ʼE Koutou Leleiʼia Moʼoni Koa Te ʼu Tapuakina ʼAē ʼe Foaki Mai e Sehova?
KO KENICHI, ko te tagata kua taʼu nimagofulu tupu, neʼe ʼalu ki te falemasi ʼo kumi he faitoʼo ki tona ihupeʼe. ʼI tana fakaʼaogaʼi te faitoʼo ʼaia, neʼe fua kovi ki tona sino, he neʼe laga ai te kili ʼi tona sino katoa. ʼE mahino ia, neʼe kamata lotolotolua ia Kenichi pe neʼe tokaga fakalelei koa te tōketā ki te ʼu meʼa ʼaē neʼe ʼaoga kia ia.
Ko ʼihi ʼe feala ke nātou manatu feiā ʼo ʼuhiga mo Sehova ʼAtua, ohage ko te manatu ʼa Kenichi ʼo ʼuhiga mo tana tōketā. ʼE nātou lotolotolua peʼe tokaga moʼoni koa te ʼAtua māfimāfi, ia Sehova, kia tatou takitokotahi. Logope la ʼe nātou fakamoʼoni, ko te ʼAtua ʼe agalelei, kae ʼe mole nātou tui papau peʼe tokaga moʼoni kia tatou takitokotahi. ʼE moʼoni tāfito te faʼahi ʼaia mokā hoko kia nātou he ʼu fihifihia, peʼe ʼahiʼahiʼi nātou ʼuhi ko tanatou maʼuliʼi te ʼu pelesepeto ʼo te Tohi-Tapu. ʼUhi ko tanatou mole maʼu ʼo te fakasiosio poto, ʼe nātou faka ʼuhigaʼi ai tonatou ʼu fihifihia ohage ko tona fai e Kenichi, ʼi tana sio ki te kili ʼaē neʼe malaga ʼi tona sino, ʼo nātou ʼui ʼe ko te hala ʼa te ʼAtua.—Tāʼaga Lea 19:3.
ʼE mole tonu ke tou fakatatau ia Sehova pea mo te tagata heʼe haohaoa. Ko te tagata, ʼe faka tuʼakoi tona poto pea mo tona ʼu fealagia. ʼE mole feala hana ʼiloʼi lelei pe koteā te meʼa ʼaē ʼe ʼaoga ki te hahaʼi, ohage ko te meʼa neʼe fai e te tōketā ʼa Kenichi. Kae ko Sehova, ʼe ina fakatokagaʼi ia meʼa fuli. ʼE lahi te ʼu lakaga ʼaē ʼe tokoni ai ia Sehova kia tatou, ka mole tou ʼiloʼi pe la neʼe ina fai te faʼahi ʼaia peʼe mole tou loto fakafetaʼi koteʼuhi ʼi te agamāhani, ʼe tou fakatokagaʼi tāfito te ʼu meʼa ʼaē ʼe mole tou maʼu, ka mole tou tokagaʼi te ʼu tapuakina lahi ʼaē ʼe tou maʼu. ʼAua naʼa tou foimo tukugakoviʼi ia Sehova ʼo ʼuhiga mo te ʼu fihifihia ʼaē ʼe hoko kia tatou, kae ʼe tonu ke tou faiga ke tou fakatokagaʼi te ʼu tapuakina ʼaē ʼe foaki mai e Sehova.
ʼO mulimuli ki te tohi ʼo te Webster’s Ninth New Collegiate Dictionary, ko he “tapuakina” ʼe faka ʼuhiga ki “he meʼa ʼe ina fakatupu manuʼia pea mo fakatupu fiafia.” ʼE koutou fakamoʼoni koa la ki te faʼahi ʼaia, tāfito la ʼo ʼuhiga mo te ʼu tapuakina ʼaē ʼe foaki mai e Sehova?
