Kapite 18

Ke Koutou Fakatuʼutuʼu Ke Koutou Tauhi Ki Te ʼAtua ʼo Talu Ai

1, 2. ʼE feʼauga pe koa tatatou maʼu ia te ʼatamai mālama ʼo ʼuhiga mo te ʼAtua?

KOUTOU fakakaukauʼi age muʼa ʼe koutou tutuʼu ʼi muʼa ʼo he matapā ʼo he koga fale neʼe kalavi pea ʼe tuku ai he ʼu tuʼuga koloā. ʼE faka fealagia atu e he tahi ke koutou avahi te matapā ʼo ina foaki atu te kalavi pea mo ina ʼui atu ke koutou toʼo te ʼu koloā ʼaia. ʼE mole he ʼuhiga anai ʼo te kalavi ʼaia mo kapau ʼe mole koutou fakaʼaogaʼi. ʼO feiā aipe ki te ʼatamai mālama, ʼe tonu ke koutou fakaʼaogaʼi mo kapau ʼe koutou fia maʼu he ʼu fua lelei.

² Ko te faʼahi ʼaia ʼe moʼoni tāfito ʼo ʼuhiga mo te ʼatamai mālama ʼo ʼuhiga mo te ʼAtua. ʼE mahino ia, ko te ʼatamai mālama ʼo ʼuhiga mo Sehova ʼAtua pea mo Sesu Kilisito ko tona faka ʼuhiga ko te maʼuli heʼegata. (Soane 17:3) Kae, moʼo maʼu ʼo te ʼamanaki ʼaia ʼe mole gata ʼaki pe takotou maʼu ʼo te ʼatamai mālama. ʼE ʼaoga ke koutou maʼuliʼi te ʼatamai mālama ʼo ʼuhiga mo te ʼAtua ʼi tokotou maʼuli, ohage pe anai ko hakotou fakaʼaogaʼi he kalavi maʼuhiga. Neʼe ʼui e Sesu ko nātou ʼaē ʼe nātou fai te finegalo ʼo te ʼAtua ʼaē ka “hū anai ki te puleʼaga.” Ko te faʼahiga hahaʼi ʼaia ʼe nātou maʼu anai te pilivilesio ʼaē ko te tauhi ki te ʼAtua ʼo talu ai!—Mateo 7:21; 1 Soane 2:17.

3. Koteā te finegalo ʼo te ʼAtua ʼo ʼuhiga mo tatou?

³ ʼI te ʼosi ʼo takotou ako ia te finegalo ʼo te ʼAtua, ʼe maʼuhiga takotou mulimuli kiai. ʼI takotou manatu, koteā te finegalo ʼo te ʼAtua ʼo ʼuhiga mo koutou? ʼE feala pe ke fakanounou fēnei: Ke koutou faʼifaʼitaki kia Sesu. ʼE ʼui mai e te ʼuluaki tohi ʼa Petelo 2:21: “Ko te ala ʼaia neʼe pāuiʼi koutou kiai, koteʼuhi neʼe mamahi foki ia Kilisito maʼa koutou, ʼo ina tuku atu he faʼifaʼitaki ke koutou mulimuli lelei ki tona ʼu tafuga vaʼe.” Moʼo fai ʼo te finegalo ʼo te ʼAtua, ʼe ʼaoga ke koutou mulimuli lelei ki te faʼifaʼitaki ʼo Sesu. ʼE tonu ke feiā takotou maʼuliʼi te ʼatamai mālama ʼo ʼuhiga mo te ʼAtua.

NEʼE FAKAʼAOGAʼI FEAFEAʼI E SESU TE ʼATAMAI MĀLAMA ʼO ʼUHIGA MO TE ʼATUA

4. He koʼe ʼe ʼiloʼi lelei e Sesu ia Sehova, pea neʼe feafeaʼi tana fakaʼaogaʼi te ʼatamai mālama ʼaia?

⁴ ʼE ʼiloʼi lelei age e Sesu Kilisito ia te ʼAtua ia tatou. ʼI muʼa ʼo tana haʼu ki te kele, neʼe maʼuli ia pea mo gāue mo Sehova ʼAtua ʼi selo lolotoga te ʼu temi ʼe mole feala hona fakafuafua. (Kolose 1:15, 16) Pea neʼe koteā te meʼa neʼe fai e Sesu ʼaki te toe ʼatamai mālama ʼaia? Neʼe mole gata ʼaki pe tana maʼu ia te ʼatamai mālama ʼaia, kae neʼe maʼuli ia Sesu ʼo ʼalutahi mo te ʼatamai mālama ʼaia. Koʼena la te tupuʼaga ʼo tana agalelei ki te hahaʼi, mo faʼa kātaki, pea mo manavaʼofa ʼi tana ʼu felogoi ʼaē mo nātou. ʼI te faʼahi ʼaia, neʼe faʼifaʼitakiʼi e Sesu tana Tāmai ʼaē ʼe ʼi selo pea neʼe gāue ia ʼo ʼalutahi mo tona ʼatamai mālama ʼo ʼuhiga mo te ʼu ala pea mo te ʼuhiga ʼo Sehova.—Soane 8:23, 28, 29, 38; 1 Soane 4:8.

