ʼE ʼAoga Kia Tatou Te Kokelekasio
1 Ko te ʼu foha ʼo Kolea neʼe nātou fakahā tanatou leleiʼia te kokelekasio ʼa Sehova ʼaki te ʼu palalau ʼaenī: “Ko he ʼaho e tahi ʼi tou ʼu malaʼe ʼe lelei age ia ʼi ni ʼaho e afe ʼi he tahi faʼahi.” (Pes. 84:10) Kia nātou, ʼe mole feala ke foaki age e te mālama he meʼa lelei ʼe tatau mo te meʼa ʼaia. Kapau ʼe koutou logoʼi te ʼu meʼa ʼaia, ʼe tonu ke koutou fakaliliu te kokelekasio ko he koga meʼa maʼuhiga ki tokotou maʼuli.
2 Talu mai te kamataʼaga, ko te kokelekasio faka Kilisitiano neʼe ina maʼu te ʼu tapuakina ʼa Sehova. (Gāue 16:4, 5) ʼE mole he tahi ia tatou ʼe tonu ke ina meʼa noaʼi te kokelekasio peʼe ke ina ʼui pe ko te kokelekasio ʼe ko he faʼahi ʼe feala ke tou fakatahitahi ai. Ko te kokelekasio ʼe ko he faʼahi ʼe maʼu ai e te kau Fakamoʼoni ʼa Sehova ʼi te ʼu kolo fuli te ʼu tokoni pea mo te ʼu palalau fakaloto mālohi. ʼE feala ke tou fakatahitahi ʼi te logo tahi ke feala ai hotatou akoʼi e Sehova pea mo takitaki tatou ʼi te gāue faka mafola ʼo te Puleʼaga.—Is. 2:2.
3 Ko te kokelekasio faka Kilisitiano ʼe ko he meʼa tāfito ʼaia ʼe tou akoʼi ai te moʼoni. (1 Tim. 3:15) Ko te ʼu tisipulo ʼa Sesu ʼe tonu ke nātou “tahi”—ke nātou logo tahi mo te ʼAtua, mo Kilisito, pea ke nātou fefaifaitahiʼaki. (Soane 17:20, 21; vakaʼi ia Isaia 54:13.) ʼI te faʼahi fuli ʼe tou ʼolo ai ʼi te mālama, ʼe faka tui ʼotatou ʼu tēhina ki te ʼu akonaki pea mo te ʼu pelesepeto, pea ʼe nātou mulimuli kiai ʼi tonatou maʼuli.
4 ʼE akoʼi mo teuteuʼi tatou ʼo ʼuhiga mo tatatou gāue ʼaē ko te fai ʼo te ʼu tisipulo. ʼI te māhina fuli, ko Te Tule Leʼo, te Réveillez-vous!, pea mo Te Minisitelio ʼo Te Puleʼaga ʼe nātou foaki mai he ʼu tokoni ʼe ʼaoga ke feala ai hatatou kamata he ʼu fai palalau faka Tohi-Tapu. Neʼe fakatuʼutuʼu te ʼu fono moʼo fakahā mai kia tatou peʼe feafeaʼi te maʼu pea mo te fakatuputupu ʼo te fia logo ʼa te hahaʼi. Ko te tuputupu ʼaē ʼe tou sio kiai ʼi te malamanei katoa, ʼe fakamoʼoni ʼaki ai ʼe tokoni te ʼAtua ki te gāue ʼaia.—Mat. 28:18-20.
5 ʼAki te kokelekasio, ʼe tou maʼu te palalau fakaloto mālohi ʼi te ʼaho fuli ke tou ‘uga ia tatou ki te ʼofa pea mo te ʼu gāue matalelei.’ (Hep. 10:24, 25) ʼE fakaloto mālohiʼi ai tatou ke tou kātakiʼi ʼotatou ʼu fihifihia ʼi te agatonu. Ko te ʼu tagata taupau agaʼofa ʼe feala ke nātou tokoniʼi tatou ke tou tauʼi ʼotatou ʼu fihifihia pea mo ʼotatou ʼu tuʼania. (Tnk. 4:9-12) ʼE foaki mai kia tatou te ʼu tokoni ʼe ʼaoga mokā ʼe tou ʼamanaki hēʼia ki he tuʼutāmaki. ʼE ʼi ai koa he tahi age kautahi ʼe ina foaki mai te taʼi tokoni ʼofa ʼaia?—1 Tes. 5:14.
6 ʼE loto ia Sehova ke tou nofo ōvi ki tana kautahi ʼo tou taupau maʼu tatatou logo tahi. (Soane 10:16) Tahi ʼaē meʼa ʼe tokoniʼi tatou e te kokelekasio ke tou taupau maʼu tatatou felogoi mo te kalasi ʼo te tagata kaugana agatonu mo poto ʼaki tana fakanofo te ʼu tagata taupau feʼaluʼaki moʼo fakaloto mālohiʼi ʼo tatou. Ko tatatou tali te tokoni ʼofa ʼaia, ʼe tou fakaōvi ai ki ʼotatou ʼu tēhina pea ʼe tokoni ai kia tatou ke tou nofo mālohi ʼi te faʼahi fakalaumālie.
7 Ko te kokelekasio ʼe ko he fakatuʼutuʼu maʼuhiga ki totatou maʼuli fakalaumālie. Ka na ʼaua la ia ia, ʼe mole feala anai tatatou kaugana fakalelei kia Sehova. Tou nofo ōvi ki te fakatuʼutuʼu ʼaē neʼe foaki mai e Sehova. ʼOfa pe ke tou gāue ʼo ʼalutahi mo te ʼu fakatuʼutuʼu pea ke tou maʼuliʼi fakamalotoloto te tokoni ʼaē ʼe ina foaki mai. ʼAki te faʼahi ʼaia ʼe feala ai tatatou fakahā tatatou leleiʼia te kokelekasio.—Pes. 27:4.