Ko Te Tāmai ʼe Mole Hona Fakatatau
Ka ʼui e he fafine, ʼe tokaga lelei tona ʼohoana ki te ʼu meʼa ʼaē ʼe ʼaoga ki tonā loto fale, ʼe ko tona faka ʼuhiga, ʼe tokaga lelei ki te ʼu meʼa ʼaē ʼe ʼaoga ki tona famili, ki te meʼa kai, mo te ʼapi, pea mo te ʼu mutuʼi meʼa, ke maʼuli fiafia te famili. E feafeaʼi te tokaga lelei ʼa Sehova ki te ʼu meʼa ʼaē ʼe ʼaoga kia tatou? Koutou fakatokagaʼi te Kele. ʼE vaha mamaʼo mo te laʼā ia kilometa e 150 000 000, pea neʼe fakafuafua fakalelei te vaha mamaʼo ʼaia ke ʼaua naʼa vevela fau peʼe momoko fau, kae ke maui mālie te maʼuli ʼi te kele. Neʼe toe fakafuafua lelei mo te fakafalele ʼo te kele, ke tupu ai te ʼu fasiga taʼu kehekehe ʼo maʼu ai te ʼu taʼukai lalahi. Koia, ʼe fafaga e te kele te ʼu hahaʼi e toko nima miliale tupu. ʼE hā mai ai, ʼe lelei ʼaupito te tokaga ʼa Sehova kia tatou!
Tahi ʼaē meʼa, ʼe fakapapau mai e te Tohi-Tapu kia tatou, ʼe tokaga moʼoni ia Sehova kia tatou takitokotahi pea mo te ʼu meʼa fuli ʼaē ʼe ʼaoga ki totatou maʼuli fiafia. Koutou fakakaukauʼi te faʼahi ʼaenī, ʼe ʼiloʼi e Sehova te ʼu higoa ʼo te ʼu fetuʼu fuli, pea ʼe mole he misi ʼe tō ifo ki te kele ka mole ina ʼiloʼi. (Isaia 40:26; Mateo 10:29-31) Koia, ʼe toe tokaga foki ki te ʼu hahaʼi ʼaē ʼe nātou ʼoʼofa kia te ia pea kua totogi nātou ʼaki te taʼataʼa maʼuhiga ʼo tona ʼAlo ʼofaina, ia Sesu Kilisito! (Gāue 20:28) ʼE tonu te ʼu palalau ʼaenī ʼa te tagata poto: “Ko te tapuakina ʼa Sehova—koʼena te meʼa ʼaē ʼe ina fakakoloaʼia, pea ʼe mole maʼu ai he ʼu mamahi.”—Tāʼaga Lea 10:22.
Ko He ʼu Tapuakina ʼe Nātou Fakakoloaʼia Tatou
ʼE tou maʼu te meʼa maʼuhiga ʼaupito pea ʼe tonu ke tou loto fakafetaʼi ʼo ʼuhiga mo te faʼahi ʼaia. Koteā te meʼa ʼaia? ʼE fakahā mai e te Tohi-Tapu ʼo ina ʼui fēnei: “ ʼE lelei te lao ʼo tou gutu kia te ʼau, ʼo lelei age ʼi te ʼu foʼi piesi aulo pea mo siliva ʼe lauʼi afe.” (Pesalemo 119:72; Tāʼaga Lea 8:10) Tatau aipe peʼe feafeaʼi te maʼuhiga ʼo te aulo, kae ʼe ko te lao ʼa Sehova ʼaē ʼe tonu ke tou holi tāfito kiai. ʼE tonu ke tou faka maʼuhigaʼi te ʼatamai mālama totonu ʼo tana lao, ʼo feiā mo te fakasiosio tonu pea mo te fakasiosio poto ʼaē ʼe foaki mai e Sehova kia nātou ʼaē ʼe nātou kumi fakamalotoloto te moʼoni. Ko te ʼu meʼa fuli ʼaia ʼe ko he puipui kia tatou, mo he tokoni ke tou kātakiʼi te ʼu ʼahiʼahi pea mo tou lava fakatokatoka te ʼu fihifihia, pea mo tou fiafia.