5. He koʼe neʼe papitema ia Sesu, pea neʼe feafeaʼi tana maʼuli ʼo ʼalutahi mo te ʼuhiga ʼo tona papitema?

⁵ Ko te ʼatamai mālama ʼo Sesu neʼe ina uga ai foki ia ia ke ina fai he meʼa maʼuhiga. Neʼe haʼu ia mai Kalilea ki te Vaitafe ʼo Solotane, ʼo papitemaʼi ia ia e Soane. (Mateo 3:13-15) Neʼe koteā ʼaē neʼe fakatātā e te papitema ʼo Sesu? ʼI tona ʼuhiga Sutea, neʼe tupu ia ʼi te puleʼaga neʼe kua ʼosi foaki ki te ʼAtua. Koia, neʼe kua ʼosi foaki ia Sesu ki te ʼAtua talu tana tupu. (Ekesote 19:5, 6) ʼI tana ʼalu ʼaē ʼo papitema, neʼe ina foaki totonu ia ia kia Sehova moʼo fai ʼo te finegalo ʼo te ʼAtua ʼo ʼuhiga mo ia ʼi te temi ʼaē neʼe nofo ai ʼi te kele. (Hepeleo 10:5, 7) Pea neʼe mulimuli Sesu ki te ʼuhiga ʼo tona papitema. Neʼe ina fakaʼaogaʼi tona maʼuli ki te tauhi ʼaē kia Sehova, ʼo ina fakahā te ʼatamai mālama ʼo ʼuhiga mo te ʼAtua ki te hahaʼi ʼi te temi fuli pe. Neʼe fiafia ia Sesu ʼi tana fai te finegalo ʼo te ʼAtua, ʼo ina fakatatau te faʼahi ʼaia ki hana meʼa kai.—Soane 4:34.

6. Ko te faʼahi fea ʼaē neʼe fakafisi ai Sesu kia ia totonu?

⁶ Neʼe ʼiloʼi lelei e Sesu ko te fai ʼo te finegalo ʼo Sehova ʼe ko te meʼa maʼuhiga ʼaupito—tatau aipe pe neʼe tonu ke mate ʼuhi ko te faʼahi ʼaia. Kae, neʼe fakafisi ia Sesu kia ia totonu, ʼo ina tuku ki muli te ʼu meʼa ʼaē neʼe loto ia kiai. Neʼe ina fakamuʼamuʼa tuʼumaʼu te finegalo ʼo te ʼAtua. ʼI te faʼahi ʼaia, ʼe lava feafeaʼi koa hatatou mulimuli ki te faʼifaʼitaki haohaoa ʼa Sesu?

TE ʼU MEʼA ʼE NĀTOU TAKI KI TE MAʼULI HEʼEGATA

7. Koteā te ʼu meʼa ʼe tonu ke fai e he tahi ke feala ai hana aʼu ki te papitema?

⁷ ʼI totatou kehekehe mo Sesu, ʼe tou heʼe haohaoa pea ʼe feala ke tou aʼu ki te papitema mokā ʼe tou fai te tahi age ʼu meʼa maʼuhiga. ʼUluaki ʼe tonu ke ʼulu ki totatou loto te ʼatamai mālama ʼo ʼuhiga mo Sehova ʼAtua pea mo Sesu Kilisito. Ko te faʼahi ʼaia ʼe ina uga ai tatou ke tou haga tui pea ke tou maʼu he ʼofa lahi ki te ʼAtua. (Mateo 22:37-40; Loma 10:17; Hepeleo 11:6) Ko te fakalogo ki te ʼu lao ʼa te ʼAtua, ki tana ʼu pelesepeto, pea mo tana ʼu fakatotonu ʼe tonu ke nātou uga ai tatou ke tou fakahemala, pea ke tou fakahā totatou lotomamahi ʼo mulimuli ki te finegalo ʼo te ʼAtua, ʼo ʼuhiga mo tatatou ʼu agahala ʼi te temi ʼaē. Ko te faʼahi ʼaia ʼe iku ai mo tatatou tafoki, ko tona faka ʼuhiga ko tatatou lītuʼa pea mo līaki he aga ʼe kovi neʼe tou mulimuli kiai ʼi te temi ʼaē neʼe mole heʼeki tou maʼu ai te ʼatamai mālama ʼo ʼuhiga mo te ʼAtua. (Gāue 3:19) ʼE mahino ia, kapau ʼe tou fai fakafūfū he agahala kae mole tou fai te meʼa ʼaē ʼe totonu, ʼe hā ʼaki ai ʼe mole heʼeki tou lītuʼa moʼoni ki te meʼa ʼaia, kae ʼe mole feala ke tou kākāʼi te ʼAtua, koteʼuhi ʼe sio ia Sehova ki te ʼu aga malualoi fuli.—Luka 12:2, 3.

