Te ʼu Fehuʼi ʼa Te Kau Lautohi

Neʼe foaki ki ʼihi kau Fakamoʼoni ʼa Sehova he ʼu gāue ʼe tonu ke nātou fai ʼi he ʼu fale pe ko he ʼu kele ʼe ʼa te ’Ēkelesia. Koteā te manatu ʼa te Tohi-Tapu ʼo ʼuhiga mo te ʼu gāue ʼaia?

ʼE lagi hoko te fihifihia ʼaia ki te kau Kilisitiano ʼaē ʼe nātou loto moʼoni ke nātou maʼuliʼi te tokoni ʼo 1 Timoteo 5:8, ʼaē ʼe ina fakahā te maʼuhiga ʼaē ke kita taupau tokita famili. ʼE moʼoni, ʼe maʼua ki te kau Kilisitiano ke nātou maʼuliʼi te tokoni ʼaia, kae ʼe mole ko he takuʼaki ʼaia ke nātou tali he gāue ka mole nātou vakavakaʼi fakalelei. ʼE mahino ki te kau Kilisitiano, ʼe tonu ke nātou fakatokagaʼi te tahi ʼu meʼa ʼo mulimuli ki te finegalo ʼa te ʼAtua. Ohage la, logope la te holi ʼa he tagata ke ina taupau tona famili, kae ʼe mole ko he takuʼaki ʼaia ke ina maumauʼi te lao ʼa te Tohi-Tapu ʼo ʼuhiga mo te aga ʼaē ʼe tonu ke kita fai pea mo te fai fakapō. (Vakaʼi ia Senesi 39:​4-9; Isaia 2:4; Soane 17:14, 16.) ʼE toe maʼuhiga foki ke fakalogo te kau Kilisitiano ki te fakatotonu ʼaē ke nātou mavae mai Papiloni Lahi, te kautahi faka malamanei ʼo te lotu hala.​—Apokalipesi 18:​4, 5.

ʼI te malamanei katoa, ʼe lahi te ʼu gāue kehekehe ʼe fakahoko e te kau kaugana ʼa te ʼAtua. ʼE mole tonu leva ke tou fai he lisi ʼo te ʼu gāue fuli ʼaia pea mo tou fakatuʼutuʼu he ʼu lekula fefeka. (2 Kolonito 1:​24) Kae tou vakaʼi he ʼu puani ʼe lelei ke fakakaukauʼi e te kau Kilisitiano mokā maʼua ke nātou fai he tonu ʼo ʼuhiga mo he gāue. Ko te ʼu puani ʼaia neʼe fakahā fakanounou e Te Tule Leʼo Fakafalani ʼo te ʼaho 15 ʼo ʼOketopeli 1982, neʼe talanoa te alatike ki te ʼu fua lelei ʼaē ʼe tou maʼu ʼi tatatou fakaʼaogaʼi totatou leʼo ʼo loto ʼaē neʼe foaki mai e te ʼAtua. Neʼe lagaʼi te ʼu fehuʼi e lua ʼi te kiʼi talanoa, pea neʼe fakahā ai mo he ʼu tokoni fakapotopoto.

Koʼeni te ʼuluaki fehuʼi: ʼE tapuʼi koa e te Tohi-Tapu te gāue ʼaia? ʼO ʼuhiga mo te faʼahi ʼaia, neʼe ʼui e Te Tule Leʼo, ko te Tohi-Tapu ʼe ina tapuʼi te kaihaʼa, te fakaʼaogaʼi kovi ʼo te toto, pea mo te tauhi tamapua. ʼE tonu ke fakafisi he Kilisitiano ki he gāue ʼe fai ai te ʼu meʼa ʼaia ʼaē ʼe mole leleiʼia e Sehova.

