ʼE Feala Koa Hakotou Tokoni Kia Nātou?
1 Neʼe tokoniʼi e te ʼapositolo ko Paulo te ʼu kokelekasio “ke tatau te fetokoniʼaki ʼo tona ʼu koga.” (1 Ko. 12:25, MN) Koia, ʼe tonu ai ke tou feʼofaʼofani pea ke tou fetokoniʼaki mo kapau ʼe ʼaoga. Ohage la, ʼe ʼi ai te ʼu tuagaʼane ʼe nātou taupau tokotahi tanatou ʼu fānau ʼi te moʼoni. Ko te ʼu tuagaʼane ʼaia ʼe nātou ʼamo tokotahi te kavega ʼaē ko te akoʼi ʼo tanatou fānau ʼi te faʼahi fakalaumālie. ʼE mahino ia, ʼe tonu ke foaki age kia nātou ʼaia he ʼu fakaloto mālohi pea mo he ʼu tokoni ʼaoga “ ʼo mulimuli ki te ʼu meʼa ʼaē ʼe ʼaoga kia nātou.” (Loma 12:13a, MN) ʼE feala koa hakotou tokoni kia nātou?
2 Te ʼu Faʼahiga Puleʼaki Moʼo Tokoni Kia Nātou: ʼE feala ke tou tokoni ki te taʼi famili ʼaia, mo kapau ʼe mole hanatou ʼu meʼa feʼoloʼaki, ke tou ʼave nātou ki te ʼu fono pea mo te ʼu fakatahi. ʼE feala ke tou tokoni ki he faʼe moʼo taupau tanatou ʼu kiʼi toe veliveli ʼi te ʼu fono, ke feala hana mulimuli lelei ki te ʼu fono. ʼO toe feiā pe, ʼe feala ke tou fakamaʼamaʼa tana kavega, ʼo tou tokoni ki ai mokā fai faka mafola mo tana ʼu kiʼi toe. Kapau ʼe tou tokaga moʼoni ki te ʼu fānau—ʼo tou kaumeʼa mo nātou—pea ʼe feala anai ke tou uga te kau tūpulaga ke nātou fai te ʼu meʼa ʼaē ʼe lelei. Kapau ʼi ʼihi temi ʼe tou fakaafe he faʼe peʼe ko he tāmai ʼe ina taupau tokotahi tana ʼu toe, ke haʼu ʼo kau ki tatatou ako faka famili, pea ʼe feala anai ke tokoni kia ia ʼi te faʼahi fakalaumālie.
3 Tou Aga Fakapotopoto: ʼE tonu ke tou tokaga ke mole tou fakakinauʼi he tahi ke tou tokoni age ki ai, mo kapau ʼe ina logoʼi ʼe mole ʼaoga kia ia te faʼahi ʼaia. Tahi ʼaē, ʼe mole tou fia ʼiloʼi anai te ʼu meʼa faka famili ʼa he tahi, mokā tou tokoni ki ai. ʼE mahino ia, ʼe lelei anai ki he ʼu tuagaʼane pea mo he ʼu taumatuʼa ke nātou tokoni ki he tuagaʼane ʼe faigataʼaʼia.
4 ʼE fakaloto mālohiʼi te kau Kilisitiano fuli ke nātou “mauliʼi te aga talitali kaiga.” (Loma 12:13b) Ko te tokoni ki tatatou ʼu tēhina pea mo tuagaʼane, ʼe kau ki te ʼu gāue ʼaē ʼe tou fai moʼo fakahā tatatou feʼofani, ohage ko te ʼofa ʼaē neʼe maʼu e Kilisito.—Soane 13:35.