Te Tagata ʼAē ʼe Lahi Tokotahi ʼo Te ʼu Temi Fuli
1 ʼI te temi ʼaē neʼe tou maʼu ai te tohi foʼou ʼaia, neʼe tou fia mahino ki tona kupu tāfito ʼaē ko Te tagata ʼaē ʼe lahi tokotahi ʼo te ʼu temi fuli. Moʼo faka ʼuhigaʼi ʼo he tagata ʼe lahi ʼaupito, ʼe tonu anai ke māʼoluga age ia ʼi te ʼu lauʼi miliale hahaʼi ʼaē neʼe maʼuʼuli ʼi te kele. Ko te kupu ʼaē ko te “Lahi” neʼe faka ʼuhiga ki te “māʼoluga ʼi te natula peʼe ʼi te ʼu kalitate.” Ko te tagata ʼaē ʼe higoaʼi feiā ʼe tonu ko he tahi ʼe makehe ʼaupito!
2 Ko Sesu Kilisito, te ʼAlo ʼo te ʼAtua, ʼe tāu katoa mo ia te taʼi higoa ʼaia. Ko te meʼa ʼaē neʼe ina fai ʼi te kele ʼe mole hona pikipikiga mo te koloā, mo he gāue fakamālama, peʼe ko te pule faka politike. Neʼe haʼu ia mai te famili agavaivai pea neʼe lahi te temi ʼo tona maʼuli neʼe mole ʼiloa ia ia. Kae, ʼi tona taʼu 30 neʼe tokagaʼi leva ia ia e te hahaʼi fuli ʼo Palesitina, ʼuhi ko tana fai akonaki pea mo te ʼu gāue ʼaē neʼe ina fai. Neʼe ina fakahā te ʼulugaaga pea mo te ʼu fakatuʼutuʼu ʼa Sehova ʼAtua ʼi hona faʼahiga ʼaluʼaga neʼe mole heʼeki fai e he tagata. Neʼe ina fakahoko te gāue faka mafola ʼe lahi ʼaupito neʼe mole heʼeki fai e he tagata, neʼe ina fai te ʼu milakulo fakaofoofo, pea neʼe ina fakatuʼu te tafitoʼaga ʼo te mālama foʼou.
3 Neʼe uga tatou e Paulo ke “fakahaga tuʼumaʼu [tatatou] sio” kia Sesu ohage ko hotatou faʼifaʼitakiʼaga mo hotatou motele. (Hep. 12:2) Mai te taʼu 1985 ki te taʼu 1991, neʼe tā hoholo e te Sosiete te ʼu alatike e 149 ʼi Te Tule Leʼo ʼo ʼuhiga mo te maʼuli pea mo te minisitelio ʼo Sesu. ʼE tou ʼiloʼi ai ʼaki te ʼu alatike ʼaia te maʼuhiga ʼo te meʼa ʼaē neʼe palalau ki ai Sesu pea mo te ʼu meʼa ʼaē neʼe ina fai maʼa tatou. Neʼe faka maʼuhigaʼi e te ʼu alatike ʼaia ke tou muliʼi tana faʼifaʼitaki. Ko te ʼu alatike fuli ʼaia neʼe fakatahiʼi pea neʼe faka fealagia ai ke tou maʼu he tohi. ʼE ko he meʼa gāue lelei moʼo tokoni ki niʼihi ke fakahaga tuʼumaʼu tanatou sio kia Sesu pea ke nātou liliu ko he ʼu hahaʼi fakalogo kia ia ʼaē neʼe fakatuʼu e Sehova “ ʼo māʼoluga age ia ʼi te ʼu puleʼaga fuli, te pule, te mālohi pea mo te pule ʼaliki”!—Ef. 1:21.