Koʼeni te lua fehuʼi: Kapau ʼe ʼau fai te gāue ʼaia, ʼe ʼau kau anai koa ʼi he ʼu meʼa ʼe tapuʼi e Sehova? ʼE mahino ia, ʼe kita kau anai ki he ʼu gāue ʼe fakafeagai ki te Tohi-Tapu, mo kapau ʼe kita gāue ʼi he fale gaoʼi paʼaga, pe ʼi he lopitali ʼe fai ai te ʼu fakatō fatu, pe ko he fale ʼa te hahaʼi paomutu. Tatau aipe peʼe tonu pe ke kita fai menasi ai ʼi te ʼaho fuli, peʼe kita tali telefoni, kae ʼe kita lagolago anai ki he ʼu faʼahiga gāue ʼe tauteaʼi e te Folafola ʼa te ʼAtua.

Ko te tokolahi ʼo te kau Kilisitiano, neʼe feʼauga ʼaki pe tanatou vakaʼi te ʼu fehuʼi ʼaia e lua ke feala hanatou fai he tonu ʼo ʼuhiga mo he gāue.

Ohage la, ʼaki te ʼu fehuʼi ʼaia e lua, kua feala ke kita ʼiloʼi ai pe koʼe ʼe mole feala ke gāue he Kilisitiano moʼoni ʼi he kautahi ʼo te lotu hala, ʼo gāue ki he ʼēkelesia peʼe ʼi te loto ʼēkelesia. Ia Apokalipesi 18:​4, ʼe tohi ai te fakatotonu ʼaenī: “Koutou mavae maia te ia, taku hahai! Naa koutou kau ki tana u agahala.” ʼE feala ke kita kau ki te ʼu agahala ʼo Papiloni Lahi mo kapau ʼe kita gāue tuʼumaʼu ki he lotu ʼe ina faka mafola he ʼu akonaki loi. Tatau aipe peʼe gāue ʼōloto, peʼe fai menasi, peʼe ina gaohi te ʼu meʼa ʼaē kua maumau, peʼe ina taupau te falā, kae ko tana gāue ʼaia ʼe lagolago ki he kautahi ʼe fakafeagai ki te lotu moʼoni. Tahi ʼaē meʼa, ko te hahaʼi ʼaē ʼe nātou sio kia ia ʼaē ʼe gāue moʼo fakamataleleiʼi te ʼēkelesia, peʼe ina gaohi te ʼu meʼa ʼaē kua maumau, peʼe ina fakahoko tana ʼu gāue faka lotu, ʼe nātou manatu anai, ʼe kau mo ia ʼi te lotu ʼaia.

Kae e feafeaʼi kia ia ʼaē ʼe mole gāue tuʼumaʼu ki te ʼēkelesia pe ko he tahi kautahi faka lotu? ʼE lagi pāui anai ia ia ke ina fakahoko fakavilivili he gāue maʼuhiga moʼo gaohi he tuio neʼe fasi ʼi te ʼēkelesia. ʼE mole kehe koa la mo he tahi ʼe ina sinie he kotala mo te ʼēkelesia, ke ina toe gaohi te ʼato ʼo te ʼēkelesia ʼaia?

ʼE moʼoni, ʼe lahi te ʼu ʼaluʼaga kehekehe ʼe feala ke hoko. Koia, tou fakamanatuʼi ia puani e nima ʼaē neʼe fakahā e Te Tule Leʼo:

1. Ko te gāue ʼaia ʼe fai pe koa moʼo tokoni ki te hahaʼi, pea ʼe fakafeagai koa ki te Tohi-Tapu? Tou toʼo te faʼifaʼitaki ʼo te tagata tufa tohi. Kapau ʼe tufa tohi, pea ʼe maʼua anai ke ina ʼave te ʼu tohi ʼo te ʼēkelesia ʼo te kolo pea mo te ʼu lopitali ʼaē ʼe fai ai te ʼu fakatō fatu, kae mole faka ʼuhiga leva, ʼe lagolago ki te ʼu meʼa kovi ʼaē ʼe hoko ai. ʼE foaki mai e te ʼAtua te mālama ki te hahaʼi fuli pe, māʼiape la mo te ʼu ʼēkelesia pea mo te ʼu lopitali ʼaē ʼe fai ai te ʼu fakatō fatu. (Gaue 14:​16, 17) Ko he Kilisitiano ʼe tufa tohi, ʼe feala ke ina ʼui ʼe ina fakahoko he gāue moʼo tokoni ki te hahaʼi ʼi te ʼaho fuli. Pea ʼe feiā anai ki te Kilisitiano ʼaē ʼe pāui ke ina fai he gāue ʼe tonu ke fai fakavilivili​—ohage ko te tagata gaohi tuio ʼaē ʼe pāui ke haʼu ʼo tāʼofi te ʼalu ʼa te vai ʼi te ʼēkelesia pe ko te pāui ʼa te tagata taki motokā ʼave mahaki ke ʼalu ʼo kumi mai he tahi neʼe pogia lolotoga he misa. ʼE ina faka ʼuhiga anai te gāue ʼaia ʼe ko he tokoni ki te hahaʼi.

