Ko He Gāue ʼe Fakamaʼua Kiai Te Agavaivai
1 Ko te Folafola ʼa te ʼAtua ʼe ina tokoniʼi tatou ke tou “agavaivai, ke ʼaua naʼa tou liufaki te kovi ʼaki te kovi . . . kae [ke tou] tapuakiʼi.” (1 Pet. 3:8, 9, MN ) ʼE mahino ia, ko te tokoni ʼaia ʼe ʼaoga ki te gāue fai faka mafola. Ei, ko te minisitelio faka Kilisitiano, ʼe feala ke ʼahiʼahi ai totatou agavaivai.
2 Ko te agavaivai ʼe ko he kalitate ʼe tokoni mai ke tou kātakiʼi te ʼu ʼaluʼaga faigataʼa. Ka tou fai faka mafola, ʼe tou palalau mo he ʼu hahaʼi neʼe mole nātou kole mai ke tou ʼolo age, pea ʼe tou ʼiloʼi ko ʼihi ʼe mole nātou tali lelei anai tatou. ʼE tonu ke tou agavaivai mokā tali feiāʼi tatou. ʼI te kolo neʼe faigataʼa ʼaupito ai te gāue, neʼe fai faka mafola te ʼu tuagaʼane ʼi te ʼu ʼapi ʼi te ʼaho fuli lolotoga taʼu e lua, kae neʼe mole he tahi neʼe ina tali lelei nāua! Kae neʼe nā kātaki aipe, pea ia ʼaho nei ʼe tuʼu ʼi te kolo ʼaia te ʼu kokelekasio e lua.
3 Tou Kātakiʼi Te Tali Koviʼi: Ko te agavaivai ʼe tokoni mai ke tou faʼifaʼitaki kia Sesu, mokā agakovi mai te hahaʼi, pea mokā mole nātou fakaʼapaʼapa. (1 Pet. 2:21-23) ʼI te tahi ʼapi, neʼe ʼi ai te tuagaʼane neʼe tauveleʼi, ʼuluaki e te fafine ʼo te ʼapi pea fai feiā mo tona ʼohoana, ʼo nā kapu ia ia ke ʼalu. Neʼe malimali pe te tuagaʼane, pea ina ʼui age ʼe ina fakaʼamu ke nātou toe fai palalau ʼi he tahi temi. Neʼe malave ʼaupito ki te taumatuʼa, ʼo nā fakalogo ai ki te tahi tuagaʼane neʼe haʼu ʼo fai faka mafola kia nāua, pea nā tali te fakaafe ke nā ʼolo ki te fono ʼi te Fale ʼo Te Puleʼaga. Ko te tuagaʼane ʼaē neʼe kapu e te taumatuʼa ʼaia, neʼe kau ʼi te fono ʼaia pea neʼe ʼalu ʼo tali kāiga kia nāua, pea mo toe fai fagonogono kia nāua. ʼO toe feiā mo tatou, “ ʼaki he agamālū pea mo he fakaʼapaʼapa lahi,” ʼe feala ke tou fakamalū te ʼita ʼo te hahaʼi ʼaē ʼe mole nātou tali lelei tatou.—1 Pet. 3:15, MN; Taag. 25:15.
4 ʼAua Naʼa Tou Fiatuʼu ʼi Tatatou ʼu Palalau: Ko tatatou mālama ki te Tohi-Tapu, ʼe mole ina fakagafua mai ke tou fakamālaloʼi te hahaʼi, peʼe tou fakalainoaʼi nātou ʼaki tatatou ʼu palalau. (Soa. 7:49) Ko te Folafola ʼa te ʼAtua ʼe ina tokoniʼi tatou ‘ke ʼaua naʼa tou laukovi ki he tahi.’ (Tito 3:2) Kapau ʼe tou loto agavaivai, ohage ko Sesu, ʼe tou fakafimālieʼi te hahaʼi. (Mat. 11:28, 29) ʼE fia logo te hahaʼi mokā tou agavaivai.
5 Ei, ko te agavaivai ʼe tokoni mai ke tou faʼa kātaki ʼi te ʼu telituale ʼaē ʼe faigataʼa. ʼE feala ke ina fakamalū te ʼita ʼo te hahaʼi ʼaē ʼe mole fia logo, pea mo tupu ai he fia logo ʼa ʼihi hahaʼi ki te logo ʼo te Puleʼaga. Kae tāfito, ʼe fakafiafia ai ia Sehova, ʼaē “ ʼe ina foaki tona ʼofa makehe ki te kau agavaivai.”—1 Pet. 5:5, MN.