8. Koteā te meʼa ʼe tonu ke koutou fai mokā ʼe koutou fia kau ki te faka mafola ʼo te Puleʼaga?

⁸ ʼI te temi ʼaenī kua koutou maʼu ai te ʼatamai mālama ʼo ʼuhiga mo te ʼAtua, ʼe mole feala koa la ke koutou fakakaukauʼi peʼe feafeaʼi anai hakotou fakaʼaogaʼi te ʼu meʼa fakalaumālie ʼaia? E lagi ʼe koutou fia fakahā te meʼa ʼaē ʼe koutou ako ki tokotou ʼu kāiga, ki tokotou ʼu kaumeʼa, pea mo ʼihi age. ʼE mahino papau ia, neʼe kua koutou fai te faʼahi ʼaia, ohage pe ko te fakahā e Sesu te logo lelei ki te tahi ʼu hahaʼi ʼi te fagonogono ʼi te temi fuli. (Luka 10:38, 39; Soane 4:6-15) ʼI te temi nei e lagi koutou fia fai he meʼa ke lahi age. Ko te ʼu tagata ʼāfea ʼe nātou fiafia anai ʼi te palalau mo koutou, ke feala hanatou ʼiloʼi peʼe kua koutou mulimuli ki te ʼu meʼa ʼaē neʼe koutou ako ʼi te Tohi-Tapu, pea mo nātou vakaʼi pe kua feala hakotou kau ki te gāue fai faka mafola ʼo ʼuhiga mo te Puleʼaga ʼaē ʼe fai tuʼumaʼu e te kau Fakamoʼoni ʼa Sehova. Kapau koia ʼaia pea ʼe fai anai e te ʼu tagata ʼāfea he ʼu fakatuʼutuʼu ke feala hakotou kaugā gāue mo he Fakamoʼoni ʼi te minisitelio. Neʼe mulimuli te ʼu tisipulo ʼa Sesu ki tana ʼu fakatotonu, ke feala hanatou fakahoko tonatou minisitelio ʼaki te fakatokatoka lelei. (Maleko 6:7, 30; Luka 10:1) ʼE koutou maʼu anai he tokoni feiā mo kapau ʼe koutou kau ki te faka mafola ʼo te logo ʼo te Puleʼaga ʼi te ʼu ʼapi pea mo te tahi ʼu agaaga ʼo te fai faka mafola.—Gāue 20:20, 21.

9. ʼE foaki feafeaʼi e he tahi tona maʼuli ki te ʼAtua, pea koteā te ikuʼaga ʼo te faʼahi ʼaia ki tona maʼuli?

⁹ Ko te faka mafola ʼo te logo lelei ki te ʼu hahaʼi kehekehe ʼi te telituale ʼo te kokelekasio, ʼe ko he faka fealagia ʼaia ke tou maʼu ia nātou ʼaē ʼe fia fai ki te faitotonu pea ʼe kau te faʼahi ʼaia ki te ʼu gāue lelei ʼaē ʼe fakamoʼoni ʼaki ai takotou tui. (Gāue 10:34, 35; Sake 2:17, 18, 26) Tahi ʼaē meʼa, ko te ʼolo tuʼumaʼu ki te ʼu fono faka Kilisitiano pea mo takotou kau tuʼumaʼu ki te fai faka mafola, ʼe koutou fakahā ʼaki ai kua koutou fakahemala pea kua koutou maliu mai takotou aga ʼāfea, pea kua koutou fakatotonu ke koutou mulimuli ki te ʼatamai mālama ʼaē kua koutou maʼu ʼo ʼuhiga mo te ʼAtua ʼi te temi ʼaenī. Kaʼe koteā te tahi meʼa ʼaē ʼe tonu ke koutou fai? ʼE tonu ke koutou foaki tokotou maʼuli kia Sehova ʼAtua. Ko tona faka ʼuhiga ʼe koutou faikole fakamalotoloto, ʼo koutou fakahā ki te ʼAtua ʼe koutou lotolelei pea ʼe koutou foaki tokotou maʼuli kia te ia mo tokotou loto katoa moʼo fai ʼo tona finegalo. ʼE feiā te ʼaluʼaga ʼo tokita foaki ia tokita maʼuli kia Sehova pea mo kita tali te ʼakau toho mālū ʼa Sesu Kilisito.—Mateo 11:29, 30.

