ʼE Tonu Koa Ke ʼOlo Takotou Fānau Ki He Fale Posio?

KOUTOU fakakaukau ʼe koutou maʼuʼuli ʼi he kiʼi kolo veliveli ʼe masiva. ʼE lahi takotou ʼu fānau ʼe nātou ako ʼi te ʼu kalasi liliki, kae ʼi tonatou taʼu 12, ʼe nātou hiki anai ki te ʼu kalasi lalahi. ʼI te kolo ʼaē ʼe koutou nonofo ai, ʼe lahi ʼaupito te tamaliki ʼaē ʼe ʼolo ki te ʼu faleako lalahi, ʼe mole nātou maʼu te ʼu meʼa ʼaē ʼe ʼaoga ki te ako, pea ʼe mole feʼauga te hahaʼi faiako. ʼI ʼihi temi, ʼuhi ko te ʼu lakeleve, ʼe māpunuʼi te ʼu faleako lolotoga ni ʼu vāhaʼa peʼe ko ni ʼu māhina.

ʼE foaki atu e he tahi he kaupepa matalelei ʼe ina fakahā ai te fale posio ʼi te kolo. ʼE koutou sio ki te ʼu paki ʼe hā ai te kau ako ʼe nātou fiafia pea mo teu lelei, ʼe nātou ako ʼi te ʼu kalasi ʼe lahi ai te ʼu meʼa gāue, mo te ʼu laboratoires, pea mo te ʼu fale tānakiʼaga tohi. ʼE fakaʼaogaʼi e te kau ako te ʼu olotinatea, pea ʼe nātou mālōlō ʼi te ʼu kogafale moe ʼe maʼa, pea mo matalelei. ʼE koutou lau ai ko te fakatuʼutuʼu ʼo te faleako, ʼe ko he tokoni ki te tamaliki ako ke nātou “maʼu te ako ʼaē ʼe lelei ʼaupito ki te faʼahi ʼaē ʼe nātou faiva ai.” Ki muli age, ʼe koutou lau fēnei: “ ʼE fakamaʼua ki te tamaliki ako fuli ke nātou mulimuli ki te ʼu lekula ʼo ʼuhiga mo te aga ʼaē ʼe tonu ke fai, ohage pe ko te ʼu meʼa māhani ʼaē ʼe fakamaʼua kia nātou ʼi he loto fale, ohage ko te agalelei, mo te aga fakapoipoi, mo te fakaʼapaʼapa ki te ʼu mātuʼa pea kia nātou ʼaē kua matuʼatuʼa, mo te fetokoniʼaki, mo te faʼa kātaki, mo te agaʼofa, mo te fai fakahagatonu, pea mo te agatonu.”

ʼE ʼui fēnei e te talavou ʼi te kaupepa ʼaia: “Neʼe foaki mai e taku ʼu mātuʼa te pilivilesio lahi, ke ʼau kau ki te faleako ʼaē ʼe lelei ʼaupito.” ʼE ʼui fēnei e te taʼahine: “Ko te ako ʼe ko he meʼa ʼe ina uga kita pea ʼe ko he meʼa fakafiafia. ʼI henī ko te loto ʼaē ke ako ʼe mole ko he meʼa ʼe fakakinauʼi.” ʼE koutou ʼave anai koa takotou tama pe ko takotou taʼahine ki he fale posio feiā?

Ko Te Ako Pea Mo Te Faʼahi Fakalaumālie

Ko te ʼu mātuʼa fuli ʼaē ʼe lototokaga, ʼe nātou fia foaki ki tanatou ʼu fānau he ʼaluʼaga ʼe lelei moʼo kamata tonatou maʼuli, pea moʼo fakahoko te faʼahi ʼaia, ʼe ʼaoga kiai he ako ʼe lelei pea mo fakafuafua lelei. ʼI te agamāhani, ʼe faka fealagia e te ako ke nātou maʼu gāue mokā ʼosi tanatou ako, pea ʼe tokoni ki te kau tūpulaga ke nātou liliu ko he ʼu hahaʼi lalahi ʼe nātou popoto ʼi te takitaki tonatou maʼuli pea mo te maʼuli ʼo tonatou ʼu famili.