ʼE moʼoni te faʼahi ʼaia māʼiape la kia nātou liliki. Koutou fakatokagaʼi pe neʼe fakatokatoka feafeaʼi e te kiʼi taʼahine tona ʼu fihifihia ʼo mulimuli ki te ʼu lao ʼa Sehova. ʼE nofo ōvi te kiʼi taʼahine ko Akemi ki Tokio. Ko tana tāmai pea mo tana faʼe, neʼe nā maʼuliʼi te ʼu pelesepeto ʼo te Tohi-Tapu ʼo nā akoʼi ia ia, pea ʼaki tanā ʼu palalau pea mo tanā faʼifaʼitaki, neʼe nā tokoni ki tanā taʼahine ke ʼofa kia Sehova pea mo tona kāiga. ʼI tanā teuteu fakatomuʼa ki te ʼu fihifihia ʼaē ka hoko kia ia ʼi te faleako, neʼe nā fai ia meʼa fuli moʼo akoʼi fakalelei ia ia. Kae ʼi te temi ʼaē neʼe hū ai ia Akemi ki te faleako, neʼe ʼui e ʼihi tamaliki ʼo tana kalasi ʼe “kehe” ia ia mo nātou, he neʼe faikole ʼi muʼa ʼo tana kai pea neʼe mole kau ia ki te ʼu meʼa ʼaē neʼe mole ʼalutahi mo te Tohi-Tapu. Mole tuai, pea neʼe vāʼi ia ia e ʼihi tamaliki agamālohi, pea neʼe nātou puke ia ia ʼi te hili ako ʼo fepākiʼaki, mo mioʼi tona ʼu nima, pea mo fakalainoaʼi ia ia.
Ko te kiʼi taʼahine ko Akemi neʼe mole ina liufaki te kovi ʼaia, pea neʼe mole mataku ʼi muʼa ʼo nātou ʼaē neʼe nātou gaohi koviʼi ia ia. Kae neʼe faiga ia ke ina maʼuliʼi te ʼu meʼa ʼaē neʼe ina ako. ʼI te lelei ʼo tana aga pea mo tona lototoʼa, neʼe tupu ai tona fakaʼapaʼapaʼi e te tahi ʼu tamaliki ʼo tana kalasi. Neʼe nātou tala te ʼu meʼa ʼaia ki tonatou faiako, pea talu mai te ʼaho ʼaia, neʼe mole toe gaohi koviʼi ia Akemi ʼi te faleako.
Koteā te meʼa ʼaē neʼe tokoni kia Akemi ke ina kātakiʼi te ʼaluʼaga faigataʼa ʼaia? Neʼe ko te ʼatamai mālama totonu, mo te fakasiosio tonu, pea mo te poto fakaʼatua ʼaē neʼe akoʼi age ki ai e tana ʼu mātuʼa. Neʼe kua ina ʼiloʼi lelei te loto faʼa kātaki ʼa Sesu, pea neʼe fia mulimuli ki tana faʼifaʼitaki. ʼAki te Tohi-Tapu, neʼe mahino kia ia, ko ʼihi hahaʼi ʼe nātou fai he ʼu meʼa kovi heʼe kei nātou nonofo ʼi te fakapōʼuli, pea neʼe ko he fakaloto mālohi ʼaia kia ia ke fehiʼa ki te ʼu aga ʼaē ʼe fai e te hahaʼi ʼaia, ka mole fehiʼa ki te hahaʼi totonu.—Luka 23:34; Loma 12:9, 17-21.
