“Ko Te Poto Neʼe Hā Mai Ia ʼe Tonu ʼAki Tana ʼu Gāue”
1. Koteā te manatu ʼa ʼihi ʼo ʼuhiga mo tatatou gāue?
1 ʼI ʼihi temi ʼe tali koviʼi tātou e te hahaʼi heʼe natou mahino hala ki te gāue ʼaē ʼe tou fai, pe neʼe hala te ʼu logo ʼaē neʼe fakahā age ʼo ʼuhiga mo te kau Fakamoʼoni ʼa Sehova. Lagi natou manatu fēia ʼuhi ko te ʼu meʼa ʼaē neʼe natou logo mo sio kiai ʼi te ʼu tala logo. ʼI ʼihi koga meʼa, kua lau ko tātou ko he “magaʼi lotu fakatupu tuʼutāmaki.” ʼE tonu ke tou tali feafeaʼi mokā fai mai te ʼu taʼi fasituʼu ʼaia?
2. Koteā ʼaē kā tokoni mai ke mole tou lotovaivai mokā fai mai he ʼu fasituʼu kiā tātou?
2 Tou Taupau He Manatu ʼe Lelei: ʼI te ʼuluaki sēkulō, ko te hahaʼi neʼe natou mahino hala peʼe natou palalau kovi kiā Sesu pea mo te tahi ʼu kaugana ʼa Sehova. (Gāue 28:22) Kae neʼe mole ufiufi Sesu pea mo te tahi ʼu kaugana ʼi tanatou minisitelio ʼuhi ko te ʼu fasituʼu ʼaia. Neʼe ʼui fēnei e Sesu: “Ko te poto neʼe hā mai ia ʼe tonu ʼaki tana ʼu gāue.” (Mat. 11:18, 19) Neʼe hoko atu tana faʼafai ʼi te fakahoko ʼo te finegalo ʼo tana Tamai, he neʼe falala ia ko te hahaʼi loto fakamālotoloto ʼe natou mahino anai ki te maʼuhiga ʼo te logo lelei. ʼE mole tou lotovaivai anai mo kapau ʼe tou manatuʼi neʼe felāveʼi te ʼAlo totonu ʼo te ʼAtua mo te taʼi aga ʼaia ʼa te hahaʼi.
3. He koʼē ʼe mole tonu ke tou punamaʼuli ki te ʼu palalau kovi pea mo te fakafeagai ʼaē ʼe fai mai kiā tātou?
3 Neʼe ʼui e Sesu ʼe fehiʼa anai ia te mālamanei ki tana ʼu tisipulo ohagē pē ko tana fehiʼa ʼaē kiā te ia. (Soa. 15:18-20) Koia, ʼe mole tonu ke tou punamaʼuli ki te ʼu palalau kovi pea mo te fakafeagai ʼaē ʼe hoko iā ʼaho nei. ʼI tona fakahagatonu, ʼi te ʼu ʼaho fakamuli pea ʼi te ʼāsili lahi ʼo te ʼita ʼo Satana, ʼe tonu ia ke lahi age te fai mai ʼo he ʼu palalau kovi pea mo te fakafeagai ʼa te hahaʼi. (Fakh. 12:12) ʼE tou fiafia heʼe fakaʼiloga ʼaki te ʼu meʼa ʼaia te kua vave fakaʼauha ʼo te mālama ʼa Satana.
4. Kapau ʼe palalau kovi he tahi ki te logo lelei, ʼe tonu ke tou tali feafeaʼi ki ai?
4 Tou Tali ʼAki He Agalelei: Kā palalau kovi mai he tahi, ʼe tonu ke tou tali tuʼumaʼu ʼaki he agalelei pea mo he agamalū. (Taag. 15:1; Kol. 4:5, 6) Kapau ko he ʼaluʼaga ʼe fealagia, pea ʼe tou lava fakamahino age ki he tahi ʼe fakamālotoloto, ʼe lahi te ʼu loi ʼe fai ʼo ʼuhiga mo te kau Fakamoʼoni ʼa Sehova peʼe tou fehuʼi age pe koʼē ʼe manatu fēia. Ko tatatou tali ʼaki he agamalū ʼe feala ai ke ina fakakaukauʼi ia te ʼu meʼa ʼaē neʼe logo kiai ʼo ʼuhiga mo te kau Fakamoʼoni ʼa Sehova, pea mo ina tali anai he Fakamoʼoni ʼe toe liliu age kiō ia. Kae kapau ʼe ʼita lahi, ʼe lagi lelei age ke tou mavae mai ai. ʼE feala ke tou tui papau, tatau aipē pe koteā te manatu ʼa te hahaʼi ʼo ʼuhiga mo tātou, kae ʼe maʼuhiga kiā Sehova tatatou minisitelio.—Isa. 52:7.