ʼE feala ke koutou fai te fehuʼi ʼaenī: ‘Kapau ʼe foaki e te fale posio he ako ʼe lelei pea mo ina akoʼi te ʼu aga ʼaē ʼe tonu ke fai, he koe koa ʼe mole ʼau fakaʼaogaʼi te fealagia ʼaia?’ Moʼo tali ki te fehuʼi ʼaia, ʼe tonu ki te ʼu mātuʼa Kilisitiano ke nātou vakaʼi ʼi te faikole te faʼahi ʼe maʼuhiga ʼaupito, ʼe ko te ʼaluʼaga fakalaumālie ʼo tanatou fānau. Neʼe fehuʼi fēnei e Sesu Kilisito: “He koteā anai hona ʼaoga ki he tagata ʼo hana maʼu te malamanei katoa kaʼe ʼe ina totogi ʼaki tona nefesi?” (Maleko 8:36) ʼE mahino ia ʼe mole ʼi ai hona ʼaoga. Koia, ʼi muʼa ʼo hanatou fakatuʼutuʼu ke nātou ʼave tanatou fānau ki he fale posio, ʼe tonu ke vakaʼi e te ʼu mātuʼa Kilisitiano peʼe lave feafeaʼi anai te faʼahi ʼaia ki te ʼamanaki ʼo tanatou fānau ʼo ʼuhiga mo te maʼuli heʼegata.

Tanatou Pikisia Mo Te Tahi Kau Ako

ʼE lagi maʼu e ʼihi fale posio he ʼu lekula māʼoluga. Kae e feafeaʼi te ʼu lekula ʼo ʼuhiga mo te ʼu aga ʼaē ʼe tonu ke fai e nātou ʼaē ʼe nātou leʼoleʼo pea mo nātou ʼaē ʼe nātou gāue ʼi te ʼu faleako ʼaia? ʼO ʼuhiga mo te faʼahiga hahaʼi, ʼaē ʼe kaugamālie anai ʼi “te ʼu ʼaho fakamuli” ʼaenī, neʼe ʼui fēnei e te ʼapositolo ko Paulo: “ ʼI te ʼu ʼaho fakamuli ʼe ʼi ai anai te ʼu temi maʼuhiga ʼaupito mo faigataʼa. Heʼe ko te hahaʼi ʼe kaumeʼa pe anai mo nātou totonu, kaumeʼa mo te paʼaga, fiatuʼu, fialahi, lea hala ki te ʼAtua, talagataʼa ki te ʼu mātuʼa, maʼuli galo, heʼe agatonu, heʼeʼofa, logogataʼa, fasituʼu, heʼe fakatātāʼofi, fekai, mole manako ki te meʼa ʼaē ʼe lelei, kākā, fiatuʼu, fonu ʼi te fialahi, kaumeʼa mo te ʼu fakafiafia kae mole kaumeʼa mo te ʼAtua, ʼe hage ʼe nātou pipiki ki te ʼAtua, kae nātou lītuʼa ki tona mālohi; pea mai ia nātou ʼaia ke ke maliu kehe mai ai.”​—⁠2 Timoteo 3:​1-5.

Kua hoko ʼi te malamanei katoa te mole kei lelei ʼo te aga ʼa te hahaʼi, pea mo tanatou kua vaivai ʼi te faʼahi fakalaumālie, koia kua liliu ai ko he meʼa faigataʼa ki te kau Fakamoʼoni ʼa Sehova tanatou maʼuliʼi te ʼu pelesepeto ʼo te Tohi-Tapu. Ko te kau ako ʼaē ʼe nātou momoe ʼi tonatou ʼapi ʼi te ʼaho fuli, maʼa nātou, māʼiape la peʼe mole nātou fakatahi tuʼumaʼu mo te kau ako ʼo te mālama, kae ʼe feala ke nātou pikisia ʼi tanatou aga, ʼo kovi ai kia nātou ʼi te faʼahi fakalaumālie. Ko te tauʼi ʼo te mālohi ʼaia, ʼe feala ke liliu ko he fihifihia ki te ʼu fānau ʼa te kau Fakamoʼoni, logope la te ʼu tokoni pea mo te ʼu fakaloto mālohi ʼaē ʼe foaki age e tanatou ʼu mātuʼa ʼi te ʼaho fuli.