TE PAPITEMA—KOTEĀ TONA FAKA ʼUHIGA KIA KOUTOU

10. ʼI te hili ʼo takotou foaki tokotou maʼuli kia Sehova, he koʼe ʼe tonu ke koutou papitema?

¹⁰ ʼO mulimuli ki te ʼu palalau ʼa Sesu, ko nātou fuli ʼaē ʼe liliu ko tana ʼu tisipulo ʼe tonu ke nātou papitema. (Mateo 28:19, 20) He koʼe ʼe ʼaoga te faʼahi ʼaia ʼi te hili ʼo te foaki ʼo tokotou maʼuli ki te ʼAtua? ʼE ʼiloʼi e Sehova ʼe koutou ʼofa kia te ia, heʼe kua koutou foaki tokotou maʼuli kia te ia. Kae ʼe mahino ia, ʼe koutou fia fakahā anai ki te hahaʼi ke nātou ʼiloʼi tokotou ʼofa ʼaē ki te ʼAtua. ʼIo, ko te papitema ʼe ina foaki atu he faigamālie ke koutou fakahā ia muʼa ʼo te hahaʼi kua koutou foaki tokotou maʼuli kia Sehova ʼAtua.—Loma 10:9, 10.

11. Koteā te faka ʼuhiga ʼo te papitema?

¹¹ ʼE maʼuhiga ʼaupito te ʼuhiga fakatā ʼo te papitema. Ka fakauku koutou ki te vai, ʼe hage kua koutou mate ʼo ʼuhiga mo tokotou faʼahiga maʼuli ʼāfea. ʼI te temi ʼaē ʼe koutou tuʼu ake ai mai te vai, ʼe hage ʼe kua koutou tuʼu ake ki he maʼuli foʼou, ʼaē ʼe takitaki e te finegalo ʼo te ʼAtua kae mole ko tokotou finegalo ʼo koutou totonu. ʼE mahino ia, ʼe mole faka ʼuhiga ai leva ʼe mole koutou toe fai anai he agahala, koteʼuhi ʼe tou heʼe haohaoa fuli pea ʼe tou agahala ʼi te ʼaho fuli. Kae, ʼi tokotou ʼuhiga kaugana ʼa Sehova, ʼaē kua koutou foaki tokotou maʼuli kia te ia, kua koutou maʼu te ʼu felogoi makehe mo ia. Mai tona ʼaluʼaga ʼaē kua koutou fakahemala pea kua koutou papitema ʼaki te agavaivai, ʼe lotolelei ia Sehova ke ina fakamolemole takotou ʼu agahala ʼaki te sakilifisio faitotogi ʼa Sesu. Ko te papitema ʼe ina faka fealagia ke tou maʼu he leʼo ʼo loto ʼe maʼa ia muʼa ʼo te ʼAtua.—1 Petelo 3:21.

12. Koteā te faka ʼuhiga ʼo te papitema (a) “ ʼi te huafa ʼo te Tāmai”? (b) ‘ ʼi te huafa ʼo te ʼAlo’? (c) ‘ ʼi te huafa ʼo te laumālie maʼoniʼoni’?

¹² Neʼe fakatotonu e Sesu ki tana kau tisipulo ke nātou papitemaʼi te ʼu tisipulo foʼou “ ʼi te huafa ʼo te Tāmai pea mo te ʼAlo pea mo te laumālie maʼoniʼoni.” (Mateo 28:19) Koteā te faka ʼuhiga ʼo te ʼu palalau ʼa Sesu? Ko te papitema “ ʼi te huafa ʼo te Tāmai” ʼe hā ʼaki ai, ko ia ʼaē kua papitema kua ina tali ʼaki tona loto katoa ia Sehova ʼAtua ko te Tupuʼaga pea mo te Tuʼi faitotonu ʼo te ʼatulaulau. (Pesalemo 36:9; 83:18; Tagata Tānaki 12:1) Ko te papitema ‘ ʼi te huafa ʼo te ʼAlo’ ko tona faka ʼuhiga, ko ia ʼaē kua papitema kua ina tali ia Sesu Kilisito—pea tāfito Tana sakilifisio faitotogi—ʼaē ko te puleʼaki pe ʼaia e tahi neʼe fakatuʼutuʼu e te ʼAtua ʼo ʼuhiga mo te fakamaʼuli. (Gāue 4:12) Ko te papitema ‘ ʼi te te huafa ʼo te laumālie maʼoniʼoni’ ko tona faka ʼuhiga, ko ia ʼaē kua papitema ʼe ina ʼiloʼi ko te laumālie maʼoniʼoni ʼo Sehova, peʼe ko tona mālohi gāue, ʼe ko te meʼa gāue ʼa te ʼAtua moʼo fakahoko ʼo Tana ʼu fakatuʼutuʼu pea mo ina foaki te mālohi ki Tana kau kaugana ke nātou fai Tona finegalo faitotonu, ʼo mulimuli ki Tana kautahi ʼaē ʼe ina takitaki ʼaki Tona laumālie.—Senesi 1:2; Pesalemo 104:30; Soane 14:26; 2 Petelo 1:21.

