ʼE Hāofaki Anai Te Faʼahiga Hahaʼi Fuli Pe
1 ʼE loto ia Sehova “ke hāofaki te faʼahiga tagata fuli pe, pea ke nātou maʼu te ʼatamai mālama totonu ʼo te moʼoni.” (1 Tim. 2:4) Logope la te uga ʼo te hahaʼi e te ʼu aga ʼaē ʼe nātou maʼu mai tanatou ʼu mātuʼa, tonatou faʼahiga maʼuli, pea mo te ʼu agaaga ʼo tonatou fenua, ʼe nātou maʼu te loto faʼitaliha, pea ʼe feala tanatou fili takitokotahi peʼe feafeaʼi te fakaʼaogaʼi ʼo tonatou maʼuli. ʼE feala ke nātou fai te meʼa ʼaē ʼe lelei ʼo nātou maʼuʼuli ai, peʼe nātou fai te meʼa ʼaē ʼe kovi ʼo nātou mamate ai. (Mat. 7:13, 14) ʼE malave feafeaʼi te faʼahi ʼaia ki tatatou manatu ʼo ʼuhiga mo te hahaʼi ʼaē ʼe tou fakahā kiai te logo lelei ʼo te Puleʼaga?
2 ʼE mole tonu ke tou ʼui ko te fia logo ʼa he tahi ki te moʼoni ʼe mulimuli ki he ʼu faʼahiga meʼa ohage ko tona fenua peʼe ko te ʼu agaaga ʼo te fenua ʼaē ʼe nofo ai peʼe ko te tuʼulaga ʼaē ʼe ina maʼu. ʼE feala ke aʼu te moʼoni ki te hahaʼi ʼaē neʼe mole fualoa hanatou ako, pe ko nātou ʼaē neʼe laka ki muʼa tanatou ako, kia nātou fuli ʼaē ʼe kau ki te ʼu meʼa faka politike, pea mo te ʼu hahaʼi maʼu tuʼulaga, mo nātou ʼaē ʼe mole tui ki te ʼAtua, pea mo te hahaʼi māmio kovi. Kua fetogi te maʼuli ʼo te hahaʼi mai te ʼu fenua fuli pea mo te ʼu faʼahi faka sosiale kehekehe, pea ʼe nātou faiga ʼi te temi nei ke nātou maʼu te maʼuli ʼi te mālama foʼou ʼa te ʼAtua. (Taag. 11:19) Koia, ʼe mole tonu ke tou fakameʼameʼa ʼi te fakahā ʼo te logo ʼo te Puleʼaga ki te hahaʼi kehekehe.
3 Tou Vakaʼi Te ʼu Faʼifaʼitaki ʼAenī: Ko te tagata neʼe ina fakatuʼutuʼu ke ina fakapogi te ʼohoana ʼo tana faʼe, kae neʼe mole ina fai. Ki muli age neʼe ina fakatuʼutuʼu ke ʼalu ʼo fakamate kae neʼe mole feala tana fai te faʼahi ʼaia. Ki muli age neʼe pilisoniʼi ia ia he neʼe kaihaʼa pea neʼe ina fakaʼaogaʼi te toloke, ʼo haʼele kovi ai tona maʼuli faka taumatuʼa. Ia ʼaho nei kua liliu te tagata ʼaia ʼo agatonu, pea kua maʼuli fiafia mo tona ʼohoana, pea kua felogoi lelei mo te ʼohoana ʼo tana faʼe. Koteā te meʼa ʼaē neʼe fetogi ai? Neʼe ina ako te Tohi-Tapu mo te kau Fakamoʼoni ʼa Sehova, pea neʼe ina maʼuliʼi te meʼa ʼaē neʼe ina ako. Neʼe mole faka ʼuhiga e Sehova, ʼe mole ʼaoga ki te tagata ʼaia ia te totogi.
4 Ko he fafine gaoʼi ʼata logona neʼe mole maʼuli fiafia. Kae neʼe ōfo ʼi tana sio ki te lelei ʼo te aga ʼa te Fakamoʼoni ʼa Sehova, pea neʼe ina tali te ako Tohi-Tapu, ʼo mole tuai pea ʼalu ʼo tokoni ki te hahaʼi ke nātou ʼiloʼi te logo lelei ʼo te Puleʼaga. ʼI te potu fuli neʼe fai faka mafola ai ʼi te ʼu ʼapi neʼe ʼiloʼi ia ia e te hahaʼi, kae ʼaki he loto fakafiafia, neʼe ina fakamatala age ʼe loto ia ke ʼiloʼi ia ia ko he Fakamoʼoni ʼa Sehova kae mole ko he tahi ʼe gaoʼi ʼata.
5 ʼI te fakatuʼutuʼu ʼa te fafine Fakamoʼoni ʼa Sehova ke ina fai he ako Tohi-Tapu mo he tahi ʼe apone ki te Te Tule Leʼo, neʼe logo mai te fafine ʼo tona vāhaʼa fale ki te faʼahi ʼaia, pea neʼe haʼu ia ʼo kau ki te ako. Neʼe mahino atu aipe ki te fafine ʼaia ʼe kua ina maʼu te moʼoni ʼaē neʼe ina kumi! Neʼe toe fakatokatoka ai mo tona ʼohoana, he neʼe kua nā fakatotonu ke nā mavete. Neʼe ina fia ʼiloʼi ʼaupito te ʼu fakakikite ʼaē ʼe fai ʼaki te ʼu fetuʼu pea mo pipiki ia ki te ʼu meʼa faifakalauʼakau, kae kua ina līaki te ʼu tohi neʼe totogi kovi, pea mo tana ʼu meʼa fuli ʼaē neʼe pipiki ki te ʼu meʼa fakatemonio. Mole tuai, pea ʼalu ia ki te ʼu fono pea mo palalau ki tona ʼu famili pea mo tona ʼu kaumeʼa ʼo ʼuhiga mo tana tui foʼou. ʼI te temi nei kua fagonogono fakafiafia ia ki te hahaʼi.
6 ʼE mole tonu ke tou fakamāuʼi te hahaʼi. Kae, ke tou faiva ʼi te fakahā ʼo te logo lelei ki te hahaʼi ʼi te potu fuli pe. ʼE lahi te ʼu tupuʼaga ʼe feala ke tou falala ai ko Sehova, ʼaē ʼe “sio ki te ʼu loto,” ʼe liliu anai ko te “Fakamaʼuli ʼo te faʼahiga tagata fuli pe.”—1 Sam. 16:7; 1 Tim. 4:10.