2. ʼE pule koa te Kilisitiano ki te gāue ʼaē ʼe ina fai? Ko he Kilisitiano ʼe ʼi ai hona fale koloā, ʼe mole ina fakaʼui anai pea mo fakatau anai he ʼu fakatātā, mo he ʼu kiʼi meʼa moʼo fai ʼaki te ʼu meʼa fakamanamana, pe ko he ʼu sikaleti, pe ko he ʼu foʼi sosiso neʼe fai ʼaki te toto. Mai tona ʼuhiga ʼaē ko ia te patolo, ʼe feala ke ina takitaki te ʼu meʼa ʼaē ʼe hoko ʼi tona fale koloā. Tatau aipe peʼe lagi fakaneke ia ia e te hahaʼi ke ina fakatau he ʼu sikaleti pe ko he ʼu fakatātā ke maʼu ai hana falā, kae ʼe mulimuli pe anai ki te ʼu akonaki ʼa te Tohi-Tapu. ʼI te tahi faʼahi, ko he Kilisitiano ʼe gāue ʼi he fale koloā lahi ʼe fakatau ai te meʼa kai, ʼe lagi kole anai kia ia ke ina taupau te kesi, peʼe ina fakamaʼa te simā, peʼe ina lau te falā. ʼE mole ko ia ʼaē ʼe ina filifili pe koteā ʼaē ka fakaʼui anai peʼe fakatau anai, tatau aipe peʼe kau ai he ʼu meʼa ʼe mole lelei, ohage la ko te ʼu sikaleti pe ko te ʼu kiʼi fakatātā ʼo te ʼu lafeti faka lotu.a (Vakaʼi ia Luka 7:8; 17:​7, 8.) Ko te faʼahi ʼaia ʼe ʼalutahi mo te manatu ʼaenī ka hoa mai.

3. ʼE lahi feafeaʼi te kau ʼa te Kilisitiano ki te gāue ʼaia ʼe fai? Tou toe fakaʼaogaʼi te faʼifaʼitaki ʼo te fale koloā. Ko ia ʼaē neʼe hinoʼi ke gāue ʼi te kesi peʼe ke ina fakatokatoka te ʼu meʼa ʼaē ʼe fakatau, ʼe lagi ina puke ʼi ʼihi temi te ʼu sikaleti pe ko te ʼu fakatātā faka lotu; kae ʼe mole ko tana gāue tāfito ʼaia. Kae ʼe kehe ʼaupito anai mo kapau ʼe gāue pe ia ʼi te koga meʼa ʼaē ʼe fakatau ai te ʼu sikaleti! Kapau koia ʼaia, pea ko tana gāue katoa ʼi te ʼaho fuli, ʼe pipiki ki he meʼa ʼe fakafeagai ki te ʼu akonaki faka Kilisitiano. (2 Kolonito 7:1) ʼE hā ʼaki mai, ʼe maʼua ke kita fakakaukauʼi peʼe lahi feafeaʼi anai hakita kau ki te gāue ʼaē ʼe kita filifili ke kita fai.