KUA KOUTOU TOKALELEI KOA KE KOUTOU PAPITEMA?

13, 14. He koʼe ʼe mole tonu ke tou tuʼania tatatou tauhi ʼaē kia Sehova ʼAtua?

¹³ Mai tona ʼaluʼaga ʼaē ko te papitema ʼe lahi ʼaupito tona faka ʼuhiga pea ʼe ko he faʼahi ʼe maʼuhiga ʼaupito ʼi te maʼuli ʼo he tahi, ʼe tonu koa ke koutou tuʼania te faʼahi ʼaia? Kailoa ia! Logope la ko te fakatuʼutuʼu ʼaē ke koutou papitema ʼe mole koutou fai feiā pe, ʼe mahino ia ʼe ko te fakatuʼutuʼu fakapotopoto pe ʼaia e tahi ʼe feala ke koutou fai.

¹⁴ Ko te papitema ʼe ko te fakamoʼoni ʼaia kua koutou fili ke koutou tauhi kia Sehova ʼAtua. Koutou manatuʼi te hahaʼi ʼaē ʼe feʼiloʼiʼaki mo koutou. ʼE mole ʼi ai koa la he faʼahi, ʼe nātou kaugana ki ai ohage ko hanatou pule? Ko ʼihi ʼe nātou kaugana ki te paʼaga. (Mateo 6:24) Ko ʼihi ʼe nātou tokaga pe nātou ki tanatou gāue peʼe nātou kaugana kia nātou totonu pe ʼaki tanatou fakahoko katoa te ʼu meʼa ʼaē ʼe nātou holi ki ai ʼi tonatou maʼuli. Ko ʼihi ʼe nātou kaugana ki te ʼu ʼatua loi. Kae ko koutou, neʼe koutou fili ke koutou tauhi ki te ʼAtua moʼoni, ia Sehova. ʼE mole he tahi age ʼe feala ke ina fakahā he agalelei lahi feiā, mo he manavaʼofa, pea mo he ʼofa. ʼE faka maʼuhigaʼi e te ʼAtua te hahaʼi ʼo ina foaki kia nātou te gāue ʼe ʼaoga ke feala ai hanatou maʼu te fakamaʼuli. ʼE ina fakapale tana kau kaugana ʼaki te maʼuli heʼegata. ʼE moʼoni, ʼe mole ʼaoga ke koutou tuʼaniaʼi te muliʼi ʼaē ʼo te faʼifaʼitaki ʼo Sesu pea mo te foaki ʼo tokotou maʼuli kia Sehova. ʼI tona fakahagatonu, ko te faʼahiga maʼuli pe ʼaia e tahi ʼe fakapotopoto pea ʼe leleiʼia e te ʼAtua.—1 Hau 18:21.

15. Koteā te ʼu fihifihia māhani ʼe nātou tāʼofi ai he tahi ke ʼaua naʼa papitema?

¹⁵ Kae, ʼe mole koutou ʼolo ʼo papitema he neʼe fakalotoʼi koutou e niʼihi. ʼE ko te meʼa pe ia ʼa koutou pea mo Sehova. (Kalate 6:4) Lolotoga takotou tuputupu ʼi te faʼahi fakalaumālie neʼe lagi koutou fai te fehuʼi ʼaenī: “Koteā koa te meʼa ʼaē ʼe ina tāʼofi ai ʼau ke ʼau papitema?” (Gāue 8:35, 36) ʼE feala ke koutou fai te ʼu fehuʼi ʼaenī, ‘ ʼE mole ʼau papitema koa la ʼuhi ko te fakafeagai ʼaē ʼo toku famili? ʼE kei ʼau fai koa he faʼahiga meʼa ʼe mole ʼalutahi mo te Tohi-Tapu peʼe ʼau fai he agahala? ʼE ʼau mataku koa naʼa mole kei ʼoʼofa te hahaʼi kia te ʼau?’ Koʼena te ʼu meʼa ʼe ʼaoga ke koutou vakaʼi, kae ke koutou fakakaukauʼi lelei te ʼu faʼahi ʼaia.