Koia, e feafeaʼi te ʼaluʼaga ʼo te ʼu fānau ʼaē ʼe mavae mai tonatou ʼu ʼapi ʼo ʼolo ʼo nonofo ʼi te ʼu fale posio? ʼE līʼakina nātou, ʼo mole nātou maʼu he tokoni ʼi te faʼahi fakalaumālie mai tanatou ʼu mātuʼa ʼofa. Mai tona ʼaluʼaga ʼaē ʼe nātou maʼuʼuli mo tonatou ʼu kaugā ako ʼi te temi fuli pe, ko te fakaneke ʼaē ke nātou mulimuli ki te ʼu meʼa ʼaē ʼe fai e tonatou ʼu kaugā ako ʼe lave mālohi ki te ʼatamai pea mo te loto ʼo te kau tūpulaga ʼaia, ohage pe ko te meʼa ʼaē ʼe hoko ki te kau ako ʼaē ʼe nātou momoe ʼi tonatou ʼapi. Neʼe ʼui fēnei e te talavou: “ ʼO ʼuhiga mo te ʼu aga ʼaē ʼe fai, ko he tahi ʼe nofo ʼi he fale posio, ʼe nofo ʼi te tuʼutāmaki ʼi te temi fuli pe.”

Neʼe tohi fēnei e Paulo: “Ko te ʼu fakakaugā kovi ʼe nātou fakakovi he ʼu agamāhani ʼe lelei.” (1 Kolonito 15:33) ʼE mole tonu ke manatu e te ʼu mātuʼa Kilisitiano ʼe mole tuʼutāmaki anai tanatou fānau ʼi te faʼahi fakalaumālie, mo kapau ʼe nātou fakatahi tuʼumaʼu mo nātou ʼaē ʼe mole nātou tauhi ki te ʼAtua. ʼAki te temi, ʼe feala ki te ʼu fānau ʼaē ʼe pipiki ki te ʼAtua, ke nātou fehiʼa ki te ʼu meʼa ʼaē ʼe maʼuhiga ki te kau Kilisitiano, pea mole kei nātou leleiʼia te ʼu meʼa fakalaumālie. ʼI ʼihi temi, ʼe mole hā te faʼahi ʼaia ki te ʼu mātuʼa, ʼo aʼu ki te mavae ʼo tanatou fānau mai te fale posio. Kae kua tauhala te fakatonutonuʼi ʼo te ʼu meʼa ʼaia.

ʼE hā lelei te faʼahi ʼaia ʼi te meʼa ʼaē neʼe hoko kia Clément. ʼE ina fakamatala fēnei: “ ʼI muʼa ʼo taku nofo posio, neʼe ʼau ʼofa ki te moʼoni pea neʼe ʼau fai faka mafola mo te ʼu tēhina. Neʼe ʼau leleiʼia tāfito taku kau ki te ako Tohi-Tapu ʼo tomatou famili, pea mo te ako tohi ʼo te kokelekasio. Kae, ʼi taku ʼalu ʼo nofo posio ʼi toku taʼu 14, neʼe ʼau līaki te moʼoni. Lolotoga te ʼu taʼu e nima ʼaē neʼe ʼau nofo ai ʼi te fale posio, neʼe mole ʼau kau ki he fono. Neʼe ʼau fakaʼaogaʼi te toloke, te suluka, pea mo te ʼinu fakavale, ʼuhi ko taku ʼu fakakaugā kovi.”

Te ʼu Fakaneke ʼo Te Kau Faiako

ʼI te ʼu faleako fuli, ʼe feala ke ʼi ai he kau hahaʼi faiako ʼe kovi tanatou aga, pea ʼe nātou fakaʼaogaʼi kovi tonatou tuʼulaga. Ko ʼihi ʼe nātou agakovi pea mo aga fefeka, kae ko ʼihi ʼe nātou fai he ʼu aga heʼeʼaoga ki te tamaliki ako ʼi te faʼahi fakasino. ʼE mahino ia, ʼi te ʼu fale posio, ko te ʼu aga ʼaia ʼo te ʼu hahaʼi faiako ʼe mole fakahā.

