Koutou Fakaʼaogaʼi Lelei Tokotou Maʼuli
KO TE tāmai neʼe takoto ʼi tona moeʼaga ʼi fale, pea neʼe mate māmālie ai ʼi tona kosea. Ko tona foha neʼe ina fakatokatoka te ʼu meʼa gāue papa ʼo tana tāmai, ʼi te fale gāue. ʼI tana puke te ʼu meʼa gāue ʼaia, neʼe ina manatuʼi te ʼu meʼa taulekaleka ʼaē neʼe fai ʼaki e tana tāmai. Logope la neʼe ōvi te fale gāue ki te ʼapi, kae neʼe ina ʼiloʼi papau ʼe mole toe hū anai kiai tana tāmai, pea ʼe mole ina toe fakaʼaogaʼi anai te ʼu meʼa gāue ʼaē neʼe faiva ʼi tona fakaʼaogaʼi. Neʼe kua ʼosi te temi ʼaia.
Neʼe fakakaukauʼi e te foha te vaega ʼo Tagata Tānaki 9:10: “Ko meʼa fuli ʼaē ʼe maʼu e tou nima ke ina fai, fai koe ʼaki tou mālohi, heʼe mole he gāue, he fakatuʼutuʼu, he mālama, he poto ʼi te Seole, te potu ʼaē ʼe ke ʼalu kiai.” Neʼe ina ʼiloʼi lelei te vaega ʼaia. Neʼe kua tuʼa lahi tana fakaʼaogaʼi te vaega ʼaia moʼo akoʼi ki te hahaʼi te moʼoni faka Tohi-Tapu ʼaē ʼe ina ʼui, ʼe mole hoko he meʼa ʼi te ʼosi mate. ʼI te temi nei, kua malave mālohi ki tona loto te fakamatala ʼa Salomone, ʼaē ʼe tonu ke tou maʼuli pea ke tou fakafiafia katoa lolotoga te temi ʼaē ʼe feala ke tou fai ai te faʼahi ʼaia, heʼe hoko mai anai te temi ʼaē ʼe mole kei feala ai hatatou fai ia te faʼahi ʼaia.
Koutou Leleiʼia Te Maʼuli
ʼI te tohi katoa ʼo Tagata Tānaki, neʼe fakaloto mālohiʼi e te Hau poto ko Salomone te hahaʼi ʼaē ʼe nātou lau tana tohi, ke nātou fiafia ʼi tonatou maʼuli. Ohage la ʼi te kapite 3, ʼe ina ʼui fēnei: “Kua ʼau ʼiloʼi ʼe mole ʼi ai he meʼa ʼe lelei age maʼa nātou ʼi hanatou fakafiafia pea mo hanatou fai te meʼa ʼaē ʼe lelei lolotoga tonatou maʼuli; pea ke kai foki te tagata fuli pe, ʼio ke ʼinu pea mo mamata ki te lelei ʼo tana gāue kinakina katoa. ʼE ko te meʼa ʼofa ia ʼo te ʼAtua.”—Tagata Tānaki 3:12, 13.
ʼAki te laumālie ʼo te ʼAtua, neʼe tohi liuliuga te manatu ʼaia e Salomone: “Koʼeni! Ko te meʼa ʼaē ʼe lelei tokotahi ʼaē neʼe ʼau sio kiai, pea ʼe matalelei, ke kai te tagata pea mo ʼinu, pea ke sio ki te lelei ʼo tana gāue kinakina katoa ʼaia ʼaē ʼe gāue kinakina ai ʼi te laʼā ʼi te lolotoga ʼo te ʼu ʼaho ʼo tona maʼuli ʼaē neʼe foaki age ki ai e te ʼAtua moʼoni, heʼe ko tona vahe ʼaia.”—Tagata Tānaki 5:18.