4. Ko ai ʼaē ʼe ina foaki te litotogi pea ko te potu fea ʼaē ʼe fai ai te gāue? Tou vakaʼi ia ʼaluʼaga e lua. Ko te lopitali ʼe ina fai te ʼu fakatō fatu, ʼe ina loto ke vikiʼi ia ia e te hahaʼi, koia ʼe ina fakatotonu ai ke ina totogi he tagata gāue moʼo fakamaʼa te ʼu ala ʼo te koga meʼa ʼaia. ʼE ko te lopitali ʼaē ʼe ina totogi te tagata ʼaia, kae ʼe mole gāue ia ʼi te lopitali, pea ʼe mole sio te hahaʼi kia ia ʼe gāue ʼaho katoa ai. Kae ʼe nātou sio kia ia ʼe ina fai he gāue ʼe ʼaoga ki te hahaʼi pea ʼe mole ko he gāue ʼe fakafeagai ki te Tohi-Tapu, pea ʼe mole nātou tokagaʼi pe ko ai ʼaē ʼe ina totogi ia ia. Koʼeni te tahi ʼaluʼaga ʼe kehe ʼaupito. ʼI he fenua ʼe feala ke gāue faʼifaʼitaliha ai te ʼu paomutu, ko te puleʼaga ʼe ina totogi he afilimie ke gāue ʼi te ʼu fale paomutu, ʼo ina fai he ʼu sivi toto ke ʼaua naʼa mafola te ʼu mahaki ʼo te ʼu felāveʼi fakasino. Logope la ʼe totogi ia ia e te puleʼaga, kae ko tana gāue katoa ʼe fai ʼi te ʼu fale paomutu, ʼo fealagia ai ki te hahaʼi ʼaia ke hoko atu tanatou fai te ʼu aga fakalialia. ʼE hā mai ʼi te ʼu faʼifaʼitaki ʼaia, ʼe maʼua ke kita vakaʼi pe ko ai ʼaē ʼe ina foaki te litotogi pea mo te potu ʼaē ʼe fai ai te gāue.

5. ʼE lave feafeaʼi te gāue ʼaia kia tatou pea mo ʼihi; ʼe fakatupu tūkia koa ki totatou leʼo ʼo loto peʼe ki ʼihi? ʼE maʼua ke kita tokagaʼi tokita leʼo ʼo loto pea mo te leʼo ʼo loto ʼo ʼihi. Logope la ʼe mole lagi kovi ki te kau Kilisitiano he faʼahiga gāue (ʼo feiā mo te potu ʼaē ʼe fai ai te gāue ʼaia pea mo ia ʼaē ʼe ina foaki te litotogi), kae ʼe lagi kita manatu anai ʼe hoha anai tokita leʼo ʼo loto. Ko te ʼapositolo ko Paulo ʼaē neʼe ko he faʼifaʼitakiʼaga lelei, neʼe ina ʼui fēnei: “E matou tui, e matou mau he loto ateaina lelei pea mo tamatou fakaʼamu ke tuha tamatou fai omatou mauli i te meafuape.” (Hepeleo 13:18) ʼE lelei ke tou fakafisi ki te ʼu gāue ʼaē ʼe tou lotolotolua ai; kae ʼe mole tonu ke tou fatufatuʼi ia nātou ʼaē ʼe mole nātou manatu tahi mo tatou. ʼI te tahi faʼahi, ʼe lagi ʼui anai e he Kilisitiano, ʼe mole fakafeagai tana gāue ki te Tohi-Tapu, kae ʼe ina ʼiloʼi, ko te gāue ʼaia ʼe feala ke fakatupu tūkia ki ʼihi ʼi te kokelekasio pea mo tona ʼu vāhaʼa fale. Neʼe fakahā fēnei e Paulo te manatu lelei ʼo ʼuhiga mo te faʼahi ʼaia: “E mole matou tuku he mea fakatupu higa ki he tahi, naʼa fakalaulauʼi tamatou gaue. Kae i te meafuape, e matou faiga ke falanaki mai kia matou ko te u faifekau a te Atua.”​—2 Kolonito 6:​3, 4.