Kae, tokolahi te kau faiako ʼe nātou faiga fakamalotoloto ke nātou akoʼi te ʼu fānau ke nātou liliu ko he ʼu hahaʼi ʼe gāue lelei ʼi te sosiete, ke nātou felogoi lelei mo te hahaʼi, pea ke nātou mulimuli ki te ʼu fakatuʼutuʼu ʼaē kua fai. Kae ʼi te faʼahi ʼaia ʼe toe ʼi ai te tahi faigataʼaʼia ki te ʼu fānau ʼaē ko he kau Fakamoʼoni ʼa Sehova. Ko te ʼu manatu ʼo te mālama ʼe mole ʼalutahi tuʼumaʼu mo te ʼu pelesepeto faka Kilisitiano. Logope la te fakaloto mālohi e te hahaʼi faiako ia te kau ako ke nātou kau ki te mālama ʼaenī, neʼe ʼui e Sesu ʼe mole tonu ke “kau [tana ʼu tisipulo] ki te mālama.”​—⁠Soane 17:16.

E feafeaʼi mo kapau ʼe hoko he ʼu fihifihia ʼi te mulimuli ʼo te ʼu fānau ki te ʼu pelesepeto ʼo te Tohi-Tapu? Kapau ʼe kau te ʼu fānau ki te faleako ʼo te kolo pea mo nātou momoe ʼi tonatou ʼapi, ʼe feala ke nātou palalau ki te ʼu faʼahi ʼaia mo tanatou ʼu mātuʼa. Pea ʼe feala ke takitaki e te ʼu mātuʼa tanatou fānau pea mo feala ke nātou palalau mo te tagata faiako. ʼI te agamāhani, ʼe fakatokatoka fakavilivili te ʼu fihifihia pea mo te ʼu femahinohalaʼaki.

ʼE mole tatau ia mo te ʼu fale posio. ʼE leʼoleʼo tuʼumaʼu te kau hahaʼi ako e tanatou ʼu faiako. Kapau ʼe muliʼi e te fānau te ʼu pelesepeto faka Kilisitiano, pea ʼe tonu ke nātou fai te faʼahi ʼaia kae mole tokoni age tanatou ʼu mātuʼa ʼi te ʼaho fuli. ʼI ʼihi temi, ʼe fakatuʼutuʼu e te ʼu fānau ke nātou nonofo agatonu ki te ʼAtua ʼi te ʼu taʼi ʼaluʼaga ʼaia. Kae ʼi te agamāhani ʼe mole nātou fai te faʼahi ʼaia, heʼe ko te tamasiʼi ʼe mulimuli ki te meʼa ʼaē ʼe loto kiai te tagata faiako.

ʼE Faka Tuʼakoi Te ʼu Meʼa ʼAē ʼe Feala Ke Nātou Fai

ʼI te ʼu univelesitē, ʼi te agamāhani ʼe faʼifaʼitaliha ai te feʼoloʼaki ʼa te tamaliki ako, kae ko te ʼu fale posio ʼe faka tuʼakoi ai te ʼu meʼa ʼaē ʼe fai e te ʼu fānau. ʼE lahi te ʼu faleako feiā ʼe mole nātou fakagafua ki te kau ako ke nātou mavae ʼi te fale posio, gata pe ʼi te ʼAhotapu, pea ko ʼihi fale posio ʼe mole nātou fakagafua te faʼahi ʼaia. ʼE ʼui fēnei e te taʼahine ʼe higoa ko Eru, ʼe taʼu 11 pea ʼe nofo ʼi te fale posio: “ ʼE mole fakagafua tuʼa tahi e te ʼu pule ʼo te faleako ke mātou ʼolo ki tamatou ʼu fono, pea mo te fai faka mafola. ʼI te faleako, ʼe ʼi ai pe te ʼu lotu ʼo te ʼu Katolika pea mo te kau Mahometa. ʼE tonu ke filifili e te kau ako fuli he lotu e tahi, pea kapau ʼe mole nātou fai, pea ʼe fakafeagai kia nātou te kau faiako pea mo te tamaliki ako. Tahi ʼaē meʼa, ʼe fakaloto mālohiʼi te kau ako ke nātou hiva te hiva faka puleʼaga pea mo te ʼu hiva ʼo te ʼēkelesia.”

Kapau ʼe ʼave e te ʼu mātuʼa tanatou fānau ki te taʼi faleako ʼaia, pea koteā te manatu ʼaē ʼe nātou akoʼi ki tanatou fānau? ʼE lagi feala ke nātou manatu ko te ako ʼe maʼuhiga age ʼi te fakatahi ʼaē ki te tauhi, pea mo tanatou kau ki te gāue ʼaē ko te fai ʼo ni ʼu tisipulo​—peʼe lagi nātou manatu ʼe maʼuhiga age te faʼahi ʼaia ʼi tanatou nofo agatonu ki te ʼAtua.​—⁠Mateo 24:14; 28:19, 20; 2 Kolonito 6:​14-​18; Hepeleo 10:​24, 25.