ʼE mahino ia, ʼe mole loto anai e te ʼu mātuʼa ke gaohi koviʼi pea mo manukinukiʼi tanatou ʼu tamaliki. Kae koutou fakakaukauʼi age muʼa te fiafia ʼa te ʼu mātuʼa ʼa Akemi ʼi tanā ʼiloʼi te ʼu meʼa fuli ʼaē neʼe hoko. Ko te taʼi tamaliki ʼaia ʼe ko he tapuakina mai ia Sehova.—Pesalemo 127:3; 1 Petelo 1:6, 7.
Tou Falala Kia Sehova ʼAki He Loto Faʼa Kātaki
Kae ʼi muʼa ʼo takotou maʼu te tapuakina ʼa Sehova, ʼe tonu ʼi ʼihi temi ke koutou talitali ki te temi ʼaē ka ina fai ai te faʼahi ʼaia. ʼE ʼiloʼi e Sehova tokotou ʼaluʼaga, pea ʼe ina foaki te ʼu meʼa ʼaē ʼe ʼaoga kia koutou ʼi te temi ʼaē ʼe ʼaoga tonu ai kia koutou. (Pesalemo 145:16; Tagata Tānaki 3:1; Sake 1:17) E lagi koutou leleiʼia te ʼu fuaʼi ʼakau, kae ʼe feafeaʼi anai mo kapau ʼe foaki atu e he tahi he fuaʼi ʼakau ʼe kei mumui? Tatau aipe pe koteā te fuaʼi ʼakau ʼaia ʼaē ʼe foaki atu, pe ko he foʼi ʼapo, pe ko he foʼi moli, pe ko he tahi age fuaʼi ʼakau, kae ʼe koutou loto anai ke momoho, mo huhuʼa, pea mo malie. ʼE toe feiā pe mo Sehova, ʼe ina foaki atu te ʼu meʼa ʼaē ʼe ʼaoga kia koutou ʼi tona temi totonu—ʼo mole ina foaki fakatomuʼa fau peʼe tauhala fau.
Koutou manatuʼi te meʼa ʼaē neʼe hoko kia Sosefo. Logope la neʼe mole ina fai he meʼa ʼe kovi, kae neʼe pilisoniʼi ia ia e te kau Esipito. Ko te tahi tagata neʼe nā pilisoni fakatahi, ko te tagata ʼaē neʼe tokaga ki te meʼa ʼinu ʼa Falaone, neʼe ina fakaʼamu ke faka ʼāteaina ia ia pea neʼe ina fakapapau age kia Sosefo, ʼe ina poapoaki anai ʼo ʼuhiga mo ia kia Falaone. Kae ʼi tana ʼosi mavae ʼi te fale pilisoni, neʼe mole ina toe manatuʼi ia Sosefo. Neʼe hage kua līʼakina ia Sosefo. Kae hili kiai taʼu e lua, pea faka ʼāteaina ia ia mai te fale pilisoni pea neʼe liliu ko te lua pule ʼo Esipito. Neʼe mole tuʼania ia Sosefo, kae neʼe falala kia Sehova ʼaki he loto faʼa kātaki. ʼI tana fai te faʼahi ʼaia, neʼe tapuakina ia ia ʼo feala tana hāofaki ia te kau Iselaelite pea mo te kau Esipito.—Senesi 39:1–41:57.
Ko Masashi neʼe ko te tagata ʼāfea ʼi te potu tokelau ʼo Saponia. Neʼe mole nofo ia ʼi te fale pilisoni, kae neʼe tonu ke falala kia Sehova. Koteā tona tupuʼaga? Talu mai te fakatuʼutuʼu ʼi Saponia ʼo te Ako ʼaē ʼe ina Teuteuʼi ki te Minisitelio, ʼaē ʼe akoʼi ai te ʼu minisi faka Kilisitiano faiva, neʼe fakaʼamu mālohi ke kau ki te ako ʼaia. Neʼe faikole fakamalotoloto ke kau ki te pilivilesio ʼaia. Neʼe fakaafe te tēhina ʼaē neʼe kaugā pionie mo ia, kae ko Masashi, logope la tona lotomālohi ke kau kiai, neʼe mole fakaafe ia. Neʼe lotomamahi ʼaupito.