ʼO toe feiā pe, ʼe ina uga fēnei te kau tūpulaga: “Fakafiafia, talavou, ʼi tou temi tūpulaga, pea ke fai e tou loto te meʼa ʼaē ʼe lelei kia te koe ʼi tou temi talavou [peʼe ʼi tou temi finemui], pea ke haʼele ʼi te ʼu ala ʼo tou loto pea mo te ʼu meʼa ʼaē ʼe sio kiai tou ʼu mata.” (Tagata Tānaki 11:9a) ʼI meʼa lelei foki te fakafiafia katoa ʼi te mālohi ʼo te temi tūpulaga!—Tāʼaga Lea 20:29.
‘Koutou Manatuʼi Tokotou Tupuʼaga’
ʼE mahino ia, neʼe mole fia ʼui e Salomone ʼe ko he agapoto ke tou kumi ia meʼa fuli ʼaē ʼe leleiʼia e totatou loto peʼe ʼotatou mata. (Vakaʼi ia 1 Soane 2:16.) ʼE hā lelei te faʼahi ʼaia ʼi te ʼu meʼa ʼaē neʼe ina tohi ki muli age: “Kae ke ke ʼiloʼi papau ʼo ʼuhiga mo te ʼu meʼa fuli ʼaia [te ʼu meʼa ʼaē ʼe ke holi kiai] ʼe fakamāuʼi anai koe e te ʼAtua moʼoni.” (Tagata Tānaki 11:9b) Tatau aipe peʼe tou taʼu fia, kae ʼe tonu ke tou manatuʼi ʼe vakaʼi e te ʼAtua te ʼu meʼa ʼaē ʼe tou fai ʼi totatou maʼuli, pea ʼe ina fakamāuʼi anai tatou ʼo mulimuli ki te ʼu meʼa ʼaia.
ʼE ko he agavale hatatou manatu ʼe feala ke tou maʼuʼuli maʼa tatou totonu, pea mo tou tuku ki totatou temi matuʼa te temi ʼaē ʼe tonu ai ke tou tauhi ki te ʼAtua! ʼE feala ke tou mamate fakafokifā. Tatau aipe peʼe mole hoko te faʼahi ʼaia, kae ʼe mole liliu ʼo faigafua te tauhi ki te ʼAtua ʼi te temi matuʼa. ʼI tana ʼiloʼi te faʼahi ʼaia, ʼe tohi fēnei e Salomone: “Koia manatuʼi tou Tupuʼaga lahi ʼi tou temi tūpulaga, ʼi muʼa ʼo te hoko mai ʼo te ʼu ʼaho faigataʼa, peʼe ko te ʼu taʼu ʼaē ka ke ʼui ai: ‘Neʼe mole ʼau fiafia ʼi te ʼu taʼu ʼaia.’ ”—Tagata Tānaki 12:1.
Ko te temi matuʼa ʼe ko he temi ʼe kita maʼuli kinakina ai. ʼI hona ʼuhiga fakatātā, ʼe fakamatala e Salomone te ʼu meʼa ʼaē ʼe hoko ki te sino. Ka matuʼa he tahi, pea ʼe tete tona ʼu nima, kua vaivai tona ʼu vaʼe, pea ʼe tō tona ʼu nifo. ʼE hihina tona ʼulu pea ʼe maʼofa. ʼE ʼala ake ʼi te tatagi ʼo te ʼu manulele, heʼe mole moe lelei. Kua vaivai fuli te ʼu koga ʼo tona sino—tona ʼu mata, tona ʼu taliga, tona ʼu nima, tona ihu pea mo tona gutu. ʼI te kua vaivai ʼo tona sino, koia ʼe tuʼania naʼa tūkia, pea ʼe ina tuʼaniaʼi te tahi ʼu “meʼa fakamataku” ʼi te ʼu ala. Pea moʼo fakaʼosi, ʼe mate te tagata ʼaia.—Tagata Tānaki 12:2-7.