ʼI ʼihi fale posio, ʼe fakatuʼutuʼu e te kau ako ʼaē ko te kau Fakamoʼoni ʼa Sehova ke nātou fakatahi ʼo ako te Tohi-Tapu, kae māʼia mo te faʼahi ʼaia ʼe tautau faigataʼa. Ko te tūpulaga, ʼe higoa ko Blessing, ʼe taʼu 16, ʼe ina ʼui ʼo ʼuhiga mo te fale posio ʼaē ʼe nofo ai: “ ʼI te ʼaho fuli, ʼe fakatahitahi ia nātou ʼaē ʼe ʼui ko he kau Kilisitiano ke nātou faikole. Ko mātou kau Fakamoʼoni, neʼe mātou kole kia nātou peʼe feala hamatou ako te Tohi-Tapu, kae ʼui mai e nātou lalahi, ko tamatou kautahi ʼe mole fakamoʼoni ia kiai te puleʼaga. Koia ʼe nātou fakakinauʼi mātou ke mātou faikole mo nātou. Kapau ʼe mātou fakafisi, pea ʼe nātou tā mātou. Kapau ʼe mātou kole ki te ʼu hahaʼi faiako, pea ʼe fakaʼāsili te gaohi koviʼi ʼo mātou. ʼE nātou tauveleʼi mātou, pea mo nātou ʼui kia nātou lalahi ke nātou tā mātou.”

Koutou Makehe Mai Ia Nātou

Kapau ʼe ʼiloʼi lelei e te kau ako ʼo te fale posio ʼe ko he kau Fakamoʼoni ʼa Sehova, pea ʼe feala ke tokoni te faʼahi ʼaia kia nātou. ʼE feala ke mole fakamaʼua age e te ʼu pule ʼo te faleako ke nātou kau ki he ʼu gāue ʼo te lotu hala, ʼe fakafeagai ki te ʼu meʼa ʼaē ʼe tui ki ai te kau Fakamoʼoni ʼa Sehova. ʼE mole lagi faiga anai tanatou ʼu kaugā ako ke nātou kau ki he ʼu gāue peʼe ko he ʼu fai palalau ʼe kovi. ʼE lagi maʼu anai he ʼu fealagia ke fai faka mafola ki te ʼu kaugā ako pea mo te kau faiako. Pea tahi ʼaē, ko nātou ʼaē ʼe nātou maʼuliʼi te ʼu pelesepeto faka Kilisitiano ʼe mole feala ke tukugakoviʼi ki he hala mamafa, pea ʼi ʼihi temi, ʼe fakaʼapaʼapa kia nātou te kau faiako pea mo te ʼu kaugā ako.

Kae ʼe mole hoko tuʼumaʼu feiā te ʼu meʼa. ʼI ʼihi temi, ko te mole fia kau ʼa he tūpulaga ki te ʼu meʼa ʼo te faleako, ʼe feala ke tupu ai hona fakatagaʼi pea mo fakalainoaʼi ia ia e te tamaliki ako pea mo te kau faiako. Ko Yinka, ko te tama ʼe taʼu 15 ʼe nofo ʼi te fale posio, ʼe ina ʼui fēnei: “ ʼI te faleako, kapau ʼe ʼiloʼi ko koutou ko te Fakamoʼoni ʼa Sehova, pea ʼe nātou gaohi koviʼi koutou. ʼI tanatou ʼiloʼi ʼaē tamatou tuʼu mālohi ʼi te faʼahi fakalaumālie pea mo te aga ʼaē ʼe tonu ke mātou fai, ʼe nātou faiga ke nātou kākāʼi mātou.”