16. Koteā te ʼu fua lelei ʼe koutou maʼu anai ʼi takotou tauhi ʼaē kia Sehova?

¹⁶ ʼE mole ʼaoga ke tou taupau te ʼu manatu ʼe mole lelei ka mole tou tokagaʼi te ʼu fua lelei ʼaē ʼe tou maʼu ʼi tatatou tauhi kia Sehova. Ohage la, ko te fakafeagai ʼa te famili. Neʼe fakapapau mai e Sesu ki tana kau tisipulo ʼe tatau aipe peʼe puli tonatou ʼu kāiga ʼuhi ko tanatou mulimuli ʼaē kia te ia, ʼe nātou maʼu anai he famili fakalaumālie ʼe lahi age. (Maleko 10:29, 30) Ko te ʼu kaugā fagona Kilisitiano ʼaia ʼe nātou fakahā atu anai tonatou ʼofa fakatautehina, mo tokoni kia koutou ke koutou kātakiʼi te fakataga, pea mo nātou lagolago kia koutou ke koutou haʼele ʼi te ala ʼo te maʼuli. (1 Petelo 5:9) ʼE feala foki ke tokoniʼi koutou e te ʼu tagata ʼāfea ʼo te kokelekasio ke lava lelei takotou tauʼi tokotou ʼu faigataʼaʼia pea mo ʼihi ʼaluʼaga faigataʼa ʼe felāveʼi mo koutou. (Sake 5:14-16) ʼO ʼuhiga mo te fehiʼa ʼo te mālama ʼaenī kia koutou, e lagi lelei ke koutou fai te fehuʼi ʼaenī, ‘Koteā koa te meʼa ʼaē ʼe feala ke fakatatau ki te maʼu ʼo te ʼofa ʼo te Tupuʼaga ʼo te ʼatulaulau, ʼo tupu ai tana fiafia ʼi taku fili te maʼuli ʼaia?’—Tāʼaga Lea 27:11.

KOUTOU MAʼULI ʼO ʼALUTAHI MO TE FOAKI ʼO TOKOTOU MAʼULI PEA MO TOKOTOU PAPITEMA

17. He koʼe ʼe tonu ke koutou tokagaʼi te papitema ohage ko te kamataʼaga ʼo tokotou maʼuli faka Kilisitiano kae mole ko te fakaʼosi?

¹⁷ ʼE maʼuhiga ke koutou manatuʼi ko te papitema ʼe mole ko te fakaʼosi ʼaia ʼo takotou tuputupu ʼi te faʼahi fakalaumālie. ʼE ko te fakaʼiloga ʼaia ʼo te kamataʼaga ʼo takotou tauhi ki te ʼAtua ʼi tokotou maʼuli, ohage ko he minisi neʼe ina fakanofo pea ʼe ko he Fakamoʼoni ʼa Sehova. Logope la te maʼuhiga ʼo te papitema, kae ʼe mole ko he fakamoʼoni ʼaia e kita maʼuli anai. Neʼe mole ʼui fēnei e Sesu: ‘Ko nātou ʼaē ʼe papitema ʼe nātou hāo anai.’ Kae, neʼe ʼui maʼana: “Kaʼe ko ʼaē ka faʼa kātaki anai ʼo kaku ki te fakaʼosi, ʼe ko ia ia ʼaē ka maʼuli anai.” (Mateo 24:13) Koia, ʼe maʼuhiga ai ke koutou kumi te Puleʼaga ʼo te ʼAtua ʼo koutou fakamuʼamuʼa ʼi tokotou maʼuli.—Mateo 6:25-34.

18. ʼI te hili ʼo te papitema, koteā te ʼu fakatuʼutuʼu ʼe tonu ke koutou fai?