Koia, tou toe vakaʼi te fehuʼi ʼaē peʼe feala ke kita gāue ʼi he ʼēkelesia, ohage la ke kita ʼai hana ʼu matapā fakamālama foʼou, peʼe kita fakamaʼa tona ʼu tapi, peʼe kita gaohi tona gutuʼumu. Koteā tona pikipikiga pea mo te ʼu puani ʼaē neʼe tou vakaʼi ʼi ʼoluga?

Koutou manatuʼi te manatu ʼo ʼuhiga mo te takitaki ʼo te gāue. ʼE ko te Kilisitiano koa te patolo ʼaē ʼe ina fakatotonu ke fai te gāue ʼaia ʼi te ʼēkelesia? Kapau ko ia ʼaia, pea ʼe ina fakatotonu anai koa ke lagolago kia Papiloni Lahi ʼo ina fai he kotala ʼe tokoni anai ki he lotu hala? ʼE mole tatau koa la te faʼahi ʼaia pea mo ia ʼaē ʼe ina fakatau he ʼu sikaleti pea mo he ʼu fakatātā ʼi tona fale koloā?​—2 Kolonito 6:​14-​16.

Kapau ko te Kilisitiano ko he tagata ʼe gāue ki he patolo, pea ʼe mole ko ia ʼaē ʼe ina filifili te ʼu gāue ʼaē ʼe tonu ke ina fai, pea ʼe tonu anai ke ina vakaʼi ʼihi atu faʼahi, ohage la te potu ʼaē ʼe fai ai te gāue, pea ʼe lahi feafeaʼi tana kau ki te gāue ʼaia. ʼE gata pe koa tana gāue ki te fetuku pea mo te fakatokatoka ʼo he ʼu hekaʼaga ki he lafeti, pe ko te tokoni ki te hahaʼi, ohage ko te tagata tamate afi ʼe ʼalu ʼo tāmateʼi te afi ʼi he ʼēkelesia? Ki te tokolahi, ko te gāue ʼaia ʼe kehe ʼaupito ia mo he tahi ʼe nofo fualoa anai ʼo pena te ʼēkelesia peʼe gāue tuʼumaʼu ki te fakamatalelei ʼo te ʼōloto. Kapau ʼe kita gāue lolotoga he temi loaloaga peʼe kita haʼu tuʼumaʼu ʼo gāue ʼi te ʼēkelesia, pea ʼe tokolahi anai te hahaʼi ʼaē ka nātou manatu hala anai, ko te Kilisitiano ʼaia ʼe kau ʼi te lotu ʼaia, pea ʼe lagi fakatupu tūkia anai kia nātou.​—Mateo 13:41; 18:​6, 7.

Neʼe tou vakaʼi te ʼu puani maʼuhiga ʼo ʼuhiga mo te filifili ʼo he gāue. Neʼe vakaʼi te ʼu puani ʼaia ʼo ʼuhiga mo te ʼu gāue ʼaē ʼe pipiki ki te lotu hala. Kae ʼe feala pe ke fakaʼaoga ki he tahi ʼu faʼahiga gāue. ʼI te ʼu ʼaluʼaga fuli, ʼe lelei ke kita faikole ke kita fakakaukauʼi te ʼu agaaga kehekehe ʼo te ʼaluʼaga ʼaē ʼe kita tau mo ia. Ko te ʼu puani ʼaē neʼe fakahā ʼi ʼoluga, neʼe nātou tokoni ki te kau Kilisitiano fakamalotoloto ke nātou fai he ʼu tonu ʼaki tonatou leʼo ʼo loto, ʼe hā ai tanatou holi ʼaē ke nātou haʼele agatonu mo Sehova.​—Tāʼaga Lea 3:​5, 6; Isaia 2:3; Hepeleo 12:12-​14.

[Nota ʼi te lalo pasina]

Kei Koutou Manatuʼi Koa?