ʼE lahi te ʼu faigataʼaʼia ʼi te temi matuʼa, tāfito la kia nātou ʼaē neʼe mole nātou ‘manatuʼi tonatou Tupuʼaga Lahi’ lolotoga tonatou temi tūpulaga. Koteʼuhi neʼe mole nātou fakaʼaogaʼi lelei tonatou maʼuli, koia ʼe mole nātou ‘fakafiafia’ ʼi tonatou temi matutuʼa. Tahi ʼaē meʼa, ko te faʼahiga maʼuli ʼaē ʼe mole ina faka maʼuhigaʼi te ʼAtua, ʼe feala ke ina hilifaki he tahi ʼu fihifihia pea mo he ʼu mamahi ki te temi matuʼa. (Tāʼaga Lea 5:3-11) Meʼa fakaʼofaʼofa foki, he ko te hahaʼi ʼaia ʼi tanatou fakakaukauʼi te ka haʼu, ʼe nātou manatu pe nātou ki te mate.
Te Fakafiafia ʼi Te Temi Matuʼa
Kae ʼe mole faka ʼuhiga leva ʼe mole feala ke fiafia te hahaʼi matutuʼa ʼi tonatou maʼuli. ʼI te Tohi-Tapu, ko “te loaloaga ʼo te ʼu ʼaho pea mo te ʼu taʼu ʼo te maʼuli” ʼe toe pipiki ki te tapuakina ʼa te ʼAtua. (Tāʼaga Lea 3:1, 2) Neʼe ʼui e Sehova ki tona kaumeʼa ko Apalahamo: “Pea ko koe, . . . ʼe tanu anai koe ʼi tou temi matuʼa.” (Senesi 15:15) Logope la te ʼu faigataʼaʼia ʼo te temi matuʼa, kae neʼe maʼu e Apalahamo te tokalelei pea mo te loto fīmālie ʼi tana kua matuʼa, he neʼe ina ʼiloʼi neʼe ina fakaʼaogaʼi tona maʼuli moʼo tauhi kia Sehova. Tahi ʼaē meʼa, neʼe tui mālohi pea mo fakatalitali ki te “kolo ʼaē ʼe ʼi ai hona ʼu tafitoʼaga moʼoni,” te Puleʼaga ʼa te ʼAtua. (Hepeleo 11:10) Koia, neʼe mate “matuʼa pea mo fiafia.”—Senesi 25:8.
Neʼe fai e Salomone te fakaloto mālohi ʼaenī: “Kapau ʼe maʼuli he tagata lolotoga ni ʼu taʼu, pea ke fakafiafia ʼi te ʼu taʼu fuli ʼaia.” (Tagata Tānaki 11:8) Peʼe tou tūpulaga peʼe tou matutuʼa, ko te fiafia moʼoni ʼe pipiki ki tatatou felogoi mo te ʼAtua.
Neʼe fakakaukauʼi te ʼu meʼa ʼaia e te tūpulaga ʼi te fale gāue ʼi tana fakatokatoka te ʼu meʼa gāue ʼo tana tāmai. Neʼe ina manatuʼi te hahaʼi fuli ʼaē ʼe ina ʼiloʼi, ʼe nātou faiga ke nātou fakaʼaogaʼi lelei tonatou maʼuli kae ʼe mole nātou fiafia heʼe mole nātou felogoi mo tonatou Tupuʼaga. ʼI tana ʼosi fakaloto mālohiʼi tatou ke tou fakafiafia ʼi totatou maʼuli, neʼe lelei te ʼu palalau fakanounou ʼaē neʼe fai e Salomone ʼo ʼuhiga mo te ʼu faʼahi ʼaia: “Ko te manatu fakaʼosi ʼo ʼuhiga mo te faʼahi ʼaia, mai tona ʼaluʼaga ʼaē kua tou fagono kia meʼa fuli: Manavasiʼi ki te ʼAtua moʼoni pea mo taupau tana ʼu fakatotonu. He koʼena te maʼua katoa ʼo te tagata”!—Tagata Tānaki 12:13.