¹⁸ Ke feala hakotou faʼa kātaki ʼi takotou tauhi kia Sehova, ʼe koutou fia fai anai he ʼu fakatuʼutuʼu fakalaumālie ʼo ʼuhiga mo koutou. Ko he fakatuʼutuʼu ʼe tau ke koutou tuputupu ai ʼi te ʼatamai mālama ʼo ʼuhiga mo te ʼAtua, ʼe ko te ako takitokotahi ʼo tana Folafola. Koutou fakatuʼutuʼu ke koutou lau te Tohi-Tapu ʼi te ʼaho fuli. (Pesalemo 1:1, 2) Koutou ʼolo tuʼumaʼu ki te ʼu fono faka Kilisitiano, heʼe koutou felāveʼi ai mo ni hahaʼi ʼe feala ke nātou fakaloto mālohiʼi koutou ʼi te faʼahi fakalaumālie. He koʼe koa la ʼe mole koutou fakatuʼutuʼu ke fai hakotou ʼu tali ʼi te ʼu fono ʼo te kokelekasio ʼo koutou vikiviki ai kia Sehova pea mo koutou faigaʼi ai ke koutou fakaloto mālohiʼi niʼihi? (Loma 1:11, 12) Ko te tahi fakatuʼutuʼu ʼe feala ke koutou fai, ko te hikihiki ʼo te lelei ʼo takotou ʼu faikole.—Luka 11:2-4.

19. Ko te ʼu kalitate fea ʼaē ʼe feala ke tokoni te laumālie maʼoniʼoni kia koutou ke koutou fakahā?

¹⁹ Kapau ʼe koutou maʼuli ʼo ʼalutahi mo te ʼuhiga ʼo tokotou papitema, ʼe ʼaoga ke koutou tokakaga tuʼumaʼu ki te ʼu meʼa ʼaē ʼe koutou fai, ʼo koutou tuku te laumālie maʼoniʼoni ʼo te ʼAtua ke ina fakatuputupu ia koutou, te ʼu faʼahiga kalitate ohage ko te ʼofa, te fiafia, te tokalelei, te kātaki fualoa, te finegaloʼofa, te agalelei, te tui, te agamālū, pea mo te loto lolomi. (Kalate 5:22, 23; 2 Petelo 3:11) Koutou manatuʼi, ʼe foaki e Sehova tona laumālie maʼoniʼoni ki tana kau kaugana faitotonu pea mo fakalogo ʼaē ʼe nātou kole te faʼahi ʼaia kia te ia. (Luka 11:13; Gāue 5:32) Koia ke koutou kole ki te ʼAtua tona laumālie pea ke koutou kole ki ai ke tokoni atu kia koutou ke koutou fakahā te ʼu kalitate ʼaē ʼe ina leleiʼia. ʼAki te temi, ko te ʼu faʼahiga kalitate ʼaia ʼe ʼiloga lelei anai ʼi takotou ʼu palalau pea mo takotou aga, ʼuhi ko takotou tali te laumālie ʼo te ʼAtua. ʼE moʼoni, ko tatou fuli ʼi te kokelekasio faka Kilisitiano ʼe tou faiga ke tou maʼu “te ʼuhigaʼi tagata foʼou” ke feala hatatou tatau mo Kilisito. (Kolose 3:9-14) ʼE tou felāveʼi fuli mo te ʼu fihifihia kehekehe ʼi tatatou fai te faʼahi ʼaia, ʼo mulimuli pe ki te fakaʼaluʼalu ʼo tatatou tuputupu ʼi te faʼahi fakalaumālie. ʼI tokotou ʼuhiga heʼe haohaoa, ʼe tonu ke koutou gāue kinakina ke koutou maʼu te ʼuhigaʼi tagata ʼaē ʼe tatau mo Kilisito. Kae ʼaua naʼa koutou lotovaivai, heʼe feala ke koutou fai te faʼahi ʼaia ʼaki te tokoni ʼa te ʼAtua.

20. Ko te ʼu faʼahi fea ʼaē ʼe feala ai hakotou faʼifaʼitaki kia Sesu ʼi te minisitelio?

²⁰ ʼI takotou ʼu fakatuʼutuʼu fakalaumālie, ʼe tonu ke koutou mulimuli fakalelei ki te faʼifaʼitaki lelei ʼa Sesu ʼo ʼuhiga mo te fiafia. (Hepeleo 12:1-3) Neʼe leleiʼia e Sesu tona minisitelio. Kapau ʼe koutou maʼu te pilivilesio ʼaē ko te kau ki te faka mafola ʼo te Puleʼaga, koutou tokakaga ke ʼaua naʼa liliu te faʼahi ʼaia ko he meʼa ʼe koutou fai ka mole kei ʼalu ai tokotou loto. Ohage ko Sesu, koutou faiga ke koutou maʼu te fiafia ʼi takotou fakahā ki niʼihi te Puleʼaga ʼo te ʼAtua. Koutou fakaʼaogaʼi te akonaki ʼe foaki atu e te kokelekasio moʼo tokoni kia koutou ke koutou liliu ko he tagata peʼe ko he fafine ʼe poto lelei ʼi te akoʼi ʼo te Tohi-Tapu ki te hahaʼi. Pea ke koutou ʼiloʼi papau ʼe feala ke foaki atu e Sehova te mālohi moʼo fakahoko ʼo tokotou minisitelio.—1 Kolonito 9:19-23.