Te Maʼua ʼo Te ʼu Mātuʼa

ʼE mole feala ki te hahaʼi faiako, ki te faleako, peʼe ko te kolesi ke nātou akoʼi te ʼu fānau ke nātou liliu ko he kau kaugana ʼa Sehova. ʼE mole ko hanatou gāue pea ʼe mole ko honatou maʼua. ʼE ʼui e te Folafola ʼa te ʼAtua, ʼe ko te ʼu mātuʼa ʼaē ʼe tonu ke tokakaga ki te ʼu meʼa ʼaē ʼe ʼaoga ki tanatou ʼu fānau ʼi te faʼahi fakalaumālie. Neʼe tohi fēnei e Paulo: “ ʼU tāmai, ʼaua naʼa koutou fakatupu ʼita takotou fānau, kae ke koutou haga ako ia nātou ke nātou maʼu te akonaki pea mo te manatu ʼa Sehova.” (Efesi 6:⁠4) ʼE lava fakahoko feafeaʼi e te ʼu mātuʼa te tokoni fakaʼatua ʼaia, mo kapau ʼe nonofo tanatou fānau ʼi he fale posio ʼe lagi faka tuʼakoi ai te ʼu ʼaʼahi ʼo te ʼu mātuʼa, ʼo tuʼa tahi peʼe tuʼa lua ʼi te māhina?

ʼE kehekehe ʼaupito te ʼu ʼaluʼaga, kae ʼe tonu ke faiga te ʼu mātuʼa ke nātou mulimuli ki te ʼu palalau fakaʼatua ʼaenī: “ ʼIo, kapau ʼe mole tokaga he tahi ki tona ʼu kāiga, kae tāfito kia nātou ʼo tona loto fale, ʼe kua fakafisi ia ki te tui pea ʼe kovi age ia ʼi he tagata ʼe mole tui.”​—1 Timoteo 5:8.

ʼE ʼi Ai Koa He Tahi Puleʼaki?

Koteā ʼaē ʼe feala ke fai e te ʼu mātuʼa mo kapau ʼe tonu ke nātou fai he puleʼaki pe e tahi: te fale posio peʼe ko he faleako ʼe mole katoa ai te ʼu meʼa ʼaē ʼe ʼaoga ki te ako ʼo tanatou fānau? Ko ʼihi ʼaē neʼe hoko kia nātou te ʼaluʼaga ʼaia, neʼe nātou fakatuʼutuʼu ke foaki he ako takitokotahi moʼo fakakatoa te ako ʼo tanatou fānau ʼi te faleako ʼo te kolo. Ko ʼihi mātuʼa ʼe nātou fakaʼaogaʼi he temi moʼo akoako e nātou totonu tanatou fānau.

ʼI ʼihi temi ʼe tekeʼi e te ʼu mātuʼa te ʼu fihifihia heʼe lelei tanatou fakatuʼutuʼu fakatomuʼa ki te temi ʼaē ka lalahi ai tanatou fānau ke nātou hū ki te ʼu faleako lalahi. Kapau ʼe kei veliveli takotou ʼu fānau, peʼe koutou fakatuʼutuʼu ke koutou maʼu fānau, ʼe lagi lelei ke koutou vakavakaʼi peʼe ʼi ai he kolesi lelei ʼi te kolo ʼaē ʼe koutou nonofo ai. Kapau ʼe mole ʼi ai, pea ʼe lagi feala ke koutou ʼolo ki he kolo ʼe koutou ōvi ai ki he kolesi feiā.

Ohage ko tona ʼiloʼi lelei e te ʼu mātuʼa, ʼe maʼua ke nātou popoto, mo faʼa kātaki, pea mo fakaʼaogaʼi he temi ʼe lahi moʼo fakahū ki te loto ʼo he tamasiʼi te ʼofa ʼaē kia Sehova. Kapau ʼe faigataʼa te fai ʼo te faʼahi ʼaia ʼi te temi ʼaē ʼe nofo ai te tamasiʼi ʼi fale, pea ʼe toe faigataʼa ʼaupito anai tona fai mokā nofo mamaʼo! Mai tona ʼaluʼaga ʼaē ʼe pipiki kiai te maʼuli heʼegata ʼo te tamasiʼi, koia ʼe tonu ai ki te ʼu mātuʼa ke nātou fai he puleʼaki lelei pea mo vakaʼi ʼi te faikole, peʼe tonu koa ke nātou ʼave tanatou fānau ki he fale posio. ʼE mole ko he meʼa fakapotopoto te sakilifisioʼi ʼo te ʼu lelei fakalaumālie ʼa he tamasiʼi ki te ʼu lelei ʼo he ako ʼi he fale posio. ʼE hage anai te faʼahi ʼaia ko he lele ki he ʼapi ʼe lolotoga vela moʼo toʼo mai ai he koloā ʼe mole maʼuhiga​—ʼo kita vela ai ʼi te afi.

