‘Te ʼu Fafine ʼAē ʼe Gāue Kinakina ʼi Te ʼAliki’
1 Neʼe fai e Paulo te ʼu palalau ʼaē ʼi ʼoluga ʼo ʼuhiga mo Tolufano pea mo Tufosa, ko te ʼu tuagaʼane e toku lua neʼe nā gāue kinakina ʼi te kokelekasio ʼo Loma. ʼO ʼuhiga mo Pelesita, te tahi tuagaʼane, neʼe ina ʼui fēnei: “E lahi tana gaue i te Aliki.” Neʼe ina toe vikiʼi mo Foepene, ʼo ina ʼui ʼe ko te “mauliʼaga o te tokolahi.” (Loma 16:2, 12) ʼI te Tohi-Tapu, ko Talika, neʼe ko te fafine neʼe “lahi ana gaue lelei mo tana faiofa.” (Gaue 9:36) ʼE ko he toe tapuakina lahi ʼi te kokelekasio te ʼu fafine ʼaē kua fakapotopoto ʼi te faʼahi fakalaumālie!
2 ʼE tou leleiʼia koa te ʼu tuagaʼane ʼaē ʼe gāue kinakina ʼi totatou kokelekasio? ʼE nātou fai te koga lahi ʼo te gāue fai faka mafola, mo te ʼu ako Tohi-Tapu, pea mo te tokoni ʼaē ʼe fai ki te tokolahi ʼo te hahaʼi ʼaē ʼe foʼofoʼou mai. ʼE toe lahi foki mo te temi ʼaē ʼe nātou fakaʼaogaʼi moʼo tokoni ki tanatou fānau ke nātou tuputupu ʼi te faʼahi fakalaumālie. ʼE kau te ʼu fafine Kilisitiano ki te fakatuputupu ʼo te ʼofa, mo te fiafia, mo te tokalelei pea mo te gāue mālohi ʼo te kokelekasio. ʼE nātou lagolago ki tonatou ʼohoana pea mo tonatou loto fale ke toe lahi age tanatou tauhi kia Sehova.
3 Ko Te ʼu Tuagaʼane ʼe Tauhi ʼi Te Temi Katoa: Ia nātou ʼaē ʼe gāue kinakina ʼi te ʼAliki, ʼe ʼi ai te ʼu tuagaʼane misionea, pea ko te tokolahi ʼo nātou ʼaia neʼe nātou tokoni ki te tuputupu ʼo te gāue ʼi te ʼu fenua tai. ʼI te ʼu kokelekasio ʼaē ʼe ʼaʼahi e tonatou ʼu ʼohoana, ko te ʼu ʼohoana ʼo te ʼu tagata taupau feʼoloʼaki ʼe nātou maʼumaʼua ʼi te fai faka mafola, pea ʼe nātou fakaloto mālohi te ʼu tuagaʼane e tokolahi. Tou toe manatuʼi foki mo te ʼu tuagaʼane ʼi te Petele, ʼaē ʼe nātou gāue mālohi ʼi te gāue taputapu moʼo lagolago ki te kautahi ʼa Sehova. Pea ko ʼotatou ʼu tuagaʼane ʼaē ʼe pionie katoa, ʼe nātou faiga agatonu ke nātou vikiʼi te ʼAtua, pea ʼe nātou tokoni ai ki te toko lauʼi afe hahaʼi ke nātou ako te moʼoni.
4 Ko te ʼu fafine agatonu ʼaia ʼe nātou maʼu he fiafia lahi ʼi tonatou maʼuli faka sakilifisio. (1 Tim. 6:6, 8) ʼE tau mo feʼauga ke tou vikiʼi nātou, mo fakaloto mālohiʼi pea ke tou lagolago kia nātou.
5 ʼE maʼuhiga te ʼu fafine Kilisitiano ki te kautahi ʼa Sehova, heʼe nātou fakahoko he tauhi agatonu, pea ʼe ko he tapuakina kia tatou fuli. ʼOfa pe ke hoko atu tatatou leleiʼia te ʼu fafine ʼaia pea mo tou faikole ke tapuakina nātou e Sehova ʼi tanatou haga ‘gāue kinakina ʼi te ʼAliki.’