Neʼe koutou leleiʼia koa te ʼu alatike fakamuli ʼo Te Tule Leʼo? Kapau koia ʼaia, pea koutou vakaʼi peʼe feala hakotou tali ki te ʼu fehuʼi ʼaenī:

◻ He koʼe ʼe gali mo te kau Kilisitiano fakanofo te kupuʼi palalau ʼaē neʼe fai e Paulo “ko he ʼu tagata fakafofoga moʼo fetogi ia Kilisito”? (2 Kolonito 5⁠:​20, MN)

ʼI te temi muʼa, neʼe fekauʼi tāfito te ʼu tagata fakafofoga ʼi te ʼu temi tau moʼo vakavakaʼi pe neʼe feala ke tāʼofi te tau. (Luka 14⁠:​31, 32) Mai tona ʼaluʼaga ʼaē ʼe mamaʼo te hahaʼi agahala mai te ʼAtua, koia neʼe ina fekauʼi ai tona ʼu tagata fakafofoga fakanofo moʼo fakahā ki te hahaʼi tana ʼu fakatuʼutuʼu ki te fakatokatoka pea ke nātou kumi te tokalelei mo te ʼAtua.​—15/12, pasina 18.

◻ Koteā te ʼu faʼahi e fā ʼaē neʼe fakaloto mālohiʼi ai te tui ʼa Apalahamo?

ʼUluaki, neʼe ina fakahā tana tui kia Sehova he neʼe fakalogo ʼi te temi ʼaē neʼe palalau ai te ʼAtua (Hepeleo 11:8); lua, ko tana tui neʼe ʼi ai tona pikipikiga mo tana ʼamanaki (Loma 4:​18); tolu, neʼe tau palalau ia Apalahamo mo te ʼAtua; pea fā, neʼe lagolago Sehova kia Apalahamo ʼi te ʼu temi ʼaē neʼe mulimuli ai ki tana takitaki. Ko te ʼu faʼahi ʼaia ʼe toe feala foki ke fakamālohiʼi ai tatatou tui ia ʼaho nei.​—1/1, pasina 17, 18.

◻ Koteā te faka ʼuhiga ʼo te ʼui ʼaē, “Aua naa ke tuku matou ki te fakahala”? (Mateo 6⁠:13)

ʼE tou kole ai ki te ʼAtua ke mole ina tuku tatou ke tou agahala mokā fakahalaʼi tatou ke tou talagataʼa kia te ia. ʼE feala ke ina takitaki tatou ke mole tou tō pea ke mole kākāʼi tatou e Satana, “te agakovi.” (1 Kolonito 10⁠:13)​—15/1, pasina 14.

◻ Koteā ʼaē ʼe tonu ke tou fai ke fakamolemole mai te ʼAtua kia tatou?

ʼE tonu ke tou kofesioʼi tatatou agahala, mo tou loto fakahemala pea mo fakatupu “te ʼu fua ʼaē ʼe gali mo te fakahemala.” (Luka 3⁠:⁠8, MN) Ko tatatou fakahemala pea mo tatatou fia fakatonutonuʼi te hala ʼaē neʼe tou fai, ʼe ina toe uga anai tatou ke tou kumi te tokoni fakalaumālie ʼa te kau tagata ʼāfea Kilisitiano. (Sakopo 5⁠:​13-15)​—15/1, pasina 19.

◻ He koʼe ʼe tonu ke tou faigaʼi mālohi ke tou agavaivai?

Ko ia ʼaē ʼe agavaivai ʼe loto faʼa kātaki, pea ʼe mole ina tokagaʼi fau anai tona ʼuhiga ʼo ia totonu. Kapau ʼe koutou agavaivai pea ʼe koutou maʼu ai anai hokotou ʼu kaumeʼa moʼoni ʼe nātou ʼoʼofa kia koutou. Kae ko te meʼa ʼaē maʼuhiga tāfito, heʼe koutou maʼu ai anai he ʼu tapuakina mai ia Sehova. (Tāʼaga Lea 22:4)​—1/2, pasina 7.

◻ Koteā koa te kehekehe ʼo te mate ʼa Sesu pea mo te mate ʼa Atama?