ʼE ʼui fēnei e te Folafola ʼa te ʼAtua: “ ʼE poto ia ia ʼaē ʼi tana sio ki te malaʼia, ʼe nono, kae ko nātou ʼaē ʼe mole popoto neʼe mole nātou tokagaʼi nātou pea ʼe tonu ia ke hoko kia nātou te tautea.” (Tāʼaga Lea 22:⁠3) ʼE lelei age te teuteu fakatomuʼa ki he fihifihia, ʼi te fakatonutonuʼi ki muli age ʼo te fihifihia ʼaia. ʼE lelei takotou fakakaukauʼi te faʼahi ʼaia mo kapau ʼe koutou fia ʼiloʼi peʼe tonu koa ke ʼalu takotou tamasiʼi ki he fale posio.

[Talanoa ʼo te pasina 28]

Ko Te Manatu ʼa Te Kau Fakamoʼoni Tūpulaga ʼo ʼUhiga Mo Te Fale Posio

“ ʼI te fale posio, ko te kau Fakamoʼoni ʼa Sehova ʼe mole ʼi ai hanatou ʼu fakakaugā ʼi te faʼahi fakalaumālie. ʼE ko he nofoʼaga ʼe agamālohi ai te kau tūpulaga, pea ʼe lahi te fakaneke ʼaē ke fai te aga ʼaē ʼe kovi.”​—⁠Ko Rotimi, ʼaē neʼe ʼi te fale posio ʼi tona taʼu 11 ki te 14.

“Neʼe faigataʼa ʼaupito taku kau ki te ʼu fono. Neʼe gata pe ki te ʼAhotapu ʼaē neʼe feala ke ʼau kau kiai, pea ke feala ke ʼau kau kiai, neʼe tonu ke ʼau hola lolotoga te talitali ʼo te kau tamaliki ako ki te misa. Neʼe mole he temi neʼe ʼau fiafia ai, koteʼuhi ʼi taku kei nofo ʼi fale, neʼe ʼau kau ki te ʼu fono fuli ʼo te kokelekasio, pea neʼe ʼau fai faka mafola ʼi te ʼu Moeaki pea mo te ʼu ʼAhotapu. Neʼe mole ʼau lotomālohi ʼi te faleako. Neʼe lahi te ʼu lelei neʼe mole ʼau maʼu.”​—⁠Ko Esther, ʼaē neʼe gaohi koviʼi e te kau faiako he neʼe mole fia kau ki te ʼu gāue ʼo te ʼēkelesia ʼi te faleako.

“Ko te fai faka mafola ki te ʼu kaugā ako neʼe mole ko he meʼa faigafua ʼi te fale posio. ʼE mole ko he meʼa faigafua te mole muliʼi ki te ʼu meʼa ʼaē ʼe fai e te tamaliki. Neʼe ʼau fia faʼifaʼitaki ki te tamaliki. Lagi neʼe ʼau lototoʼa anai mo kanapaula neʼe feala ke ʼau ʼalu ki te ʼu fono pea mo kau ki te fai faka mafola. Kae neʼe hoki feala ke ʼau fai te meʼa ʼaia ʼi te ʼu temi ʼaē neʼe ʼau mālōlō ai, ʼaē neʼe hoko tuʼa tolu ʼi te taʼu. Kapau ʼe ʼi ai hakotou mālama kae mole fakafonu ʼaki he moʼi lolo, pea ʼe mole mālohi anai tana mū. Neʼe feiā te meʼa ʼaē neʼe hoko kia ʼau ʼi te faleako.”​—⁠Ko Lara, ʼaē neʼe nofo ʼi te fale posio ʼi tona taʼu 11 ki te taʼu 16.

“ ʼI te temi nei, ʼi taku mole kei nofo ʼi te fale posio, ʼe ʼau fiafia he kua feala ke ʼau kau ki te ʼu fono fuli, ke ʼau fai faka mafola, pea mo ʼau kau ki te vakaʼi ʼo te vaega faka Tohi-Tapu ʼi te ʼaho fuli mo toku famili. Logope la ʼe ʼi ai te ʼu lelei ʼi te nofo ʼi te fale posio, kae ʼe mole ko he meʼa ʼe maʼuhiga age ʼi toku vāhaʼa mo Sehova.”​—⁠Ko Naomi, ʼaē neʼe ina uga tana tāmai ke ina toʼo ia ia mai te fale posio.