Kae neʼe ina fai he ʼu fakatuʼutuʼu moʼo tauʼi te mamahi ʼaē neʼe ina logoʼi ʼi tona loto. Neʼe ina ako te Tohi-Tapu pea mo te ʼu tohi ʼaē neʼe tā e te Sosiete Watch Tower, ʼo ina vakaʼi tāfito te ʼu kapite ʼaē ʼo ʼuhiga mo te agavaivai pea mo te lolomi ʼo te ʼu meʼa ʼo te loto. Neʼe ina fetogi ai tana manatu, pea neʼe toe ʼāsili tona fiafia ʼi tana gāue pionie. ʼOsi ʼaia, pea neʼe ina maʼu te pepa ʼaē ʼe fakaafe ai ki te ako ʼaia, logope la neʼe mole kei ʼamanaki ʼe fakaafe anai.
Neʼe toe lahi age te fua lelei ʼo te ako ʼaia kia ia he neʼe kua ina maʼu te ʼu kalitate ohage ko te faʼa kātaki pea mo te agavaivai. Ki muli age, neʼe maʼu e Masashi te pilivilesio ʼaē ke liliu ko he tagata taupau feʼaluʼaki, ʼo ina ʼaʼahi tona ʼu tēhina. Ei, neʼe ʼiloʼi e Sehova te ʼu meʼa ʼaē neʼe ʼaoga kia Masashi, pea neʼe ina foaki age kia ia ʼi te lakaga ʼaē neʼe ʼaoga tonu ki ai.
Koutou Kumi Te ʼu Tapuakina ʼa Sehova
Koia, ko Sehova ʼe mole hage ko te tōketā ʼaē neʼe tou talanoa ki ai. Logope la ʼe mole feala tuʼumaʼu hatatou fakatokagaʼi te tokaga ʼa Sehova kia tatou, kae ʼe tou maʼu tona ʼofa ʼi te ʼu ʼaluʼaga kehekehe—ʼi te ʼu lakaga pea mo te ʼu ʼaluʼaga ʼe feala ke fua lelei kia tatou. Koia, koutou haga kumi tana ʼu tapuakina. Koutou manatuʼi, kua lahi te ʼu meʼa ʼaē kua tonu ai ke koutou loto fakafetaʼi kia te ia. Kua tapuakina koutou ʼaki te ʼu meʼa fuli ʼaē ʼe ʼaoga moʼo fakahoko atu tokotou maʼuli ʼi te kele. Neʼe foaki atu kia koutou te ʼatamai mālama ʼo ʼuhiga mo Sehova pea mo tona ʼu ala haohaoa. Kua koutou maʼu te fakasiosio tonu, pea mo te fakasiosio poto. Ko te ʼu meʼa fuli ʼaia ʼe fakatupu fiafia kia koutou.
Ke feala hakotou mālama lelei age ki te ʼu tapuakina ʼa Sehova, koutou haga ako tuʼumaʼu te Tohi-Tapu. Koutou faikole kia Sehova ke koutou mahino pea mo koutou maʼuliʼi te ʼu akonaki maʼuhiga ʼo tana Folafola. ʼE koutou liliu anai ʼo koloaʼia, pea ʼe koutou maʼu fuli anai te ʼu meʼa ʼaē ʼe ʼaoga kia koutou. Ei, ʼaki te ʼu meʼa ʼaia, ʼe koutou maʼuli manuʼia anai ʼi te temi ʼaenī, pea mo koutou maʼu te maʼuli heʼegata ʼi te mālama foʼou ʼaē ka hoko mai.—Soane 10:10; 1 Timoteo 4:8, 9.
[Paki ʼo te pasina 23]
Ko te tapuakina ʼa Sehova ʼe maʼuhiga age ia ʼi te aulo