manukiʼi tuʼumaʼu anai koutou e te ʼu kaugā ako mokā kotou palalau ki te moʼoni. Ko ʼihi ʼe natou tokagaʼi anai takotou lototoʼa pea ʼe feala ke tupu ai hanatou fia logo. Kae ʼe mole tonu leva ke kotou lotovaivai mo kapau ʼe mole tali e he tahi. ʼI te fakamahino ʼo takotou tui, ʼe fiafia anai ia Sehova. (Hep. 13:15, 16) Kotou haga kole ki te ʼAtua ke ina foaki atu te lototoʼa. (Gāue 4:29; 2 Tim. 1:7, 8) Kotou fakakaukauʼi age muʼa, te toe fiafia lahi ʼe kotou maʼu anai mo kapau ʼe fakalogo atu he tahi pea lagi ʼe ina fili ai anai ke tauhi kiā Sehova ki ʼamuli!