Te ʼOfa—Ko Te Kalavī ʼo He Minisitelio ʼe Fua
1 “Omai kia te au, . . . pea e au fakafimalieʼi anai koutou.” (Mat. 11:28) Neʼe hā ia te ʼofa lahi ʼo Sesu ki te hahaʼi ʼaki te ʼu taʼi palalau mālie ʼaia. Pea ʼi totatou ʼuhiga minisi Kilisitiano, ʼe tou fia faʼifaʼitakiʼi ia Sesu, ʼo tou fakahā totatou ʼofa ki te hahaʼi ʼaē kua gaʼegagaʼe ʼi he mālama ʼe mole maʼu ai te ʼofa. ʼE tou lava fakahā feafeaʼi totatou ʼofa ki te hahaʼi mokā tou fai faka mafola?
2 ʼI Tatatou ʼu Palalau: Ko te ʼofa ʼo Sesu ki te hahaʼi, neʼe ina uga ia ia ke ina fakaʼaogaʼi te ʼu faigamālie fuli moʼo fakahā ia te logo lelei. (Soa. 4:7-14) Ko te ʼofa ʼe tokoni mai anai ke ʼaua naʼa tou lotolotolua ʼi te fagonogono faigamālie. Ko te kiʼi taʼahine e taʼu ono neʼe ina fai te fagonogono ki te fafine neʼe heka ʼi ʼona tafa ʼi te fale talitali mahaki. Koteā ʼaē neʼe tupu ai tana fagonogono ki te fafine? Neʼe ina fakamahino fēnei: “Neʼe ʼiloga mai neʼe ʼaoga ke ʼiloʼi e te fafine ia Sehova.”
3 ʼE tou lava fakahā tatatou tokaga ʼaē ki te hahaʼi, ʼaki hata malimali fakamālotoloto pea mo leʼo faka kaumeʼa. Kapau ʼe tou fakalogo lelei ki te ʼu palalau ʼa te hahaʼi, mo tou lotomahino ki te ʼu meʼa ʼaē ʼe natou hoha kiai, pea mo tou fakahā he tokaga moʼoni, pea ʼe tou toe fakahā ai totatou ʼofa kiā nātou. (Taag. 15:23) Kā tou faʼifaʼitakiʼi ia Sesu, ʼe tonu ke tou faka maʼuhigaʼi ia te logo fakaloto mālohi ʼo te Puleʼaga pea mo te ʼofa lahi ʼo Sehova ki te hahaʼi.—Mat. 24:14; Luka 4:18.
4 ʼI Tatatou ʼu Gāue: Neʼe fakahā e Sesu ʼi tana ʼu gāue kehekehe ia tana tokagaʼi te ʼu meʼa ʼaē ʼe ʼaoga ki te hahaʼi. (Mat. 15:32) ʼE feala foki mo tātou ke tou maʼu he ʼu faigamālie moʼo fai he ʼu gāue ʼofa mokā tou faka mafola ʼi te minisitelio. Neʼe fakatokagaʼi e te tuagaʼane te faiga mālohi ʼa te fafine ke mahino ki te ʼu palalau ʼi te telefoni. Neʼe tokoni totatou tuagaʼane ki te fafine, ʼo ina fakaliliu age te ʼu palalau ʼo ia ʼaē neʼe telefoni. ʼAki te tokaga ʼofa ʼaia neʼe feala ai ke kamata ia te fai palalau faka Tohi-Tapu, ʼo tupu ai te tali e te fafine ke fai tana ako Tohi-Tapu. ʼI te tahi ʼaluʼaga, ko te tehina ʼi tana toe liliu ki tana ʼaʼahi, neʼe ina maʼu atu te tagata ʼe kinakina, he neʼe ina fata ki tona muʼa matapā ia te foʼi sofa. ʼI tana ʼosi tokoni age ki te tagata, neʼe feala leva ki te tehina ke heka ki te foʼi sofa ʼaē neʼe tokoni ki tona fata, pea mo kamata te ako Tohi-Tapu mo te tagata ʼaē neʼe loto fakafetaʼi.
5 ʼE tou fakahā ʼi tatatou kau ki te minisitelio ia totatou ʼofa ʼaē ki te ʼAtua pea mo totatou kāiga. (Mat. 22:36-40) Kapau ʼe tou fakahā totatou ʼofa ʼi tatatou ʼu palalau pea mo tatatou ʼu gāue, pea ʼe fakamoʼoni anai te hahaʼi fakamālotoloto ʼe tou maʼu ia te moʼoni.