Ko Atama neʼe tonu ke mate, he neʼe talagataʼa ʼi tona loto faʼitaliha ki tona Tupuʼaga. (Senesi 2:​16, 17) Kae ko Sesu neʼe mole tonu ke mate, he “neʼe mole agahala.” (1 Petelo 2:​22, MN) Koia ʼi te temi ʼaē neʼe mate ai Sesu, neʼe ina maʼu te meʼa maʼuhiga ʼaupito ʼaē neʼe mole kei maʼu e Atama ʼi te temi ʼaē neʼe mate ai​—ʼe ko te ʼuhiga haohaoa. Koia, ko te mate ʼa Sesu neʼe ʼi ai tona maʼuhiga faka sakilifisio pea neʼe toe totogi ʼaki te malamanei.​—15/2, pasina 15, 16.

◻ ʼI te meʼa faka polofeta ʼaē neʼe hā kia Esekiele, koteā ʼaē ʼe fakatātā e te kolo?

Mai tona ʼuhiga ʼaē ʼe tuʼu ʼi te lotomalie ʼo he fenua “ ʼe mole taputapu,” koia, ʼe lagi ko he meʼa ʼe tuʼu ʼi te kele. ʼE hā mai ai ʼe fakatātā e te kolo ʼaia he fakatuʼutuʼu fakakelekele, ʼe fua lelei anai kia nātou fuli ʼaē ʼe nātou faʼufaʼu te sosiete faitotonu ʼi te kele.​—1/3, pasina 18.

◻ He koʼe neʼe fufulu e Sesu te ʼu vaʼe ʼo tana kau tisipulo ʼi tanatou lolotoga fai te Pāsikate ʼo te taʼu 33 ʼo totatou temi?

Neʼe mole fakatuʼu e Sesu he talatisio ʼo ʼuhiga mo te fufulu ʼo te ʼu vaʼe. Kae neʼe tokoni ai ki tana kau tisipulo ke nātou fetogi tanatou manatu, pea ke nātou agavaivai pea mo lotolelei ke nātou fakahoko te ʼu gāue faka agavaivai maʼa tonatou ʼu tēhina.​—1/3, pasina 30.

◻ ʼI tatatou akoʼi te hahaʼi, koteā ʼaē ʼe maʼuhiga age ʼi te poto palalau?

ʼE maʼuhiga tāfito te ʼu kalitate ʼaē ʼe tou maʼu, pea mo tatatou ʼu agamāhani ʼi te faʼahi fakalaumālie, ʼaē ʼe feala ke faʼifaʼitakiʼi e nātou ʼaē ʼe ako. (Luka 6:​40; 2 Petelo 3:​11)​—15/3, pasina 11, 12.

◻ Ko te ʼu tēhina ʼaē ʼe lautohi ʼi te ʼu fono, ʼe nātou lava hikihiki feafeaʼi tanatou lau te Tohi-Tapu?

ʼE tonu ke nātou akoako te lautohi. Ei, ʼe tonu ke nātou lau leʼolahi ʼo fai liuliuga, ke faigafua tanatou lautohi. Kapau ʼe ʼi ai he ʼu foʼi fime ʼo te Tohi-Tapu ʼi takotou lea, pea ʼe lelei ke koutou fakalogo ki te faka maʼuhigaʼi e te tēhina te ʼuhiga ʼo te ʼu kupu pea mo tana puʼaki te ʼu higoa pea mo te ʼu kupu faigataʼa.​—15/3, pasina 20.

◻ Koteā te faka ʼuhiga ʼo te ʼui ʼaē, mokā mate he tahi, pea ‘ko tona laumālie ʼe toe liliu ki te ʼAtua moʼoni’? (Tagata Tānaki 12⁠:​7)

Mai tona ʼuhiga ʼaē ko te laumālie ʼe ko te mālohi ʼo te maʼuli, “ ʼe toe liliu ki te ʼAtua moʼoni,” ko tona faka ʼuhiga, ko te ʼamanaki ʼaē ke kita toe maʼuli ʼi te ka haʼu, ʼe fakalogo katoa ki te ʼAtua. ʼE gata pe ki te ʼAtua te fealagia ʼaē ke ina toe foaki mai te laumālie, peʼe ko te mālohi ʼo te maʼuli, ke toe fakatuʼuake he tahi. (Pesalemo 104⁠:30)​—1/4, pasina 17.