4 ʼI te ʼosi ʼo tatatou fakamālo ki he tahi ʼi te loto fale, ʼe feala ke tou ʼui age fēnei:
◼ “Ko ai ʼaē ʼe feala ke koutou ʼui ko te tagata ʼaē ʼe lahi tokotahi ʼo te ʼu temi fuli? ʼOsi ʼaia pea tou ʼui age: “Ko te tohi ʼaenī ʼe talanoa ki te maʼuli katoa ʼo Sesu, ki te ʼu akonaki neʼe ina fai, ʼe tali ki te ʼu fehuʼi neʼe fai e te tokolahi ʼo ʼuhiga mo tana ʼu milakulo, pea ʼe ina fakahā mai te tahi ʼu manatu ʼaoga. Ko te fakamanatu fakalelei ʼo te ʼu akonaki ʼa te Tohi-Tapu ʼo ʼuhiga mo Sesu pea ʼe fakamoʼoni ai ko Sesu Kilisito ʼe ko te tagata ʼaē ʼe lahi tokotahi ʼo te ʼu temi fuli.” ʼOsi ʼaia pea tou fakahā age te talanoa ʼa Napoléon ʼo ʼuhiga mo Sesu ʼaē ʼe tuʼu ʼi te tolu palakalafe ʼo te ʼuluaki palalau ʼi te kamataʼaga ʼo te tohi.
5 Mokā tou fakahā te tohi, ʼe feala ke tou ʼui age fēnei:
◼ “Koteā ʼaē neʼe liliu ai Sesu ko te tagata ʼe lahi tokotahi ʼi te malamanei?” ʼE feala ke koutou tali ki te faʼahi ʼaia ʼaki hakotou fakahā age he ʼu kapite ʼi te ʼu kapite e 133 ʼe talanoa tāfito ai ki tona maʼuli, tona ʼulugaaga, tana ʼu akonaki, pea mo tana ʼu gāue. ʼE fakamahino e te kapite 24 te tupuʼaga ʼo tana haʼu ʼaē ki te kele. Ko te kapite 35 ʼe toe fakamanatuʼi ai tana Akonaki ʼiloa ʼi te Moʼuga. Ko te kapite 43 ʼe ina faka maʼuhigaʼi te poto ʼo Sesu ʼi tana akoʼi niʼihi ʼaki te ʼu lea fakatātā. Ko te kapite 133 ʼe ina foaki mai he puani ke tou ʼiloʼi fakatomuʼa ai te ʼu tapuakina ʼe maʼu anai e te malamanei ʼi te temi ʼaē ʼe hoko katoa anai tana ʼu gāue. ʼE feala ke maʼuhiga hakotou fakaʼaogaʼi te ʼu fehuʼi ʼaē ʼo te ʼu kapite fuli moʼo uga ʼo te fai palalau; ʼe fakahā e te ʼu vaega faka Tohi-Tapu ʼaē ʼe tuʼu ʼi ai peʼe tohi ʼifea te fakamatala ʼaia ʼi te Tohi-Tapu. ʼE feala ke koutou fakahā te ʼu lea fakatātā fakaofoofo ʼaē ʼe hā ai te mālohi ʼo te ʼulugaaga ʼo Sesu, te loloto ʼo tona manavaʼofa ki te hahaʼi, pea mo tana gāue mālohi ʼi te fai faka mafola.—Vakaʼi te ʼu kapite 44, 95, 117, pea mo te 123.
6 ʼE tou tufa anai te tohi foʼou ʼaia lolotoga te māhina ʼaenī. Ko tona ʼu agaaga makehe ʼe ko he ʼu tupuʼaga lelei ʼaia ke tou fakahā ai te tohi pea ke tou tufa ki niʼihi ʼaki te fiafia lahi. Ko nātou ʼaē ʼe fia maʼuli ʼo heʼegata ʼe tonu ke nātou maʼu te ʼatamai mālama ʼo ʼuhiga mo Sesu Kilisito. (Soane 17:3) Ko tatatou ʼu faiga mālohi moʼo tufa ʼo te tohi ʼaia ʼe faka fealagia ai ki te tokolahi ʼe fakamalotoloto ke nātou ʼiloʼi te tagata ʼaē ʼe lahi tokotahi ʼo te ʼu temi fuli.