“Koutou Fakahā Takotou Loto Fakafetaʼi”
1 Tokolahi ia tatou neʼe akoʼi ʼi totatou kei veliveli ke tou ʼui fēnei “fakalelei age muʼa” pea mo tou ʼui “mālo” mokā neʼe fakaʼapaʼapa mai he tahi mo agalelei mai kia tatou. ʼE fakatotonu mai e Paulo ke tou ‘fakahā tuʼumaʼu tatatou loto fakafetaʼi,’ pea ʼe tonu ke tou loto fakafetaʼi tāfito kia Sehova. (Kol. 3:15, 16) Kae ʼe lava feafeaʼi hatatou loto fakafetaʼi ki totatou Tupuʼaga Lahi? Pea koteā te ʼu tupuʼaga tāfito ʼaē ʼe tonu ai ke tou fakamālo kia te ia?
2 Neʼe tohi fēnei e te ʼapositolo ko Paulo: “Tou fakamālo ki te ʼAtua, ʼi tana foaki mai kia tatou te mālo ʼaki totatou ʼAliki ko Sesu Kilisito!” (1 Ko. 15:57) ʼI te ʼAho Fakamanatu ʼaē ʼe fai ʼi te taʼu fuli, ʼe fakamanatu mai kia tatou te ʼofa lahi ʼo te ʼAtua pea mo Kilisito, ʼi tanā foaki mai te totogi ʼaē ʼe faka fealagia ai ke tou maʼu te ʼamanaki ki te maʼuli heʼegata. (Soane 3:16) Mai tona ʼaluʼaga ʼaē ko te tokolahi ia tatou ʼe kua mamate te ʼu hahaʼi ʼaē ʼe tou ʼofa mamahi ai, koia ʼe tou fakamālo ai ki te fakapapau ʼa Sesu ʼo ʼuhiga mo te fakatuʼuake! ʼE fonu ʼotatou loto ko te loto fakafetaʼi mokā tou fakatokagaʼi te ʼamanaki ʼaē ko te hāo ʼi te fakaʼosi ʼo te tuʼu ʼo te ʼu faʼahiga meʼa ʼaenī, ʼo mole tou ʼiloʼi anai te mate. (Soane 11:25, 26) ʼE faigataʼa tatatou maʼu he ʼu palalau moʼo fakahā tatatou loto fakafetaʼi ki te ʼu tapuakina taulekaleka ka tou maʼu anai mai te nima ʼo Sehova ʼi te Palatiso ʼaē ka ʼamanaki hū kiai. (Fkhā. 21:4) Koteā te ʼu tupuʼaga lelei ʼaē ʼe feala ke tou maʼu moʼo ‘fakahā ai tatatou loto fakafetaʼi’ ki te ʼAtua?
3 ʼE Tou Fakahā Feafeaʼi Tatatou Loto Fakafetaʼi: ʼE ko he meʼa lelei hatatou fakahā tuʼumaʼu tatatou loto fakafetaʼi kia Sehova ʼi te faikole ʼo ʼuhiga mo tana agalelei. (Pes. 136:1-3) Tahi ʼaē meʼa, ʼe uga tatou e totatou loto, ke tou fakahā tatatou loto fakafetaʼi kia te ia ʼi te tahi ʼu ʼaluʼaga lelei. Ohage la, ʼe tou kau anai ki te Fakamanatu ʼo te mate ʼo Kilisito ʼi te ʼAhotapu, ʼaho 23 ʼo Malesio. Moʼo tokoni ki te ʼu meʼa ʼaē ʼe ʼaoga ki te kokelekasio pea mo te gāue faka malamanei, ʼe tou ‘faka maʼuhiga ia Sehova ʼaki he loto fiafia mo totatou ʼu koloā.’ (Taag. 3:9) ʼE tou lagolago katoa ki te kau tagata ʼāfea pea mo tou faifaitahi mo nātou, ʼo tou fakahā ai tatatou loto fakafetaʼi kia Sehova ʼo ʼuhiga mo te tokoni ʼaē ʼe ina foaki mai ʼaki ia te ʼu tagata ʼaia. (1 Tes. 5:12, 13) ʼI te ʼaho fuli, ʼe tou faiga ke tou taupau maʼu te aga ʼaē ʼe lelei ʼaē ʼe ina faka kolōliaʼi te huafa ʼo te ʼAtua. (1 Pe. 2:12) ʼE leleiʼia e Sehova te ʼu meʼa fuli ʼaia ʼaē ʼe tou fai moʼo fakahā tatatou loto fakafetaʼi.—1 Tes. 5:18.
4 Te Meʼa ʼAē ʼe Lelei Ke Tou Fakahā Ai Tatatou Loto Fakafetaʼi: Ko tatatou kau ki te gāue fai faka mafola ʼaki totatou nefesi katoa, ko tatatou faka maʼuhigaʼi te huafa ʼo Sehova, mo tatatou fakahā tatatou loto fakafetaʼi ʼi te faikole, pea mo tatatou nofo agatonu ʼo lagolago ki te moʼoni, ʼe kau te ʼu meʼa fuli ʼaia ki te ʼu meʼa ʼaē ʼe lelei ke tou fakahā ai tatatou loto fakafetaʼi ki totatou Tupuʼaga, ʼo ʼuhiga mo te ʼu meʼa fuli ʼaē neʼe ina fai maʼa tatou. ʼE fiafia ia Sehova ʼi tana sio ʼaē ʼe tou foaki age kia te ia he tauhi taputapu moʼo lagolago ki tona finegalo, ʼaē “ke [ina] hāofaki te faʼahiga tagata fuli pe.” (1 Tim. 2:3, 4) Ko te tupuʼaga la ʼaia ʼo te faiga ʼa te tokolahi ʼi te ʼu kaugā fai faka mafola, ke nātou tali te fakaafe ʼaē neʼe fai ʼi Te Minisitelio ʼo Te Puleʼaga ʼi Fepualio, ʼaē ke tou pionie vaeluaʼi temi ʼi he māhina e tahi peʼe ʼi te lolotoga ʼo te ʼu māhina ʼo Malesio, ʼo ʼApelili, pea mo Maio. Ko tatatou faiga mālohi ʼi te minisitelio ʼe ko he faʼahi lelei ʼaia ke tou ‘fakahā ai tatatou loto fakafetaʼi’ ki te ʼAtua. ʼE feala anai koa hakotou kau ki te kau pionie ʼi ʼApelili, peʼe ko Maio?
5 Neʼe foaki mai kia tatou te ʼamanaki moʼoni ʼo ʼuhiga mo te maʼuli heʼegata. Ka hoko anai te faʼahi ʼaia, pea ʼe tou maʼu anai te ʼu tupuʼaga ʼi te ʼaho fuli ke hoko atu tatatou loto fakafetaʼi kia Sehova.—Pes. 79:13.