21. (a) He koʼe ʼe tou ʼiloʼi ʼe maʼuhiga kia Sehova te hahaʼi faitotonu ʼaē kua papitema? (b) Koteā ʼaē ʼe hā ʼaki ai ʼe maʼuhiga te papitema ke feala ai hatatou hāo, ʼi te fakamāu ʼaē ka fakahoko e te ʼAtua ki te tuʼu agakovi ʼo te ʼu faʼahiga meʼa ʼaenī?

²¹ Ko he tahi kua ina foaki tona maʼuli ki te ʼAtua, ʼo papitema pea ʼe faiga ke ina muliʼi te faʼifaʼitaki faitotonu ʼa Sesu ʼe maʼuhiga ia ki te ʼAtua. ʼE vakaʼi e Sehova te loto ʼo te ʼu hahaʼi fuli, ʼaē ʼe lauʼi miliale, pea ʼe ina ʼiloʼi ʼe tahitahiga te maʼu ʼo te faʼahiga hahaʼi ʼaia. ʼE ina tokagaʼi ia nātou ohage ko he ʼu koloā, ko “he ʼu meʼa ʼaē ʼe manakoʼia.” (Asea 2:7) ʼE fakahā e te ʼu lea faka polofeta ʼo te Tohi-Tapu ʼe tokagaʼi e te ʼAtua te faʼahiga hahaʼi ʼaia ohage ko ni hahaʼi kua ʼosi fakaʼiloga, ke nātou hāo ʼi tana fakamāu ʼaē kua vave hoko ki te tuʼu agakovi ʼo te ʼu faʼahiga meʼa ʼaenī. (Esekiele 9:1-6; Malakia 3:16, 18) ʼE koutou kau koa ia nātou ʼaē ʼe “nātou loto ki te maʼuli heʼegata”? (Gāue 13:48) ʼE koutou lotomālohi koa ke koutou maʼu te fakaʼiloga ʼaē ʼe fai kia nātou ʼaē ʼe tauhi ki te ʼAtua? Ko te fakaʼiloga ʼaia ʼe kau ki ai te foaki ʼo tokotou maʼuli ki te ʼAtua pea mo te papitema, ʼaē ʼe maʼuhiga ki tokotou hāofaki.

22. Koteā te ʼu meʼa ʼaē ʼe fakatalitali kiai te “toe hahaʼi tokolahi”?

²² ʼI te ʼosi ʼo te Tulivio, neʼe hū ia Noe pea mo tona famili mai te aleka ki tuʼa, ʼo nātou maʼu he kele kua ʼosi fakamaʼa. ʼO feiā aipe ʼi te temi ʼaenī, “ko te toe hahaʼi tokolahi” ʼaē ʼe nātou maʼuliʼi te ʼatamai mālama ʼo ʼuhiga mo te ʼAtua ʼi tonatou maʼuli pea mo nātou maʼu te ʼofa ʼo Sehova, ʼe nātou maʼu te ʼamanaki ʼaē ko te maʼuli ʼi te fakaʼosi ʼo te tuʼu agakovi ʼo te ʼu faʼahiga meʼa ʼaenī, pea ʼe nātou maʼuʼuli anai ʼo heʼegata ʼi he kele kua ʼosi fakamaʼa ʼo talu ai. (Fakahā 7:9, 14) ʼE feafeaʼi anai koa te maʼuli ʼaia?

TE SIVI ʼO TOKOTOU ʼATAMAI MĀLAMA

ʼE loto ia Sehova ke koutou fakaʼaogaʼi feafeaʼi tokotou ʼatamai mālama ʼo ʼuhiga mo ia?

Koteā te ʼu meʼa ʼaoga ke fai ʼi muʼa ʼo te papitema?

He koʼe ko te papitema ʼe mole ko he fakaʼosi ʼaia ʼo te maʼuli faka Kilisitiano kae ko tona kamataʼaga?

E feafeaʼi hatatou maʼuli ʼo ʼalutahi mo te foaki ʼo totatou maʼuli ki te ʼAtua pea mo totatou papitema?

[Paki ʼo te pasina 172]

Neʼe kua foaki koa tokotou maʼuli ki te ʼAtua ʼi te faikole?

[Paki ʼo te pasina 174]

Koteā koa te ʼu meʼa ʼaē ʼe nātou tāʼofi koutou ke ʼaua naʼa koutou papitema?